Informasaun atu uza hamutuk livru Moris Kristaun no Haklaken
4-10 SETEMBRU
Keʼe no hetan buat murak husi Bíblia
it-2 p. 467 par. 4
Naran
Ema Izraél hafoʼer Maromak nia naran tanba nuʼudar Maromak nia povu sira la moris tuir Maromak nia morál neʼebé loos. (Ezequiel [Yehezkiel] 43:8; Amós 2:7) Hodi nuneʼe mak Maromak fó kastigu tanba sira-nia sala, no neʼe halo nasaun seluk koʼalia aat kona-ba Maromak nia naran. (Kompara Salmo [Mazmur] 74:10, 18; Isaías [Yesaya] 52:5.) Nasaun sira-neʼe la hatene katak kastigu neʼebé Jeová fó ba ema Izraél, tuir loloos atu hanorin sira, maibé sira hanoin sala katak Jeová la iha kbiit atu proteje ninia povu. Tanba ninia naran neʼe mak Jeová lori fali ema Izraél restu ba sira-nia rai atu hamoos ninia naran.—Ezequiel (Yehezkiel) 36:22-24.
it-2 p. 140
Justisa
Tan neʼe mak Jeová iha direitu atu husu ema sira neʼebé hakarak halo tuir nia hodi hatene didiʼak kona-ba ninia justisa no banati-tuir ninia hahalok neʼe. (Isaías [Yesaya] 1:17, 18; 10:1, 2; Jeremias [Yeremia] 7:5-7; 21:12; 22:3, 4; Ezequiel [Yehezkiel] 45:9, 10; Amós 5:15; Miquéias [Mikha] 3:9-12; 6:8; Zacarias [Zakharia] 7:9-12.
11-17 SETEMBRU
Keʼe no hetan buat murak husi Bíblia
(Ezequiel 47:1, 8; 48:30, 32-34)
w99 1/3 p. 11 par. 14
“Fó atensaun ba” Maromak nia templu!
14 Ezequiel nia vizaun hatudu sai buat seluk neʼebé importante tebes. Porezemplu, templu neʼebé Ezequiel haree laʼós templu neʼebé tebes. Maski ema judeu halo tuir buat balu husi Ezequiel nia vizaun atu harii templu foun, maibé, tuir loloos templu neʼebé temi iha Ezequiel nia vizaun boot tebes toʼo fatin neʼebé templu orijinál uluk harii iha Foho Moriá mós latoʼo atu harii templu neʼe. Ikusmai, ema judeu harii templu foun iha sidade Jeruzalein, maibé templu neʼebé Ezequiel haree iha ninia vizaun laʼós iha sidade maibé iha rai ketak ida iha fatin neʼebé dook. (Esdras [Ezra] 1:1, 2) No mós templu neʼebé harii iha Jeruzalein, la iha mota ida mak suli sai husi fatin neʼe. Tan neʼe, ema Izraél haree buat balu deʼit mak sai loos ona husi Ezequiel nia profesia. Neʼe hatudu katak, sei iha buat seluk tan neʼebé importante tebes atu sai loos iha futuru iha dalan espirituál nian.
it-2 p. 1001
Oan-mane husi ema
Husi Eskritura Lia-Ebraiku hotu, livru Ezequiel mak uza liafuan “oan-mane husi ema” barak liu. Jeová bolu ninia profeta ho naran neʼe ba dala 90 liu. (Ezequiel [Yehezkiel] 2:1, 3, 6, 8) Jeová bolu Ezequiel ho naran neʼe atu hatudu katak profeta neʼe ema deʼit, hodi nuneʼe ema bele hatene katak Maromak Jeová neʼebé Aas Liu Hotu mak uza Ezequiel atu hatoʼo deʼit ninia mensajen. Daniel 8:17 mós uza naran neʼe hodi bolu profeta Daniel.
18-24 SETEMBRU
Keʼe no hetan buat murak husi Bíblia
(Daniel 1:5, 8)
it-2 p. 382
Mexak
Karik tanba razaun tolu neʼebé halo sira sente katak han liurai nia hahán sei hafoʼer sira: (1) Ema Babilónia han animál sira neʼebé Moisés nia Ukun-Fuan temi nuʼudar animál foʼer; (2) animál balu la hasai raan ho didiʼak, no balu buti mate deʼit; (3) baibain, ema jentiu hasaʼe uluk animál ba sira-nia maromak sira, no atu han naʼan sira-neʼe mak parte ida husi adorasaun ba sira-nia maromak.—Daniel 1:8; kompara 1 Korinto 10:18-20, 28.
w12 15/6 p. 17, kaixa
“UKUN SIRA-NEʼE HOTU” REPREZENTA SÉ?
Profesia iha Daniel 2:44 dehan katak Maromak nia Ukun “sei harahun no halakon ukun sira-neʼe hotu”. Profesia neʼe koʼalia deʼit kona-ba ukun sira neʼebé reprezenta parte oioin husi estátua boot.
Entaun, oinsá ho ema nia ukun sira seluk? Profesia seluk iha Apokalipse ajuda ita atu komprende liután kona-ba saida mak sei mosu ba ukun seluk. Profesia neʼe hatudu katak “liurai sira hotu rai neʼe nian” sei halibur hodi kontra Jeová “iha loron boot Maromak kbiit waʼin nian”. (Apokalipse 16:14; 19:19-21) Entaun, neʼe hatudu katak laʼós deʼit ukun sira neʼebé iha estátua boot mak sei lakon, maibé governu hotu mós sei lakon iha funu Armajedón.
w01 15/10 p. 6 par. 4
Xave ba mundu neʼebé haksolok
Bele hetan resposta husi Daniel 2:44: “Iha liurai sira-neʼe nia tempu, Maromak iha lalehan sei harii ukun ida neʼebé sei nunka lakon. No ukun neʼe sei la entrega ba povu sira seluk. Ukun neʼe sei harahun no halakon liurai sira-neʼe [ema] hotu nia ukun, no ukun neʼe mesak mak sei hamriik ba nafatin.” Tanbasá mak Maromak nia Ukun tenkesér “harahun” ema nia ukun hotu? Tanba sira lakohi Maromak atu ukun sira, maibé hakarak ukun an rasik deʼit. Sira-nia hakarak sira-neʼe mai husi Satanás nia hanoin husi Adão no Eva nia tempu iha jardín Eden. Ema nia ukun la lori diʼak ba ema no tanba sira-nia hakaʼas-an atu kaer metin ba sira-nia ukun, sira sei sai Kriadór nia inimigu. (Salmo [Mazmur] 2:6-12; Apokalipse 16:14, 16) Tan neʼe mak ita tenke husu ba ita-nia an, ‘Ita apoia ka kontra Maromak nia Ukun?’
25 SETEMBRU–1 OUTUBRU
Keʼe no hetan buat murak husi Bíblia
w07 1/9 p. 18 par. 5
Pontu importante husi livru Daniel
4:10, 11, 20-22—Ai-hun boot neʼebé Nabukodonosor haree iha ninia mehi reprezenta saida? Ai-hun neʼe reprezenta Nabukodonosor nuʼudar ukun-naʼin neʼebé iha kbiit boot iha mundu tomak. Maibé ai-hun neʼe reprezenta buat importante seluk, tanba ukun neʼe sei habelar ba “rai tomak”. Daniel 4:17 liga mehi neʼe ho “Maromak Aas Liu Hotu” nia ukun kona-ba ema hotu. Entaun, ai-hun mós reprezenta Jeová nia direitu atu ukun, liuliu kona-ba ukun mundu tomak. Tan neʼe, mehi neʼe refere ba buat rua, neʼe mak Nabukodonosor nia ukun no Jeová nia ukun ba lalehan no rai.
w88 1/10 p. 30 par. 3-5
Pergunta husi lee-naʼin
Ikusmai sira lori ema ebreu naran Daniel tama no liurai repete fali katak nia atu fó unuk kór-violeta ba Daniel, fó korrente osan-mean, no pozisaun terseiru iha liurai nia ukun. Profeta neʼe hatán ho respeitu hodi dehan: “Ita bele rai deʼit Ita-nia prezente no fó prezente sira-neʼe ba ema seluk. Maibé, haʼu sei lee letra sira-neʼe ba liurai no esplika ninia signifika ba liurai.”—Daniel 5:17.
Tan neʼe Daniel la halo korrupsaun ka simu osan atu esplika ba liurai. Liurai bele rai ninia prezente sira ka fó fali ba ema seluk. Daniel fó esplikasaun laʼós atu hetan kolen tanba Jeová, Maromak neʼebé loos mak fó kbiit ba nia. No lakleur tan Jeová sei lori kastigu ba Babilónia.
Daniel 5:29 hatete katak, bainhira Daniel lee no esplika tiha, liurai haruka ema fó kolen ba Daniel. Sira halo tuir Liurai Belsazar nia orden hodi tau unuk no korrente ba Daniel, laʼós Daniel rasik mak tau. Tan neʼe buat neʼebé hakerek iha Daniel 5:29 la kontra Daniel nia liafuan neʼebé hakerek iha Daniel 5:17, tanba profeta neʼe fó sai ho klaru katak nia la iha hakarak neʼebé atu hanoin diʼak deʼit ba ninia an.
dp 109 p. 22
Letra haat neʼebé lori mudansa ba mundu tomak
22 Esplika tiha ai-sasiʼik neʼe, lakleur tan Babilónia mós sei monu ba Média no Pérsia nia tropa sira. Maski Belsazar sai laran-tun bainhira rona ba mensajen neʼe, nia kaer nafatin ninia liafuan hodi haruka ninia atan sira tau unuk, korrente osan-mean ba Daniel, no fó sai katak nia mak ukun-naʼin ho pozisaun terseiru. (Dan 5:29) Daniel simu deʼit glória sira-neʼe tanba nia hatene katak glória sira-neʼe haleno fali glória neʼebé fó ba Jeová. Karik Belsazar hanoin katak fó glória ba Jeová nia profeta bele hamaus Jeová atu la lori kastigu ba Babilónia, se nuneʼe, neʼe tarde ona.
EZEKIEL
42 Tuirmai nia lori haʼu ba pátiu boot iha parte norte. No nia lori haʼu ba uma neʼebé iha sala han-fatin sira. Uma neʼe besik área mamuk, iha uma boot nia parte norte. 2 Iha fatin atu tama ba uma neʼe iha parte norte, no uma neʼe naruk metru 52, no luan metru 26. 3 Uma neʼe harii entre pátiu boot nia laʼo-fatin no pátiu kiʼik nia área ida neʼebé ho luan metru 10,5. Uma neʼe iha andár tolu ho varanda neʼebé hateke malu. 4 Iha sala han-fatin sira-nia oin iha laʼo-fatin ho luan metru lima no naruk metru 52, no fatin atu tama mak husi parte norte. 5 Sala han-fatin sira iha andár leten mak kiʼik liu fali sala han-fatin sira iha klaran no okos, tanba varanda mak okupa fatin barak liu. 6 Tanba uma sira-neʼe iha andár tolu, maibé uma neʼe la iha riin hanesan ho pátiu sira-nia riin. Tan neʼe mak ladún iha fatin barak iha andár leten, no sala sira kiʼik liu fali sala sira iha andár klaran no okos.
7 Moru liʼur husi fatuk neʼebé besik sala han-fatin sira, naruk metru 26. Moru neʼe mós besik pátiu boot no hateke malu ho sala han-fatin sira seluk. 8 Tanba sala han-fatin sira neʼebé besik pátiu boot, naruk metru 26, maibé sala han-fatin sira neʼebé hateke ba fatin santu, naruk metru 52. 9 Iha parte leste iha mós fatin atu tama ba sala han-fatin sira-neʼe liuhusi pátiu boot.
10 Iha pátiu nia moru laran iha parte leste, iha mós sala han-fatin sira, besik área mamuk no uma boot. 11 Iha mós laʼo-fatin iha sala sira-neʼe nia oin hanesan laʼo-fatin iha sala han-fatin sira iha parte norte. Sala sira-neʼe nia naruk no luan mak hanesan deʼit; sala sira-neʼe nia dalan atu sai no nia modelu mak hanesan deʼit. Fatin atu tama ba sala sira-neʼe 12 hanesan deʼit ho fatin atu tama ba sala han-fatin sira neʼebé iha parte súl. Iha neʼebá iha fatin atu ema tama ba laʼo-fatin neʼe, fatin neʼe besik moru fatuk nian iha parte leste.
13 Tuirmai nia dehan ba haʼu: “Sala han-fatin sira iha parte norte no iha parte súl neʼebé besik ba área mamuk mak sala han-fatin sira neʼebé santu. Amlulik sira neʼebé halo serbisu ba Jeová bele uza fatin neʼe atu han sakrifísiu sira neʼebé santu liu hotu. Iha neʼebá mak sira tau sakrifísiu sira neʼebé santu liu hotu, sakrifísiu fini nian, sakrifísiu sala nian, no sakrifísiu taka sala nian, tanba fatin neʼe mak fatin santu. 14 Bainhira amlulik sira tama, sira labele sai husi fatin santu hodi ba pátiu boot se sira seidauk hasai sira-nia roupa neʼebé sira uza atu halo serbisu, tanba roupa sira-neʼe mak santu. Sira tenke hatais fali roupa seluk hodi bele hakbesik ba área neʼebé povu bele tama.”
15 Bainhira nia sukat hotu templu nia área laran, nia lori haʼu sai liuhusi portaun neʼebé hateke ba parte leste, no nia sukat área neʼe tomak.
16 Nia sukat parte leste hodi uza ai-loos sukat nian, no parte neʼe naruk metru 1.555 husi sorin ida toʼo sorin seluk.
17 Nia sukat parte norte, no parte neʼe naruk metru 1.555.
18 Nia sukat parte súl, no parte neʼe naruk metru 1.555.
19 Nia bá parte oeste. Nia sukat parte neʼe hodi uza ai-loos sukat nian, no neʼe naruk metru 1.555.
20 Nia sukat sorin haat hotu. Área neʼe iha moru neʼebé haleʼu ninia sorin haat, no iha sorin-sorin moru neʼe naruk metru 1.555, atu haketak área santu ho área neʼebé la santu.
43 Tuirmai nia lori haʼu ba portaun neʼebé hateke ba parte leste. 2 Iha neʼebá haʼu haree Izraél nia Maromak nia glória mai husi parte leste, no ninia lian mak hanesan lian husi bee barak neʼebé suli makaʼas; no ninia glória halo rai sai nabilan. 3 Vizaun neʼebé haʼu haree mak hanesan ho vizaun neʼebé uluk haʼu haree ona bainhira haʼu mai atu harahun sidade neʼe, no hanesan ho vizaun neʼebé uluk haʼu haree besik mota Kebar; tan neʼe, haʼu hakneʼak ho oin ba rai.
4 Tuirmai Jeová nia glória tama ba templu liuhusi portaun neʼebé hateke ba parte leste. 5 Depois neʼe, Maromak nia espíritu halo haʼu hamriik no lori haʼu ba pátiu kiʼik, no haʼu haree templu nakonu ho Jeová nia glória. 6 Haʼu rona mane ida nia lian koʼalia mai haʼu husi templu, no mane neʼe mai hamriik iha haʼu-nia sorin. 7 Nia dehan ba haʼu:
“Oan-mane husi ema, neʼe mak fatin ba haʼu-nia kadunan no fatin ba haʼu-nia ain, fatin neʼebé haʼu hela bá iha povu Izraél nia leet ba nafatin. Uluk umakain Izraél no sira-nia liurai sira hafoʼer haʼu-nia naran tanba sira la hatudu laran-metin ba haʼu no tanba sira-nia liurai nia mate-isin, maibé sira sei la hafoʼer tan haʼu-nia naran neʼebé santu. 8 Haʼu halakon sira ho haʼu-nia hirus tanba sira tau sira-nia templu nia odamatan iha haʼu-nia templu nia odamatan sorin, no tau sira-nia odamatan riin iha haʼu-nia odamatan riin sorin, só didin deʼit mak haketak haʼu ho sira; nuneʼe sira hafoʼer haʼu-nia naran neʼebé santu tanba hahalok foʼer neʼebé sira halo ona. 9 Agora husik sira soe tiha sira-nia hahalok la laran-metin no soe sira-nia liurai nia mate-isin dook husi haʼu, nuneʼe haʼu sei hela iha sira-nia leet ba nafatin.
10 “Oan-mane husi ema, ó tenke esplika kona-ba templu neʼe ba umakain Izraél, atu nuneʼe sira bele sente moe tanba sira-nia sala, no sira tenke estuda kona-ba templu nia modelu. 11 Se sira sente moe kona-ba buat hotu neʼebé sira halo ona, ó tenke fó sai ba sira kona-ba templu nia modelu, ninia arranju sira, ninia fatin atu sai, no fatin atu tama. Ó tenke hatudu ba sira templu nia modelu hotu no ninia ukun-fuan ho lei sira. Pinta no hakerek neʼe iha sira-nia oin, atu nuneʼe sira bele hatene buat hotu kona-ba templu nia modelu no kumpre ninia ukun-fuan sira. 12 Templu nia lei mak tuirmai neʼe: área tomak neʼebé haleʼu foho neʼe nia tutun mak santu liu hotu. Haree bá! Neʼe mak templu nia lei.
13 “Tuirmai neʼe mak altár nia medida: Altár nia hun aas sentímetru 52, no luan sentímetru 52. Ninia ninin neʼebé haleʼu luan sentímetru 22. Neʼe mak altár nia hun. 14 Altár nia plataforma neʼebé kiʼik iha altár nia hun leten, aas metru ida. Plataforma neʼe luan liu sentímetru 52 se kompara ho plataforma ida iha nia leten. Plataforma neʼebé boot, aas metru rua. Plataforma neʼe mós luan liu sentímetru 52 se kompara ho parte ida iha nia leten. 15 Altár nia parte leten liu mak fatin atu sunu ahi, neʼe aas metru rua, no dikur haat iha ninia sikun haat. 16 Altár nia fatin atu sunu ahi neʼe mak kuadradu, naruk metru neen no luan metru neen. 17 Plataforma neʼebé boot nia sorin haat, naruk metru hitu no luan metru hitu; no ninia ninin neʼebé haleʼu, sentímetru 26, no altár nia hun iha sorin-sorin, sentímetru 52.
“No altár nia eskada hateke ba parte leste.”
18 Tuirmai nia hatete ba haʼu: “Oan-mane husi ema, Jeová, Naʼi Ukun-Naʼin Boot Liu, dehan nuneʼe: ‘Neʼe mak matadalan neʼebé ó tenke tuir bainhira halo altár, atu nuneʼe bele uza hodi sunu sakrifísiu neʼebé hasaʼe tomak no hisik raan iha leten.’
19 “Jeová, Naʼi Ukun-Naʼin Boot Liu, dehan: ‘Ó tenke fó karau-aman ida ba amlulik Levi sira husi umakain Zadok, neʼebé hakbesik atu halo serbisu ba haʼu, no sira sei hasaʼe neʼe nuʼudar sakrifísiu sala nian. 20 Ó tenke foti karau nia raan balu no tau neʼe iha altár nia dikur haat, no iha plataforma nia lidun haat, no mós iha ninia ninin neʼebé haleʼu, atu nuneʼe bele hamoos altár neʼe. 21 Tuirmai ó tenke foti karau-aman neʼebé nuʼudar sakrifísiu sala nian atu bele sunu iha fatin neʼebé hili tiha ona iha templu nia liʼur. 22 Iha loron segundu ó tenke hasaʼe bibi-timur aman ida neʼebé la iha moras nuʼudar sakrifísiu sala nian; no amlulik sira sei hamoos altár neʼe hanesan sira hamoos altár hodi hasaʼe karau-aman nuʼudar sakrifísiu.’
23 “‘Bainhira ó hamoos tiha ona altár neʼe, ó tenke hasaʼe karau-aman ida husi karau-lubun no bibi-malae aman ida husi bibi-lubun nuʼudar sakrifísiu. No animál sira-neʼe labele iha moras ida. 24 Ó tenke lori animál sira-neʼe ba Jeová nia oin, no amlulik sira tenke kari masin iha animál sira-neʼe nia leten no hasaʼe tomak nuʼudar sakrifísiu ba Jeová. 25 Ba loron hitu ó tenke hasaʼe bibi-timur aman ida loroloron nuʼudar sakrifísiu sala nian, no mós hasaʼe karau-aman ida no bibi-malae aman ida loroloron; ó tenke hasaʼe animál sira neʼebé la iha moras. 26 Ba loron hitu amlulik sira tenke halo dame ba altár neʼe, no sira tenke hamoos no inaugura altár neʼe. 27 Bainhira loron hitu neʼe remata ona, hahú husi loron ualu ba oin, amlulik sira sei hasaʼe imi-nia sakrifísiu neʼebé hasaʼe tomak no sakrifísiu dame nian iha altár neʼe; no haʼu sei sai kontente ho imi’, Jeová, Naʼi Ukun-Naʼin Boot Liu, dehan.”
44 Nia lori haʼu fila ba templu nia portaun neʼebé hateke ba parte leste, neʼe katak portaun atu tama ba pátiu boot, no portaun neʼe taka ona. 2 Tuirmai Jeová dehan ba haʼu: “Portaun neʼe sei taka nafatin. Labele loke portaun neʼe, no ema ida mós sei la laʼo liu portaun neʼe; tanba Jeová, Maromak Izraél nian, tama ona liuhusi ida-neʼe, entaun portaun neʼe tenke taka nafatin. 3 Maibé, xefe ida sei tuur iha portaun neʼe atu han paun iha Jeová nia oin, tanba nia mak xefe. Nia sei bá-mai husi varanda.”
4 Tuirmai nia lori haʼu liuhusi portaun parte norte nian hodi bá templu nia oin. Bainhira haʼu hateke, haʼu haree katak Jeová nia templu nakonu ho Jeová nia glória. Entaun haʼu hakneʼak ho oin ba rai. 5 Tuirmai Jeová dehan ba haʼu: “Oan-mane husi ema, hanoin didiʼak, hateke no rona ho didiʼak ba buat hotu neʼebé haʼu hatete ba ó kona-ba ukun-fuan no lei sira ba Jeová nia templu. Haree didiʼak ba dalan atu tama templu neʼe no ba fatin hotu atu sai husi templu. 6 Ó tenke hatete ba umakain Izraél neʼebé kontradór: ‘Jeová, Naʼi Ukun-Naʼin Boot Liu, dehan nuneʼe: “Para ona, oh umakain Izraél, imi halo hahalok foʼer sira barak liu ona. 7 Imi lori ema estranjeiru sira neʼebé la hetan sirkunsizaun iha sira-nia laran no isin hodi tama haʼu-nia fatin santu, no sira hafoʼer haʼu-nia templu. Imi hasaʼe paun, naʼan bokur, no raan ba haʼu, maibé iha tempu hanesan imi kontra haʼu-nia aliansa ho imi-nia hahalok foʼer hotu. 8 Imi la tau matan ba buat santu sira iha haʼu-nia templu. Duké halo nuneʼe, imi fó knaar ba ema seluk atu halo imi-nia knaar sira iha haʼu-nia templu.”’
9 “‘Jeová, Naʼi Ukun-Naʼin Boot Liu, dehan nuneʼe: “Ema estranjeiru neʼebé hela iha rai-Izraél, neʼebé la hetan sirkunsizaun iha sira-nia laran no isin, labele tama haʼu-nia templu.”’
10 “‘Maibé ema Levi sira neʼebé laʼo dook ona husi haʼu bainhira ema Izraél laʼo sees husi haʼu hodi laʼo tuir sira-nia estátua neʼebé haʼu hakribi, sira sei lori todan ba sira-nia sala rasik. 11 No sira sei halo serbisu iha haʼu-nia fatin santu atu tau matan templu nia portaun sira no atu halo serbisu iha templu. Sira sei oho animál ba sakrifísiu sira neʼebé sunu tomak no ba povu nia sakrifísiu, no sira sei hamriik iha povu nia oin atu serbí povu. 12 Ema Levi sira serbí povu iha sira-nia estátua neʼebé haʼu hakribi nia oin, no sira sai nuʼudar fatuk sidi nian neʼebé halo umakain Izraél monu ba sala, tan neʼe mak haʼu foti liman hodi jura atu kontra sira’, Jeová, Naʼi Ukun-Naʼin Boot Liu, dehan, ‘no sira sei lori todan ba sira-nia sala rasik. 13 Sira sei la hakbesik ba haʼu atu serbí nuʼudar amlulik no la hakbesik ba haʼu-nia sasán neʼebé santu ka sasán neʼebé santu liu hotu, no sira sei lori moe tanba hahalok foʼer neʼebé sira halo ona. 14 Maibé haʼu sei fó sira knaar atu tau matan ba serbisu sira iha templu, atu serbí iha templu no tau matan ba buat hotu neʼebé tenke halo iha templu neʼe.’
15 “Jeová, Naʼi Ukun-Naʼin Boot Liu, dehan: ‘Kona-ba amlulik Levi sira, Zadok nia oan-mane sira, neʼebé halaʼo sira-nia serbisu iha haʼu-nia fatin santu bainhira ema Izraél laʼo sees husi haʼu, sira sei hakbesik hodi halo serbisu ba haʼu, no sira sei hamriik iha haʼu-nia oin hodi hasaʼe sakrifísiu naʼan bokur no raan ba haʼu. 16 Sira mak sei tama haʼu-nia templu, no sira sei hakbesik ba haʼu-nia meza hodi halo serbisu ba haʼu, no sira sei halo sira-nia knaar ba haʼu.
17 “‘Bainhira sira tama ba portaun iha pátiu kiʼik, sira tenke hatais roupa husi hena-liñu. Sira labele hatais roupa husi bibi-malae fulun bainhira sira serbí haʼu iha pátiu kiʼik nia portaun no iha pátiu kiʼik laran. 18 Sira tenke uza xapeu husi hena-liñu, no hatais kalsa badak husi hena-liñu. Sira labele uza roupa neʼebé halo sira kosar. 19 Antes sira sai ba pátiu boot, katak pátiu ba povu, sira tenke hasai roupa neʼebé sira uza atu serbí no tau roupa sira-neʼe iha sala han-fatin sira neʼebé santu. Tuirmai sira tenke hatais fali roupa seluk, atu nuneʼe sira la hadaʼet buat santu ba povu liuhusi sira-nia roupa. 20 Sira labele koir hotu sira-nia fuuk ka husik sira-nia fuuk naruk liu. Sira tenke tesi kabeer sira-nia fuuk. 21 Amlulik sira labele hemu tua-uvas bainhira sira tama ba pátiu kiʼik laran. 22 Sira labele kaben ho feto-faluk ka feto neʼebé ninia laʼen soe ona; maibé sira bele kaben ho feto virjen husi umakain Izraél ka amlulik nia feen neʼebé faluk ona.’
23 “‘Sira tenke hanorin haʼu-nia povu kona-ba saida mak la hanesan entre buat santu no buat baibain; no sira tenke hanorin povu kona-ba saida mak la hanesan entre buat neʼebé moos no buat neʼebé la moos. 24 Sira tenke sai nuʼudar juis atu tesi lia bainhira iha kazu ruma; sira tenke tesi lia tuir haʼu-nia desizaun sira. Sira tenke kumpre haʼu-nia lei no haʼu-nia ukun-fuan sira kona-ba haʼu-nia festa hotu no halo santu haʼu-nia loron Sábadu. 25 Sira labele besik ba ema nia mate-isin ruma, se lae sira sei sai la moos. Maibé, sira bele hakbesik ba mate-isin no sai la moos, se mate-isin neʼe mak sira-nia aman, inan, oan-mane, oan-feto, maun-alin, ka sira-nia feton neʼebé seidauk kaben. 26 Se amlulik ida kumpre ona prosesu atu hamoos an, sira tenke halo nia hein ba loron hitu antes nia bele serbí fali nuʼudar amlulik. 27 Iha loron neʼebé nia tama fali fatin santu, katak ba pátiu kiʼik, atu serbí iha fatin santu, nia tenke fó ninia sakrifísiu sala nian’, Jeová, Naʼi Ukun-Naʼin Boot Liu, dehan.
28 “‘Sira-nia liman-rohan mak tuirmai neʼe: Haʼu mak sira-nia liman-rohan. Imi labele fó liman-rohan ba sira iha rai-Izraél, tanba haʼu mak sira-nia liman-rohan. 29 Sira mak sei han sakrifísiu fini nian, sakrifísiu sala nian, no sakrifísiu taka sala nian, no mós buat hotu neʼebé haketak ona nuʼudar buat santu iha rai-Izraél sei sai sira-nian. 30 Imi-nia ai-fuan tasak primeiru neʼebé diʼak liu no kontribuisaun hotu mak sei sai amlulik sira-nian. No imi tenke fó trigu primeiru neʼebé imi koʼa ona ba amlulik sira. Ho ida-neʼe mak imi-nia umakain sei hetan bensaun nafatin. 31 Amlulik sira labele han naʼan husi manu ka animál neʼebé mate mesak deʼit ka animál seluk tata lees.’
45 “‘Bainhira imi fahe rai nuʼudar liman-rohan, imi tenke hasaʼe parte santu husi rai neʼe nuʼudar kontribuisaun ba Jeová. Ninia naruk metru 12.950, luan metru 5.180. Área hotu neʼe sei sai parte santu nian. 2 Iha área neʼe nia laran, imi tenke haketak rai kuadradu ba templu, neʼe naruk metru 259 no luan metru 259, no iha sorin-sorin iha rai-luan atu animál han duʼut no neʼe luan metru 26. 3 Husi área neʼebé sukat ona, ó tenke sukat tan rai naruk metru 12.950 no luan metru 5.180, no templu sei iha rai neʼe nia laran, templu neʼe mak buat neʼebé santu liu hotu. 4 Rai neʼe sei sai nuʼudar parte santu ba amlulik sira, katak amlulik sira neʼebé halo serbisu iha templu, neʼebé hakbesik ba Jeová hodi serbí nia. Rai neʼe sei sai fatin ba sira atu harii uma no fatin santu ba templu.
5 “‘Ema Levi sira neʼebé halo serbisu iha templu, sei hetan rai ho naruk metru 12.950 no luan metru 5.180, no sala han-fatin 20 mak sai sira-nian.
6 “‘Imi tenke haketak área ida ba sidade neʼe ho naruk metru 12.950 (ninia naruk neʼe hanesan ho área ba kontribuisaun neʼebé santu) no luan metru 2.590. Neʼe sei sai umakain Izraél tomak nian.
7 “‘No xefe sei hetan rai iha área kontribuisaun santu nia sorin rua, neʼe katak área ba sidade neʼe nia sorin rua. Rai neʼe besik área kontribuisaun santu no área ba sidade neʼe. Rai neʼe iha sorin parte oeste no sorin parte leste. Ninia naruk husi fronteira parte oeste toʼo fronteira parte leste mak hanesan ho suku ida-idak nia rai nia naruk. 8 Rai neʼe sei sai xefe nian iha rai-Izraél. Haʼu-nia xefe sira sei la halo aat tan ba haʼu-nia povu, no sira sei fó rai ba umakain Izraél tuir sira-nia suku sira.’
9 “Jeová, Naʼi Ukun-Naʼin Boot Liu, dehan nuneʼe: ‘Para ona, oh Izraél nia xefe sira, imi halo buat aat barak liu ona!’
“Jeová, Naʼi Ukun-Naʼin Boot Liu, dehan: ‘Para atu halo violénsia no hanehan ema, no halo fali buat neʼebé loos no justisa. Keta hadau tan haʼu-nia povu nia rai.’ 10 Imi tenke uza dasin neʼebé loos, no uza fatin sukat efa no bato nian neʼebé loos. 11 Omer ida mak bato 10, no omer ida mak efa 10. Labele troka efa no bato nia boot. Neʼe tenke tuir omer nia sukat neʼebé loloos. 12 Siklo ida tenke gera 20. No siklo 60 mak sei sai maneh ida.’
13 “‘Kontribuisaun neʼebé imi tenke fó mak tuirmai neʼe: trigu sea nanotak husi omer ida-idak no sevada sea nanotak husi omer ida-idak. 14 Mina neʼebé nuʼudar kontribuisaun tenke sukat tuir bato. Koro ida mak bato 10, no bato sanulu mak omer ida, tanba bato sanulu mak hanesan ho omer ida. 15 No husi Izraél nia animál-hakiak sira, imi tenke fó bibi-malae ida husi bibi-malae 200. Buat sira-neʼe sei sai nuʼudar sakrifísiu fini nian, sakrifísiu sunu nian neʼebé hasaʼe tomak, no sakrifísiu dame nian, atu nuneʼe bele hamoos povu nia sala’, Jeová, Naʼi Ukun-Naʼin Boot Liu, dehan.
16 “‘Povu hotu iha rai neʼe tenke fó kontribuisaun neʼe ba xefe iha rai-Izraél. 17 Maibé xefe nia knaar mak atu fó sakrifísiu neʼebé hasaʼe tomak, sakrifísiu fini nian, no sakrifísiu hemu nian durante tempu festa, fulan foun, loron Sábadu, no umakain Izraél nia festa hotu. Nia tenke fó sakrifísiu sala nian, sakrifísiu fini nian, sakrifísiu neʼebé hasaʼe tomak, no sakrifísiu dame nian, atu nuneʼe bele hamoos umakain Izraél nia sala.’
18 “Jeová, Naʼi Ukun-Naʼin Boot Liu, dehan nuneʼe: ‘Iha loron primeiru, fulan primeiru, ó tenke foti karau-aman neʼebé la iha moras husi karau-lubun nia leet, no ó tenke hamoos fatin santu. 19 Amlulik tenke foti raan balu husi karau ba sakrifísiu sala nian no tau iha templu nia odamatan riin, iha altár nia plataforma lidun haat, no mós iha odamatan riin iha pátiu kiʼik nia portaun. 20 Neʼe mak buat neʼebé ó tenke halo iha loron hitu iha fulan neʼe tanba ema naran deʼit neʼebé halo ona sala la ho neon; no ó tenke hamoos templu neʼe.
21 “‘Iha loron 14, fulan primeiru, imi tenke selebra Festa Salvasaun nian. Ba loron hitu imi tenke han paun neʼebé la iha fermentu. 22 Iha loron neʼe xefe tenke fó karau-aman ida nuʼudar sakrifísiu sala nian atu taka ninia sala no povu tomak iha rai neʼe nia sala. 23 Durante loron hitu festa nian xefe tenke fó karau-aman hitu no bibi-malae aman hitu neʼebé la iha moras, nuʼudar sakrifísiu sunu nian neʼebé hasaʼe tomak ba loron ida-idak, no mós fó bibi-timur aman ida nuʼudar sakrifísiu sala nian ba loron ida-idak. 24 Nia mós tenke fó sakrifísiu fini nian efa isin ida ho karau-aman ida-idak no ho bibi-malae aman ida-idak, no mós fó mina litru tolu ho balu ho efa ida-idak.
25 “‘Iha loron 15, fulan hitu, durante loron hitu festa nian, nia tenke fó sakrifísiu neʼebé hanesan, sakrifísiu sala nian, sakrifísiu neʼebé hasaʼe tomak, sakrifísiu fini nian, no mina.’”
46 “Jeová, Naʼi Ukun-Naʼin Boot Liu, dehan nuneʼe: ‘Pátiu kiʼik nia portaun neʼebé hateke ba parte leste tenke taka nafatin ba loron serbisu nian, ba loron neen, maibé iha loron Sábadu no loron atu komesa fulan foun, portaun neʼe tenke loke. 2 Xefe sei tama liuhusi portaun neʼe nia varanda husi pátiu boot, no nia sei hamriik besik odamatan riin iha portaun neʼe. Amlulik sira sei hasaʼe tomak ninia sakrifísiu sunu nian no hasaʼe ninia sakrifísiu dame nian, no nia tenke hakruʼuk an iha portaun nia área atu tama no tuirmai nia tenke sai. Maibé portaun neʼe tenke loke nafatin toʼo kalan. 3 Iha loron Sábadu no fulan foun, povu iha rai neʼe mós tenke hakruʼuk an iha Jeová nia oin iha fatin atu tama portaun neʼe.
4 “‘Iha loron Sábadu, xefe tenke fó bibi-malae oan neen no bibi-malae aman ida neʼebé la iha moras, nuʼudar sakrifísiu sunu nian neʼebé hasaʼe tomak ba Jeová. 5 Sakrifísiu fini nian mak efa isin ida ho bibi-malae aman neʼe no nia bele fó tan tuir ninia kbiit hamutuk ho bibi-malae oan sira-neʼe, no mós fó mina litru tolu ho balu ho efa ida-idak. 6 Iha loron neʼebé komesa fulan foun, nia tenke hasaʼe karau-aman ida husi karau-lubun, bibi-malae oan neen no bibi-malae aman ida nuʼudar sakrifísiu; animál sira-neʼe labele iha moras. 7 Nia tenke fó sakrifísiu fini nian efa isin ida ho karau-aman neʼe, efa isin ida ho bibi-malae aman neʼe, no fó tan tuir ninia kbiit hamutuk ho bibi-malae oan sira-neʼe. No nia tenke fó mina litru tolu ho balu ho efa ida-idak.
8 “‘Bainhira xefe neʼe tama, nia tenke tama liuhusi portaun nia varanda, no nia sai mós tenke liuhusi dalan neʼebé hanesan. 9 No bainhira povu iha rai neʼe mai atu adora Jeová durante tempu festa nian, povu sira neʼebé tama liuhusi portaun parte norte nian tenke sai liuhusi portaun parte súl nian, no sira neʼebé tama liuhusi portaun parte súl nian tenke sai liuhusi portaun parte norte nian. Ema ida labele fila fali liuhusi portaun neʼebé nia tama, tanba sira tenke sai liuhusi portaun neʼebé iha sira-nia oin. 10 Kona-ba xefe neʼebé iha povu nia leet, nia tenke tama bainhira povu tama, no nia tenke sai bainhira povu sai. 11 Durante tempu festa nian xefe tenke fó sakrifísiu fini nian efa isin ida ho karau-aman ida, efa isin ida ho bibi-malae aman ida, no fó tan tuir ninia kbiit hamutuk ho bibi-malae oan sira. Nia tenke fó mina litru tolu ho balu ho efa ida-idak.
12 “‘Se xefe fó sakrifísiu sunu nian neʼebé hasaʼe tomak ka sakrifísiu dame nian ba Jeová ho ninia hakarak rasik, ema sei loke portaun neʼebé hateke ba parte leste ba nia, no nia sei fó ninia sakrifísiu sunu nian neʼebé hasaʼe tomak no sakrifísiu dame nian hanesan nia halo iha loron Sábadu. Bainhira nia sai ona, portaun neʼe tenke taka fali.
13 “‘Loron-loron, ó tenke fó bibi-malae oan neʼebé tinan ida no la iha moras hodi sai nuʼudar sakrifísiu sunu nian neʼebé hasaʼe tomak ba Jeová. Ó tenke fó neʼe dadeer-dadeer. 14 Dadeer-dadeer ó tenke fó sakrifísiu fini nian sea nanotak hamutuk ho bibi-malae oan neʼe, no ho mina litru ida atu bele hisik ba trigu uut neʼebé diʼak nia leten nuʼudar sakrifísiu fini nian neʼebé hasaʼe beibeik ba Jeová. Ukun-fuan neʼe ba nafatin. 15 Dadeer-dadeer sira tenke fó bibi-malae oan, sakrifísiu fini nian, no mina nuʼudar sakrifísiu sunu nian neʼebé hasaʼe tomak. Neʼe mak sakrifísiu neʼebé tenke hasaʼe beibeik.’
16 “Jeová, Naʼi Ukun-Naʼin Boot Liu, dehan nuneʼe: ‘Se xefe ida fó rai ba ninia oan-mane ida-idak nuʼudar liman-rohan, rai neʼe sei sai ninia oan nian. Neʼe mak sira-nia liman-rohan. 17 Maibé se nia fó rai balu husi ninia liman-rohan ba ninia atan, neʼe sei sai atan neʼe nian toʼo tinan livre; no tuirmai rai neʼe sei entrega fali ba xefe. Só deʼit ninia oan-mane sira-nia liman-rohan mak sira-nian ba nafatin. 18 Xefe labele obriga povu atu sai husi sira-nia rai hodi hadau povu nia liman-rohan neʼe. Xefe tenke fahe ninia rai rasik ba ninia oan-mane sira nuʼudar liman-rohan, atu nuneʼe haʼu-nia povu labele sai husi sira-nia rai rasik.’”
19 Tuirmai nia lori haʼu ba amlulik nia sala han-fatin sira neʼebé santu, liuhusi fatin atu tama iha portaun nia sorin, neʼebé hateke ba parte norte. Iha neʼebá haʼu haree fatin ida iha kotuk iha parte oeste. 20 Nia hatete ba haʼu: “Neʼe mak fatin ba amlulik sira atu daʼan naʼan husi sakrifísiu taka sala nian no sakrifísiu sala nian, no mós iha fatin neʼe mak sira tunu sakrifísiu fini nian, atu nuneʼe sira la lori buat ruma sai ba pátiu boot no hadaʼet buat santu ba povu.”
21 Nia lori haʼu ba pátiu boot no lori haʼu liu pátiu nia lidun haat, no haʼu haree pátiu ida iha pátiu boot nia lidun ida-idak. 22 Iha pátiu boot nia lidun haat iha pátiu kiʼik, naruk metru 21 no luan metru 16. Pátiu kiʼik haat neʼe boot hanesan deʼit. 23 Pátiu kiʼik haat neʼe nia laran hada haleʼu ho fatuk sira, no iha fatuk okos iha fatin atu daʼan naʼan husi sakrifísiu sira. 24 Tuirmai nia dehan ba haʼu: “Uma sira-neʼe mak fatin ba ema neʼebé serbisu iha templu atu daʼan naʼan husi povu nia sakrifísiu sira.”
47 Tuirmai nia lori haʼu fila ba fatin atu tama templu, no iha neʼebá haʼu haree bee suli sai husi rai okos iha área atu tama templu hodi suli ba parte leste, tanba templu nia oin hateke ba parte leste. Bee neʼe suli tun husi templu nia sorin loos, liuhusi altár nia parte súl.
2 Tuirmai nia lori haʼu sai liuhusi portaun parte norte nian. Bainhira haʼu sai ona, nia lori haʼu bá pátiu boot nia portaun neʼebé hateke ba parte leste, no haʼu haree bee uitoan suli husi sorin loos.
3 Bainhira mane neʼe sai ba parte leste no kaer hela tali sukat nian iha ninia liman, nia sukat metru 518, komesa husi bee neʼebé besik portaun neʼe. Nia haruka haʼu hakur liu no bee neʼe toʼo deʼit ain-fukun.
4 Tuirmai nia sukat tan metru 518, no nia haruka haʼu hakur liu no bee neʼe toʼo ain-tuur.
Nia sukat tan metru 518, no nia haruka haʼu hakur liu no bee neʼe toʼo knotak.
5 Bainhira nia sukat tan metru 518, bee neʼe sai ona mota boot no haʼu la bele laʼo liu. Tanba mota neʼe kleʼan, entaun ema la bele hakur, no ema bele liu hodi nani deʼit.
6 Nia husu haʼu: “Oan-mane husi ema, ó haree ona ida-neʼe ka?”
Tuirmai nia haruka haʼu laʼo no fila fali ba mota ninin. 7 Bainhira haʼu fila fali, haʼu haree katak iha mota ninin iha ai-hun barak tebes iha sorin-sorin. 8 Tuirmai nia dehan ba haʼu: “Bee neʼe suli ba parte leste no kontinua suli tun liuhusi área Araba no suli tama ba tasi. Bainhira bee neʼe tama ba tasi, bee iha tasi neʼe sei sai diʼak. 9 Kriatura moris sira bele moris iha fatin naran deʼit neʼebé bee neʼe suli bá. Iha neʼebá sei iha ikan barak, tanba bee neʼe sei suli ba neʼebá. Bee iha tasi sei sai diʼak, no buat hotu sei moris iha fatin naran deʼit neʼebé mota neʼe suli bá.
10 “Peskadór sira sei hamriik besik mota ninin husi En-Gedi toʼo En-Eglaim, iha neʼebá sei iha fatin atu habai rede. No sei iha ikan oioin neʼebé barak tebes, hanesan ikan sira iha Tasi Boot.
11 “Tasi neʼe sei iha bee-lihun no debu sira neʼebé sei la sai diʼak. No ema sei husik deʼit fatin sira-neʼe tanba iha masin barak.
12 “Ai-hun oioin neʼebé iha fuan atu han sei moris iha mota ninin nia sorin-sorin. Ai-hun sira-neʼe nia tahan sei la sai namlaek; no sira sei la para atu fó fuan. Fulan-fulan sira sei fó fuan foun, tanba bee neʼebé suli ba sira mak husi fatin santu. Sira-nia fuan sira sai nuʼudar ai-han no tahan sei kura moras.”
13 Jeová, Naʼi Ukun-Naʼin Boot Liu, dehan nuneʼe: “Imi sei fahe rai neʼe ba Izraél nia suku 12 nuʼudar liman-rohan, no José sei simu rai rua nuʼudar liman-rohan. 14 Imi sei simu rai neʼe nuʼudar liman-rohan no hetan rai neʼe ho medida hanesan deʼit. Haʼu jura ona atu fó rai neʼe ba imi-nia beiʼala sira, no agora haʼu fahe neʼe ba imi nuʼudar liman-rohan.
15 “Tuirmai neʼe mak fronteira ba rai neʼe iha parte norte: Fronteira neʼe hahú husi Tasi Boot no liu dalan Hetlon toʼo Zedad, 16 Hamat, Berota, no Sibraim, neʼebé iha entre área Damasku nian no área Hamat nian, toʼo Hazer-Hatikon, neʼebé besik Hauran nia fronteira. 17 Entaun fronteira neʼe sei komesa husi tasi toʼo Hazar-Enon, liuhusi Damasku nia fronteira iha parte norte, no mós liuhusi Hamat nia fronteira. Neʼe mak fronteira iha parte norte.
18 “Fronteira parte leste liu entre Hauran no Damasku no liuhusi Mota Jordaun entre Jílead no rai-Izraél. Imi tenke sukat husi fronteira neʼe toʼo tasi parte leste. Neʼe mak fronteira iha parte leste.
19 “Fronteira parte súl sei hahú husi Tamar toʼo bee Meribat-Kades nian, tuirmai liu Foho-Leet no toʼo Tasi Boot. Neʼe mak fronteira iha parte súl.
20 “Fronteira parte oeste mak Tasi Boot, husi fronteira neʼe saʼe toʼo fatin ida neʼebé iha Lebo-Hamat nia oin. Neʼe mak fronteira iha parte oeste.”
21 “Imi tenke fahe rai neʼe ba malu, ba Izraél nia suku 12. 22 Imi tenke fahe rai ba malu nuʼudar liman-rohan no fahe ba ema estranjeiru sira neʼebé hela ho imi, neʼebé iha oan durante sira hela iha imi-nia leet; no imi tenke haree sira hanesan ema Izraél neʼebé moris iha rai-Izraél. Sira sei simu liman-rohan iha Izraél nia suku sira-nia leet hamutuk ho imi. 23 Imi tenke fó rai nuʼudar liman-rohan ba ema estranjeiru iha área husi suku ida neʼebé nia hela bá”, Jeová, Naʼi Ukun-Naʼin Boot Liu, dehan.
48 “Tuirmai neʼe mak Izraél nia suku, tuir sira-nia naran, hahú husi parte dook liu iha norte: Baliza ba Dan nia rai liu dalan Hetlon toʼo Lebo-Hamat, toʼo Hazar-Enan, liuhusi Damasku nia fronteira neʼebé iha parte norte, iha Hamat nia sorin; no baliza neʼe hahú husi fronteira parte leste toʼo fronteira parte oeste. 2 Aser nia rai mak iha Dan nia baliza sorin, hahú husi fronteira parte leste toʼo fronteira parte oeste. 3 Neftali nia rai mak iha Aser nia baliza sorin, hahú husi fronteira parte leste toʼo fronteira parte oeste. 4 Manases nia rai mak iha Neftali nia baliza sorin, hahú husi fronteira parte leste toʼo fronteira parte oeste. 5 Efraim nia rai mak iha Manases nia baliza sorin, hahú husi fronteira parte leste toʼo fronteira parte oeste. 6 Ruben nia rai mak iha Efraim nia baliza sorin, hahú husi fronteira parte leste toʼo fronteira parte oeste. 7 Judá nia rai mak iha Ruben nia baliza sorin, hahú husi fronteira parte leste toʼo fronteira parte oeste. 8 Iha Judá nia baliza sorin, hahú husi fronteira parte leste toʼo fronteira parte oeste, imi tenke haketak rai nuʼudar kontribuisaun luan metru 12.950, no ninia naruk mós hanesan ho suku seluk nia rai, hahú husi fronteira parte leste toʼo fronteira parte oeste. Templu sei iha rai neʼe nia klaran.
9 “Rai neʼebé imi fó nuʼudar kontribuisaun ba Jeová, nia naruk tenke metru 12.950 no luan metru 5.180. 10 Neʼe mak rai neʼebé fó nuʼudar kontribuisaun santu ba amlulik sira. Rai neʼe nia parte norte naruk metru 12.950, parte oeste luan metru 5.180, no parte leste luan metru 5.180, no parte súl naruk metru 12.950. Jeová nia templu sei iha rai neʼe nia klaran. 11 Rai neʼe sei fó ba Zadok nia oan-mane sira. Sira mak amlulik neʼebé sai santu ona, sira halaʼo sira-nia serbisu ba haʼu no la laʼo sees bainhira ema Izraél no ema Levi laʼo sees husi haʼu. 12 Sira sei simu rai parte balu husi kontribuisaun neʼebé haketak ona nuʼudar buat neʼebé santu liu hotu. Rai neʼe iha ema Levi nia rai sorin.
13 “Ema Levi sei simu rai iha amlulik nia rai sorin, neʼe naruk metru 12.950 no luan metru 5.180. Rai neʼe nia medida mak naruk metru 12.950 no luan metru 5.180. 14 Rai neʼe mak diʼak liu, no sira labele faʼan, troka, ka entrega rai neʼe balu ba ema seluk, tanba neʼe mak buat santu ba Jeová.
15 “Área restu ho luan metru 2.590 no naruk metru 12.950 sei sai nuʼudar rai baibain deʼit atu ema husi sidade bele uza, hodi harii uma no fatin ba animál atu han duʼut. Sidade sei harii iha rai neʼe nia klaran. 16 Sidade neʼe nia medida mak tuirmai neʼe: Baliza iha parte norte metru 2.331, parte súl metru 2.331, parte leste metru 2.331, no parte oeste metru 2.331. 17 Fatin ba animál han duʼut iha sidade nia liʼur mak luan metru 130 iha parte norte, metru 130 iha parte súl, metru 130 iha parte leste, no metru 130 iha parte oeste.
18 “Área restu nia naruk metru 5.180 iha parte leste no metru 5.180 iha parte oeste, ninia naruk mak hanesan ho kontribuisaun santu. No rai neʼe sei fó ai-han ba sira neʼebé serbisu iha sidade neʼe. 19 Ema husi Izraél nia suku hotu neʼebé serbisu iha sidade neʼe sei halo toʼos iha rai neʼe.
20 “Kontribuisaun tomak neʼebé imi tenke fó mak rai kuadradu metru 12.950. Imi tenke haketak neʼe nuʼudar kontribuisaun santu hamutuk ho sidade nia área.
21 “Rai restu iha kontribuisaun santu nia sorin rua no iha sidade nia área sorin rua mak sei sai xefe nian. Rai neʼe besik ho kontribuisaun santu nia baliza iha parte leste no oeste, neʼebé naruk metru 12.950. Rai neʼe nia naruk hanesan ho rai seluk neʼebé iha ninia sorin, no neʼe sei sai xefe nian. Kontribuisaun santu no fatin santu husi templu sei iha rai neʼe nia klaran.
22 “Ema Levi nia rai no sidade nia área sei iha klaran entre xefe nia rai. Xefe nia rai sei iha klaran entre Judá no Benjamin nia baliza.
23 “Kona-ba suku sira seluk, Benjamin nia rai mak husi fronteira parte leste toʼo fronteira parte oeste. 24 Simeão nia rai mak iha Benjamin nia baliza sorin, hahú husi fronteira parte leste toʼo fronteira parte oeste. 25 Isakar nia rai mak iha Simeão nia baliza sorin, hahú husi fronteira parte leste toʼo fronteira parte oeste. 26 Zebulão nia rai mak iha Isakar nia baliza sorin, hahú husi fronteira parte leste toʼo fronteira parte oeste. 27 Gad nia rai mak iha Zebulão nia baliza sorin, hahú husi fronteira parte leste toʼo fronteira parte oeste. 28 Fronteira iha parte súl besik Gad nia baliza hahú husi Tamar toʼo bee Meribat-Kades nian, liu Foho-Leet no toʼo Tasi Boot.
29 Jeová, Naʼi Ukun-Naʼin Boot Liu, dehan: “Imi tenke fahe rai neʼe nuʼudar liman-rohan ba Izraél nia suku sira no neʼe sei sai sira-nia rai.”
30 “Tuirmai neʼe mak dalan atu sai husi sidade: Sidade neʼe nia parte norte naruk metru 2.331.
31 Sidade nia portaun sira sei hanaran tuir Izraél nia suku sira-nia naran. Iha portaun tolu iha parte norte, portaun ida naran Ruben, portaun ida naran Judá, no portaun ida naran Levi.
32 Sidade nia parte leste naruk metru 2.331, no iha portaun tolu: portaun ida naran José, portaun ida naran Benjamin, no portaun ida naran Dan.
33 Sidade nia parte súl naruk metru 2.331, no iha portaun tolu: portaun ida naran Simeão, portaun ida naran Isakar, no portaun ida naran Zebulão.
34 Sidade nia parte oeste naruk metru 2.331, no iha portaun tolu: portaun ida naran Gad, portaun ida naran Aser, no portaun ida naran Neftali.
35 “Sidade neʼe nia sorin hotu sura hamutuk metru 9.324. No husi loron neʼe ba oin, sidade neʼe sei hanaran Jeová Iha Neʼebá.”
DANIEL
1 Iha tinan terseiru husi Liurai Jeoquim nia ukun iha rai-Judá, Liurai Nabukodonozor husi Babilónia mai Jeruzalein no haleʼu sidade neʼe atu ataka. 2 Liutiha tempu balu, Jeová entrega Liurai Jeoquim neʼebé ukun rai-Judá ba Liurai Nabukodonozor nia liman, hamutuk ho sasán balu husi Maromak loos nia uma, no nia lori sasán sira-neʼe ba rai-Sinear ba ninia maromak nia uma. Nia tau sasán sira-neʼe iha fatin neʼebé rai rikusoin sira ba ninia maromak.
3 Depois neʼe, liurai haruka Aspenaz, xefe ba ema-boot iha liurai nia palásiu, atu lori mane Izraél balu mai, inklui mós liurai nia bei-oan no ema-boot sira-nia bei-oan. 4 Ema Izraél sira-neʼe tenke joven no isin diʼak, bonitu, iha matenek no koñesimentu, iha kbiit atu tetu didiʼak no iha matenek atu bele serbí iha liurai nia palásiu. Aspenaz tenke hanorin sira kona-ba oinsá hakerek no koʼalia ema Kaldeia nia língua. 5 Liután neʼe, loron-loron liurai fó ba sira parte balu husi liurai nia hahán neʼebé diʼak no husi ninia tua-uvas neʼebé nia hemu. Sira tenke simu treinu ba tinan tolu, no liutiha tinan tolu neʼe, sira tenke halo serbisu ba liurai.
6 Iha sira-nia leet iha mane joven balu husi suku Judá, joven sira-neʼe mak Daniel, Hananias, Misael, no Azarias. 7 No xefe ba ema-boot sira iha liurai nia palásiu fó naran ba joven sira-neʼe; nia hanaran Daniel nuʼudar Beltessazar, Hananias nuʼudar Sadrak, Misael nuʼudar Mexak, no Azarias nuʼudar Abednego.
8 Maibé Daniel deside iha ninia laran katak nia sei la hafoʼer ninia an ho liurai nia hahán diʼak sira no ho tua-uvas neʼebé liurai hemu. Entaun nia husu lisensa husi xefe ba ema-boot sira atu nia la han buat sira neʼebé bele hafoʼer nia. 9 No Maromak loos halo xefe neʼe hatudu laran-diʼak no laran-sadiʼa ba Daniel. 10 Maibé xefe neʼe dehan ba Daniel: “Haʼu taʼuk ba haʼu-nia naʼi liurai, neʼebé fó ona mandamentu kona-ba imi-nia ai-han no hemu. Oinsá se nia haree imi krekas liu fali joven sira seluk neʼebé tinan hanesan imi? Se nuneʼe, liurai sei fó sala ba haʼu.” 11 Maibé Daniel hatete ba guarda neʼebé xefe neʼe hili ona atu tau matan ba Daniel, Hananias, Misael, no Azarias, hodi dehan: 12 “Favór ida, koko Ita-nia atan sira-neʼe ba loron sanulu; fó deʼit modo ba ami atu han no fó bee ba ami atu hemu; 13 tuirmai kompara toʼok ami-nia isin ho joven seluk neʼebé han liurai nia hahán diʼak sira, depois neʼe, halo ba Ita-nia atan sira-neʼe tuir buat neʼebé Ita haree.”
14 Nuneʼe nia simu sira-nia hanoin no koko sira ba loron sanulu. 15 Liutiha loron sanulu, sira-nia isin diʼak liu fali joven sira seluk hotu neʼebé han liurai nia hahán diʼak sira. 16 Tan neʼe, guarda neʼebé tau matan ba sira kontinua fó modo ba sira atu han duké fó liurai nia hahán diʼak sira no liurai nia tua-uvas. 17 No ba joven naʼin-haat neʼe, Maromak loos fó koñesimentu no kbiit atu komprende kleʼan kona-ba livru no matenek sira hotu; no ba Daniel, Maromak loos fó kbiit atu komprende kona-ba vizaun no mehi sira hotu.
18 Kuandu tempu toʼo ona atu lori joven sira mai hodi hasoru liurai, tuir tempu neʼebé liurai deside ona, xefe ba ema-boot sira iha liurai nia palásiu lori sira bá iha Nabukodonozor nia oin. 19 Bainhira liurai koʼalia ho sira, liurai haree katak husi joven grupu neʼe tomak, la iha ida mak hanesan Daniel, Hananias, Misael, no Azarias; entaun sira kontinua serbí iha liurai nia oin. 20 Kuandu liurai husu sira kona-ba buat hotu neʼebé presiza rezolve homatenek no kbiit atu komprende, liurai sempre haree katak sira-nia resposta diʼak liu dala sanulu se kompara ho amlulik matan-dook sira no siʼikdór sira hotu iha rai tomak neʼebé liurai ukun. 21 No Daniel kontinua hela iha neʼebá toʼo tinan primeiru ba Liurai Ciro nia ukun.
2 Iha tinan segundu husi Liurai Nabukodonozor nia ukun, liurai hetan mehi balu, no ninia laran sente susar tebes toʼo la bele toba-dukur. 2 Nuneʼe liurai fó mandamentu atu bolu amlulik matan-dook, siʼikdór, no ema Kaldeia sira atu konta fali liurai nia mehi ba nia. Entaun sira tama mai no hamriik iha liurai nia oin. 3 Tuirmai liurai dehan ba sira: “Haʼu hetan mehi ida, no haʼu-nia laran sente susar tebes tanba haʼu hakarak hatene kona-ba mehi neʼe.” 4 Ema Kaldeia sira hatán ba liurai iha lia-Aramaiku, hodi dehan: “Oh liurai, ami harohan katak Ita-Boot moris ba nafatin. Konta mehi neʼe ba Ita-nia atan sira, no ami sei esplika ninia signifika ba Ita-Boot.”
5 Liurai hatán ba ema Kaldeia sira: “Neʼe mak haʼu-nia liafuan ikus: Se imi la konta haʼu-nia mehi no esplika ninia signifika ba haʼu, haʼu sei tesi imi ba pedasuk, no haʼu sei halo imi-nia uma sira sai fali sentina públiku. 6 Maibé se imi konta mehi neʼe, no esplika ninia signifika ba haʼu, haʼu sei fó kolen, prezente, no naran-boot ba imi. Entaun konta mehi neʼe ba haʼu no esplika ninia signifika.”
7 Sira hatán ba dala segundu: “Favór ida liurai, konta mehi neʼe ba Ita-nia atan sira, no ami sei esplika ninia signifika ba Ita-Boot.”
8 Liurai hatán: “Haʼu hatene ho didiʼak katak imi koko atu dada tempu, tanba imi hatene ona haʼu-nia liafuan ikus. 9 Se imi la konta mehi neʼe ba haʼu, iha kastigu ida deʼit ba imi hotu. Maibé imi konkorda malu ona atu fó sai liafuan neʼebé falsu no bosok haʼu toʼo situasaun neʼe troka. Tan neʼe, konta mehi neʼe ba haʼu, no haʼu sei hatene katak imi bele esplika ninia signifika.”
10 Ema Kaldeia sira hatán ba liurai: “La iha ema ida iha rai tomak neʼebé bele halo buat neʼebé liurai husu, tanba la iha liurai boot ida ka governadór ida neʼebé husu ona buat hanesan neʼe ba amlulik matan-dook, siʼikdór, no ema Kaldeia sira. 11 Buat neʼebé liurai husu mak susar tebes, no la iha ema ida mak bele fó sai ba liurai, só maromak sira deʼit, neʼebé la hela iha ema nia leet.”
12 Ho ida-neʼe, liurai sai laran-nakali tebes no fó mandamentu atu oho ema matenek hotu iha Babilónia. 13 Bainhira liurai fó sai ona mandamentu neʼe no sira atu oho ona ema matenek hotu, sira mós buka Daniel no ninia maluk sira atu oho.
14 Iha tempu neʼebá, Daniel koʼalia ho kuidadu no ho matenek ba Ariok, kapitaun ba liurai nia guarda, bainhira nia laʼo daudaun atu bá oho ema matenek sira iha Babilónia. 15 Daniel husu ba Ariok, liurai nia kapitaun, hodi dehan: “Tansá mak liurai hasai mandamentu neʼebé makaʼas hanesan neʼe?” Tuirmai Ariok fó-hatene ba Daniel kona-ba neʼe. 16 Entaun Daniel tama no husu ba liurai atu fó tempu ba nia atu esplika mehi neʼe nia signifika ba liurai.
17 Depois neʼe, Daniel fila fali ba ninia uma no konta problema neʼe ba ninia maluk sira, Hananias, Misael, no Azarias. 18 Nia husu sira atu halo orasaun ba Maromak neʼebé iha lalehan atu hatudu laran-sadiʼa, no fó sai segredu neʼe ba sira, atu nuneʼe Daniel no ninia maluk sira la bele mate hamutuk ho ema matenek seluk iha Babilónia.
19 Depois neʼe, Maromak hatudu sai segredu neʼe ba Daniel liuhusi vizaun ida iha kalan. Entaun Daniel fó hahiʼi ba Maromak neʼebé iha lalehan. 20 Daniel hatete:
“Fó hahiʼi ba Maromak nia naran ba nafatin,
Tanba nia mesak deʼit mak iha matenek no kbiit.
21 Nia troka oras no tempu sira,
Nia hasai liurai sira no foti liurai sira,
Nia fó matenek ba ema neʼebé matenek no fó koñesimentu ba sira neʼebé iha kbiit atu tetu didiʼak.
22 Nia hatudu sai buat sira neʼebé kleʼan no buat sira neʼebé subar hela,
Nia hatene buat neʼebé iha nakukun laran,
No naroman hela ho nia.
23 Oh haʼu-nia beiʼala nia Maromak, haʼu fó-agradese ba Ita no hahiʼi Ita,
Tanba Ita fó ona matenek no kbiit ba haʼu.
No agora Ita fó sai ona ba haʼu buat neʼebé ami husu ba Ita;
Ita halo ami hatene buat neʼebé liurai hanoin.”
24 Tuirmai Daniel bá hodi hasoru Ariok, ida neʼebé liurai hili ona atu oho ema matenek sira iha Babilónia, no nia dehan ba Ariok: “Keta oho ema matenek sira iha Babilónia. Lori haʼu ba liurai nia oin, no haʼu sei esplika mehi neʼe nia signifika ba liurai.”
25 Ariok lori lalais Daniel ba liurai nia oin no dehan ba liurai: “Haʼu hetan ona mane ida entre ema dadur sira husi rai-Judá, no nia bele esplika mehi neʼe nia signifika ba liurai.” 26 Liurai hatete ba Daniel, neʼebé naran Beltessazar, hodi dehan: “Ó bele duni konta mehi neʼebé haʼu haree, no esplika ninia signifika ba haʼu ka?” 27 Daniel hatán ba liurai: “Ema matenek, siʼikdór, amlulik matan-dook, no ema sira neʼebé haree fitun la iha kbiit atu fó sai segredu neʼebé liurai husu. 28 Maibé iha Maromak ida iha lalehan neʼebé hatudu sai segredu, no nia fó sai ona ba Liurai Nabukodonozor kona-ba buat neʼebé sei akontese iha loron sira-neʼe nia rohan. Ita-nia mehi no vizaun sira neʼebé Ita haree bainhira Ita toba hela iha kama leten mak tuirmai neʼe:
29 “Kona-ba Ita, oh liurai, iha kama leten Ita hanoin kona-ba buat neʼebé sei akontese iha futuru, no Maromak neʼebé hatudu sai segredu fó sai ona ba Ita kona-ba buat neʼebé atu akontese. 30 No kona-ba haʼu, Maromak hatudu sai segredu neʼe ba haʼu, laʼós tanba haʼu matenek liu ema seluk hotu neʼebé moris daudaun; maibé nia hatudu sai ida-neʼe atu haʼu bele esplika ninia signifika ba liurai, hodi nuneʼe Ita-Boot bele hatene buat neʼebé Ita hanoin.
31 “Oh liurai, iha mehi neʼe Ita-Boot hateke, no haree estátua boot ida. Estátua neʼe boot tebes no nabilan loos, no neʼe hamriik iha Ita-nia oin, no estátua neʼe nia oin halo taʼuk. 32 Estátua neʼe nia ulun halo husi osan-mean neʼebé diʼak, ninia hirus-matan no liman halo husi osan-mutin, ninia kabun no kelen halo husi riti, 33 ninia ain-kabun sira halo husi besi, no ninia ain parte kraik halo husi besi kahur ho rai-mean. 34 Ita kontinua hateke toʼo Ita haree fatuk ida tesi sai tiha husi foho ida, maibé laʼós ho ema nia liman, no fatuk neʼe kona estátua neʼe nia ain neʼebé halo husi besi kahur ho rai-mean no harahun sira. 35 Iha tempu neʼebá, besi, rai-mean, riti, osan-mutin, no osan-mean, sira hotu rahun hamutuk no sai hanesan trigu kulit husi fatin sama trigu nian iha tempu bailoro, no anin huu lakon tiha sira toʼo labele haree hetan tan. Maibé fatuk neʼebé kona estátua neʼe sai foho boot ida, no neʼe halo nakonu rai tomak.
36 “Neʼe mak liurai nia mehi, no agora ami sei esplika ninia signifika ba liurai. 37 Oh liurai, Ita-Boot mak liurai ba liurai sira, ba Ita mak Maromak iha lalehan fó ona ukun, kbiit, forsa, no glória, 38 no ba Ita-nia liman mak nia entrega ona ema sira neʼebé hela iha fatin oioin, no mós animál sira iha rai-luan no manu sira neʼebé semo iha lalehan, no nia halo ona Ita nuʼudar ukun-naʼin ba sira hotu; Ita rasik mak estátua neʼe nia ulun neʼebé halo husi osan-mean.
39 “Maibé depois Ita, ukun ida seluk sei mosu, no neʼe kiʼik liu fali Ita; tuirmai ukun ida seluk, ida terseiru, neʼebé husi riti, no neʼe sei ukun mundu tomak.
40 “Kona-ba ukun númeru haat, neʼe sei forte hanesan besi. Hanesan besi harahun no halo uut buat hotu, sin, hanesan besi neʼebé halo rahun buat oioin, nuneʼe mós ukun neʼe sei harahun no halo uut ukun sira-neʼe hotu.
41 “No hanesan Ita-Boot haree estátua neʼe nia ain parte kraik no ain-fuan halo husi besi kahur ho rai-mean, nuneʼe mós ukun neʼe sei la iha unidade, maski nuneʼe parte balu husi ukun neʼe sei toos hanesan besi, hanesan Ita haree besi kahur ho rai-mean neʼebé mamar. 42 No hanesan ninia ain-fuan halo husi besi kahur ho rai-mean, nuneʼe mós ukun neʼe sei forte iha parte balu no fraku iha parte seluk. 43 Hanesan Ita-Boot haree besi kahur ho rai-mean neʼebé mamar, sira sei kahur ho povu; maibé sira sei la belit hamutuk, ida ba ida seluk, hanesan besi la bele belit ba rai-mean.
44 “Iha liurai sira-neʼe nia tempu, Maromak iha lalehan sei harii ukun ida neʼebé sei nunka lakon. No ukun neʼe sei la entrega ba povu sira seluk. Ukun neʼe sei harahun no halakon liurai sira-neʼe hotu nia ukun, no ukun neʼe mesak mak sei hamriik ba nafatin. 45 Neʼe sei mosu tuir buat neʼebé Ita haree bainhira fatuk ida tesi sai husi foho ida, maibé laʼós ho ema nia liman, no fatuk neʼe harahun besi, riti, rai-mean, osan-mutin, no osan-mean. Maromak neʼebé Boot hatudu sai ona ba liurai kona-ba buat neʼebé sei akontese iha futuru. Mehi neʼe mak loos, no Ita bele fiar buat neʼebé haʼu esplika.”
46 Tuirmai Liurai Nabukodonozor hakneʼak ho oin ba rai iha Daniel nia oin no hatudu respeitu ba Daniel. No liurai fó mandamentu atu fó prezente no insensu ba Daniel. 47 Liurai hatete ba Daniel: “Loloos ó-nia Maromak mak Maromak neʼebé aas liu maromak sira seluk, no Naʼi ba liurai sira, no Maromak neʼebé hatudu sai segredu, tanba ó bele esplika segredu neʼe.” 48 Tuirmai liurai hasaʼe tan Daniel nia pozisaun no fó nia prezente diʼak barak, no foti Daniel nuʼudar ukun-naʼin ba distritu Babilónia tomak no nuʼudar ulun-naʼin ba ema-boot sira hodi tau matan ba ema matenek hotu iha Babilónia. 49 No tanba Daniel husu ba liurai, entaun liurai foti Sadrak, Mexak, no Abednego hodi tau matan ba serbisu iha distritu Babilónia, maibé Daniel serbí iha liurai nia palásiu.
3 Liurai Nabukodonozor halo estátua ida husi osan-mean, neʼebé aas metru 27 no luan metru 2,7. Nia tau estátua neʼe iha rai-tetuk Dura iha distritu Babilónia. 2 Tuirmai Liurai Nabukodonozor haruka lia-menon atu halibur ulun-naʼin ba distritu sira, ema-boot sira, governadór sira, konsellu-naʼin sira, xefe sira neʼebé toma konta liurai nia rikusoin, juis sira, tesi-lia naʼin sira, no administradór hotu ba distritu sira atu mai hodi tuir inaugurasaun ba estátua neʼebé Liurai Nabukodonozor halo ona.
3 Nuneʼe, ulun-naʼin ba distritu sira, ema-boot sira, governadór sira, konsellu-naʼin sira, xefe sira neʼebé toma konta liurai nia rikusoin, juis sira, tesi-lia naʼin sira, no administradór hotu ba distritu sira mai hamutuk hodi tuir inaugurasaun ba estátua neʼebé Liurai Nabukodonozor halo ona. No sira hamriik iha estátua nia oin, estátua neʼebé Nabukodonozor halo ona. 4 Ema neʼebé fó avizu hakilar ho lian makaʼas, hodi dehan: “Oh povu sira, no nasaun sira neʼebé koʼalia língua oioin, liurai fó mandamentu ba imi 5 katak bainhira imi rona lian husi dikur, flauta, arpa kiʼik, no instrumentu oioin neʼebé iha tali, flauta boot, no instrumentu múzika nian seluk hotu, imi tenke hakneʼak no hakruʼuk an hodi adora estátua osan-mean neʼebé Liurai Nabukodonozor halo ona. 6 Ema naran deʼit neʼebé la hakneʼak no hakruʼuk an hodi adora estátua neʼe, ami sei soe kedas nia ba fornu neʼebé ahi lakan makaʼas.” 7 Entaun, bainhira povu sira, no nasaun sira neʼebé koʼalia língua oioin rona lian husi dikur, flauta, arpa kiʼik, no instrumentu oioin neʼebé iha tali, no instrumentu múzika nian seluk hotu, sira hotu hakneʼak no hakruʼuk an hodi adora estátua osan-mean neʼebé Liurai Nabukodonozor halo ona.
8 No iha tempu neʼe, ema Kaldeia balu hakat mai oin no duun ema judeu sira. 9 Sira hatete ba Liurai Nabukodonozor: “Oh liurai, ami harohan katak Ita-Boot moris ba nafatin. 10 Oh liurai, Ita fó ona mandamentu katak bainhira ema hotu rona lian husi dikur, flauta, arpa kiʼik, no instrumentu oioin neʼebé iha tali, flauta boot, no instrumentu múzika nian seluk hotu, sira tenke hakneʼak no hakruʼuk an hodi adora estátua osan-mean; 11 no katak, ema naran deʼit neʼebé la hakneʼak no hakruʼuk an hodi adora estátua neʼe tenke soe ba fornu neʼebé ahi lakan makaʼas. 12 Maibé iha mane Judeu balu neʼebé Ita-Boot hili ona atu tau matan ba serbisu iha distritu Babilónia la halo tuir Ita-nia mandamentu neʼe; sira mak Sadrak, Mexak, no Abednego. Oh liurai, mane sira-neʼe la respeitu Ita. Sira la serbí Ita-nia maromak sira, no sira lakohi adora estátua osan-mean neʼebé Ita halo ona.”
13 Tuirmai Nabukodonozor hirus makaʼas no haruka atu lori Sadrak, Mexak, no Abednego mai. Entaun ema lori mane sira-neʼe mai iha liurai nia oin. 14 Nabukodonozor hatete ba sira: “Sadrak, Mexak, no Abednego, haʼu rona katak imi la serbí haʼu-nia maromak sira, no imi lakohi adora estátua osan-mean neʼebé haʼu halo ona, neʼe loos ka lae? 15 No agora, bainhira imi rona lian husi dikur, flauta, arpa kiʼik, no instrumentu oioin neʼebé iha tali, flauta boot, no instrumentu múzika nian seluk hotu, se imi hakneʼak no hakruʼuk an hodi adora estátua neʼebé haʼu harii ona, neʼe diʼak. Maibé se imi lakohi adora, haʼu sei soe kedas imi ba fornu neʼebé ahi lakan makaʼas. No maromak ida neʼebé mak bele salva imi husi haʼu-nia liman?”
16 Sadrak, Mexak, no Abednego hatán ba liurai: “Oh Nabukodonozor, ami la presiza hatán ba Ita-Boot kona-ba neʼe. 17 Oh liurai, se Ita soe ami ba fornu laran, ami-nia Maromak neʼebé ami serbí iha kbiit atu bele salva ami husi fornu neʼebé ahi lakan makaʼas, no salva ami husi Ita-nia liman. 18 Maibé se nia la salva ami, oh liurai, ami hakarak Ita hatene katak ami sei la serbí Ita-nia maromak sira ka adora estátua osan-mean neʼebé Ita halo ona.”
19 Tuirmai Nabukodonozor sai laran-nakali tebes ba Sadrak, Mexak, no Abednego toʼo ninia oin troka, no nia fó mandamentu atu halo manas liután fornu neʼe ba dala hitu liu fali baibain. 20 Nia haruka mane kbiit boot balu husi ninia soldadu sira atu kesi Sadrak, Mexak, no Abednego hodi soe sira ba fornu neʼebé ahi lakan makaʼas.
21 Entaun sira kesi mane naʼin-tolu neʼe neʼebé hatais hela sira-nia unuk laran no unuk liʼur, sira-nia xapeu, no unuk sira seluk, no soe sira ba fornu neʼebé ahi lakan makaʼas. 22 Tanba liurai nia mandamentu mak makaʼas tebes no fornu neʼe manas tebetebes, mane sira neʼebé lori Sadrak, Mexak, no Abednego mak mate tanba ahi nia lakan makaʼas. 23 Maibé mane naʼin-tolu neʼe, Sadrak, Mexak, no Abednego, neʼebé kesi metin hela, monu tama ba fornu neʼebé lakan makaʼas.
24 Depois neʼe, Liurai Nabukodonozor sai taʼuk no hamriik kedas no dehan ba ukun-naʼin sira: “Ita kesi mane naʼin-tolu no soe sira ba ahi, loos ka lae?” Sira hatán ba liurai: “Sin, oh liurai.” 25 Liurai hatete: “Haree bá! Iha mane naʼin-haat laʼo bá-mai ho livre iha ahi laran, no ahi la han sira, no mane númeru haat neʼe haree hanesan maromak sira-nia oan-mane.”
26 Nabukodonozor hakbesik ba odamatan husi fornu neʼebé ahi lakan makaʼas no dehan: “Oh Maromak Aas Liu Hotu nia atan, Sadrak, Mexak, no Abednego, sai mai!” Entaun Sadrak, Mexak, no Abednego sai husi ahi laran. 27 No ulun-naʼin ba distritu sira, ema-boot sira, governadór sira, ukun-naʼin sira neʼebé halibur iha neʼebá, haree katak ahi la han mane sira-neʼe nia isin; no sira-nia fuuk lahan ida mós la mutuk, sira-nia unuk haree hanesan deʼit ho uluk, no ema la horon ahi nia suar iha sira.
28 Tuirmai Nabukodonozor dehan: “Fó hahiʼi ba Maromak neʼebé Sadrak, Mexak, no Abednego adora, no neʼebé haruka ninia anju hodi salva ninia atan sira. Sira tau fiar ba nia no kontra liurai nia mandamentu, no prontu atu mate duké serbí ka adora maromak sira seluk; sira adora deʼit sira-nia Maromak rasik. 29 Tan neʼe, haʼu fó sai mandamentu ida katak se povu ruma husi nasaun sira ka husi língua naran deʼit, hatete buat ruma hodi kontra Maromak neʼebé Sadrak, Mexak, no Abednego adora, ema sira-neʼe tenke tesi tiha ba pedasuk, no sira-nia uma sei sai fali sentina públiku; tanba la iha maromak seluk neʼebé bele fó salvasaun hanesan Maromak neʼe.”
30 Depois neʼe, liurai fó tan pozisaun boot ba Sadrak, Mexak, no Abednego iha distritu Babilónia.
4 “Husi Liurai Nabukodonozor ba povu hotu, no nasaun sira neʼebé koʼalia língua oioin iha rai hotu: Dame hela ho imi! 2 Haʼu kontente atu fó sai kona-ba sinál no milagre sira neʼebé Maromak Aas Liu Hotu halo ona ba haʼu. 3 Nia hatudu sinál boot oioin, no ninia milagre sira mak kmanek tebes! Ninia ukun mak rohan-laek, no nia ukun husi jerasaun ba jerasaun.
4 “Haʼu, Nabukodonozor, moris ho hakmatek iha haʼu-nia uma no moris diʼak iha haʼu-nia palásiu. 5 Haʼu hetan mehi ida neʼebé halo haʼu taʼuk. Nuʼudar haʼu toba hela iha kama leten, mehi neʼe no vizaun iha haʼu-nia neon halo haʼu taʼuk. 6 Entaun haʼu fó sai mandamentu ida hodi haruka ema matenek hotu iha Babilónia atu mai hodi nuneʼe sira bele esplika mehi neʼe nia signifika ba haʼu.
7 “Iha tempu neʼebá, amlulik matan-dook, siʼikdór, ema Kaldeia sira, no ema sira neʼebé haree fitun tama mai hasoru haʼu. Bainhira haʼu konta haʼu-nia mehi ba sira, sira la bele esplika neʼe mai haʼu. 8 Ikusmai Daniel tama hodi hamriik iha haʼu-nia oin; Daniel mós iha naran Beltessazar hodi tuir haʼu-nia maromak nia naran, no Daniel iha espíritu husi maromak sira neʼebé santu, no haʼu konta haʼu-nia mehi ba nia:
9 “‘Oh Beltessazar, ulun-naʼin ba amlulik matan-dook sira, haʼu hatene ho didiʼak katak ó iha espíritu husi maromak sira neʼebé santu, no la iha segredu ida neʼebé susar liu ba ó atu fó sai. Entaun, esplika vizaun sira neʼebé haʼu haree iha haʼu-nia mehi no ninia signifika.
10 “‘Iha vizaun neʼebé haʼu haree iha haʼu-nia neon bainhira haʼu toba iha kama leten, haʼu haree ai-hun ida iha rai nia klaran, no neʼe aas tebetebes. 11 Ai-hun neʼe sai boot no forte, no ninia tutun aas toʼo lalehan, no ema hotu iha rai tomak bele haree ai-hun neʼe. 12 Ai neʼe nia tahan buras tebes, no ninia fuan barak loos, no kriatura hotu han husi ai neʼe tanba iha hahán barak. Animál fuik sira husi rai-luan buka mahon iha ninia okos, no manu sira neʼebé semo iha lalehan hela iha ninia sanak sira, no kriatura hotu han husi ai neʼe.
13 “‘Nuʼudar haʼu haree vizaun neʼe iha haʼu-nia neon bainhira haʼu toba iha haʼu-nia kama leten, haʼu haree guarda santu ida, tun husi lalehan. 14 Nia hakilar ho lian makaʼas: “Tesi tiha ai-hun neʼe, tesi tiha ninia sanak sira, hasai tiha ninia tahan sira, no halo namkari ninia fuan sira! Husik animál fuik sira halai husi ninia okos, no manu sira husi ninia sanak sira. 15 Maibé husik hela ninia hun rohan ho abut iha rai, iha duʼut nia leet iha rai-luan, no bobar metin ho besi no riti. Husik nia sai bokon ho mahobeen husi lalehan, no husik nia hela hamutuk ho animál fuik sira iha ai-horis sira-nia leet iha rai. 16 Ninia laran sei troka husi ema nia laran hodi sai fali animál nia laran, no husik deʼit nia toʼo tempu hitu liutiha. 17 Neʼe fó sai liuhusi guarda sira, no desizaun neʼe fó sai liuhusi santu sira-nia liafuan, atu nuneʼe ema bele hatene katak Maromak Aas Liu Hotu mak Ukun-Naʼin ba ema nia ukun no katak nia entrega ukun neʼe ba ema naran deʼit neʼebé nia hakarak, inklui mós entrega ba ema neʼebé kiʼik liu.”
18 “‘Neʼe mak mehi neʼebé haʼu, Liurai Nabukodonozor, hetan. Agora ó, Beltessazar, esplika ninia signifika ba haʼu, tanba ema matenek sira seluk hotu iha haʼu-nia ukun la bele esplika neʼe ba haʼu. Maibé ó bele esplika ida-neʼe, tanba ó iha espíritu husi maromak sira neʼebé santu.’
19 “Iha tempu neʼebá, Daniel neʼebé hanaran Beltessazar, sai hakfodak ba tempu uitoan, no ninia hanoin komesa halo nia sai taʼuk.
“Liurai hatete ba nia: ‘Oh Beltessazar, keta husik mehi neʼe no ninia signifika halo ó taʼuk.’
“Beltessazar hatán: ‘Oh haʼu-nia naʼi, haʼu hein katak mehi neʼe kona deʼit ema sira neʼebé odi Ita-Boot, no ninia signifika kona deʼit Ita-nia inimigu sira.
20 “‘Ai-hun neʼebé Ita-Boot haree neʼebé sai boot no forte, no ninia tutun aas toʼo lalehan, no ema hotu iha rai tomak bele haree ai-hun neʼe, 21 no ninia tahan buras tebes, no ninia fuan barak loos, no kriatura hotu han husi ai neʼe, no animál fuik sira husi rai-luan buka mahon iha ninia okos, no manu sira neʼebé semo iha lalehan hela iha ninia sanak sira, 22 neʼe mak kona-ba Ita-Boot, oh liurai, tanba Ita sai boot no forte ona, no Ita-nia naran-boot aumenta toʼo iha lalehan, no Ita-nia ukun toʼo rai nia rohan.
23 “‘No liurai haree guarda santu ida, tun husi lalehan, neʼebé dehan: “Tesi tiha ai-hun neʼe no harahun tiha, maibé husik hela ninia hun rohan ho abut iha rai, iha duʼut nia leet iha rai-luan, no bobar metin ho besi no riti. Husik nia sai bokon ho mahobeen husi lalehan, no husik nia hela hamutuk ho animál fuik sira iha rai-luan toʼo tempu hitu liutiha.” 24 Oh liurai, neʼe mak ninia signifika; neʼe mak desizaun husi Maromak Aas Liu Hotu neʼebé sei sai loos ba haʼu-nia naʼi liurai. 25 Ema sei duni sai Ita-Boot husi ema nia leet, no Ita sei hela entre animál fuik sira iha rai-luan, no Ita sei han duʼut hanesan karau-aman sira; no Ita sei sai bokon ho mahobeen husi lalehan, toʼo tempu hitu liutiha, toʼo Ita hatene katak Maromak Aas Liu Hotu mak Ukun-Naʼin ba ema nia nasaun sira no katak nia entrega ukun neʼe ba ema neʼebé nia hakarak.
26 “‘Maibé tanba sira dehan husik hela ai neʼe nia hun rohan ho abut, entaun Ita-nia ukun sei sai fali Ita-nian bainhira Ita hatene ona katak iha Ida neʼebé ukun iha lalehan. 27 Tan neʼe, oh liurai, haʼu hein katak Ita sei simu haʼu-nia konsellu. Hasees an husi Ita-nia sala bá hodi halo fali buat neʼebé loos, no husik tiha Ita-nia sala bá hodi hatudu laran-sadiʼa ba ema kiak. Karik hodi halo nuneʼe Ita bele kontinua moris diʼak.’”
28 Buat hotu neʼe akontese duni ba Liurai Nabukodonozor.
29 Fulan sanulu-resin-rua liutiha, liurai laʼo daudaun iha uma leten iha ninia palásiu iha Babilónia. 30 Liurai dehan: “Neʼe mak Babilónia Boot neʼebé haʼu rasik harii nuʼudar liurai nia uma. Haʼu harii sidade neʼe ho haʼu-nia forsa no kbiit atu hatudu sai haʼu-nia glória no kmanek.”
31 Bainhira liurai sei koʼalia hela, lian ida tun husi lalehan: “Oh Liurai Nabukodonozor, liafuan tuirmai neʼe fó sai tiha ona ba Ita: ‘Ukun neʼe hasai ona husi Ita, 32 no ema sei duni sai Ita husi ema nia leet. Ita sei hela entre animál fuik sira iha rai-luan, no Ita sei han duʼut hanesan karau-aman sira, no tempu hitu sei liutiha, toʼo Ita hatene katak Maromak Aas Liu Hotu mak Ukun-Naʼin ba ema nia nasaun sira no katak nia entrega ukun neʼe ba ema naran deʼit neʼebé nia hakarak.’”
33 Iha tempu neʼe duni, liafuan neʼe sai loos ba Nabukodonozor. Ema duni sai nia husi ema nia leet, no nia komesa han duʼut hanesan karau-aman sira, no ninia isin sai bokon ho mahobeen husi lalehan, toʼo nia fuuk sai naruk hanesan manu-makikit nia fulun no ninia liman-kukun ho ain-kukun naruk hanesan manu nia ain-kukun.
34 “Iha tempu neʼe nia rohan, haʼu, Nabukodonozor, hateke ba lalehan, no haʼu-nia kbiit atu hanoin fila fali ba haʼu; haʼu fó hahiʼi ba Maromak Aas Liu Hotu, no haʼu fó hahiʼi no glória ba Ida neʼebé moris ba nafatin, tanba ninia ukun mak rohan-laek no nia ukun husi jerasaun ba jerasaun. 35 Ema hotu neʼebé hela iha rai la importante se kompara ho Maromak, no nia halo deʼit ninia hakarak iha tropa lalehan nia leet no iha ema iha rai nia leet. No la iha ema ida bele hapara nia ka dehan ba nia: ‘Saida mak Ita halo?’
36 “Iha tempu neʼe haʼu-nia kbiit atu hanoin fila fali ba haʼu, no haʼu simu fali glória husi haʼu-nia ukun, haʼu-nia kmanek, no haʼu-nia dignidade. Ema-boot sira no ukun-naʼin sira buka haʼu ho laran-manas, no haʼu simu fali haʼu-nia ukun, no haʼu simu naran-boot liután.
37 “Agora, haʼu, Nabukodonozor, fó hahiʼi no fó glória ba Liurai lalehan nian, tanba ninia serbisu hotu mak tuir lia-loos no ninia dalan sira mak justisa, no tanba nia bele hamoe ema sira neʼebé foti an.”
5 Kona-ba Liurai Belsazar, nia halo festa boot ba ninia ema-boot naʼin-rihun ida, no nia hemu tua-uvas iha sira-nia oin. 2 Bainhira Belsazar lanu hela, nia haruka ema atu lori mai sasán sira neʼebé halo husi osan-mean no osan-mutin, neʼebé ninia aman Nabukodonozor foti husi templu iha Jeruzalein, hodi nuneʼe liurai no ninia ema-boot sira, ninia feen sira no feen-kiʼik sira bele hemu ho buat sira-neʼe. 3 Tuirmai, sira lori tama sasán sira neʼebé halo husi osan-mean, neʼebé uluk foti husi templu iha Maromak nia uma iha Jeruzalein, no liurai ho ninia ema-boot sira, ninia feen sira no feen-kiʼik sira hemu ho buat sira-neʼe. 4 Sira hemu tua-uvas, no sira fó hahiʼi ba maromak sira neʼebé halo husi osan-mean, osan-mutin, riti, besi, ai, no fatuk.
5 Iha tempu neʼe duni, ema nia liman-fuan mosu no komesa hakerek iha didin neʼebé besik ahi-oan fatin iha liurai nia palásiu, no liurai bele haree liman neʼe nia kotuk nuʼudar liman neʼe hakerek daudaun. 6 Ho ida-neʼe, liurai nia oin sai kamutis no ninia hanoin halo nia sai taʼuk, ninia kidan no ain-tuur sira komesa nakdedar.
7 Liurai hakilar ho lian makaʼas hodi bolu siʼikdór sira, ema Kaldeia sira, no ema sira neʼebé haree fitun. Liurai koʼalia ba ema matenek sira iha Babilónia, hodi dehan: “Mane neʼebé lee letra sira-neʼe no esplika ninia signifika mai haʼu, haʼu sei tau hena kór-violeta ba nia, tara korrente osan-mean ida iha ninia kakorok, no nia sei tuur iha pozisaun terseiru atu ukun.”
8 Tuirmai, liurai nia ema matenek hotu tama mai, maibé sira labele lee letra sira-neʼe no labele esplika ninia signifika ba liurai. 9 Nuneʼe Liurai Belsazar sai taʼuk tebes no ninia oin sai kamutis; no ema-boot sira sai bilán.
10 Liurai-feto tama ba fatin festa nian tanba nia rona liafuan husi liurai no ema-boot sira. Liurai-feto hatete: “Oh liurai, haʼu harohan katak Ita-Boot moris ba nafatin. Keta husik Ita-nia hanoin halo Ita sai taʼuk, no keta husik Ita-nia oin sai kamutis. 11 Iha mane ida iha Ita-nia ukun neʼebé iha espíritu husi maromak sira neʼebé santu. Iha Ita-nia aman nia tempu, mane neʼe iha koñesimentu no iha kbiit atu komprende kleʼan no iha matenek hanesan matenek husi maromak sira. Ita-nia aman Liurai Nabukodonozor hili nia nuʼudar ulun-naʼin ba amlulik matan-dook, siʼikdór, ema Kaldeia, no ema sira neʼebé haree fitun; Oh liurai, Ita-nia aman halo nuneʼe. 12 Tanba Daniel, neʼebé liurai hanaran Beltessazar, nia iha neon neʼebé matenek tebes, iha koñesimentu, no iha kbiit atu komprende kleʼan hodi bele esplika mehi sira, ai-sasiʼik sira, no bele rezolve problema neʼebé susar. Entaun bolu Daniel mai, no nia sei esplika letra sira-neʼe nia signifika ba Ita.”
13 Nuneʼe ema lori Daniel mai iha liurai nia oin. Liurai husu ba Daniel: “Ó mak Daniel neʼebé dadur hamutuk ho ema sira husi rai-Judá, neʼebé haʼu-nia aman liurai lori sai husi rai-Judá ka? 14 Haʼu rona ona kona-ba ó, katak ó iha espíritu husi maromak sira, ó iha koñesimentu, iha kbiit atu komprende kleʼan no ó matenek liu. 15 Haʼu bolu ona ema matenek no siʼikdór sira mai iha haʼu-nia oin atu lee letra sira-neʼe no esplika ninia signifika ba haʼu, maibé sira labele esplika. 16 Maibé haʼu rona ona kona-ba ó, katak ó bele esplika segredu sira no rezolve problema neʼebé susar. No agora se ó bele lee letra sira-neʼe no esplika ninia signifika mai haʼu, haʼu sei tau hena kór-violeta ba ó, tara korrente osan-mean ida iha ó-nia kakorok, no ó sei tuur iha pozisaun terseiru atu ukun.”
17 Tuirmai Daniel hatán ba liurai: “Ita bele rai deʼit Ita-nia prezente no fó prezente sira-neʼe ba ema seluk. Maibé, haʼu sei lee letra sira-neʼe ba liurai no esplika ninia signifika ba liurai. 18 No kona-ba Ita, oh liurai, Maromak Aas Liu Hotu fó ona ukun ba Ita-nia aman Nabukodonozor no mós fó naran-boot, respeitu, no kmanek. 19 Tanba Maromak fó naran-boot ba nia, entaun povu hotu, no nasaun sira neʼebé koʼalia língua oioin nakdedar ho taʼuk iha ninia oin. Ema naran deʼit neʼebé nia hakarak oho ka husik moris, nia halo nuneʼe, no ema naran deʼit neʼebé nia hakarak foti aas ka hamoe, nia halo nuneʼe. 20 Maibé kuandu nia sai foti an no ulun-toos, toʼo nia hatudu hahalok foti an, Maromak hatún nia husi ninia kadunan ba ninia ukun, no Maromak hasai tiha ninia dignidade husi nia. 21 Ema duni sai nia husi ema nia leet, no ninia laran sai hanesan animál nian, no nia hela entre kuda-burru fuik sira. Nia han duʼut hanesan karau-aman sira, no ninia isin sai bokon ho mahobeen husi lalehan, toʼo nia hatene katak Maromak Aas Liu Hotu mak Ukun-Naʼin ba ema nia nasaun sira no katak Maromak entrega ukun neʼe ba ema neʼebé nia hakarak.
22 “Kona-ba Ita-Boot, Belsazar, neʼebé nuʼudar ninia oan-mane, Ita la haraik an maski Ita hatene buat hotu neʼe. 23 Maibé, Ita sai foti an hasoru Naʼi iha lalehan, no Ita haruka ema lori mai sasán sira husi ninia uma atu fó ba Ita. Tuirmai Ita no Ita-nia ema-boot sira, Ita-nia feen sira no feen-kiʼik sira hemu tua-uvas hodi uza sasán sira-neʼe no fó hahiʼi ba maromak sira neʼebé halo husi osan-mean, osan-mutin, riti, besi, ai, no fatuk, maromak sira neʼebé labele haree no labele rona buat ida no la hatene buat ida. Ita-Boot la fó glória ba Maromak neʼebé fó moris ba Ita no Ita-nia moris tomak depende ba nia. 24 Tan neʼe, nia hamosu liman ida no hakerek letra sira-neʼe. 25 Letra neʼebé hakerek ona mak tuirmai neʼe: MENE, MENE, TEKEL, no PARSIN.
26 “Liafuan sira-neʼe nia signifika mak tuirmai: MENE, Maromak sura ona loron sira ba Ita-Boot nia ukun no halakon ida-neʼe.
27 “TEKEL, Maromak tetu ona Ita iha dasin no Ita kmaan liu.
28 “PERES, Maromak fahe ona Ita-nia ukun no fó neʼe ba ema Média no Pérsia.”
29 Depois neʼe, Belsazar haruka ema atu tau hena kór-violeta ba Daniel, no tara korrente osan-mean ida iha ninia kakorok; no sira fó avizu kona-ba Daniel katak nia sei tuur iha pozisaun terseiru atu ukun.
30 Iha kalan neʼe kedas mak ema oho Belsazar, liurai ema Kaldeia nian. 31 No Dário, ema Média, mak simu fali ukun neʼe; iha tempu neʼebá nia maizumenus tinan 62.
6 Dário hanoin katak diʼak atu hili ulun-naʼin hamutuk naʼin-120 atu tau matan ba distritu sira iha ninia rai tomak. 2 No iha ukun-naʼin naʼin-tolu mak tau matan ba sira, no ukun-naʼin sira-neʼe ida mak Daniel; no ulun-naʼin sira tenke fó relatóriu ba ukun-naʼin sira-neʼe, atu nuneʼe liurai la bele lakon osan. 3 No Daniel hatudu sai katak nia matenek liu fali ukun-naʼin no ulun-naʼin sira seluk, tanba nia iha neon neʼebé matenek tebes, no liurai hanoin atu hasaʼe Daniel nia pozisaun ba ukun neʼe tomak.
4 Iha tempu neʼebá, ukun-naʼin sira no ulun-naʼin sira buka razaun atu duun Daniel kona-ba ninia serbisu ba liurai, maibé sira la bele hetan razaun atu duun nia no la bele hetan sala ida, tanba nia laran-metin no ema la hetan buat aat ida ka sala ida iha nia. 5 Tuirmai mane sira-neʼe dehan: “Ita sei la hetan razaun ida iha Daniel atu bele duun nia kona-ba ninia serbisu, maibé ita bele lasu nia atu kontra liurai hodi uza ninia Maromak nia lei .”
6 Entaun, ukun-naʼin sira hamutuk ho ulun-naʼin sira tama nuʼudar grupu hodi hasoru liurai, no sira dehan ba liurai: “Oh Liurai Dário, ami harohan katak Ita-Boot moris ba nafatin. 7 Ukun-naʼin sira husi liurai nia ukun, ema-boot sira, ulun-naʼin ba distritu, liurai nia konsellu-naʼin sira, no governadór sira hotu koʼalia hamutuk ona atu halo lei ida hodi bandu katak ba loron 30, ema naran deʼit neʼebé harohan ba maromak ruma ka ema ruma, no la harohan ba Ita deʼit, oh liurai, ema neʼe tenke soe tiha ba leaun nia kuak. 8 Agora, oh liurai, ami husu atu Ita halo lei ida no asina ida-neʼe, hodi nuneʼe lei neʼe la bele troka, tanba lei husi ema Média no Pérsia la bele troka.”
9 Entaun Liurai Dário asina lei neʼebé bandu kona-ba neʼe.
10 Maibé bainhira Daniel hatene katak liurai asina ona lei neʼe, nia bá kedas ninia uma. Uma neʼe iha kuartu iha leten no iha janela nakloke neʼebé hateke ba Jeruzalein. No dala tolu iha loron ida nia laran, nia hakneʼak no halo orasaun no fó hahiʼi iha ninia Maromak nia oin, hanesan nia halo beibeik ona antes neʼe. 11 Iha tempu neʼe, mane sira-neʼe tama hamutuk no haree Daniel harohan daudaun hodi husu laran-sadiʼa iha ninia Maromak nia oin.
12 Entaun sira hakbesik ba liurai no fó-hanoin nia kona-ba lei neʼebé liurai hasai ona, hodi dehan: “Ita asina ona lei ida neʼebé dehan katak ba loron 30, ema naran deʼit neʼebé harohan ba maromak ruma ka ba ema ruma, no la harohan ba Ita deʼit, oh liurai, ema neʼe tenke soe tiha ba leaun kuak, loos ka lae?” Liurai hatán: “Loos, lei neʼe metin ona hodi tuir lei husi ema Média no Pérsia, neʼebé la bele troka.” 13 Sira hatete kedas ba liurai, hodi dehan: “Daniel, neʼebé dadur hamutuk ho ema sira husi rai-Judá, la hatudu respeitu ba Ita, oh liurai, no mós la respeitu lei neʼebé Ita asina ona, maibé nia halo orasaun dala tolu iha loron ida ba ninia Maromak.” 14 Bainhira liurai rona ida-neʼe, nia sai neon-susar tebes, no nia koko hanoin kona-ba dalan atu salva Daniel; no toʼo loro-matan tun nia hakaʼas an buka dalan oioin atu salva Daniel. 15 Ikusmai, mane sira-neʼe tama nuʼudar grupu hodi hasoru liurai, no sira dehan ba liurai: “Oh liurai, Ita-Boot hatene katak tuir lei ema Média no Pérsia nian, bainhira liurai hasai ona lei ida ka bandu buat ruma, neʼe la bele troka.”
16 Tan neʼe, liurai haruka ema lori Daniel no soe nia ba leaun nia kuak. Liurai hatete ba Daniel: “Ó-nia Maromak neʼebé ó kontinua serbí sei salva ó.” 17 Tuirmai sira lori fatuk ida mai no tau iha kuak neʼe nia ibun, no liurai tau selus ba fatuk neʼe ho ninia kadeli selus nian no mós ema-boot sira-nia kadeli selus nian, hodi nuneʼe la bele troka buat ida kona-ba Daniel nia kazu.
18 Tuirmai liurai laʼo ba ninia palásiu. Nia jejún durante kalan neʼe no lakohi rona múzika ruma, no nia toba la dukur. 19 Ikusmai, bainhira rai naroman uitoan ona, liurai hamriik no bá lalais leaun kuak. 20 Nuʼudar nia hakbesik ba kuak neʼe, nia bolu Daniel ho lian triste. Liurai husu Daniel, hodi dehan: “Oh Daniel, Maromak moris nia atan, ó-nia Maromak neʼebé ó kontinua serbí salva ona ó husi leaun sira ka lae?” 21 Daniel hatán kedas ba liurai: “Oh liurai, haʼu harohan katak Ita-Boot moris ba nafatin. 22 Haʼu-nia Maromak haruka ninia anju hodi taka leaun sira-nia ibun, no sira la hakanek haʼu, tanba nia haree katak haʼu la halo sala iha ninia oin; no mós haʼu la halo sala hasoru Ita, oh liurai.”
23 Liurai kontente tebes, no nia haruka ema atu hasai Daniel husi kuak neʼe. Bainhira sira hasai tiha Daniel husi kuak neʼe, sira haree katak nia la iha kanek ida, tanba nia tau fiar ba ninia Maromak.
24 Tuirmai liurai haruka atu lori mai mane sira neʼebé duun Daniel, no soe sira ba leaun nia kuak, hamutuk ho sira-nia oan sira no sira-nia feen. Antes sira tun toʼo kuak neʼe nia okos, leaun sira ataka sira no harahun sira-nia ruin hotu.
25 Tuirmai Liurai Dário hakerek ba povu hotu, no ba nasaun sira neʼebé koʼalia língua oioin neʼebé hela iha rai hotu: “Dame hela ho imi! 26 Haʼu fó sai mandamentu ida katak iha rai hotu neʼebé haʼu ukun, povu tenke nakdedar no taʼuk iha Daniel nia Maromak nia oin. Tanba nia mak Maromak neʼebé moris no nia iha ba nafatin. Ninia ukun sei nunka lakon, no nia ukun ba nafatin. 27 Nia proteje no salva ninia povu; nia hatudu sinál no milagre sira iha lalehan ho rai, tanba nia salva Daniel husi leaun nia ain-kukun.”
28 Kona-ba Daniel, nia moris diʼak durante Dário nia ukun no durante Ciro, ema Pérsia, nia ukun.