Ita sobu rahun uma fatuk nian
1 Durante tempu kleur ona, Satanás uza hanorin falsu no lia-bosok atu taka netik ema barak nia neon no laran. Nia habelar doutrina hanesan Trindade, infernu no fiar katak iha buat ida neʼebé moris hela kuandu ema mate. Nia haburas hanoin katak Maromak la iha no mós halo dúvida kona-ba Bíblia nuʼudar Maromak nia Liafuan. Satanás mós uza foti-an kona-ba rasa no nasaun atu taka ema fiar-laek sira-nia hanoin atu sira la bele haree naroman husi lia-loos. (2 Kor 4:4) Oinsá mak ita bele “sobu rahun” fiar falsu hirak-neʼe neʼebé hanesan “uma fatuk nian”?—2 Kor 10:4, 5.
2 Laran envolve: Kuandu ema ida tuir relijiaun ba tempu kleur ona, fiar husi relijiaun neʼe bele sai metin iha ninia laran. Ema balun tuir deʼit fiar neʼebé sala husi kiʼik kedas. Atu ajuda ema hanesan neʼe, ita presiza koʼalia iha dalan neʼebé hatudu respeitu ba sira-nia hanoin.—1 Ped 3:15.
3 Ita bele hatudu respeitu ba ema hanesan neʼe hodi fó tempu ba sira atu esplika buat neʼebé sira fiar, no tansá sira fiar neʼe. (Tgo 1:19) Karik sira kaer metin ba fiar katak ema mate nia klamar moris hela, tanba sira-nia família ka belun ida mate, no sira hakarak tebes atu haree fali nia. Ka karik sira selebra loron-boot ruma tanba sira hakarak deʼit atu halibur hamutuk ho família. Se ita rona ba sira-nia hanoin, ida-neʼe sei ajuda ita atu komprende sira-nia sentimentu no ajuda ita atu hatán iha dalan neʼebé diʼak liu.—Prov 16:23.
4 Banati-tuir Jesus: Jesus fó ezemplu diʼak mai ita kuandu nia hatán ba pergunta husi mane ida neʼebé hatene ukun-fuan Moisés nian. Jesus la fó-hatene deʼit buat neʼebé nia tenke halo. Se Jesus fó-hatene deʼit, karik ema neʼe sei la simu tanba ninia fiar metin ona ba buat neʼebé nia hatene. Tan neʼe, Jesus husu ninia hanoin kona-ba Eskritura, no uza ilustrasaun atu ajuda nia komprende.—Lc 10:25-37.
5 Maromak nia Liafuan bele ajuda ema atu la halo tuir tan hanorin neʼebé laloos. (Ebr 4:12) Hodi hanorin ho pasiénsia, ita bele book ema nia fuan no ajuda sira atu husik hanorin neʼebé laloos. Nuneʼe sira bele simu lia-loos neʼebé sei halo sira sai livre.—Joao 8:32.