Uza buat neʼebé ema bele haree

TANBASÁ mak ita hakarak uza buat neʼebé ema bele haree kuandu ita hanorin? Tanba neʼe mak dalan diʼak atu hanorin. Maromak Jeová no Jesus Kristu uza buat neʼebé ema bele haree kuandu sira hanorin, no ita mós bele aprende husi sira-nia ezemplu. Bainhira ita uza buat neʼebé ema bele haree, informasaun sei tama iha ema nia laran liuhusi sira-nia tilun no mós matan. No ida-neʼe sei ajuda ita atu halo rona-naʼin tau atensaun didiʼak ba buat neʼebé ita hanorin. Oinsá mak ita bele uza buat neʼebé ema bele haree kuandu ita haklaken liafuan diʼak? Oinsá mak ita bele halo ida-neʼe iha dalan neʼebé diʼak liu?

Oinsá mak Mestre Boot sira uza buat neʼebé bele haree atu hanorin. Jeová uza buat neʼebé bele haree atu hanorin lisaun importante. Iha kalan ida, Maromak lori Abraão bá liʼur no hatete: “Favór ida, haree ba leten, haree ba lalehan no sura toʼok fitun sira, se ó bele sura sira hotu. . . . Ó-nia bei-oan sei sai barak hanesan neʼe.” (Gênesis [Kejadian] 15:5) Maski Maromak nia promete neʼe mak susar tuir ema nia haree, maibé ida-neʼe book duni Abraão nia laran no nia tau fiar ba Jeová nia liafuan. Iha tempu seluk, Jeová haruka Jeremias atu bá iha badain sanan-rai nia uma no haree nuʼudar badain neʼe halo sanan ida. Ida-neʼe hanorin lisaun importante katak ita-nia Kriadór iha kbiit duni atu halo buat naran deʼit neʼebé nia hakarak ba ita ema. (Jeremias [Yeremia] 18:1-6) No Jeová uza patola hun atu hanorin Jonas kona-ba hahalok laran-sadiʼa, no Jonas nunka haluha ida-neʼe. (Jonas [Yunus] 4:6-11) Jeová mós haruka ninia profeta sira atu halo drama kiʼik no uza sasán balu hodi hatoʼo mensajen. (1 Reis [Raja-Raja] 11:29-32; Jeremias [Yeremia] 27:1-8; Ezequiel [Yehezkiel] 4:1-17) Parte sira husi tenda santu no templu mak nuʼudar ilas no ajuda ita atu komprende buat lalehan nian. (Ebreu 9:9, 23, 24) Maromak mós uza vizaun barak atu fó sai hanorin importante.—Ezequiel (Yehezkiel) 1:4-28; 8:2-18; Apóstolu 10:9-16; 16:9, 10; Apokalipse 1:1.

Oinsá mak Jesus uza buat neʼebé ema bele haree atu hanorin? Bainhira ema farizeu no ema neʼebé apoia Herodes koko Jesus ho ninia liafuan, Jesus husu sira fó ba nia osan denáriu ida no haruka sira atu haree ilas iha osan-besi neʼe. Tuirmai, nia esplika katak sira tenke fó ba Liurai Roma buat neʼebé ninian, maibé sira mós tenke fó ba Maromak buat neʼebé Maromak nian. (Mateus 22:19-21) Atu hanorin ita kona-ba serbí Maromak ho buat hotu neʼebé ita iha, Jesus koʼalia kona-ba feto-faluk ida neʼebé fó osan-besi rua ho folin kiʼik nuʼudar kontribuisaun ba templu. Feto-faluk neʼe fó buat hotu neʼebé nia iha. (Lucas 21:1-4) Iha tempu seluk, Jesus uza labarik ida nuʼudar ezemplu kona-ba hahalok haraik-an no la buka atu sai ema-boot. (Mateus 18:2-6) Jesus rasik mós hatudu hahalok haraik-an hodi fase ninia dixípulu nia ain.—João 13:14.

Dalan balu atu uza buat neʼebé ema bele haree. La hanesan ho Maromak Jeová, ita la bele hatoʼo mensajen hodi uza vizaun sira. Maski nuneʼe, ita-nia livru sira iha dezeñu oioin neʼebé bele book ema nia laran. Tan neʼe, uza dezeñu sira-neʼe atu ajuda ita-nia estudante atu hanoin kona-ba moris iha mundu foun tuir Bíblia nia promete. Bainhira ita estuda Bíblia ho ema, karik ita bele hatudu ba nia dezeñu neʼebé liga ho tópiku neʼebé ita estuda daudaun, no husu ba nia saida deʼit mak nia haree iha dezeñu neʼe. Bainhira Jeová fó vizaun balu ba profeta Amós, Jeová husu: “Ó haree saida, Amós?” (Amós 7:7, 8; 8:1, 2) Ita bele husu pergunta hanesan neʼe nuʼudar ita dada ema nia atensaun ba dezeñu sira neʼebé ita uza.

Se ita hakerek iha kuadru ka iha surat-tahan oinsá atu sura númeru ruma ka halo diagrama, ka liña naruk, hodi hatudu kona-ba tempu neʼebé buat ruma mosu, ida-neʼe bele ajuda ema atu komprende profesia balu hanesan “tinan hitu” iha Daniel 4:16 no kona-ba “semana hitunulu” iha Daniel 9:24. Ita mós bele hetan sira-neʼe iha ita-nia livru balu neʼebé ita uza atu estuda ho ema.

Bainhira ita halo adorasaun família nian, ita bele estuda kona-ba tenda santu nian, templu iha Jeruzalein, no Ezequiel nia vizaun kona-ba templu. Hodi uza dezeñu ka diagrama kona-ba tenda santu nian no templu, neʼe sei ajuda ita atu komprende liu. Ita bele hetan dezeñu ka diagrama sira iha livru Pemahaman Alkitab, iha apéndise husi Bíblia Sagrada Tradusaun Mundu Foun, no iha edisaun balu husi Livru Haklaken.

Bainhira ita lee Bíblia hamutuk ho família, diʼak mós atu uza mapa sira. Haree toʼok mapa ba Abraão nia viajen husi sidade Ur toʼo Haran no toʼo Betel. Haree toʼok dalan neʼebé ema Izraél laʼo liu bainhira sira sai husi rai-Ejitu atu bá rai neʼebé Maromak promete. Buka toʼok área neʼebé Izraél nia suku ida-idak simu nuʼudar liman-rohan. Haree toʼok fatin sira neʼebé Salomão ukun. Haree toʼok dalan neʼebé Elias laʼo liu hodi halai husi Jezreel atu bá rai-fuik besik área Beer-Seba kuandu Jezabel ameasa atu oho nia. (1 Reis [Raja-Raja] 18:46–19:4) Buka toʼok sidade no knua sira neʼebé Jesus haklaken bá. Haree toʼok Paulo nia viajen neʼebé temi iha livru Apóstolu.

Ita bele hatudu ba ita-nia estudante Bíblia kona-ba oinsá kongregasaun halaʼo ninia atividade sira. Karik ita bele hatudu ba nia programa ba reuniaun boot no esplika kona-ba saida deʼit mak fó sai iha reuniaun boot sira. Ema barak gosta tebes bainhira sira vizita Reuniaun-Fatin ka sukursál ida husi Testemuña ba Jeová. Hodi halo ida-neʼe, ita bele hadiʼa ema nia hanoin sala kona-ba ita-nia serbisu haklaken. Bainhira ema mai vizita ita-nia Reuniaun-Fatin, hatudu oinsá mak Reuniaun-Fatin la hanesan ho igreja sira. Fó-hatene katak Reuniaun-Fatin simples deʼit no ita uza fatin neʼe atu aprende kona-ba Maromak no aprende oinsá atu haklaken ba ema. Hatudu fatin fahe livru nian, mapa ba ita-nia haklaken-fatin, no kaixa kontribuisaun nian neʼebé la hanesan duni ho buat neʼebé relijiaun seluk uza atu husu ezmola.

Se iha vídeo sira neʼebé ita-nia organizasaun halo, uza sira-neʼe atu ajuda ema hametin sira-nia fiar ba Bíblia, atu ajuda estudante hatene kona-ba Testemuña ba Jeová nia atividade, no fó laran-manas ba sira atu moris tuir Bíblia nia matadalan.

Uza buat neʼebé ema bele haree kuandu hanorin ema barak. Bainhira ita prepara no uza dezeñu sira ka buat seluk neʼebé ema bele haree, ida-neʼe bele ajuda duni kuandu ita atu hanorin ema barak. Atan laran-metin no matenek prepara ona buat barak hanesan dezeñu, mapa, tabela sira, ka buat seluk tan neʼebé ita bele uza atu hanorin.

Baibain, irmaun neʼebé dirije estudu Livru Haklaken ka Estudu Bíblia iha Kongregasaun nian bele uza dezeñu sira husi lisaun atu fó sai pontu importante sira.

Nota badak ba diskursu públiku balu bele fó oportunidade ba ita atu uza buat neʼebé bele haree atu esplika pontu ruma. Maibé, la haluha katak ita mós bele hetan rezultadu diʼak hodi dada rona-naʼin nia atensaun ba Bíblia, tanba baibain rona-naʼin iha Bíblia rasik. Se dala ruma presiza uza dezeñu ruma ka hakerek pontu importante sira iha kuadru, importante katak rona-naʼin hotu inklui mós sira neʼebé tuur iha kotuk bele haree ida-neʼe ho momoos. Maibé, neʼe la dehan katak ita presiza uza beibeik buat sira-neʼe.

Kuandu ita hanorin, ita-nia objetivu atu uza buat neʼebé ema bele haree mak laʼós atu halo ema hamnasa. Bainhira ita uza buat sira-neʼe iha dalan neʼebé matenek, neʼe sei ajuda rona-naʼin atu komprende ideia ka pontu importante. Ita bele uza buat sira-neʼe atu halo klaru ita-nia informasaun, halo fasil liu atu komprende, ka apoia buat neʼebé ita hanorin. Bainhira ita uza ho didiʼak buat neʼebé ema bele haree, neʼe sei book rona-naʼin nia laran no sira sei la haluha buat neʼebé ita koʼalia.

Ita-nia matan no tilun mak parte importante neʼebé ajuda ita atu aprende buat ruma. Hanoin-hetan oinsá mak Jeová no Jesus uza buat sira-neʼe kuandu hanorin, no hakaʼas an atu banati-tuir sira nuʼudar ita mós hanorin ema seluk kona-ba Maromak.