Oinsá ita bele prepara ba Reuniaun Serbisu
1. Oinsá mak Reuniaun Serbisu ajuda ita? Oinsá mak ita bele hetan benefísiu husi reuniaun neʼe?
1 Reuniaun Serbisu ajuda ita atu halaʼo serbisu haklaken neʼebé fó rezultadu diʼak. Tanba iha reuniaun neʼe buat neʼebé ita koʼalia liu mak kona-ba dalan oinsá atu haklaken lia-foun diʼak Reinu nian, halo dixípulu, no oinsá atu fó-hatene kona-ba Maromak nia loron justisa nian. (Mt 28:20; Mc 13:10; 2 Ped 3:7) Ita bele hetan benefísiu diʼak liután husi reuniaun importante neʼe bainhira ita prepara didiʼak no prontu atu hola parte.
2. Oinsá mak ita bele prepara atu rona ba diskursu ida?
2 Diskursu: Informasaun neʼebé uza ba diskursu sira baibain hetan iha matadalan ba irmaun neʼebé sei hatoʼo diskursu. Ita bele lee informasaun neʼebé nia sei uza, lee eskritura sira, no hanoin kona-ba oinsá ita bele halo tuir informasaun neʼe iha ita-nia serbisu haklaken.
3. Saida mak ita bele halo atu prepara ba parte neʼebé halaʼo hodi husu pergunta?
3 Parte neʼebé halaʼo hodi husu pergunta: Parte neʼe halaʼo hanesan ho estudu Menara Pengawal, neʼebé loke no ramata ho liafuan badak. Riska pontu importante iha parágrafu ida-idak, no sai prontu atu fó komentáriu neʼebé badak kona-ba pontu neʼebé koʼalia daudaun.
4. Oinsá mak ita bele prepara ba parte neʼebé husu rona-naʼin atu fó komentáriu?
4 Parte neʼebé husu rona-naʼin atu fó komentáriu: Parte neʼe sei hatoʼo nuʼudar diskursu, maibé irmaun neʼebé hatoʼo diskursu neʼe dala ruma sei husu rona-naʼin atu hola parte. Se ita riska pontu importante balu no lee eskritura sira, karik ita bele fó komentáriu bainhira irmaun husu pergunta. Irmaun neʼe sei hakaʼas an atu fó sai pontu importante hodi hein resposta husi rona-naʼin.
5. Oinsá mak ita bele hetan benefísiu husi drama kiʼik sira?
5 Drama kiʼik: Parte balu sei inklui mós drama kiʼik atu hatudu oinsá mak ita bele halo tuir iha ita-nia haklaken-fatin. Irmaun katuas sira ka haklaken-naʼin neʼebé iha esperiénsia ona ka pioneiru sira mak sei ajuda ho ida-neʼe. Ita hotu bele prepara ba parte hanesan neʼe hodi hanoin kona-ba oinsá mak sei halo drama kiʼik neʼe. Bainhira iha drama kiʼik atu hatudu oinsá atu fahe livru fulan-fulan nian, hanoin kona-ba oinsá ita bele halo tuir ka oinsá ita bele troka liafuan uitoan atu ita bele koʼalia ba uma-naʼin oioin. Importante atu lori ba reuniaun livru neʼebé sei uza iha drama kiʼik. Iha kalan neʼebé ita halaʼo Adorasaun Família nian, diʼak atu ita prepara uluk oinsá atu fahe livru sira.
6. Saida deʼit mak ita hetan kuandu ita prepara ba Reuniaun Serbisu?
6 Ita bele haksolok ho Reuniaun Serbisu bainhira ita prepara no hanoin kona-ba parte sira antes ita bá reuniaun. Hodi halo nuneʼe, ita sei hametin malu liután. (Rom 1:11, 12) Se ita fó tempu atu prepara ba Reuniaun Serbisu neʼe, ita sei hetan kbiit atu bele halaʼo ita-nia serbisu haklaken diʼak liután.—2 Tim 3:17.