Uza Bíblia atu fó resposta

BAINHIRA ema husu kona-ba ita-nia fiar, esperansa, moris, no ita-nia hanoin kona-ba buat neʼebé akontese daudaun, diʼak atu uza Bíblia hodi hatán ba sira. Tanbasá? Tanba Bíblia mak Maromak nia Liafuan, no mós nuʼudar ita-nia fiar nia hun. Tan neʼe, ita fiar buat neʼebé Bíblia hatete kona-ba akontesimentu sira iha mundu neʼe no halo tuir ninia matadalan iha ita-nia moris. Ita sempre fiar ba buat neʼebé Bíblia promete kona-ba ita-nia esperansa ba futuru.—2 Timóteo 3:16, 17.

Ita-nia naran mak Testemuña ba Jeová, no ita iha responsabilidade boot hodi lori naran neʼe. (Isaías [Yesaya] 43:12) Tan neʼe, kuandu ita fó resposta ruma ba ema, ita la tuir deʼit ema nia hanoin, maibé tuir buat neʼebé Jeová hatete iha nia Liafuan. Maski dala ruma ita iha hanoin rasik kona-ba buat ruma, maibé ita hakarak hanoin tuir Maromak nia Liafuan tanba ita fiar katak ida-neʼe mak lia-loos. Tuir loloos, Bíblia fó liberdade ba ita hodi halo desizaun rasik. Tan neʼe, ita hakarak hanorin Bíblia nia matadalan ba ema seluk hodi sira mós bele sente livre atu halo desizaun duké ita rasik mak halo desizaun ba sira. Hanesan ho apóstolu Paulo, ita mós ajuda ema atu halo tuir Maromak tanba sira tau fiar iha nia.—Roma 16:26.

Apokalipse 3:14 bolu Jesus Kristu nuʼudar “sasin-naʼin neʼebé laran-metin no loos”. Kuandu ema husu pergunta ba Jesus, saida mak nia halo? Dala ruma nia hatán hodi uza ai-knanoik neʼebé halo sira hanoin didiʼak. Dala ruma nia husu fali ba ema neʼebé foin husu pergunta atu fó sai saida mak nia hatene ona kona-ba eskritura ruma. No Jesus mós temi beibeik husi Maromak nia Liafuan. (Mateus 4:3-10; 12:1-8; Lucas 10:25-28; 17:32) Iha Jesus nia tempu, sira lee eskritura husi livru neʼebé sira rai iha sinagoga. Maski Jesus rasik la iha livru sira hanesan neʼe, maibé nia hatene didiʼak Eskritura no nia temi beibeik neʼe kuandu nia hanorin. (Lucas 24:27, 44-47) Nuneʼe mak Jesus bele hatete katak buat neʼebé nia hanorin laʼós husi ninia hanoin rasik maibé mai husi ninia Aman.—João 8:26.

Ita-nia hakarak mak atu halo tuir Jesus nia ezemplu. Maski ita la hanesan ho Jesus neʼebé rona Maromak rasik koʼalia ba nia, maibé ita iha Maromak nia Liafuan, Bíblia. Bainhira ita uza Bíblia hodi hatán pergunta sira, ita hatudu katak ita sadere deʼit ba lia-loos husi Maromak nia Liafuan duké dada atensaun ba ita-nia an rasik ka fó sai ema sala-naʼin nia hanoin.—João 7:18; Roma 3:4.

Liután neʼe, ita hakarak hatudu oinsá Bíblia kona rona-naʼin nia moris. Antes ita loke Bíblia, ita bele ajuda nia atu simu Maromak nia Liafuan hodi husu: “Ita sente katak Maromak nia liafuan mak importante liu duké ema nian ka lae?” Ka, “Ita hatene ka lae, Bíblia mós koʼalia kona-ba pergunta neʼebé Ita husu?” Ba ema neʼebé la fiar Bíblia, karik ita bele uza dalan seluk atu komesa koʼalia kona-ba Bíblia. Porezemplu, ita bele husu: “Haʼu bele ka lae, hatudu ba Ita liafuan neʼebé hakerek nanis kona-ba buat neʼebé mosu ohin loron?” Ka, “Haree toʼok liafuan husi livru neʼebé ema barak liu iha mundu tomak lee.”

Dala ruma ita temi deʼit eskritura hodi la loke Bíblia. Maibé, diʼak liu mak ita loke Bíblia hodi lee eskritura ba sira. Se bele, husu sira atu lee husi sira rasik nia Bíblia tanba hodi halo ida-neʼe bele book sira-nia laran.—Ebreu 4:12.

Katuas kristaun sira iha responsabilidade boot atu uza Bíblia hodi hatán ba pergunta sira. Kritériu ba irmaun sira atu serbí nuʼudar katuas mak ‘kaer metin ba liafuan neʼebé loos iha dalan neʼebé sira hanorin’. (Tito 1:9) Bainhira ema iha kongregasaun presiza halo desizaun boot ruma, karik sira buka uluk konsellu husi katuas kongregasaun nian. Tan neʼe, importante tebes ba katuas sira atu fó konsellu neʼebé mai husi Bíblia! Kuandu katuas sira sempre uza Bíblia atu hanorin, irmaun-irmán sira seluk mós sei banati-tuir ezemplu diʼak neʼe.