Uza mikrofone ho diʼak

ITA-NIA maluk kristaun fahe sira-nia tempu no hakaʼas an atu tuir reuniaun. Maibé hodi irmaun-irmán sira bele hetan buat diʼak, sira presiza rona ho momoos buat neʼebé hatoʼo iha reuniaun.

Iha tempu antigu mikrofone la iha. Entaun, bainhira Moisés koʼalia ba povu Izraél iha rai-tetuk Moab antes atu tama ba rai neʼebé Maromak promete ona, oinsá mak povu rihun ba rihun bele rona Moisés nia diskursu? Karik sira presiza forma grupu barak no ema balu hetan knaar atu hatutan Moisés nia liafuan husi grupu ida ba grupu seluk. (Deuteronômio [Ulangan] 1:1; 31:1) Lakleur depois ema Izraél sira hahú atu manán rai neʼebé Maromak promete, Josué halibur nasaun iha Foho Gerizím no Foho Ebal nia leet, no ema levita hamriik iha klaran. Iha fatin neʼe, nasaun tomak rona Maromak nia bensaun no malisan, no sira bele hatán. (Josué [Yosua] 8:33-35) Karik iha situasaun neʼe ema balu iha knaar atu hatutan tan Josué nia liafuan, maibé tanba sira halibur iha foho rua nia leet, karik neʼe mós halo fasil ba ema atu rona ninia lian.

Iha Jesus nia tempu kuandu “ema-lubun boot tebes” mak halibur iha Tasi Galileia atu rona ninia liafuan, Jesus saʼe ba ró, no bá dook uitoan husi tasi-ibun, no koʼalia ba sira. (Marcos 4:1, 2) Tanbasá mak Jesus koʼalia husi ró? Tanba bainhira tasi sai hakmatek, ema nia lian bele toʼo ba fatin dook liuhusi bee leten.

Uluk, ema neʼebé hatoʼo diskursu tenke koʼalia ho lian makaʼas atu rona-naʼin sira bele rona. Maibé husi tinan 1920 ba oin, Jeová nia atan sira komesa ona uza ekipamentu hanesan mikrofone iha reuniaun boot sira.

Ekipamentu lian nian. Ekipamentu neʼe bele aumenta oradór nia lian hodi nia la presiza koʼalia makaʼas liu. No tanba ida-neʼe halo fasil ba ema-lubun atu rona, sira bele tau atensaun ba diskursu ka komentáriu sira.

Ita-nia organizasaun uza ekipamentu lian nian iha reuniaun boot sira. Liután neʼe, kongregasaun barak uza mikrofone atu hatoʼo diskursu, dirije reuniaun, ka lee husi plataforma. Iha kongregasaun balu, rona-naʼin sira mós uza mikrofone atu fó komentáriu. Se ita-nia kongregasaun uza mikrofone, ita presiza aprende oinsá atu uza ho didiʼak.

Oinsá atu uza mikrofone. Diʼak atu halo tuir matadalan tuirmai neʼe: (1) Baibain, mikrofone tenke dook husi ita-nia ibun maizumenus sentímetru 10 toʼo 15. Se ita-nia ibun besik liu mikrofone, ita-nia lian sei la sai moos. Se ita dook husi mikrofone, ita-nia lian sei sai kiʼik demais. (2) Mikrofone tenkesér iha ita-nia oin. Se ita fila oin ba sorin, hein toʼo ita-nia ibun besik mikrofone mak foin koʼalia fali. (3) Koʼalia ho klaru no ho lian boot uitoan liu fali kuandu ita koʼalia baibain. Maibé ita la presiza koʼalia makaʼas. Liuhusi mákina lian nian, ita-nia liafuan sira sei toʼo ba rona-naʼin hotu. (4) Se ita presiza meʼar ka fani, ita tenke hadook ita-nia oin husi mikrofone.

Kuandu hatoʼo diskursu. Bainhira ita hamriik iha mikrofone nia oin, baibain irmaun ida mak sei muda mikrofone tun-saʼe ba ita. Nuʼudar nia halo ida-neʼe, diʼak atu hamriik loos hodi foti ita-nia ulun. Tau ita-nia nota iha pódiu, no haree se mikrofone la hanetik ita atu haree ita-nia nota.

Kuandu ita komesa koʼalia, rona didiʼak ita-nia lian husi koluna. Se ita-nia lian boot demais, ka halo tarutu, karik ita presiza hakiduk uitoan husi mikrofone. Keta koʼalia kuandu ita sei hateke tun hela ba nota, maibé koʼalia deʼit kuandu iha mikrofone nia oin.

Kuandu lee iha plataforma. Diʼak atu hiʼit saʼe ita-nia Bíblia ka livru sira hodi ita-nia oin la hateke tun ba kraik. Baibain mikrofone iha ita-nia oin, tan neʼe karik ita presiza kaer Bíblia ka livru sira iha sorin uitoan. Se hanesan neʼe, ita mós presiza kuidadu atu ita-nia ulun labele iha klaran entre mikrofone no livru, maibé muda ita-nia ulun ba sorin seluk hodi nuneʼe ita-nia lian sei tama nafatin iha mikrofone.

Iha Estudu Livru Haklaken, baibain irmaun neʼebé lee presiza hamriik hodi uza mikrofone neʼebé tau iha nia oin. Ida-neʼe ajuda nia atu dada iis ho livre no lee ho sentimentu. Tuir loloos, knaar atu lee parágrafu sira mak parte importante tebes iha reuniaun sira. Tan neʼe, se ita hakarak rona-naʼin atu hetan buat diʼak husi reuniaun, sira presiza duni atu rona informasaun neʼebé ita lee husi plataforma.

Kuandu fó komentáriu iha reuniaun. Se ita-nia kongregasaun uza mikrofone, hanoin-hetan katak ita presiza atu koʼalia momoos ho volume neʼebé natoon. Kuandu fó komentáriu, diʼak atu kaer ita-nia livru ka Bíblia iha ita-nia liman. Ida-neʼe sei ajuda ita atu kontinua haree informasaun sira ho klaru nuʼudar ita koʼalia iha mikrofone.

Iha kongregasaun balu iha irmaun sira neʼebé iha knaar atu lori mikrofone ba sira neʼebé fó komentáriu. Se irmaun neʼebé dirije hili ita, diʼak atu nafatin hiʼit liman hodi irmaun sira neʼebé lori mikrofone bele haree no hetan ita lalais. No se irmaun neʼe lori mikrofone ba ita, sai prontu atu simu ida-neʼe. Keta fó komentáriu lai se ita seidauk kaer mikrofone iha ita-nia liman. Kuandu ita-nia komentáriu hotu ona, fó fali kedas mikrofone ba irmaun neʼebé lori ida-neʼe.

Kuandu halo drama kiʼik. Se ita halo drama kiʼik, ita presiza hanoin nanis oinsá atu uza mikrofone ho didiʼak. Se uza mikrofone neʼebé hamriik hela, ita bele livre atu kaer Bíblia ka ita-nia nota ho liman rua. Se ita uza mikrofone neʼebé ita rasik mak kaer, ida-neʼe halo fasil ba ita atu book an, maibé kuandu ita loke Bíblia, karik ita presiza husu ita-nia ajudante atu kaer mikrofone ba ita. Ita ho ita-nia ajudante presiza koʼalia nanis kona-ba neʼe no treinu hamutuk hodi nia hatene oinsá atu kaer mikrofone ba ita. Nuʼudar ita halo drama kiʼik, hanoin-hetan katak ita labele fila kotuk ba rona-naʼin sira, liuliu se ita mak koʼalia.

Iha Reuniaun Serbisu nian, dala ruma ema barak mak hola parte iha drama kiʼik ida no presiza uza mikrofone barak. Irmaun sira neʼebé prepara plataforma sei tau uluk mikrofone iha plataforma ka sei fó ba sira neʼebé hola parte iha drama neʼe. Atu halo neʼe ho diʼak, irmaun sira-neʼe presiza halo planu nanis no prepara didiʼak. Antes reuniaun, diʼak atu treinu drama kiʼik iha plataforma hodi hatene oinsá atu uza mikrofone ho loloos. Maibé se ita halo treinu iha fatin seluk, ita bele finje kaer buat seluk nuʼudar mikrofone. Iha tempu neʼebé ita halo tiha drama kiʼik, antes atu tun husi plataforma, ita presiza tau fali mikrofone sira ho neineik no kuidadu hodi ita-nia ain labele kaʼit ba fiu.

Ita-nia objetivu kuandu ita tuir reuniaun mak atu fó laran-manas ba malu liuhusi ita-nia diskursu no komentáriu sira. (Ebreu 10:24, 25) Hodi hatene oinsá atu uza mikrofone ho didiʼak, ita bele kumpre objetivu importante neʼe.