Uza ai-knanoik neʼebé rona-naʼin komprende

IMPORTANTE katak ai-knanoik neʼebé ita uza apoia duni informasaun neʼebé ita koʼalia daudaun. Maibé, importante mós katak ai-knanoik neʼe tuir rona-naʼin nia situasaun.

Oinsá mak rona-naʼin nia esperiénsia no situasaun bele ajuda ita atu hili ai-knanoik neʼebé diʼak atu uza kuandu koʼalia? Hanoin toʼok kona-ba Jesus nia ezemplu. Bainhira Jesus koʼalia ba ema-lubun ka ba ninia dixípulu sira, nia la uza ai-knanoik husi rai seluk tanba ema Izraél sei la komprende ida-neʼe. Porezemplu, Jesus nunka koʼalia kona-ba dalan neʼebé ema-boot iha rai-Ejitu halaʼo sira-nia moris ka nia la koʼalia kona-ba oinsá ema husi rai-Índia halaʼo adorasaun. Duké halo nuneʼe, Jesus uza ai-knanoik sira kona-ba buat neʼebé ema Izraél sira halo loroloron, hanesan suku roupa, halo negósiu, lakon buat folin-boot, no tuir festa kazamentu nian. Nia uza buat sira-neʼe tanba nia hatene ema nia sentimentu bainhira hasoru situasaun sira hanesan neʼe. (Marcos 2:21; Lucas 14:7-11; 15:8, 9; 19:15-23) Jesus haklaken liuliu ba ema Izraél, tan neʼe nia uza ai-knanoik neʼebé kona duni sira-nia atividade loroloron nian hanesan: Serbisu iha toʼos, bibi rona ba bibi-atan nia lian, no oinsá uza animál nia kulit atu rai tua-uvas. (Marcos 2:22; 4:2-9; João 10:1-5) Jesus mós koʼalia kona-ba istória antigu neʼebé ema barak hatene, hanesan tempu neʼebé Maromak kria mane ho feto primeiru, Rai-Nabeen iha Noé nia tempu, tempu neʼebé sidade Sodoma no Gomorra naksobu, oinsá Lot nia feen mate, no istória seluk tan. (Mateus 10:15; 19:4-6; 24:37-39; Lucas 17:32) Kuandu ita hili ai-knanoik atu uza, ita mós hanoin didiʼak rona-naʼin nia esperiénsia no situasaun moris nian ka lae?

Oinsá se ita koʼalia ba ema balu ka ema ida deʼit? Se nuneʼe, hakaʼas an atu hili ai-knanoik neʼebé diʼak ba sira. Bainhira Jesus haklaken ba feto Samaria ida iha bee-matan besik sidade Sikar, nia koʼalia kona-ba “bee moris nian”, ‘ema sei nunka sente hamrook tan’, no ‘bee-matan neʼebé suli hodi fó moris rohan-laek’. Tuir loloos, ai-knanoik neʼe liga duni ho buat neʼebé feto neʼe halo daudaun. (João 4:7-15) No bainhira Jesus koʼalia ba mane sira neʼebé fase hela rede, nia uza ai-knanoik neʼebé liga duni ho sira-nia serbisu. (Lucas 5:2-11) Tuir loloos iha situasaun ida-idak, Jesus bele uza ai-knanoik seluk hanesan serbisu iha toʼos, tanba sira hotu mós bele komprende neʼe. Maibé Jesus uza ai-knanoik kona-ba buat neʼebé sira rasik halo daudaun, no neʼe kona duni sira-nia laran. Ita hakaʼas an atu halo tuir Jesus nia ezemplu neʼe ka lae?

Jesus haklaken liuliu ba “bibi-malae neʼebé lakon husi umakain Izraél”. Maibé, apóstolu Paulo haklaken ba ema Izraél no mós ba ema husi nasaun seluk. (Mateus 15:24; Apóstolu 9:15) Tan neʼe mak Paulo uza ai-knanoik seluk. Porezemplu, bainhira nia hakerek karta ba ema kristaun iha Korinto, nia koʼalia kona-ba halai-taru, ema nia toman atu han ai-han neʼebé hasaʼe ona ba estátua, no kona-ba soldadu sira neʼebé manán funu. Nia koʼalia kona-ba buat neʼebé ema husi nasaun seluk hatene didiʼak.—1 Korinto 8:1-10; 9:24, 25; 2 Korinto 2:14-16.

Ita halo tuir Jesus no Paulo nia ezemplu hodi hili didiʼak ai-knanoik sira kuandu hanorin ka lae? Ita hatene rona-naʼin nia situasaun no atividade neʼebé sira halo loroloron ka lae? Klaru katak situasaun iha mundu agora la hanesan ho apóstolu sira-nia tempu. Porezemplu, ohin loron ema barak bele hatene saida mak akontese daudaun iha fatin oioin iha mundu hodi haree notísias. Dala ruma ita bele uza buat balu neʼebé ita haree iha notísias sira nuʼudar ai-knanoik. Maski nuneʼe, baibain ita bele book rona-naʼin nia laran se ita koʼalia kona-ba buat neʼebé kona duni sira-nia moris loroloron nian, hanesan sira-nia uma, família, serbisu, hahán neʼebé baibain sira han, ka situasaun iha sira-nia área.

Se ita presiza esplika buat barak kona-ba ai-knanoik neʼebé ita uza, karik neʼe hatudu katak ita-nia ai-knanoik neʼe ema ladún hatene ho didiʼak. Ida-neʼe bele halo susar ba ema atu hatene pontu importante. No rezultadu mak rona-naʼin sei hanoin-hetan deʼit ita-nia ai-knanoik, no haluha lia-loos husi Bíblia neʼebé ita hakarak hanorin.

Duké uza ai-knanoik neʼebé susar atu komprende, Jesus uza ai-knanoik sira neʼebé simples no tuir situasaun neʼebé ema hasoru iha sira-nia moris loroloron nian. Hodi halo nuneʼe, Jesus bele esplika iha dalan simples hanorin neʼebé kleʼan no susar atu komprende. Hodi kompara situasaun iha ema nia moris loroloron nian ho lia-loos husi Bíblia, Jesus ajuda ema komprende ho klaru lia-loos importante sira neʼebé nia hanorin, no mós ajuda sira atu la haluha ida-neʼe. Jesus fó duni ezemplu diʼak ba ita atu halo tuir, loos ka lae?