Informasaun atu uza hamutuk livru Moris Kristaun no Haklaken
3-9 ABRÍL
Keʼe no hetan buat murak husi Bíblia
w01 15/10 p. 25 par. 13
Proteje bá ó-nia laran
13 Jeremias fó avizu katak “laran mak makerek liu fali buat hotu-hotu no perigu liu”. (Jeremias [Yeremia] 17:9) Se ita mak sempre fó razaun oioin kona-ba ita-nia fraku ka ita-nia sala, ka gaba an kona-ba buat neʼebé ita kumpre, neʼe hatudu sai katak ita iha laran neʼebé makerek. Ema neʼebé moris ho oin rua mós hatudu sai katak nia iha laran neʼebé makerek. (Salmo [Mazmur] 12:2; Provérbios [Amsal] 23:7) Tan neʼe mak importante ba ita atu hanoin didiʼak kona-ba ita-nia laran!
w07 15/3 p. 9 par. 6
Pontu importante husi livru Jeremias
20:7—Oinsá mak Jeová ‘uza ninia kbiit’ atu lohi Jeremias? Ema lakohi rona, kontra, no fó terus ba Jeremias bainhira nia hatoʼo Jeová nia mensajen, karik neʼe halo Jeremias sente katak nia la iha tan forsa atu haklaken. Maibé Jeová uza ninia kbiit hodi halakon Jeremias nia sentimentu neʼe, no fó forsa ba nia atu kontinua. Iha dalan hanesan neʼe mak Jeová lohi Jeremias hodi uza nia kumpre buat neʼebé profeta neʼe rasik hanoin katak nia la iha kbiit atu kumpre.
10-16 ABRÍL
Keʼe no hetan buat murak husi Bíblia
w07 15/3 p. 10 par. 9
Pontu importante husi livru Jeremias
22:30—Jeová nia liafuan neʼe hasai Jesus nia direitu atu tuur iha David nia kadunan ka lae? (Mateus 1:1, 11) Lae. Jeová nia liafuan neʼe atu bandu Joakim nia oan no bei-oan sira hodi la bele “tuur iha David nia kadunan . . . iha rai-Judá”. Maibé kona-ba Jesus, nia sei ukun husi lalehan, laʼós husi rai-Judá.
w07 15/3 p. 11 par. 1
Pontu importante husi livru Jeremias
23:33—“Jeová nia lia-menon neʼebé todan” mak kona-ba saida? Iha Jeremias nia tempu, mensajen todan neʼebé profeta Jeremias hatoʼo kona-ba tempu neʼebé Jeruzalein sei naksobu mak hanesan naha todan ba povu. Maibé tanba povu sira-neʼe lakohi rona, sira mak sai fali hanesan naha todan ba Jeová, no Jeová hatete katak nia sei soe tiha sira. Hanesan neʼe mós, Bíblia nia mensajen kona-ba halakon relijiaun kristaun sira sai hanesan buat todan ida ba relijiaun sira-neʼe, no ema sira neʼebé la rona ba mensajen neʼe mós sai buat todan ida ba Maromak.
17-23 ABRÍL
Keʼe no hetan buat murak husi Bíblia
jr p. 27 par. 21
Serbí Jeová iha “loron sira-neʼe nia rohan”
21 Iha tempu neʼebé Zedekias ukun, liurai husi Edom, Moab, Amon, Tiro, no Sidon haruka sira-nia manu-ain ba Jeruzalein. Karik sira-nia objetivu mak atu buka Zedekias hamutuk ho sira hodi kontra Nabukodonozor. Maibé Jeremias husu Zedekias atu hakruʼuk ba Babilónia. Hodi nuneʼe mak Jeremias fó ai-lolon ba manu-ain sira hodi hatudu katak sira-nia nasaun mós tenke serbí ema Babilónia. (Jeremias [Yeremia] 27:1-3, 14) Jeremias nia mensajen halo ema barak hirus no Hananias fó susar ba Jeremias. Hananias mak profeta falsu ida no nia uza Jeová nia naran hodi hatete katak Babilónia nia ai-lolon mak sei tohar. Maibé Jeová uza Jeremias hodi hatete katak latoʼo tinan ida, lohidór Hananias sei mate, no neʼe akontese duni ba nia.—Jeremias (Yeremia) 28:1-3, 16, 17.
jr p. 187-188 par. 11-12
“Haʼu la bele nonook deʼit”
11 Diʼak atu hanoin katak Jeremias laʼós ema neʼebé fanátiku. Nia hatudu matenek bainhira hasoru ema sira neʼebé kontra nia. Nia hatene tempu neʼebé loos atu hasees an husi ema sira neʼe. Porezemplu, hanoin toʼok kona-ba tempu neʼebé nia hasoru Hananias. Bainhira profeta falsu neʼe koʼalia kontra Jeová nia liafuan iha ema barak nia oin, Jeremias korrije nia no esplika oinsá nia bele hatene profeta neʼebé loos. Iha tempu neʼebá, Jeremias leba hela ai-lolon iha ninia kanuruk, neʼe atu hatudu katak Jeruzalein sei hakruʼuk ba Babilónia. Hananias sai hirus no baku tohar tiha ai-lolon neʼe. Karik liutiha neʼe, Hananias halo aat liután. Entaun saida mak Jeremias sei halo? Bíblia hatete katak “Jeremias laʼo sees husi fatin neʼe”. Sin, Jeremias sai husi fatin neʼebá. Ikusmai, ho Jeová nia matadalan, nia fila fali no fó-hatene ba Hananias katak Maromak sei halo ba ema judeu sai atan ba liurai Babilónia no katak Hananias sei mate.—Jeremias (Yeremia) 28:1-17.
12 Husi istória neʼe, klaru katak bainhira haklaken, maski ita presiza hatudu aten-brani, maibé ita mós tenke iha hanoin neʼebé loos no hatudu matenek. Se uma-naʼin ida mak lakohi rona ba ita no komesa sai hirus toʼo ameasa atu halo violénsia ba ita, diʼak atu uza matenek hodi laʼo sees deʼit no bá haklaken fali uma seluk. Ita la presiza diskute kona-ba mensajen neʼebé ita hatoʼo ba ema. Hodi ‘kontrola an kuandu ema halo sala hasoru ita’, neʼe sei la taka dalan ba ita atu ajuda fali ema neʼe iha tempu diʼak seluk.—Lee 2 Timóteo 2:23-25; Provérbios (Amsal) 17:14.
24-30 ABRÍL
Keʼe no hetan buat murak husi Bíblia
w96 1/5 p. 11 par. 5
Maromak no Sezár
5 Tinan atus balu liu tiha, Jeová nia espíritu santu book Jeremias hodi hatete ba ema judeu sira neʼebé moris nuʼudar dadur atu hakruʼuk ba Babilónia nia ukun-naʼin sira no halo orasaun atu sidade Babilónia bele iha dame. Iha Jeremias nia karta, nia dehan: “Jeová, ukun-naʼin ba tropa lalehan nian, Maromak Izraél nian, dehan ba ema dadur hotu, . . . ‘Buka dame iha sidade neʼebé haʼu haruka imi bá nuʼudar dadur, no harohan ba Jeová kona-ba sidade neʼe, tanba se sidade neʼe iha dame, imi mós sei iha dame.’” (Jeremias [Yeremia] 29:4, 7) Jeová nia povu iha razaun atu “buka dame” iha tempu hotu ba sira-nia an no mós ba nasaun neʼebé sira hela bá, hodi sira bele iha liberdade atu adora Jeová.—1 Pedro 3:11.
g 6/12 p. 14 par. 1-2
Bíblia—Livru neʼebé fó sai profesia, Parte 2
Sai loos: Ema judeu sira moris tiha nuʼudar dadur ba tinan 70 hahú husi 607 toʼo 537 molok Kristu, Liurai Ciro husi Pérsia fó livre ba sira no husik sira fila fali ba sira-nia rai hodi harii fali templu iha Jeruzalein.—Esdras (Ezra) 1:2-4.
Istória hatudu saida?
● Ema Izraél moris duni nuʼudar dadur iha Babilónia ba tinan 70 hanesan Bíblia fó-hatene nanis ka lae? Arkeólogu husi rai-Izraél naran Ephraim Stern hatete: “Husi tinan 604 toʼo 538 molok Kristu, peskiza kona-ba rai neʼe hatudu katak rai neʼe mamuk no fuik. Iha tinan sira-neʼe, sidade sira neʼebé ema Babilónia harahun, la iha sidade ida mak iha ema hela iha neʼebá.” Iha tempu neʼebé rai neʼe mamuk no fuik mak tempu neʼebé ema Izraél moris nuʼudar dadur iha Babilónia husi 607 toʼo 537 molok Kristu.—2 Crônicas (Tawarikh) 36:20, 21.
JEREMIAS
17 “Judá nia sala bahat ona ho besi.
Sala sira-neʼe bahat ona iha sira-nia
fuan-laran ho besi neʼebé ninia tutun
meik halo husi fatuk-lakan
No mós bahat ona iha sira-nia altár
nia dikur sira,
2 Bainhira sira-nia oan hanoin-hetan
sira-nia altár no ai-riin lulik sira
Iha ai-hun buras nia sorin, no iha foho-oan
sira neʼebé aas nia leten,
3 Iha foho sira iha rai-luan.
Ó-nia rikusoin no sasán hotu,
haʼu sei fó ba ema atu hadau.
Neʼe duni, ó-nia fatin aas adorasaun nian
mós ema sei hadau tanba sala neʼebé ó
halo ona iha ó-nia rai tomak.
4 Ó rasik mak sei halo lakon ó-nia
liman-rohan neʼebé haʼu fó ona ba ó.
No haʼu sei halo ó sai atan ba ó-nia inimigu
sira iha rai neʼebé ó la hatene,
Tanba ó sunu lakan haʼu-nia hirus hanesan ahi.
Neʼe sei lakan ba nafatin.”
5 Jeová dehan nuneʼe:
“Malisan ba ema neʼebé tau fiar deʼit ba ema,
Neʼebé sadere ba ema nia forsa,
No hadook ninia laran husi Jeová.
6 Nia sei sai hanesan ai-hun ida neʼebé
hamriik mesak iha rai-fuik maran.
Nia sei la haree bainhira buat diʼak toʼo mai,
Maibé nia sei hela iha fatin sira neʼebé maran-dekor iha rai-fuik,
Iha rai masin neʼebé la iha ema ida
mak bele hela.
7 Bensaun ba ema neʼebé
tau fiar metin ba Jeová,
Neʼebé ho laran tomak sadere ba Jeová.
8 Nia sei sai hanesan ai-hun ida
neʼebé kuda besik bee,
Neʼebé ninia abut sira toʼo ba bee-dalan.
Nia sei la sente buat ida bainhira rai manas,
Maibé ninia tahan sei buras nafatin.
Maski udan la tun ba tinan ida mós
nia sei la sente laran-taridu,
No nia mós sei la para atu fó fuan.
9 Laran mak makerek liu fali buat
hotu-hotu no perigu liu.
Sé mak bele hatene ida-neʼe?
10 Haʼu, Jeová, mak buka-hatene
ema nia laran,
Haʼu haree didiʼak ema nia hanoin,
Atu fó ba ema ida-idak tuir ninia lalaʼok sira,
Tuir rezultadu husi ninia hahalok sira.
11 Hanesan manu-fuik luut tolun
neʼebé laʼós ninian,
Nuneʼe mós ho ema neʼebé halibur
rikusoin hodi lohi ema.
Lakleur deʼit rikusoin sira-neʼe
sei husik hela nia,
No ikusmai nia mak ema beik-teen.”
12 Kadunan ida neʼebé kmanek liu,
neʼebé aas husi tempu ulukliu,
Kadunan neʼe mak ita-nia fatin santu.
13 Oh Jeová, Izraél nia esperansa,
Sira hotu neʼebé husik hela Ita
sei hetan moe boot.
Sira neʼebé fila kotuk ba Ita,
sira-nia naran sei hakerek iha rai-rahun,
Tanba sira husik hela ona Jeová,
hun ba bee moris nian.
14 Kura haʼu bá, oh Jeová,
no haʼu sei sai isin-diʼak.
Salva haʼu bá, no haʼu sei hetan salvasaun,
Tanba ba Ita-Boot mak haʼu fó hahiʼi.
15 Haree bá! Iha ema neʼebé hatete mai haʼu:
“Jeová nia liafuan iha loos neʼebé?
Husik ida-neʼe sai loos bá!”
16 Maibé ba haʼu, haʼu la hadook an husi Ita
no nafatin laʼo tuir Ita nuʼudar bibi-atan,
Haʼu mós la husu beibeik katak
loron terus boot nian toʼo mai.
Ita hatene didiʼak buat hotu neʼebé
haʼu-nia ibun koʼalia ona;
Haʼu koʼalia buat hotu iha Ita-nia oin!
17 Keta halo haʼu sai taʼuk.
Ita mak haʼu-nia fatin seguru
iha tempu terus boot.
18 Husik sira neʼebé haterus haʼu
hetan moe bá,
Maibé keta husik haʼu hetan moe.
Husik sira sai taʼuk bá,
Maibé keta husik haʼu sai taʼuk.
Lori loron susar boot toʼo ba sira,
Harahun sira no halakon sira toʼo mohu.
19 Jeová dehan mai haʼu: “Bá no hamriik iha portaun boot neʼebé Judá nia liurai sira tama-sai, no mós iha portaun hotu iha Jeruzalein. 20 Ó tenke hatete ba sira:
‘Rona Jeová nia liafuan bá, imi Judá nia liurai sira, ema Judá tomak, no ema hotu neʼebé hela iha Jeruzalein, neʼebé tama liu husi portaun sira-neʼe. 21 Jeová dehan nuneʼe: “Kuidadu imi-nia an bá, keta lori sasán saida deʼit iha loron Sábadu ka keta lori tama sasán neʼe liuhusi portaun sira iha Jeruzalein.
22 Imi labele lori sai sasán saida deʼit husi imi-nia uma iha loron Sábadu; no imi labele halo serbisu saida deʼit. Hanoin-hetan katak loron Sábadu mak loron santu, hanesan haʼu fó ukun-fuan ona ba imi-nia beiʼala sira.
23 Maibé sira la rona no sira mós la see tilun, ho ulun-toos sira lakohi halo tuir no lakohi simu dixiplina.”’
24 “‘Jeová dehan: “Maibé, se imi halo tuir haʼu ho loloos, no imi la lori tama sasán saida deʼit liuhusi sidade neʼe nia portaun iha loron Sábadu, no imi hanoin-hetan nafatin katak loron Sábadu mak loron santu hodi la halo serbisu saida deʼit, 25 nuneʼe liurai sira no ulun-naʼin sira neʼebé tuur iha David nia kadunan mós sei saʼe kuda-karreta no kuda sira tama liuhusi sidade neʼe nia portaun, liurai sira no mós sira-nia ema-boot sira, ema Judá no ema neʼebé hela iha Jeruzalein; sira sei hela iha sidade neʼe ba nafatin. 26 No povu sei mai husi sidade
sira iha Judá, husi fatin sira besik Jeruzalein, husi rai-Benjamin, husi rai-tetuk, husi foho sira, no husi parte súl, no sira sei lori sakrifísiu sunu nian, sakrifísiu sira, sakrifísiu fini nian, insensu mutin no sakrifísiu agradese nian ba Jeová nia uma.
27 “‘“Maibé se imi la halo tuir haʼu-nia ukun-fuan kona-ba loron Sábadu neʼebé
santu no se imi lori tama sasán sira liuhusi Jeruzalein nia portaun sira iha loron Sábadu, haʼu sei halakan ahi iha sidade neʼe nia portaun sira, no ahi neʼe sei han mohu Jeruzalein nia uma-aas sira neʼebé seguru
no ahi neʼe sei la bele hamate.”’”
18 Neʼe mak Jeová nia liafuan tun ba Jeremias, dehan: 2 “Laʼo bá, toʼo badain rai-mean nia uma, no iha neʼebá haʼu sei
halo ó rona haʼu-nia liafuan.”
3 Nuneʼe haʼu bá toʼo badain rai-mean nia uma, no nia halo hela sanan-rai ho rai-mean.
4 Maibé sanan-rai neʼebé badain halo ho rai-mean neʼe sai aat tiha iha ninia liman. Nuneʼe, ho rai-mean neʼe,
nia halo fali sanan-rai seluk neʼebé
tuir ninia haree diʼak liu.
5 Tuirmai Jeová nia liafuan tun mai haʼu,
dehan: 6 “‘Oh umakain Izraél, haʼu mós bele halo ba imi hanesan ho buat neʼebé badain rai-mean neʼe foin halo, loos ka lae?’ Jeová dehan. ‘Haree bá! Hanesan rai-mean iha badain rai-mean nia liman, nuneʼe mós imi iha haʼu-nia liman, oh umakain Izraél.
7 Bainhira haʼu koʼalia kona-ba atu fokit sai no sobu no halakon nasaun ida ka ukun ida, 8 maibé nasaun neʼe husik ninia hahalok aat neʼebé haʼu dehan ona, nuneʼe haʼu mós sei troka haʼu-nia hanoin kona-ba susar neʼebé haʼu hakarak atu lori ba sira. 9 Maibé bainhira haʼu koʼalia kona-ba atu harii no kuda nasaun ida ka ukun ida, 10 no nasaun neʼe halo fali buat neʼebé aat iha haʼu-nia oin no la halo tuir haʼu-nia liafuan, nuneʼe haʼu mós sei troka haʼu-nia hanoin kona-ba buat diʼak neʼebé haʼu hakarak atu halo ba sira.’
11 “Agora favór ida, hatete ba ema Judá no ba ema neʼebé hela iha Jeruzalein: ‘Jeová dehan nuneʼe: “Haʼu prepara hela susar ida no halo planu ida hasoru imi. Favór ida, fila fali husi imi-nia hakat sira neʼebé aat, hadiʼa bá imi-nia hahalok sira no lalaʼok sira.”’”
12 Maibé sira dehan: “Lae, ami la bele fila fali ona! Tanba ami sei laʼo tuir ami-nia hanoin rasik, no ho ulun-toos ami ida-idak sei halo tuir ami-nia laran-aat rasik.”
13 Tan neʼe, Jeová dehan nuneʼe:
“Imi rasik husu lai ba nasaun sira seluk.
Sé mak rona ona buat hanesan neʼe?
Feto virjen Izraél halo ona
buat neʼebé aat tebes.
14 Jelu-rahun iha Líbanu sei nabeen husi fatuk-boot sira iha foho-lolon ka lae?
Ka, bee malirin neʼebé suli tun husi
fatin dook sei sai maran ka lae?
15 Maibé haʼu-nia povu haluha ona haʼu,
Tanba sira hasaʼe sakrifísiu
ba buat neʼebé folin-laek.
No sira mós halo ema sidi iha sira-nia dalan, dalan sira neʼebé antigu,
No laʼo fali iha dalan seluk neʼebé la tetuk
no la kabeer,
16 Nuneʼe sira halo sira-nia rai sai fali
fatin neʼebé halo ema taʼuk
No ba fatin neʼe, ema sei hakfuʼik nafatin.
Ema hotu neʼebé laʼo liu sei hateke ba fatin
neʼe ho taʼuk no doko sira-nia ulun.
17 Hanesan anin husi loro-saʼe,
haʼu sei halo sira namkari iha inimigu nia oin.
Iha sira-nia loron terus nian, haʼu sei fila
kotuk ba sira, no la fó oin ba sira.”
18 No sira dehan: “Mai, mai ita futu lia hasoru Jeremias, tanba ita-nia amlulik sira sei nafatin fó ukun-fuan, matenek-naʼin sira sei nafatin fó konsellu, no profeta sira sei nafatin hatoʼo Maromak nia liafuan. Mai ita koʼalia hasoru nia no keta see tilun ba buat neʼebé nia hatete.”
19 Haree didiʼak haʼu, oh Jeová,
No rona ba buat neʼebé haʼu-nia
inimigu sira hatete.
20 Buat diʼak bele selu fali ho buat aat ka lae?
Tanba sira keʼe rai-kuak ba haʼu-nia moris.
Hanoin-hetan bá, dala barak ona
haʼu hamriik iha Ita-nia oin atu koʼalia
buat diʼak kona-ba sira,
Atubele hasees Ita-nia hirus husi sira.
21 Tan neʼe, saran sira-nia oan-mane
ba hamlaha bá,
No saran sira ba surik nia kbiit bá.
Husik sira-nia feen lakon oan sira
no sai faluk bá.
Husik sira-nia mane mate
ho moras-peste bá,
Husik sira-nia mane joven mate
ho surik iha funu-laran bá.
22 Husik ema rona sira-nia tanis
hakilar husi sira-nia uma bá
Bainhira Ita lori naʼok-teen sira
mai ataka sira derrepente deʼit.
Tanba sira keʼe ona rai-kuak atu kaer haʼu
No tau ona lasu sira ba haʼu-nia ain.
23 Maibé oh Jeová,
Ita-Boot hatene didiʼak sira-nia planu
aat hotu hasoru haʼu atu oho haʼu.
Keta taka sira-nia hahalok sala,
No keta hamoos sira-nia sala husi Ita-nia oin.
Husik sira sidi iha Ita-Boot nia oin bá
Bainhira Ita fó kastigu ba sira ho Ita-nia hirus.
19 Jeová dehan nuneʼe: “Bá no sosa buli rai-mean ida husi badain rai-mean. Lori ho katuas balu povu neʼe nian no amlulik balu neʼebé katuas ona,
2 no bá toʼo Foho-Leet Hinom nian, toʼo iha Portaun Sanan-Rai Rohan nian. No iha neʼebá, fó sai liafuan neʼebé haʼu fó-hatene ba ó.
3 Ó tenke dehan: ‘Rona ba Jeová nia liafuan, imi rai-Judá nia liurai sira no imi hotu
neʼebé hela iha Jeruzalein. Jeová, ukun-naʼin ba tropa lalehan nian, Maromak Izraél nian, dehan nuneʼe:
“‘“Haʼu sei lori terus ba fatin neʼe, no ema sé deʼit neʼebé rona kona-ba neʼe sei hakfodak.
4 Neʼe tanba sira husik ona haʼu no halo fatin neʼe sai fali fatin neʼebé haʼu la hatene. Iha fatin neʼe, sira hasaʼe sakrifísiu ba maromak sira seluk, neʼebé sira no sira-nia beiʼala no rai-Judá nia liurai sira uluk la hatene,
no sira halo fatin neʼe nakonu ho ema laran-moos nia raan. 5 Sira harii ona fatin aas adorasaun nian ba Baal hodi sunu sira-nia oan-mane iha ahi laran nuʼudar sakrifísiu sunu nian ba Baal, neʼe mak hahalok neʼebé haʼu nunka haruka ka koʼalia, no haʼu-nia laran nunka hanoin kona-ba ida-neʼe.”’
6 “‘Jeová dehan: “Tan neʼe, haree bá! Loron sira sei toʼo mai bainhira ema sei la temi tan fatin neʼe nuʼudar Tofet ka Foho-Leet Hinom nian, maibé temi fali nuʼudar Foho-Leet Oho nian. 7 Iha fatin neʼe, haʼu sei sobu Judá no Jeruzalein nia planu, no haʼu sei halo sira monu ba sira-nia inimigu nia surik, no ba ema neʼebé buka atu oho sira. No haʼu sei fó sira-nia mate-isin nuʼudar ai-han ba manu sira iha lalehan no animál sira iha rai. 8 No haʼu sei halo sidade neʼe sai fatin neʼebé halo ema taʼuk no ema sei hakfuʼik ba fatin neʼe. Ema hotu neʼebé laʼo liu sei hateke ba fatin neʼe ho taʼuk no hakfuʼik ba susar hotu neʼebé kona sidade neʼe. 9 No haʼu sei halo sira han fali sira-nia oan-mane no oan-feto nia isin, no sira ida-idak sei han sira-nia maluk nia isin, tanba sira-nia inimigu no ema neʼebé buka atu oho sira sei halo susar tebes ba sira hodi ataka haleʼu sidade neʼe no sulan sira.”’
10 “Tuirmai ó tenke halo rahun buli neʼe
iha mane sira-nia oin, sira neʼebé bá hamutuk ho ó, 11 no hatete ba sira: ‘Jeová, ukun-naʼin ba tropa lalehan nian, dehan nuneʼe: “Hanesan ema neʼebé harahun badain rai-mean nia kusi toʼo la iha ema ida mak bele hadiʼa fali, nuneʼe mak haʼu sei harahun povu neʼe no sidade neʼe; no sira sei hakoi mate-isin iha Tofet toʼo la iha tan fatin atu hakoi.”’
12 “Jeová dehan: ‘Hanesan neʼe mak haʼu sei halo ba fatin neʼe no ba ema sira neʼebé hela iha fatin neʼe, haʼu sei halo sidade neʼe sai hanesan Tofet. 13 No uma sira hotu iha Jeruzalein no liurai Judá nia uma sira sei sai foʼer hanesan fatin neʼe, Tofet, tanba sira hasaʼe sakrifísiu ba fitun sira iha uma hotu nia kakuluk, no iha uma hotu, sira fui sakrifísiu hemu nian ba maromak sira seluk.’”
14 Tuirmai, bainhira Jeremias fila fali husi Tofet, fatin neʼebé Jeová haruka nia atu fó sai Ninia liafuan, nia bá hamriik iha pátiu iha Jeová nia uma, no hatete ba ema hotu: 15 “Jeová, ukun-naʼin ba tropa lalehan nian, Maromak Izraél nian, dehan nuneʼe: ‘Haree bá, haʼu sei lori terus boot hotu ba sidade neʼe no ba ninia knua sira hotu, hanesan haʼu dehan tiha ona hasoru sidade neʼe, tanba ho ulun-toos sira lakohi halo tuir haʼu-nia liafuan.’”
20 No amlulik Pasur, Imer nia oan-mane, neʼebé mós ulun-naʼin neʼebé toma konta iha Jeová nia templu, nia rona hela ba Jeremias neʼebé hatoʼo liafuan hirak-neʼe husi Maromak. 2 Tuirmai, Pasur baku profeta Jeremias no xave metin nia iha ai kastigu nian neʼebé iha Portaun Benjamin nian besik Jeová nia templu. 3 Maibé iha loron tuirmai bainhira Pasur hasai Jeremias husi ai kastigu nian, Jeremias dehan ba nia:
“Ó-nia naran laʼós Pasur tan, maibé Jeová hanaran ó Taʼuk iha Fatin Hotu.
4 Tanba Jeová dehan nuneʼe: ‘Haʼu sei halo ó no ó-nia belun sira hotu taʼuk tebes. Ho ó-nia matan rasik ó sei haree sira monu ba sira-nia inimigu nia surik; no haʼu sei entrega ema Judá tomak ba liurai Babilónia nia liman, no nia sei lori sira nuʼudar dadur ba rai-Babilónia no oho sira ho surik. 5 No haʼu sei fó ba inimigu nia liman sidade neʼe nia rikusoin hotu, sidade neʼe nia sasán hotu, buat hotu neʼebé folin-boot no Judá nia liurai sira-nia rikusoin hotu. No inimigu sira-neʼe sei hadau rikusoin hirak-neʼe no lori hotu ba rai-Babilónia.
6 No kona-ba ó, Pasur, no ema hotu
neʼebé hela iha ó-nia uma, imi sei sai dadur.
Ó sei bá rai-Babilónia no mate iha neʼebá, no ema sei hakoi ó iha neʼebá hamutuk ho ó-nia belun hotu, tanba ó hatoʼo lia-bosok ba sira nuʼudar profeta.’”
7 Oh Jeová, Ita lohi ona haʼu
toʼo halo haʼu sai beik.
Ita uza Ita-nia kbiit hasoru haʼu,
no Ita manán ona.
Loron tomak, ema hamoe haʼu;
Ema hotu hamnasa haʼu.
8 Tanba bainhira haʼu koʼalia,
haʼu tenke hakilar dehan:
“Maromak sei lori violénsia no harahun Judá!”
Tanba Jeová nia liafuan mak ema koʼalia aat
no goza haʼu loron tomak.
9 Nuneʼe haʼu hatete: “Haʼu sei la temi tan
kona-ba nia,
No haʼu sei la koʼalia tan hodi ninia naran.”
Maibé iha haʼu-nia laran, ninia liafuan sai hanesan ahi-lakan neʼebé sulan metin
iha haʼu-nia ruin,
No haʼu kole ona atu hanetik ida-neʼe;
Haʼu la bele tahan tan ida-neʼe.
10 Tanba haʼu rona lia-anin barak neʼebé aat;
Buat neʼebé halo haʼu taʼuk mak haleʼu haʼu.
“Mai ita duun nia; duun nia bá!”
Ema hotu neʼebé finje hasé haʼu ho dame,
sira mós hein hela ba tempu
neʼebé haʼu sidi, dehan:
“Karik nia sei halo sala neʼebé beik,
No ita bele manán hasoru nia
no selu aat ba nia.”
11 Maibé Jeová mak hamutuk ho haʼu
hanesan asuwaʼin neʼebé forsa boot.
Tan neʼe mak ema neʼebé haterus haʼu
sei sidi no sira sei la manán.
Sira sei hetan moe boot, tanba sira
sei la hetan susesu.
No moe boot neʼebé sira hetan,
ema sei la haluha ba nafatin.
12 Maibé oh Jeová, ukun-naʼin tropa lalehan nian, Ita-Boot haree didiʼak ba ema laran-loos;
Ita haree ema nia hanoin no laran.
Husik haʼu haree Ita fó kastigu ba sira,
Tanba haʼu entrega ona haʼu-nia
kazu ba Ita-Boot.
13 Kanta ba Jeová! Fó hahiʼi ba Jeová!
Tanba nia salva ona ema kiak
husi ema aat sira-nia liman.
14 Malisan ba loron neʼebé haʼu moris mai!
Keta fó bensaun ba loron neʼebé haʼu moris,
loron neʼebé haʼu-nia inan tuur ahi!
15 Malisan ba ema neʼebé hatoʼo
liafuan diʼak ba haʼu-nia aman
No halo nia haksolok, hodi dehan:
“Oan-mane ida moris ona ba ó, oan-mane!”
16 Halo ema neʼe sai hanesan sidade sira neʼebé Jeová halakon ona no la sente kasian.
No halo nia rona lian halerik iha dadeer
no lian funu nian iha meiudia.
17 Tansá mak nia la oho tiha haʼu bainhira
haʼu sei iha inan nia knotak laran?
Hodi nuneʼe haʼu-nia inan nia oan-fatin
mak sai hanesan haʼu-nia rate
No haʼu sei nunka moris mai.
18 Tansá mak haʼu tenke sai
husi inan nia knotak
Se atu haree deʼit terus no susar,
No halo haʼu-nia moris remata deʼit ho moe?
21 Jeová nia liafuan tun ba Jeremias bainhira Liurai Zedekias haruka Pasur, Malkias nia oan-mane, no amlulik Sofonias, Maseas nia oan-mane, atu husu ba Jeremias, dehan:
2 “Favór ida, ajuda ami no husu lai ba Jeová, tanba Liurai Nabukodonozor husi rai-Babilónia mai ona atu halo funu hasoru ita. Karik Jeová sei halo buat furak ruma hodi ajuda ita no liurai neʼe sei hakiduk husi ita.”
3 Jeremias hatete ba sira: “Imi tenke dehan ba Zedekias: 4 ‘Jeová, Maromak Izraél nian, dehan nuneʼe: “Haʼu sei halo kroʼat sira iha imi-nia liman kontra hasoru fali imi, kroʼat sira neʼebé imi uza atu halo funu hasoru liurai Babilónia no ema Kaldeia sira iha moru nia liʼur neʼebé ataka haleʼu imi. No haʼu sei halibur sira hotu ba sidade neʼe nia klaran. 5 No haʼu rasik mak sei halo funu hasoru imi ho liman neʼebé forte no ho liman neʼebé iha kbiit, ho hirus, ho nervozu no ho laran neʼebé nakali tebetebes.
6 Haʼu sei fó kastigu ba ema hotu iha sidade neʼe, ema no animál hotu. Sira sei mate ho moras-peste neʼebé boot.”’
7 “‘Jeová dehan: “Liutiha neʼe, haʼu sei entrega Zedekias, rai-Judá nia liurai, ba Nabukodonozor, liurai ba rai-Babilónia. Haʼu sei entrega Zedekias hamutuk ho nia atan sira no povu sira iha sidade neʼe, neʼebé la mate ho moras-peste, ho surik no ho hamlaha. Sin, haʼu sei entrega sira hotu ba sira-nia inimigu nia liman, ba ema sira neʼebé buka atu oho sira. Nia sei oho sira ho surik. Nia sei la sente kasian, nia sei la hanoin no la sente laran-sadiʼa ba sira.”’
8 “No ó tenke hatete ba povu neʼe: ‘Jeová dehan nuneʼe: “Haree bá, haʼu tau iha imi hotu nia oin dalan ba moris no dalan ba mate. 9 Ema neʼebé hela nafatin iha sidade neʼe sei mate ho surik, ho hamlaha no ho moras-peste. Maibé ema neʼebé sai husi sidade neʼe no entrega an ba ema Kaldeia sira neʼebé ataka haleʼu imi, sei moris nafatin,
no ema neʼe sei salva ninia moris.”’
10 “‘Jeová dehan nuneʼe: “Tanba haʼu fila
kotuk ona ba sidade neʼe, no haʼu sei halo sidade neʼe hetan terus, laʼós buat diʼak. Sidade neʼe sei monu ba liurai Babilónia nia liman, no nia sei sunu sidade neʼe ho ahi.”
11 “‘Ba liurai Judá nia umakain: Rona Jeová nia liafuan bá. 12 Oh David nia umakain,
Jeová dehan nuneʼe:
“Dadeer-dadeer halaʼo justisa bá,
No salva ema husi ema aat
neʼebé hadau sira-nia rikusoin,
Atu nuneʼe haʼu-nia hirus
labele lakan hanesan ahi
No ahi neʼe labele lakan makaʼas
toʼo la iha ida mak bele hamate
Tanba imi-nia hahalok aat sira.”’
13 Jeová dehan: ‘Oh povu neʼebé
hela iha foho-leet,
Oh fatuk-boot iha rai-tetuk,
Haʼu sei fó susar ba imi.
Ba imi neʼebé hatete: “Sé mak sei tun
mai atu kontra hasoru ami?
No sé mak bele tama iha ami-nia hela-fatin?”
14 Haʼu sei tesi lia hasoru imi
Tuir imi-nia hahalok’, Jeová dehan.
‘No haʼu sei sunu imi-nia ai-laran,
No ahi sei han buat hotu neʼebé haleʼu imi.’”
22 Jeová dehan nuneʼe: “Laʼo ba liurai Judá nia palásiu, no hatoʼo mensajen ida-neʼe.
2 Ó tenke hatete: ‘Rona Jeová nia liafuan bá, oh liurai Judá neʼebé tuur iha David nia kadunan, ó ho ó-nia atan sira no ó-nia povu, ema hotu neʼebé tama liuhusi portaun sira-neʼe. 3 Jeová dehan nuneʼe: “Halaʼo justisa no halo hahalok loos bá. Salva ema husi ema aat neʼebé hadau sira-nia rikusoin. Keta halo aat ba ema husi rai seluk neʼebé hela iha imi-nia leet, no keta halo aat ba oan-kiak no feto-faluk sira. No keta fakar ema laran-moos sira-nia raan iha fatin neʼe. 4 Tanba se imi halo tuir liafuan neʼe ho didiʼak, liurai sira neʼebé tuur iha David nia kadunan sei tama ba palásiu neʼe liuhusi portaun sira, sira saʼe kuda no kuda-karreta, hamutuk ho sira-nia atan no sira-nia povu hotu.”’
5 “Jeová hatutan tan: ‘Maibé se imi la halo
tuir liafuan sira-neʼe, haʼu jura hodi haʼu-nia an rasik katak palásiu neʼe sei sai fatin neʼebé harahun tiha.’
6 “Tanba Jeová nia liafuan kona-ba
liurai Judá nia palásiu mak neʼe:
‘Ba haʼu, ó mak hanesan Jílead,
Hanesan foho Líbanu nia tutun.
Maibé haʼu sei halo ó sai rai neʼebé fuik;
No sei la iha ema ida mak hela
iha ó-nia sidade sira.
7 No haʼu sei hili ema atu mai no halakon ó,
Sira ida-idak ho sira-nia kroʼat.
Sira sei tesi ó-nia ai-sedru neʼebé diʼak liu
No sunu tiha ai neʼe iha ahi.
8 “‘No ema husi nasaun barak sei laʼo liu sidade neʼe no koʼalia ba malu: “Tansá mak Jeová halo buat hanesan neʼe ba sidade boot neʼe?” 9 No sira sei hatán: “Tanba sira husik tiha aliansa ho Jeová, sira-nia Maromak,
no hakruʼuk fali ba maromak sira seluk hodi serbí sira.”’
10 Keta tanis ba ema neʼebé mate ona,
No keta sente triste ba nia.
Maibé, tanis makaʼas ba ida neʼebé sai dadur,
Tanba nia sei la fila fali tan ba ninia rai,
ninia moris-fatin.
11 “Tanba neʼe mak Jeová nia liafuan
kona-ba Salum, Josias nia oan-mane, liurai Judá neʼebé ukun tuir ninia aman Josias, neʼebé sai tiha ona husi fatin neʼe: ‘Nia sei la fila fali tan.
12 Tanba nia sei mate iha fatin neʼebé
sira lori nia bá nuʼudar dadur, no nia sei la haree tan rai neʼe.’
13 Susar ba ema neʼebé harii
ninia uma ho hahalok laloos
No neʼebé harii ninia kuartu sira
iha andár-leten la ho justisa,
Nia neʼebé halo nia maluk sira
serbisu ba nia saugati deʼit,
Nia neʼebé lakohi selu kolen
ba ninia maluk sira;
14 Nia neʼebé dehan: ‘Ha’u sei harii
uma boot ba haʼu-nia an,
Ho kuartu sira neʼebé luan iha andár-leten.
Haʼu sei tau janela sira
No taka uma nia didin ho ai-sedru
no pinta kór mean naroman.’
15 Ó sei ukun nafatin tan deʼit ó uza
ai-sedru barak liu fali ema seluk ka?
Ó-nia aman mós han no hemu,
Maibé nia halaʼo justisa no halo hahalok loos,
No buat hotu iha nia moris laʼo ho diʼak.
16 Nia apoia ema iha terus laran no
ema kiak sira neʼebé lori kazu ba nia,
Nuneʼe buat hotu laʼo ho diʼak.
Jeová dehan: ‘Hahalok neʼebé nia halo hatudu katak nia hatene haʼu, loos ka lae?’
17 ‘Maibé ó-nia matan no fuan kaan deʼit
atu hetan rikusoin iha dalan neʼebé laloos,
No atu fakar ema laran-moos nia raan,
Atu lohi ema no kasa ema nia osan.’
18 “Tan neʼe, kona-ba Josias nia oan-mane, Jehoakim, liurai ba rai-Judá,
Jeová dehan nuneʼe:
‘Bainhira nia mate, ema sei la tanis
ba nia hodi koʼalia ba malu:
“Aii, haʼu-nia naan! Aii, haʼu-nia feton!”
Sira sei la lelir ba nia, dehan:
“Aii, haʼu-nia naʼi! Aii, ninia kmanek la iha ona!”
19 Ema sei hakoi nia hanesan
hakoi kuda-burru ida,
Sira sei rasta nia mate-isin no soe sai nia,
Soe ba portaun Jeruzalein nia liʼur.’
20 Saʼe ba foho Líbanu no hakilar bá,
Iha Basan, hasaʼe ó-nia lian bá,
No husi Abarim, hakilar bá,
Tanba ema hotu neʼebé hadomi
tebes ó lakon mohu ona.
21 Uluk haʼu koʼalia ba ó bainhira
ó sente hakmatek hela.
Maibé ó hatete: ‘Ha’u sei la halo tuir.’
Neʼe mak ó-nia hahalok husi tempu ó sei joven,
Tanba ó la halo tuir haʼu-nia liafuan.
22 Anin mak sei lori ó-nia bibi-atan hotu,
No ema sira neʼebé hadomi
tebes ó sei sai dadur.
No ema sei hamoe ó no ó sei sente
moe tanba ó-nia terus hotu.
23 Oh, ó neʼebé hela iha foho Líbanu,
Ó neʼebé halo knuuk iha ai-sedru nia leet,
Ó sei halerik bainhira ó sente moras,
Terus hanesan feto ida neʼebé atu tuur ahi!”
24 “Jeová, Maromak neʼebé moris, dehan nuneʼe: ‘Haʼu jura hodi haʼu-nia an rasik. Maski ó Konias, Jehoakim nia oan-mane, liurai ba rai-Judá, mak sai hanesan kadeli iha haʼu-nia liman-loos, maibé haʼu sei losu sai ó husi haʼu-nia liman! 25 Haʼu sei entrega ó ba ema sira neʼebé buka atu oho ó, ba ema sira neʼebé hataʼuk ó, ba Liurai Nabukodonozór husi rai-Babilónia nia liman, no ba ema Kaldeia sira-nia liman. 26 No haʼu sei soe ó ho ó-nia inan neʼebé tuur ahi ó ba rai seluk, rai neʼebé laʼós imi-nia moris-fatin, no imi sei mate iha neʼebá. 27 No imi sei nunka fila fali ba rai neʼebé imi hadomi tebes.
28 Mane Konias neʼe mak kusi aat ida
neʼebé rahun ona no ema hakribi,
Kusi ida neʼebé sei la iha ema ida
mak hakarak, loos ka lae?
Tansá mak haʼu tenke soe nia
ho ninia bei-oan sira,
No soe sira ba rai neʼebé sira la hatene?’
29 Oh rai, rai, rai, rona Jeová nia liafuan bá.
30 Jeová dehan nuneʼe:
‘Hakerek bá kona-ba mane neʼe
nuʼudar ema neʼebé la iha oan,
Nuʼudar mane neʼebé sei la hetan
susesu iha ninia moris tomak,
Tanba husi ninia bei-oan hotu, la iha
ema ida mak sei troka ninia fatin
Hodi tuur iha David nia kadunan
no ukun fali iha rai-Judá.’”
23 Jeová dehan: “Susar ba bibi-atan sira
neʼebé halakon mohu haʼu-nia bibi sira iha haʼu-nia rai no halo sira namkari!”
2 Tan neʼe, Jeová, Maromak Izraél nian,
dehan ba bibi-atan sira neʼebé iha knaar atu
tau matan ba ninia povu: “Imi halo haʼu-nia bibi sira halai namkari; imi nafatin halo sira namkari, no imi la tau matan didiʼak ba sira.”
“Nuneʼe haʼu sei fó kastigu ba imi tanba imi-nia hahalok aat sira”, Jeová dehan nuneʼe.
3 “Tuirmai, haʼu sei halibur haʼu-nia bibi restu husi rai hotu, husi rai neʼebé haʼu halo ona sira namkari, no haʼu sei lori sira fila fali ba sira-nia
rai neʼebé nakonu ho duʼut matak, no sira sei iha oan no sai barak. 4 No haʼu sei foti bibi-atan sira neʼebé sei tau matan duni bibi sira ho loloos. Bibi sira-neʼe sei la taʼuk no mós la laran-taridu tan, no la iha ida mak sei lakon”, Jeová dehan.
5 Jeová dehan: “Haree bá! Loron sira sei toʼo
mai bainhira haʼu sei halo moris dikin foun ida neʼebé loos husi David nia umakain. No nia sei ukun nuʼudar liurai ida neʼebé hatudu matenek, halaʼo justisa no halo hahalok loos iha rai neʼe.
6 Iha ninia loron sira, Judá sei hetan
salvasaun, no Izraél sei hela ho hakmatek.
No ema sei bolu nia ho naran: Jeová mak Hun
ba Ita-nia Hahalok Loos.”
7 Jeová dehan: “Maski nuneʼe, loron sira sei
toʼo mai bainhira sira sei la koʼalia tan: ‘Haʼu jura hodi Jeová neʼebé moris, Maromak neʼebé
lori povu Izraél sai husi rai-Ejitu!’ 8 maibé sira sei hatete fali: ‘Haʼu jura hodi Jeová neʼebé moris, Maromak neʼebé lori sai umakain Izraél nia bei-oan sira husi rai norte no husi rai hotu neʼebé nia halo ona sira hela namkari’,
no sira sei hela iha sira-nia rai rasik.”
9 Kona-ba profeta sira:
Haʼu-nia fuan rahun iha haʼu-nia laran.
Haʼu-nia ruin hotu nakdoko.
Haʼu sai hanesan ema neʼebé lanu
Hanesan mane neʼebé hemu tua-uvas toʼo lanu,
Tanba Jeová no tanba ninia liafuan santu sira.
10 Tanba rai neʼe nakonu ho ema
neʼebé halo sala-foʼer;
Rai neʼe tanis halerik tanba hetan malisan
No duʼut matak iha rai-fuik sai maran.
Sira-nia hahalok mak aat, no sira uza
sala sira-nia kbiit.
11 Jeová dehan: “Profeta no amlulik
hotu foʼer ona.
Iha haʼu-nia uma mós haʼu haree
ona sira-nia hahalok aat.”
12 Jeová dehan: “Tan neʼe, sira-nia dalan
sei sai namdoras no nakukun;
Haʼu sei dudu sira no sira sei monu.
Tanba haʼu sei lori terus ba sira
Iha tinan kastigu nian.
13 No iha profeta Samaria sira-nia leet,
haʼu haree ona buat neʼebé aat tebes.
Liafuan neʼebé sira hatoʼo mak husi Baal,
No sira lori haʼu-nia povu Izraél laʼo sala dalan.
14 No iha profeta Jeruzalein sira-nia leet, haʼu haree ona buat sira neʼebé haʼu hakribi tebes.
Sira halo sala-foʼer no laʼo iha lia-bosok;
Sira fó laran-manas ba ema aat sira,
No sira la sees husi sira-nia hahalok aat.
Ba haʼu, sira hotu hanesan ona Sodoma,
No Jeruzalein nia povu hotu
hanesan Gomorra.”
15 Tan neʼe, Jeová, ukun-naʼin ba tropa
lalehan nian dehan ba profeta sira:
“Haʼu sei halo sira han ai-tahan neʼebé moruk
No haʼu sei halo sira hemu bee venenu.
Tanba hahú husi profeta Jeruzalein
sira mak ema hotu iha rai neʼe
fila kotuk ba haʼu.”
16 Jeová, ukun-naʼin ba tropa
lalehan nian dehan nuneʼe:
“Keta rona ba profeta nia liafuan
neʼebé sira hatoʼo ba imi.
Sira habosok deʼit imi.
Vizaun neʼebé sira koʼalia mak
husi sira-nia laran rasik,
Laʼós husi Jeová nia ibun.
17 Sira hatete fila-fila ba ema
neʼebé la hamtaʼuk haʼu:
‘Jeová dehan: “Imi sei iha dame.”’
No ba ema hotu neʼebé laʼo tuir sira rasik
nia laran neʼebé toos, sira hatete:
‘Terus sei la kona imi.’
18 Tanba sé mak hamriik hamutuk ona
ho ema neʼebé besik loos ba Jeová
Atu haree no rona ninia liafuan?
Sé mak see tilun didiʼak ba ninia
liafuan hodi rona ida-neʼe?
19 Haree bá! Jeová nia hirus sei huu
makaʼas hanesan anin-boot;
Hanesan anin-boot neʼebé dulas makaʼas,
neʼe sei nakdulas tun ba ema aat sira-nia
ulun leten.
20 Jeová nia hirus neʼe sei la para
Toʼo nia kumpre ona ninia hakarak
iha nia laran.
Iha loron sira-neʼe nia rohan, imi sei komprende ida-neʼe ho momoos.
21 Haʼu la haruka profeta sira-neʼe,
maibé sira bá.
Haʼu la koʼalia ba sira, maibé sira
hatoʼo liafuan nuʼudar profeta.
22 Maibé se karik sira hamriik hamutuk
ho ema neʼebé besik loos ba haʼu,
Sira sei halo haʼu-nia povu
rona haʼu-nia liafuan
No halo haʼu-nia povu fila fali
husi sira-nia lalaʼok neʼebé aat
no husi sira-nia hahalok neʼebé aat.”
23 Jeová dehan: “Haʼu mak Maromak
neʼebé besik deʼit ka?
Haʼu mós Maromak neʼebé dook, loos ka lae?”
24 Jeová dehan: “Ema ruma bele subar an iha subar-fatin neʼebé haʼu la bele haree ka?
Jeová dehan: “Haʼu mak boot liu fali lalehan
no rai, loos ka lae?”
25 “Haʼu rona ona profeta sira neʼebé hatoʼo lia-bosok hodi haʼu-nia naran, dehan: ‘Haʼu hetan mehi! Haʼu hetan mehi!’ 26 Toʼo bainhira mak profeta sira-nia laran hanoin nafatin atu hatoʼo lia-bosok? Sira mak profeta neʼebé koʼalia lia-bobar husi sira-nia laran rasik.
27 Sira koko atu halo haʼu-nia povu haluha haʼu-nia naran liuhusi sira-nia mehi neʼebé sira konta ba malu, hanesan sira-nia aman sira neʼebé haluha ona haʼu-nia naran tanba Baal. 28 Profeta neʼebé hetan mehi, husik nia konta mehi neʼe bá. Maibé profeta neʼebé simu duni haʼu-nia liafuan, nia tenke hatoʼo ho loloos liafuan neʼe.”
Jeová dehan: “Saida mak hanesan
ho trigu-kain no trigu-musan?”
29 Jeová dehan: “Haʼu-nia liafuan mak
hanesan ahi, no hanesan marreta neʼebé
baku rahun fatuk-boot, loos ka lae?”
30 Jeová dehan: “Tan neʼe, haʼu sei kontra hasoru profeta sira neʼebé naʼok haʼu-nia liafuan husi sira-nia maluk.”
31 Jeová dehan: “Haʼu sei kontra hasoru profeta sira neʼebé uza sira-nia nanál atu koʼalia: ‘Maromak dehan nuneʼe!’”
32 Jeová dehan: “Haʼu sei kontra hasoru profeta sira neʼebé konta sira-nia mehi falsu
no lori haʼu-nia povu laʼo sala dalan tanba sira-nia lia-bosok no liafuan gaba an.”
Jeová dehan nuneʼe: “Maibé haʼu la haruka
ka manda sira atu halo ida-neʼe. Nuneʼe sira
sei la lori buat diʼak ida ba povu neʼe.”
33 “No bainhira povu neʼe ka profeta ka amlulik ida husu ó, dehan: ‘Saida mak Jeová nia lia-menon neʼebé todan?’ ó tenke hatán ba sira: ‘Jeová dehan nuneʼe: “Imi mak naha todan! No haʼu sei soe tiha imi.”’
34 Kona-ba profeta, amlulik ka povu neʼebé hatete: ‘Lia-menon husi Jeová mak todan!’, haʼu sei kontra hasoru ema neʼe no ninia umakain. 35 Neʼe mak liafuan neʼebé imi ida-idak koʼalia ba imi-nia maluk no imi-nia maun-alin sira, dehan: ‘Saida mak Jeová hatán? No saida mak Jeová hatete?’ 36 Maibé imi labele temi tan lia-menon husi Jeová nuʼudar naha todan. Tanba imi ida-idak mak halo naha todan ba imi-nia an rasik hodi hatoʼo imi-nia liafuan rasik no imi troka ona liafuan husi Jeová, ita-nia Maromak neʼebé moris, ukun-naʼin ba tropa lalehan nian.
37 “Neʼe mak liafuan neʼebé ó sei hatete ba profeta sira: ‘Jeová hatán saida ona ba imi? No saida mak Jeová hatete?
38 No se imi nafatin hatete: “Lia-menon husi Jeová mak todan!”, Jeová dehan nuneʼe: “Tanba imi hatete: ‘Jeová nia liafuan mak todan’ maski haʼu dehan ona ba imi: ‘Imi labele hatete katak lia-menon husi Jeová mak todan’, 39 haree bá! Haʼu sei foti saʼe imi no soe imi dook husi haʼu-nia oin, imi no mós sidade neʼebé haʼu fó ona ba imi no ba imi-nia beiʼala sira. 40 No haʼu sei hamoe imi, no imi sei hetan moe boot ba nafatin, moe neʼebé ema sei nunka haluha.”’”
24 Tuirmai, Jeová hatudu ba haʼu kohe rua nakonu ho ai-figeira fuan neʼebé tau iha Jeová nia templu nia oin. Neʼe akontese bainhira liurai Nabukodonozor husi Babilónia lori ona Jekonias, liurai ba rai-Judá, Jehoakim nia oan-mane, nuʼudar dadur. Nia lori liurai neʼe hamutuk ho ema-boot sira husi rai-Judá, badain sira no badain-besi sira husi Jeruzalein nuʼudar dadur ba Babilónia. 2 Iha kohe ida nakonu ho ai-figeira fuan neʼebé diʼak tebes, hanesan ai-figeira fuan uluk nian, maibé iha kohe ida seluk nakonu ho ai-figeira fuan neʼebé aat tebes toʼo ema la bele han tanba aat loos.
3 Tuirmai Jeová husu mai haʼu: “Jeremias, saida mak ó haree?” Haʼu hatán: “Ai-figeira fuan; ai-figeira fuan neʼebé diʼak, diʼak tebes, maibé iha mós ai-figeira fuan neʼebé aat, aat tebes toʼo ema la bele han.”
4 Tuirmai Jeová nia liafuan tun mai haʼu, dehan:
5 “Jeová, Maromak Izraél nian, dehan nuneʼe: ‘Hanesan ai-figeira fuan neʼebé diʼak, haʼu mós sei haree ema dadur sira husi rai-Judá ho diʼak, sira neʼebé haʼu haruka ona husi fatin neʼe ba ema Kaldeia nia rai.
6 Haʼu sei tau matan sira ba sira-nia diʼak, no haʼu sei halo sira fila fali ba rai neʼe. Haʼu sei harii sira, no haʼu sei la sobu sira; haʼu sei kuda sira, no haʼu sei la fokit sira.
7 No haʼu sei fó ba sira laran neʼebé hakarak hatene haʼu, katak haʼu mak Jeová. Sira sei sai haʼu-nia povu, no haʼu sei sai sira-nia Maromak, tanba sira sei fila fali mai haʼu ho sira-nia laran tomak.
8 “‘Maibé kona-ba ai-figeira fuan neʼebé aat, aat tebes toʼo ema la bele han, Jeová dehan nuneʼe: “Hanesan neʼe mak haʼu sei haree ba Zedekias, liurai ba rai-Judá, ho ninia ema-boot sira, no ema restu husi Jeruzalein neʼebé sei hela nafatin iha rai neʼe, no mós ema sira neʼebé hela iha rai-Ejitu.
9 Haʼu sei halo nasaun hotu iha mundu neʼe sai taʼuk tanba haree susar neʼebé kona sira. Ema sei koʼalia aat ba sira, konta lia-dadolin kona-ba sira, hatún no fó-malisan ba sira iha fatin hotu neʼebé haʼu halo sira namkari. 10 No haʼu sei haruka surik, hamlaha no moras-peste hasoru sira, toʼo sira lakon mohu husi rai neʼe, neʼebé haʼu fó ona ba sira no ba sira-nia beiʼala.”’”
25 Neʼe mak liafuan neʼebé Maromak hatoʼo ba Jeremias kona-ba povu hotu iha rai-Judá bainhira Liurai Jehoakim nia ukun tama ba tinan haat. Jehoakim mak Josias nia oan-mane. Tempu neʼe mak tinan primeiru ba Liurai Nabukodonozor nia ukun iha rai-Babilónia. 2 Neʼe mak liafuan neʼebé profeta Jeremias hatoʼo kona-ba povu hotu iha rai-Judá no ema hotu neʼebé hela iha Jeruzalein:
3 “Hahú husi tempu neʼebé Liurai Josias, Amon nia oan-mane, ukun rai-Judá ba tinan 13 toʼo ohin loron, katak durante tinan 23 nia laran, Jeová nia liafuan tun mai haʼu, no haʼu koʼalia beibeik ba imi, maibé imi lakohi rona.
4 No Jeová haruka ninia atan profeta sira hotu ba imi, nia haruka sira fila-fila, maibé imi lakohi rona no imi la see tilun atu rona. 5 Sira dehan beibeik: ‘Favór ida, imi ida-idak fila fali husi imi-nia hakat sira neʼebé aat no husi imi-nia hahalok aat sira; nuneʼe mak imi sei nafatin hela ba tempu kleur iha rai neʼebé Jeová fó ona ba imi no ba imi-nia beiʼala sira iha tempu ulukliu. 6 Keta laʼo tuir maromak
sira seluk, keta serbí no hakruʼuk ba sira
hodi hakanek haʼu-nia laran ho buat neʼebé
imi halo ho imi-nia liman. Se lae, haʼu sei lori terus ba imi.’
7 “Jeová dehan: ‘Maibé imi lakohi rona haʼu. Imi hakanek haʼu-nia laran ho buat neʼebé imi halo ho imi-nia liman, toʼo lori susar ba imi-nia an rasik.’
8 “Tan neʼe, Jeová, ukun-naʼin ba tropa lalehan nian dehan: ‘“Tanba imi lakohi halo tuir haʼu-nia liafuan, 9 haʼu sei bolu nasaun sira hotu husi parte norte.” Jeová dehan: “Haʼu sei bolu haʼu-nia atan, Nabukodonozor, liurai ba rai-Babilónia, no haʼu sei lori sira atu ataka rai neʼe no ema hotu neʼebé hela iha neʼe no mós nasaun sira hotu neʼebé haleʼu rai neʼe. Haʼu sei halakon sira hotu, no ema sei taʼuk no hakfuʼik bainhira haree buat neʼebé mosu ba sira, no fatin neʼe sei sai fuik ba nafatin. 10 Haʼu sei halakon husi sira-nia leet lian haklalak no lian haksolok, lian noivu nian no lian noiva nian, lian dulas trigu nian no ahi-oan nia naroman. 11 No rai tomak neʼe sei sai aat no fuik, no sei sai fatin neʼebé halo ema taʼuk, no nasaun sira-neʼe tenke sai atan ba liurai Babilónia durante tinan 70 nia laran.”’
12 “Jeová dehan: ‘Maibé bainhira tinan 70 neʼe liu tiha, haʼu sei fó kastigu ba liurai Babilónia no ninia nasaun tanba sala neʼebé sira halo, no haʼu sei halo ema Kaldeia sira-nia rai sai fatin aat no fuik ba nafatin. 13 Haʼu sei halo tuir liafuan hotu neʼebé haʼu koʼalia ona kona-ba fó kastigu ba rai neʼe, tuir buat hotu neʼebé hakerek ona iha livru neʼe, neʼebé Jeremias fó-hatene nanis ona kona-ba nasaun hotu.
14 No liurai boot sira no nasaun barak sei halo sira sai atan, no haʼu sei selu fali sira tuir sira-nia hahalok no tuir buat neʼebé sira halo ho sira-nia liman.’”
15 Tanba Jeová, Maromak Izraél nian, dehan nuneʼe ba haʼu: “Foti kopu neʼebé nakonu ho tua-uvas laran-nakali nian husi haʼu-nia liman,
no kona-ba nasaun hotu neʼebé haʼu haruka ó bá, ó tenke halo sira hemu tua-uvas neʼe.
16 No sira sei hemu no laʼo bá-mai hanesan mane sira neʼebé sai bulak, tanba surik neʼebé haʼu haruka ba sira-nia leet.”
17 Nuneʼe, haʼu foti kopu neʼe husi Jeová nia liman no halo nasaun hotu hemu, nasaun hotu neʼebé Jeová haruka haʼu bá: 18 hahú husi Jeruzalein no sidade sira iha rai-Judá, ninia liurai sira no ema-boot sira, tanba Maromak sei halakon sira, no halo sira hetan malisan, ema sei taʼuk no hakfuʼik bainhira haree buat neʼebé mosu ba sira, hanesan sai loos daudaun; 19 tuirmai Faraun, liurai Ejitu nian, ho ninia atan sira, ninia ema-boot sira no ninia povu hotu, 20 no mós ema hotu husi rai oioin neʼebé hela iha rai-Ejitu; liurai hotu husi rai-Uz; liurai hotu husi ema Filístia nia rai, Askelon, Gaza, Ekron, no ema restu sira neʼebé sei hela iha Asdod; 21 Edom, Moab, no ema Ammon; 22 liurai hotu husi Tiro, liurai hotu husi Sidon, no liurai sira husi illa neʼebé iha tasi laran; 23 Dedan, Tema, Buz, no ema hotu neʼebé koir sira-nia fuuk iha sira-nia tilun-hun; 24 liurai hotu neʼebé ukun ema Arábia no liurai hotu neʼebé ukun ema husi rai oioin neʼebé hela iha rai-fuik; 25 liurai hotu husi Zimri, liurai hotu husi Elam, no liurai hotu neʼebé ukun ema Média; 26 no liurai hotu husi rai norte, sira neʼebé besik no mós dook, ida ba ida, no mundu neʼe nia nasaun seluk hotu neʼebé iha rai leten; ikusliu liurai husi Sesak mós sei hemu tua-uvas neʼe.
27 “No ó tenke hatete ba sira: ‘Jeová, ukun-naʼin ba tropa lalehan nian, Maromak Izraél nian, dehan nuneʼe: “Hemu no sai lanu bá, muta no monu bá toʼo la bele hamriik fali tanba surik neʼebé haʼu sei haruka ba imi-nia leet.”’ 28 No se sira lakohi foti kopu neʼe husi ó-nia liman no hemu, ó tenke hatete ba sira: ‘Jeová, ukun-naʼin ba tropa lalehan nian, dehan nuneʼe: “Imi tenke hemu! 29 Tanba haree bá, se sidade neʼebé lori haʼu-nia naran mós haʼu sei fó kastigu, sá tan ho imi? Imi bele sees husi kastigu ka lae?”’
“Jeová, ukun-naʼin ba tropa lalehan nian, dehan: ‘Imi sei la sees husi kastigu, tanba haʼu sei bolu surik atu kontra hasoru ema hotu neʼebé hela iha mundu neʼe.’
30 “No ó tenke hatoʼo liafuan sira-neʼe hotu nuʼudar profeta no hatete ba sira:
‘Husi fatin aas, Jeová sei hasaʼe lian boot,
No ema sei rona nia lian
husi ninia hela-fatin santu.
Nia sei hasaʼe lian makaʼas
hasoru ninia horik-fatin.
Nia sei hakilar hanesan ema
neʼebé sama uvas-fuan,
No hananu knananuk manán nian hasoru
ema hotu neʼebé hela iha mundu.’
31 Jeová dehan: ‘Barullu boot
sei toʼo rai nia rohan,
Tanba Jeová hasaʼe lia kontra
hasoru nasaun sira.
Nia rasik sei tesi lia ba ema hotu.
No nia sei halakon ema aat sira ho surik.’
32 Jeová, ukun-naʼin ba tropa
lalehan nian, dehan:
‘Haree bá! Terus sei habelar husi
nasaun ida toʼo nasaun seluk,
No anin-boot sei huu husi fatin
neʼebé dook liu iha mundu neʼe.
33 “‘No ema sira neʼebé Jeová oho iha loron neʼebá sei sai barak husi rai nia rohan ida toʼo rai nia rohan seluk. Ema sei la tanis ba sira, no ema sei la halibur ka hakoi sira-nia mate-isin. Sira sei sai hanesan rai-metan ba rai.’
34 Imi bibi-atan sira, tanis halerik bá!
Imi ulun-naʼin sira ba ema-lubun,
duir an bá-mai iha rai-rahun laran bá,
Tanba tempu atu oho imi
no halo imi namkari toʼo mai ona,
No imi sei monu rahun hanesan
kusi neʼebé folin-boot!
35 La iha fatin ba bibi-atan sira atu halai,
No ulun-naʼin sira ba ema-lubun
mós la bele halai-sees.
36 Rona bá! Bibi-atan sira halerik
No ulun-naʼin sira ba ema-lubun tanis hakilar,
Tanba Jeová sei estraga sira-nia rai matak.
37 No ema nia hela-fatin sira
neʼebé hakmatek sai mamuk ona
Tanba Jeová nia hirus neʼebé lakan makaʼas.
38 Nia husik ninia hela-fatin hanesan leaun ida,
No sira-nia rai sai fatin neʼebé halo ema taʼuk
Tanba surik neʼebé siʼak
No tanba ninia hirus neʼebé lakan makaʼas.”
26 Bainhira Josias nia oan-mane Liurai Jehoakim hahú ukun rai-Judá, Jeová nia liafuan tun ba Jeremias, dehan:
2 “Jeová hatete nuneʼe: ‘Bá, hamriik iha pátiu iha Jeová nia templu no koʼalia ba ema hotu husi sidade sira iha rai-Judá, neʼebé mai atu adora Jeová iha ninia templu. Fó-hatene ba sira liafuan hotu neʼebé haʼu haruka ó hatoʼo. Keta hamenus liafuan ida husi lia-menon neʼe. 3 Karik sira sei rona no sira ida-idak sei fila fali husi sira-nia lalaʼok neʼebé aat, no haʼu sei troka haʼu-nia hanoin kona-ba terus neʼebé haʼu hakarak lori ba sira tanba sira-nia hahalok aat. 4 Hatete ba sira: “Jeová dehan nuneʼe: ‘Se imi la rona haʼu hodi la halo tuir haʼu-nia ukun-fuan neʼebé haʼu tau ona iha imi-nia oin, 5 no la rona ba liafuan husi haʼu-nia atan profeta sira neʼebé haʼu haruka fila-fila ba imi, neʼebé toʼo ohin loron imi la rona,
6 se nuneʼe, haʼu sei halo uma neʼe sai hanesan Silo, no nasaun sira hotu iha mundu sei temi sidade neʼe nuʼudar malisan.’”’”
7 No amlulik sira, profeta sira no povu hotu rona Jeremias koʼalia liafuan hirak-neʼe iha Jeová nia templu.
8 Tan neʼe, bainhira Jeremias koʼalia tiha lia-menon neʼebé Jeová haruka ona nia atu hatoʼo ba ema hotu, tuirmai amlulik sira, profeta sira no povu hotu kaer nia no dehan: “Ó tenke mate. 9 Tansá mak ó koʼalia nuʼudar profeta hodi Jeová nia naran, dehan: ‘Uma neʼe sei sai hanesan Silo, no sidade neʼe sei sai aat no fuik no ema sei la hela tan iha neʼe’?” Ema hotu hobur haleʼu Jeremias iha Jeová nia templu.
10 Bainhira ema-boot sira iha rai-Judá rona liafuan hirak-neʼe, sira sai husi liurai nia palásiu no bá toʼo Jeová nia templu no tuur iha Jeová nia portaun foun nia oin. 11 Tuirmai, amlulik no profeta sira dehan ba ema-boot sira no mós ba povu hotu: “Mane neʼe merese simu kastigu-mate, tanba nia koʼalia liafuan nuʼudar profeta hodi hatete aat sidade neʼe hanesan imi foin rona ho imi-nia tilun rasik.”
12 Nuneʼe, Jeremias hatete ba ema-boot sira hotu no mós ba ema hotu: “Jeová mak haruka haʼu nuʼudar profeta atu hatoʼo ninia liafuan hotu kona-ba templu neʼe no sidade neʼe, hanesan imi foin rona. 13 Tan neʼe, agora, hadiʼa imi-nia lalaʼok sira no imi-nia hahalok sira no halo tuir imi-nia Maromak Jeová nia liafuan, no Jeová sei troka ninia hanoin kona-ba terus neʼebé nia dehan ona atu lori ba imi.
14 Maibé kona-ba haʼu, haʼu iha imi-nia liman ona. Halo deʼit ba haʼu buat neʼebé tuir imi-nia haree mak diʼak no loos. 15 Maibé imi tenke hatene ida-neʼe bá: Se imi oho haʼu, imi no sidade neʼe no ema hotu neʼebé hela iha sidade neʼe sei simu sala ba ema laran-moos nia raan, tanba loloos Jeová mak haruka haʼu ba imi atu hatoʼo liafuan hirak-neʼe hotu iha imi-nia leet.”
16 Tuirmai, ema-boot sira no povu hotu hatete ba amlulik sira no profeta sira: “Mane neʼe la merese simu kastigu-mate, tanba nia koʼalia ba ita hodi Jeová ita-nia Maromak nia naran.”
17 Liután neʼe, katuas balu iha rai neʼe mós hamriik no hahú koʼalia ba povu tomak, dehan: 18 “Bainhira Liurai Ezekias mak ukun rai-Judá, profeta Mikeas husi Moreset fó-hatene ba povu iha rai-Judá, dehan: ‘Jeová, ukun-naʼin ba tropa lalehan nian, dehan nuneʼe:
“Siaun sei harahun tiha hanesan
ema fila rai iha toʼos,
Jeruzalein sei sai sidade
neʼebé naksobu no aat,
No foho neʼebé iha Maromak nia templu sei sai hanesan ai-laran iha fatin sira neʼebé aas.”’
19 “Maibé rai-Judá nia Liurai Ezekias no ema Judá hotu oho nia ka lae? Liurai neʼe taʼuk ba Jeová no husu Jeová nia laran-sadiʼa, nuneʼe Jeová troka ninia hanoin kona-ba terus neʼebé nia dehan ona atu lori ba sira, loos ka lae? Se ita oho Jeremias karik, ita sei lori terus boot ba ita-nia an rasik.
20 “No iha mós mane ida neʼebé koʼalia nuʼudar profeta hodi Jeová nia naran, nia mak Urija, Semias nia oan, husi Kiriat-Jearim, nia mós hatoʼo liafuan hasoru sidade neʼe no rai neʼe, hanesan deʼit ho Jeremias nia liafuan. 21 Liurai Jehoakim ho nia asuwaʼin sira no ema-boot hotu rona Urija nia liafuan, no liurai neʼe buka atu oho nia. Bainhira Urija rona kona-ba neʼe, nia sai taʼuk no halai ba rai-Ejitu. 22 Tuirmai Liurai Jehoakim haruka Elnatan, Akbor nia oan-mane, hamutuk ho mane sira seluk bá rai-Ejitu. 23 Sira lori Urija husi rai-Ejitu no lori nia ba Liurai Jehoakim, tuirmai liurai neʼe oho nia ho surik no soe nia mate-isin ba fatin neʼebé baibain hakoi povu kiʼik.”
24 Maibé Ahikam, Safan nia oan-mane, apoia Jeremias, nuneʼe nia la monu ba povu nia liman no sira la bele oho nia.
27 Bainhira Liurai Jehoakim, Josias nia oan-mane, hahú ukun rai-Judá, Jeová nia liafuan tun ba Jeremias:
2 “Jeová dehan mai haʼu: ‘Halo tali sira no ai-lolon sira bá,
no tula buat sira-neʼe ba ó-nia kanuruk.
3 Tuirmai, haruka buat sira-neʼe ba liurai Edom, liurai Moab, liurai ba ema Ammon, liurai Tiro no liurai Sidon liuhusi sira-nia manu-ain neʼebé mai toʼo Jeruzalein atu hasoru Zedekias, liurai ba rai-Judá.
4 Fó mandamentu tuirmai neʼe ba sira atu sira bele hatoʼo ba sira-nia naʼi:
“‘“Jeová, ukun-naʼin ba tropa lalehan nian, Maromak Izraél nian, dehan, imi tenke hatete nuneʼe ba imi ida-idak nia naʼi: 5 ‘Haʼu mak ida neʼebé kria mundu, ema no animál sira iha rai ho haʼu-nia kbiit boot no ho haʼu-nia liman neʼebé forte; no haʼu fó buat hirak-neʼe ba ema sé deʼit neʼebé haʼu hakarak fó. 6 No agora, haʼu fó ona rai sira-neʼe hotu ba haʼu-nia atan Nabukodonozor, liurai ba rai-Babilónia nia liman; animál fuik sira iha rai mós haʼu fó ona ba nia atu serbí nia. 7 Nasaun sira hotu sei serbí nia no ninia oan-mane no ninia bei-oan toʼo tempu neʼebé ninia nasaun nia ukun remata. Iha tempu neʼebá, nasaun barak no liurai boot sira sei halo nia sai atan.’
8 “‘“Jeová dehan: ‘Se iha nasaun ka ukun ruma neʼebé lakohi serbí Nabukodonozor, liurai ba rai-Babilónia, no lakohi hakruʼuk ba liurai Babilónia, haʼu sei fó kastigu ba nasaun neʼe ho surik, ho rai-hamlaha no ho moras-peste, toʼo haʼu halakon sira ho ninia liman.’
9 “‘“‘Tan neʼe, keta rona ba imi-nia profeta sira, siʼikdór sira, mehi-naʼin sira, sira neʼebé halo masonik no matan-dook sira, neʼebé hatete ba imi: “Imi sei la serbí liurai Babilónia.” 10 Tanba sira hatoʼo lia-bosok ba imi, no se imi rona ba sira, ema sei lori imi dook husi imi-nia rai no haʼu sei halo imi namkari no imi sei lakon mohu.
11 “‘“Jeová dehan: ‘Maibé kona-ba nasaun neʼebé hakruʼuk ba liurai Babilónia no serbí nia, haʼu sei husik nasaun neʼe hela iha sira-nia rai rasik, no sira sei halo toʼos no hela iha neʼebá.’”’”
12 Ba Zedekias liurai ba rai-Judá mós haʼu hatoʼo liafuan neʼebé hanesan, dehan: “Hakruʼuk ba liurai Babilónia no serbí nia no ninia povu, no moris nafatin bá. 13 Tansá mak ó ho ó-nia povu tenke mate ho surik, ho hamlaha no ho moras-peste, hanesan liafuan neʼebé Jeová dehan ona kona-ba nasaun neʼebé lakohi serbí liurai Babilónia? 14 Keta rona ba liafuan neʼebé profeta sira koʼalia ba imi: ‘Imi sei la serbí liurai Babilónia’, tanba sira hatoʼo lia-bosok ba imi.
15 “Jeová dehan: ‘Haʼu la haruka sira, maibé sira koʼalia lia-bosok hodi haʼu-nia naran. Tan neʼe mak haʼu sei halo imi namkari no imi sei lakon mohu, imi ho profeta sira neʼebé koʼalia ba imi.’”
16 No haʼu hatete ba amlulik sira no ba povu sira-neʼe hotu: “Jeová dehan nuneʼe: ‘Keta rona ba liafuan neʼebé imi-nia profeta sira koʼalia ba imi: “Haree bá! Lakleur tan sasán sira Jeová nia templu nian sei lori fila fali husi Babilónia!” tanba sira hatoʼo lia-bosok ba imi.
17 Keta rona ba sira. Serbí liurai Babilónia no moris nafatin bá. Tansá mak sidade neʼe tenke sai fuik no aat? 18 Maibé se sira mak profeta no se sira mak hatoʼo Jeová nia liafuan karik, favór ida, husu sira harohan ba Jeová, ukun-naʼin tropa lalehan nian, atu sasán restu sira neʼebé sei iha Jeová nia templu, iha liurai Judá nia palásiu no iha Jeruzalein labele lori ba Babilónia.’
19 “Tanba Jeová, ukun-naʼin ba tropa lalehan nian, dehan nuneʼe kona-ba templu nia riin sira, basia-riti, karrosa-riti sira no sasán restu sira neʼebé sei iha hela iha sidade neʼe,
20 neʼebé Nabukodonozor, liurai Babilónia la foti bainhira nia kaer Jehoakim nia oan-mane Jekonias, liurai Judá, no lori nia husi Jeruzalein hamutuk ho Judá no Jeruzalein
nia ema-boot sira nuʼudar dadur ba Babilónia; 21 sin, Jeová, ukun-naʼin ba tropa lalehan nian, Maromak Izraél nian, dehan nuneʼe kona-ba sasán restu sira neʼebé sei iha hela iha Jeová nia templu, iha liurai Judá nia palásiu, no iha Jeruzalein: 22 ‘Jeová dehan: “Sasán sira-neʼe hotu sei lori ba Babilónia, no sasán sira-neʼe sei iha neʼebá toʼo loron neʼebé haʼu hanoin-hetan fali sira. Tuirmai, haʼu sei lori fali sasán sira-neʼe no tau fali iha fatin neʼe.”’”
28 Iha tinan neʼebé hanesan, bainhira Liurai Zedekias hahú ukun rai-Judá no ninia ukun tama ba tinan haat, no iha fulan-lima, profeta Hananias husi Jibeon, Azur nia oan-mane, hatete mai haʼu iha Jeová nia templu, iha amlulik sira no povu hotu nia oin, dehan:
2 “Jeová, ukun-naʼin ba tropa lalehan nian, dehan nuneʼe: ‘Haʼu sei harahun naha todan neʼebé liurai Babilónia fó ba imi. 3 Iha tinan rua nia laran, haʼu sei lori fila fali mai fatin neʼe sasán hotu Jeová nia templu nian, neʼebé Nabukodonozor, liurai Babilónia, foti ona husi fatin neʼe no lori ba Babilónia.’”
4 “Jeová dehan: ‘No haʼu sei lori fila fali mai fatin neʼe Jehoakim nia oan-mane Jekonias, liurai ba rai-Judá, no haʼu mós sei lori fila fali mai fatin neʼe ema Judá hotu neʼebé sai dadur iha rai-Babilónia, tanba haʼu sei harahun naha todan neʼebé liurai Babilónia fó ba imi.’”
5 Tuirmai, profeta Jeremias hatete ba profeta Hananias iha amlulik sira-nia oin no ema hotu nia oin bainhira sira hamriik iha Jeová nia templu. 6 Profeta Jeremias dehan: “Amen! Jeová halo nuneʼe bá! Haʼu hein katak Jeová sei kumpre ó-nia liafuan no lori fila fali mai fatin neʼe sasán sira Jeová nia templu nian no ema dadur hotu iha Babilónia! 7 Maibé, rona lai lia-menon neʼebé haʼu koʼalia ba ó-nia tilun no ba povu hotu nia tilun. 8 Iha tempu uluk liubá, profeta sira neʼebé moris antes haʼu no antes ó, sira mós fó-hatene nanis ona kona-ba rai barak no nasaun boot sira, kona-ba funu, terus no moras-peste. 9 Se profeta ruma fó-hatene nanis kona-ba dame no ninia liafuan neʼe sai loos duni, nuneʼe ema sei hatene katak Jeová mak haruka duni profeta neʼe.”
10 Rona tiha neʼe, profeta Hananias foti ai-lolon husi profeta Jeremias nia kanuruk no silu tohar tiha ai neʼe.
11 No Hananias hatete iha ema hotu nia oin: “Jeová dehan nuneʼe: ‘Hanesan neʼe mak iha tinan rua nia laran, haʼu sei hasai Nabukodonozor liurai Babilónia nia naha todan husi nasaun hotu nia kanuruk no haʼu sei harahun naha todan neʼe.’” Tuirmai profeta Jeremias laʼo sees husi fatin neʼe.
12 Depois profeta Hananias silu tohar tiha ai-lolon iha profeta Jeremias nia kanuruk, Jeová nia liafuan tun ba Jeremias, dehan: 13 “Bá no hatete ba Hananias: ‘Jeová dehan nuneʼe: “Ó silu tohar tiha ona ai-lolon, maibé ó tenke troka fali ai-lolon neʼe ho besi-lolon.” 14 Tanba Jeová, ukun-naʼin ba tropa lalehan nian, Maromak Izraél nian, dehan nuneʼe: “Haʼu sei tau besi-lolon iha nasaun sira-neʼe hotu nia kanuruk atu serbí Nabukodonozor liurai Babilónia, no sira tenke serbí nia. Animál fuik sira iha rai mós haʼu sei fó ba nia.”’”
15 Tuirmai, profeta Jeremias hatete ba profeta Hananias: “Oh Hananias, rona lai bá! Jeová la haruka ó, maibé ó halo ona povu sira-neʼe tau fiar ba lia-bosok. 16 Tan neʼe, Jeová dehan nuneʼe: ‘Haree bá! Haʼu sei halakon ó husi rai leten. Iha tinan neʼe ó sei mate, tanba ó halo ona ema kontra hasoru Jeová ho liafuan neʼebé ó koʼalia.’”
17 Nuneʼe, profeta Hananias mate iha tinan neʼebá, iha fulan-hitu.
29 Husi Jeruzalein, profeta Jeremias haruka karta tuirmai neʼe ba katuas sira, amlulik sira, profeta sira no ema hotu, sira hotu neʼebé Nabukodonozor lori ona husi Jeruzalein nuʼudar dadur ba Babilónia.
2 Nia halo nuneʼe bainhira Liurai Jekonias no liurai nia inan, ema-boot sira iha palásiu, Judá no Jeruzalein nia ema-boot sira, badain sira no badain-besi sira husik ona sidade Jeruzalein. 3 Nia haruka karta neʼe liuhusi Safan nia oan-mane Elasa no Hilkias nia oan-mane Gemarias, bainhira Zedekias liurai ba rai-Judá mak haruka sira bá Babilónia atu hasoru Nabukodonozor, liurai Babilónia.
Iha karta neʼe dehan:
4 “Jeová, ukun-naʼin ba tropa lalehan nian, Maromak Izraél nian, dehan ba ema dadur hotu, neʼebé nia halo ona sira sai husi Jeruzalein nuʼudar dadur ba Babilónia:
5 ‘Hariʼi uma no hela bá. Halo toʼos no han ninia fuan bá. 6 Hola feto no iha oan-mane no oan-feto sira bá; buka feen ba imi-nia oan-mane sira bá no buka laʼen ba imi-nia oan-feto sira bá, atu nuneʼe sira mós bele iha oan-mane no oan-feto sira. Sai barak iha neʼebá, no keta sai menus.
7 No buka dame iha sidade neʼebé haʼu haruka imi bá nuʼudar dadur, no harohan ba Jeová kona-ba sidade neʼe, tanba se sidade neʼe iha dame, imi mós sei iha dame.
8 Tanba Jeová, ukun-naʼin ba tropa lalehan nian, Maromak Izraél nian, dehan nuneʼe: “Keta husik imi-nia profeta sira no matan-dook sira lohi imi, no keta rona ba mehi neʼebé sira hetan. 9 Tanba Jeová dehan: ‘Sira hatoʼo lia-bosok ba imi nuʼudar profeta hodi haʼu-nia naran. Haʼu la haruka sira.’”’”
10 “Tanba Jeová dehan nuneʼe: ‘Bainhira tinan 70 iha Babilónia remata ona, haʼu sei hanoin-hetan imi, no haʼu sei kumpre haʼu-nia promete hodi lori imi fila fali ba fatin neʼe.’
11 “Jeová dehan: ‘Tanba haʼu hatene didiʼak buat neʼebé haʼu hakarak ba imi, haʼu hakarak fó dame ba imi, laʼós fó-terus, no haʼu hakarak fó ba imi futuru no esperansa. 12 No imi sei bolu haʼu no hakbesik mai haʼu liuhusi orasaun, no haʼu sei rona imi.’
13 “‘Imi sei buka haʼu no imi sei hetan, tanba imi sei buka haʼu ho imi-nia laran tomak. 14 No haʼu sei husik imi hetan haʼu’, Jeová dehan. ‘Haʼu sei halibur imi-nia ema dadur sira no halibur hamutuk imi husi nasaun hotu no fatin hotu neʼebé haʼu halo ona imi namkari’, Jeová dehan. ‘No haʼu sei lori imi fila fali ba rai neʼe, rai neʼebé uluk haʼu lori sai imi nuʼudar dadur.’
15 “Maibé imi dehan: ‘Jeová hili ona profeta sira iha Babilónia ba ami.’
16 “Jeová dehan nuneʼe ba liurai neʼebé tuur iha David nia kadunan no ba ema hotu neʼebé hela iha sidade neʼe, imi-nia maun-alin sira neʼebé la bá hamutuk ho imi nuʼudar dadur: 17 ‘Jeová, ukun-naʼin ba tropa lalehan nian, dehan nuneʼe: “Haree bá, haʼu sei haruka surik, hamlaha no moras-peste hasoru sira,
no haʼu sei halo sira sai hanesan ai-figeira fuan neʼebé dodok ona toʼo la bele han tanba aat tebes.”’
18 “‘No haʼu sei duni tuir sira ho surik, ho hamlaha no ho moras-peste, no nasaun hotu iha mundu neʼe sei sai taʼuk tanba haree buat neʼebé haʼu halo ba sira. No iha nasaun hotu nia leet neʼebé haʼu halo sira namkari, ema sei fó-malisan ba sira, ema sei hakfodak no hakfuʼik, no koʼalia aat tanba susar neʼebé kona sira, 19 tanba sira la rona ba haʼu-nia liafuan neʼebé haʼu hatoʼo ba sira liuhusi haʼu-nia atan profeta sira.’ Jeová dehan:
‘Haʼu haruka sira fila-fila.’
“‘Maibé imi la rona’, Jeová dehan.
20 “Tan neʼe, rona Jeová nia liafuan bá, imi ema dadur hotu, neʼebé haʼu duni sai ona husi Jeruzalein ba Babilónia. 21 Kona-ba Kolias nia oan-mane Akab no kona-ba Maseas nia oan-mane Zedekias, neʼebé hatoʼo lia-bosok ba imi nuʼudar profeta hodi haʼu-nia naran, Jeová, ukun-naʼin ba tropa lalehan nian, Maromak Izraél nian, dehan: ‘Haree bá, haʼu sei fó sira ba Nabukodonozor liurai Babilónia nia liman, no nia sei oho sira iha imi-nia oin. 22 No ema Judá hotu neʼebé sai dadur iha Babilónia sei temi buat neʼebé akontese ba sira bainhira sira fó-malisan ba malu, dehan: “Jeová sei halo ó hanesan Zedekias no hanesan Akab, neʼebé liurai Babilónia tunu ona iha ahi-laran!”
23 tanba sira halo ona hahalok aat iha Izraél, hodi halo sala-foʼer ho sira-nia maluk nia feen no koʼalia lia-bosok hodi haʼu-nia naran maski haʼu la haruka sira.
“‘Jeová dehan: “Haʼu mak Ida neʼebé hatene,
no haʼu mak sasin-naʼin.”’”
24 “No ba Semias husi Nehelam, ó tenke hatete: 25 ‘Jeová, ukun-naʼin ba tropa lalehan nian, Maromak Izraél nian, dehan nuneʼe: “Tanba hodi ó-nia naran ó haruka karta sira ba ema hotu neʼebé hela iha Jeruzalein, ba amlulik Sofonias, Maseas nia oan-mane, no ba amlulik sira hotu, dehan: 26 ‘Jeová foti ona ó, amlulik Sofonias, hodi troka amlulik Jehoada, ó mak sai xefe ba Jeová nia templu, atu kaer ema bulak neʼebé halo hahalok hanesan profeta no kesi ema neʼe iha ai kastigu nian;
27 nuneʼe, tansá mak ó la haksiʼak Jeremias husi Anatot, neʼebé hatudu hahalok ba imi hanesan profeta? 28 Tanba nia haruka karta mai ami iha Babilónia, dehan: “Imi sei moris nuʼudar dadur ba templu kleur. Harii uma no hela bá. Halo toʼos no han ninia fuan bá . . . ”’”’”
29 Bainhira amlulik Sofonias lee karta neʼe ba profeta Jeremias, 30 Jeová nia liafuan tun ba Jeremias, dehan: 31 “Hakerek ba ema dadur hotu, dehan: ‘Jeová dehan nuneʼe kona-ba Semias husi Nehelam: “Tanba Semias koʼalia nuʼudar profeta ba imi maski haʼu la haruka nia, no nia koko atu halo imi fiar ba lia-bosok, 32 tan neʼe, Jeová dehan: ‘Haree bá, haʼu sei fó kastigu ba Semias husi Nehelam no ninia oan no bei-oan sira. Husi Semias nia umakain,
sei la iha ema ida mak moris iha povu neʼe nia leet, no nia sei la haree buat diʼak neʼebé haʼu sei halo ba haʼu-nia povu’, Jeová dehan, ‘tanba nia halo ema kontra hasoru Jeová ho liafuan neʼebé nia koʼalia ona.’”’”
30 Jeová nia liafuan tun ba Jeremias,
dehan: 2 “Jeová, Maromak Izraél nian, dehan nuneʼe: ‘Hakerek iha livru ida liafuan hotu neʼebé haʼu hatoʼo ba ó. 3 Tanba Jeová dehan: “Haree bá, loron sira sei toʼo mai bainhira haʼu sei halibur haʼu-nia povu, Izraél no Judá, neʼebé sai dadur,
no haʼu sei lori sira fila fali ba rai neʼebé haʼu fó ona ba sira-nia beiʼala, no rai neʼe sei sai fali sira-nian.”’”
4 Neʼe mak liafuan neʼebé Jeová
hatoʼo ba Izraél no Judá.
5 Jeová dehan nuneʼe:
“Imi rona ona ema nia lian nakdedar;
Dame la iha, taʼuk deʼit mak iha.
6 Imi husu lai, mane ida bele tuur ahi ka lae?
Tan neʼe, nuʼusá mak haʼu haree mane forte hotu tau sira-nia liman rua iha sira-nia knotak
Hanesan feto neʼebé atu tuur ahi?
Tansá mak sira hotu nia oin sai kamutis?
7 Aii! Tanba loron neʼebá mak
loron neʼebé aat loos.
La iha loron ida mak hanesan loron neʼe,
Tempu neʼebé susar tebes ba Jakob.
Maibé nia sei hetan salvasaun husi susar neʼe.”
8 Jeová, ukun-naʼin ba tropa lalehan nian dehan: “No iha loron neʼebá, haʼu sei harahun naha todan iha ó-nia kanuruk, no haʼu sei halo kotu ó-nia tali ba rua; no sei la iha tan ema husi rai seluk neʼebé halo sira sai atan.
9 Sira sei serbí Jeová sira-nia Maromak
no serbí David, sira-nia liurai neʼebé haʼu
sei hili ba sira.”
10 Jeová dehan: “No kona-ba ó, Jakob,
haʼu-nia atan, keta taʼuk,
Oh Izraél, keta laran nakdedar.
Tanba husi fatin dook haʼu sei salva ó
No haʼu sei salva ó-nia bei-oan sira husi
rai neʼebé sira moris nuʼudar dadur.
Jakob sei fila fali mai no sei moris
hakmatek no iha dame,
Sei la iha ema ida mak halo sira taʼuk.”
11 Jeová dehan: “Tanba haʼu sei
hamutuk ho ó atu salva ó.
Maibé haʼu sei halakon mohu nasaun hotu
neʼebé haʼu halo ona ó-nia povu namkari;
Maibé kona-ba ó, haʼu sei la halakon mohu ó.
Haʼu sei fó dixiplina ba ó
tuir dalan neʼebé loos,
Ó sei la bele sees husi haʼu-nia kastigu.”
12 Tanba Jeová dehan nuneʼe:
“Ó neʼebé rahun ona, la iha buat ida
mak bele hadiʼa ó.
Ó-nia kanek la bele kura.
13 La iha ema ida mak koʼalia atu apoia ó,
La iha dalan atu kura ó-nia kanek.
La iha buat ida mak bele kura ó.
14 Sira hotu neʼebé hadomi
tebes ó haluha ona ó.
Sira la buka tuir tan ó.
Tanba haʼu baku ó hanesan
inimigu ida baku ó,
Haʼu fó kastigu ba ó hanesan
ema neʼebé la iha laran-sadiʼa,
Tanba ó-nia sala neʼebé todan no
ó halo ona sala barak tebes.
15 Tansá mak ó halerik ba ó-nia terus?
Ó-nia moras neʼe la bele kura!
Haʼu halo ida-neʼe ba ó
Tanba ó-nia sala neʼebé todan no
ó halo ona sala barak tebes.
16 Tan neʼe, sira hotu neʼebé han mohu ó,
haʼu sei husik ema han mohu sira,
No kona-ba ó-nia inimigu hotu,
ema sei lori sira sai dadur.
Sira neʼebé hadau ó-nia sasán,
ema sei hadau sira-nia sasán,
No sira hotu neʼebé naʼok ó-nia sasán,
haʼu sei husik ema naʼok sira-nia sasán.”
17 Jeová dehan: “Maibé haʼu sei halo ó sai isin-diʼak fali no haʼu sei kura ó-nia kanek sira,
Maski sira hotu lakohi simu ó
no bolu ó nuʼudar
‘Siaun, neʼebé la iha ema ida mak buka tuir.’”
18 Jeová dehan nuneʼe:
“Haree bá, haʼu sei halibur ema
dadur sira husi Jakob nia tenda,
No haʼu sei hatudu laran-sadiʼa
ba ninia hela-fatin sira.
Sidade neʼe sei harii fali iha
ninia foho-oan nia leten,
No ninia uma-aas neʼebé seguru sei
hamriik iha ninia fatin neʼebé loos.
19 No sira sei hasaʼe lian fó-agradese
nian no hamnasa ho haksolok.
Haʼu sei aumenta sira sai barak,
no sira sei la sai menus;
Haʼu sei halo sira sai barak tebes,
No sira sei la sai uitoan deʼit.
20 Ninia oan sira sei sai hanesan tempu uluk,
No iha haʼu-nia oin, ninia povu
sei sai forte no metin.
Haʼu sei fó kastigu ba sira
hotu neʼebé fó-terus nia.
21 Husi ninia povu rasik mak sei
mosu mai ulun-naʼin kmanek ida,
No husi ninia povu nia leet mak
sei mosu mai ukun-naʼin ida.
Haʼu sei halo nia mai besik haʼu,
no nia sei hakbesik haʼu.”
“Tanba se lae, sé tan mak brani atu
mai hakbesik haʼu?” Jeová dehan.
22 “Imi sei sai haʼu-nia povu,
no haʼu sei sai imi-nia Maromak.”
23 Haree bá! Jeová nia hirus sei
huu makaʼas hanesan anin-boot,
Anin-boot neʼebé nakdulas tun
ba ema aat sira-nia ulun leten.
24 Jeová nia hirus neʼebé
lakan makaʼas sei la para
Toʼo nia kumpre ona ninia
hakarak iha nia laran.
Iha loron sira-neʼe nia rohan,
imi sei komprende ida-neʼe.
31 Jeová dehan: “Iha tempu neʼebá,
haʼu sei sai Maromak ba Izraél nia umakain hotu, no sira sei sai haʼu-nia povu.”
2 Jeová dehan nuneʼe:
“Ba ema neʼebé la mate ho surik,
haʼu hatudu laran-sadiʼa ba sira iha rai-fuik
Bainhira Izraél laʼo ba toʼo
ninia fatin deskansa nian.”
3 Husi fatin dook, Jeová mosu
mai haʼu no dehan:
“Haʼu hadomi ó ho domin neʼebé ba nafatin.
Tan neʼe mak haʼu dada ó hakbesik mai
haʼu ho domin neʼebé laran-metin.
4 Dala ida tan, haʼu sei harii ó
no ó sei hamriik fali.
Oh feto virjen Izraél,
ó sei foti fali ó-nia tamborín
No dansa ho haksolok.
5 Ó sei halo fali toʼos-uvas
iha foho sira iha Samaria;
Toʼos-naʼin sira sei kuda no han nia fuan.
6 Tanba loron sei toʼo mai bainhira guarda
sira neʼebé iha foho sira iha Efraim
sei bolu ho lian makaʼas, dehan:
‘Hamriik bá, mai ita saʼe ba Siaun,
ba Jeová ita-nia Maromak.’”
7 Tanba Jeová dehan nuneʼe:
“Hasaʼe lian ba Jakob ho haksolok.
Haklalak ho haksolok bá tanba ó
mak iha nasaun sira-nia leten.
Haklaken bá; fó hahiʼi ba Maromak no hatete:
‘Oh Jeová, salva Ita-nia povu,
ema restu sira husi Izraél.’
8 Haʼu sei lori sira fila fali husi rai norte.
Haʼu sei halibur sira hamutuk husi fatin sira
neʼebé dook liu iha mundu neʼe.
Iha sira-nia leet sei iha ema
matan-delek no ain-kudeʼik,
Feto isin-rua no feto sira neʼebé
besik tuur ahi, sira hotu hamutuk.
Nuʼudar ema-lubun boot,
sira sei fila fali mai iha neʼe.
9 Sira sei fila fali mai ho tanis.
Sira sei husu haʼu-nia laran-sadiʼa
no haʼu sei hatudu dalan ba sira.
Haʼu sei lori sira ba mota sira neʼebé bee suli,
Haʼu sei lori sira liu iha dalan tetuk
neʼebé sei la halo sira sidi.
Tanba haʼu mak Aman ba Izraél, no Efraim mak haʼu-nia oan-mane primeiru.”
10 Imi nasaun sira, rona Jeová nia liafuan bá,
Fó sai ida-neʼe iha illa sira neʼebé dook no dehan:
“Ida neʼebé halo Izraél namkari sei halibur hamutuk fali sira.
Nia sei tau matan ba sira hanesan bibi-atan tau matan ba ninia bibi-lubun.
11 Tanba Jeová sei sosa fali Jakob
No salva nia husi ida neʼebé forsa liu fali nia.
12 Sira sei mai no haklalak ho
haksolok iha fatin aas iha Siaun
No sira-nia oin nabilan tanba
Jeová nia laran-diʼak,
Tanba trigu, tua-uvas foun no mina,
No tanba bibi-oan no karau-oan sira.
Sira sei sai hanesan jardín
neʼebé rega didiʼak ho bee,
No sira sei nunka sai fraku
ka laran-susar tan.”
13 “Iha tempu neʼebá,
feto virjen sei dansa ho haksolok,
Nuneʼe mós mane foin-saʼe
hamutuk ho katuas sira.
Haʼu sei troka sira-nia laran-susar
sai laran-haksolok.
Haʼu sei fó kmaan ba sira no halo sira kontente, sira sei la laran-triste tan.
14 Haʼu sei fó ai-han barak ba amlulik sira,
No haʼu-nia povu sei kontente tanba
haʼu-nia laran-diʼak”, Jeová dehan.
15 “Jeová dehan nuneʼe:
‘Iha Ramá, ema rona lian
halerik no tanis makaʼas.
Rakel tanis ba ninia oan-mane sira.
Nia lakohi ema fó kmaan ba nia
kona-ba ninia oan-mane sira,
Tanba ninia oan-mane sira la iha ona.’”
16 Jeová dehan nuneʼe:
“‘Keta tanis tan no keta halo
ó-nia matan-been suli tan,
Tanba haʼu sei fó kolen ba ó tuir buat
neʼebé ó halo ona’, Jeová dehan.
‘Sira sei fila fali husi inimigu nia rai.’
17 Jeová dehan: ‘No sei iha
esperansa ba ó-nia futuru,
Ó-nia oan sira sei fila fali
ba sira-nia rai rasik.’”
18 “Haʼu rona duni Efraim
nia lian halerik, dehan:
‘Ita-Boot korrije ona haʼu,
no haʼu simu korrije neʼe,
Hanesan karau-oan neʼebé seidauk treinu.
Lori haʼu fila fali no ho laran
tomak haʼu sei fila,
Tanba Ita-Boot mak Jeová haʼu-nia Maromak.
19 Tanba bainhira haʼu fila fali tiha,
haʼu arrepende an tebes;
Bainhira Ita halo ona haʼu komprende,
haʼu baku haʼu-nia kelen tanba triste.
Haʼu sai moe no sente laran-tun,
Tanba hahalok sira neʼebé haʼu halo ona
iha haʼu-nia tempu joven.’”
20 Jeová dehan: “Efraim mak haʼu-nia oan-mane neʼebé folin-boot, haʼu-nia oan doben, loos ka lae?
Tanba maski haʼu koʼalia kontra nia beibeik, maibé haʼu nafatin hanoin-hetan nia.
Tan neʼe mak haʼu sente laran la hakmatek
tanba hanoin nia.
No haʼu sei hatudu duni laran-sadiʼa ba nia.”
21 “Tau fatuk bá, hodi halo sinál
ba ó-nia dalan,
No tau fatuk riin bá hodi sai matadalan ba ó.
Haree didiʼak ba estrada, estrada neʼebé
ó tenke laʼo liu.
Oh feto virjen Izraél, fila fali mai,
fila fali ba ó-nia sidade sira-neʼe.
22 Oh oan-feto neʼebé la laran-metin,
toʼo bainhira loos mak ó sei laran-rua?
Tanba Jeová kria ona buat
foun iha mundu neʼe:
Feto ida mak sei buka makaʼas mane ida.”
23 Jeová, ukun-naʼin ba tropa lalehan nian, Maromak Izraél nian, dehan nuneʼe: “Bainhira haʼu halibur fali ema dadur sira, sira sei hatete fali liafuan tuirmai neʼe iha rai-Judá no iha ninia sidade sira, dehan: ‘Oh, hela-fatin ba hahalok loos, oh, foho santu, Jeová sei haraik bensaun ba ó.’ 24 No iha neʼebá, iha Judá no ninia sidade sira, ema hotu sei hela hamutuk, toʼos-naʼin sira no bibi-atan sira. 25 Haʼu sei fó kmaan ba ema neʼebé la iha kbiit, no haʼu sei halo bosu ema neʼebé fraku no laran-susar.”
26 Ho ida-neʼe, haʼu hadeer no loke haʼu-nia matan, toba hanesan neʼe halo haʼu kontente.
27 Jeová dehan: “Haree bá! Loron sira sei toʼo mai bainhira haʼu sei aumenta umakain Izraél no umakain Judá nia ema. Haʼu mós sei aumenta sira-nia animál hakiak.”
28 Jeová dehan: “Hanesan haʼu haree didiʼak sira atu haʼu bele fokit, sobu, harahun, halakon no halo aat ba sira, nuneʼe mós haʼu sei haree didiʼak sira atu haʼu bele harii no kuda fali sira.”
29 “Iha tempu neʼebá, sira sei la hatete tan: ‘Aman sira han uvas-fuan neʼebé seidauk tasak, maibé oan sira-nia nehan mak sente siin.’ 30 Maibé ema ida-idak sei mate tanba ninia sala rasik. Ema neʼebé han uvas-fuan neʼebé seidauk tasak, ninia nehan rasik mak sei sente siin.”
31 Jeová dehan: “Haree bá! Loron sira sei toʼo mai bainhira haʼu sei halo aliansa foun ida ho umakain Izraél no ho umakain Judá.
32 Aliansa neʼe sei la hanesan ho aliansa neʼebé uluk haʼu halo ho sira-nia beiʼala sira iha loron neʼebé haʼu kaer sira-nia liman no lori sira sai husi rai-Ejitu, neʼe mak ‘haʼu-nia aliansa neʼebé sira la halo tuir maski haʼu mak sira-nia naʼin neʼebé loos’, Jeová dehan.” 33 Jeová dehan: “Neʼe mak aliansa neʼebé haʼu sei halo ho umakain Izraél depois loron hirak neʼebá: Haʼu sei tau haʼu-nia ukun-fuan iha sira-nia laran, no haʼu sei hakerek ukun-fuan neʼe iha sira-nia fuan. No haʼu sei sai sira-nia Maromak, no sira sei sai haʼu-nia povu.”
34 Jeová dehan: “No sira sei la hanorin tan ba sira-nia maluk no sira-nia maun-alin, dehan:
‘Imi hatene Jeová bá!’ tanba sira hotu sei hatene haʼu, husi ida neʼebé kiʼik liu toʼo ida neʼebé boot liu iha sira-nia leet, tanba haʼu sei fó perdua ba sira-nia sala, no haʼu sei la hanoin-hetan tan sira-nia sala.”
35 Neʼe mak liafuan husi Jeová,
Nia neʼebé fó loro-matan atu
fó naroman iha loron,
No fó lei ba fulan no fitun sira
atu fó naroman iha kalan,
Nia neʼebé kedok tasi no halo
nia laloran baku bá-mai,
Nia neʼebé naran Jeová,
ukun-naʼin ba tropa lalehan nian:
36 “Jeová dehan: ‘Hanesan lei
sira-neʼe la bele lakon,
Nuneʼe mós Izraél nia bei-oan sira
sei la lakon ba nafatin husi haʼu-nia
oin nuʼudar nasaun ida.’”
37 Jeová dehan nuneʼe:
“‘Hanesan ema la bele sukat lalehan
iha leten no la bele buka-hatene mundu
nia hun iha okos, nuneʼe mós haʼu
la bele husik hela Izraél nia bei-oan sira
maski sira halo ona buat hotu neʼe’,
Jeová dehan.”
38 Jeová dehan: “Haree bá! Loron sira sei toʼo mai bainhira sidade neʼe sei harii ba Jeová, husi Uma-Aas Hananel toʼo Portaun Sikun. 39 No tali sukat nian sei dada loos ba toʼo foho-oan Gareb, no fila tali neʼe ba Goa.
40 No iha foho-leet neʼebé ema tau mate-isin no ahi-kadesan, no mós toʼos sira iha Foho-Leet Sedron toʼo Portaun Kuda nia sikun iha parte leste, fatin hirak-neʼe tomak sei sai buat neʼebé santu ba Jeová. Sidade neʼe sei nunka harahun ka halakon tan ba nafatin.”