LISAUN 2

Koʼalia iha dalan neʼebé naturál

2 Korinto 2:17

SAIDA MAK ITA PRESIZA HALO: Koʼalia iha dalan neʼebé naturál no husi laran hodi hatudu sai oinsá Ita sente kona-ba tópiku neʼe no Ita-nia rona-naʼin.

OINSÁ ATU HALO IDA-NEʼE:

Halo orasaun no prepara didiʼak. Halo orasaun atu bele tau fokus ba Ita-nia informasaun, laʼós ba Ita-nia an. Komprende didiʼak pontu importante sira neʼebé Ita atu hatoʼo. Duké lee deʼit informasaun, diʼak atu uza Ita-nia liafuan rasik.

Se Ita atu lee husi Bíblia ka livru seluk, hakaʼas an atu komprende didiʼak informasaun hodi nuneʼe Ita bele lee ho moos. Se Ita lee ema nia liafuan, lee ida-neʼe ho sentimentu, maibé labele demais liu.
Koʼalia husi laran. Hanoin kona-ba tanbasá rona-naʼin presiza rona mensajen neʼe. Tau fokus ba sira. Se Ita halo nuneʼe, Ita-nia dalan atu koʼalia, Ita-nia oin, no dalan neʼebé Ita hamriik no book an sei hatudu sai katak Ita koʼalia husi laran.

Koʼalia iha dalan neʼebé naturál, laʼós katak koʼalia arbiru no la hatudu respeitu. Hatudu dignidade bainhira hatoʼo informasaun hodi koʼalia liafuan neʼebé klaru no tuir gramátika.
Hateke ba rona-naʼin. Ita bele hateke ba rona-naʼin nia oin. Bainhira Ita hatoʼo diskursu, duké hateke liu deʼit ba ema hotu diʼak atu koko haree ba ema ida-idak.