Koʼalia hanesan baibain

KUANDU ita koʼalia iha dalan neʼebé baibain, neʼe sei ajuda hodi ema bele tau fiar ba ita. Ita sei fiar ba ema ida neʼebé koʼalia hodi taka nia oin ho máskara ka topeng ka lae? Oinsá se máskara neʼe kapás liu fali ema neʼe nia oin rasik, neʼe ajuda ita atu tau fiar ba nia ka lae? Karik lae. Nuneʼe, koko atu sai ita-nia an rasik, duké finje nuʼudar ema seluk.

Koʼalia iha dalan baibain la dehan katak koʼalia naranaran deʼit. Porezemplu, la diʼak atu koʼalia hodi la temi liafuan sira ho loos, koʼalia iha ibun laran deʼit ka koʼalia hodi la tuir gramátika neʼebé loos. Ladún diʼak mós atu koʼalia ho estilu oioin. Ita labele haluha katak ita presiza hatudu respeitu nafatin liuhusi ita-nia koʼalia no hahalok. Se ita koʼalia hanesan baibain, ita sei la uza liafuan aas no la hanoin demais liu kona-ba oinsá ema seluk nia haree kona-ba ita.

Iha serbisu haklaken. Kuandu ita haklaken, ita sente taʼuk ka lae? Ema hotu sente taʼuk, maibé ema balu sente taʼuk liu. Ida-neʼe bele halo sira-nia lian nakdedar ka halo sira-nia lian rona la hanesan baibain. Neʼe mós bele halo sira book sira-nia liman no ulun iha dalan neʼebé la baibain.

Problema neʼe mosu tanba razaun balu. Karik ita hanoin liu kona-ba oinsá ema seluk nia haree kona-ba ita ka ita hanoin se uma-naʼin sei simu buat neʼebé ita koʼalia ka lae. Maski la sala atu hanoin hanesan neʼe, maibé problema bele mosu se ita hanoin demais kona-ba buat sira-neʼe. Se ita sente taʼuk antes ita bá haklaken, saida mak bele ajuda ita? Prepara didiʼak no halo orasaun ba Jeová ho laran. (Apóstolu 4:29) Hanoin kona-ba laran-sadiʼa neʼebé Jeová hatudu hodi loke dalan ba ema atu moris iha mundu foun ho saúde neʼebé perfeitu. Hanoin kona-ba ema neʼebé ita hakarak ajuda no oinsá sira presiza duni atu rona liafuan diʼak.

Tanba ema hotu bele foti desizaun rasik kona-ba sira-nia moris, sira bele hili atu simu ka la simu ita-nia mensajen. Ida-neʼe mós akontese kuandu Jesus haklaken ba ema Izraél sira iha tempu uluk. Ita-nia knaar mak atu haklaken. (Mateus 24:14) Entaun, maski ema la husik ita atu koʼalia buat ida, maibé tuir loloos ita fó sasin ona ba sira. No tanba ita halo Jeová nia hakarak, neʼe hanesan ita hetan ona susesu. Maibé kuandu uma-naʼin hakarak rona ba ita, oinsá mak ita sei koʼalia? Se ita aprende atu hanoin kona-ba ema seluk nia presiza, ita sei koʼalia iha dalan neʼebé baibain.

Kuandu ita haklaken no koʼalia iha dalan neʼebé baibain, ida-neʼe sei halo uma-naʼin sente kmaan. Karik neʼe sei book nia atu simu ita-nia mensajen husi Bíblia. Diʼak liu se ita no uma-naʼin koʼalia ba malu duké ita koʼalia hanesan fó diskursu ba nia. Hatudu interese ba nia no husik nia atu fó sai ninia hanoin. Klaru katak ita hakarak hatudu respeitu ba kostume iha ita-nia rai kona-ba koʼalia ba ema neʼebé ita ladún koñese. Iha situasaun hotu, diʼak atu hatudu oin-midar.

Husi plataforma. Kuandu ita hatoʼo diskursu, diʼak liu atu koʼalia iha dalan neʼebé hanesan baibain. Se rona-naʼin mak barak, karik ita presiza hasaʼe lian uitoan. Keta koko atu dekór deʼit ita-nia diskursu, ka hakerek liafuan barak iha ita-nia nota, tanba neʼe halo ita hanoin demais kona-ba liafuan neʼebé ita atu uza. Maski importante atu uza liafuan sira neʼebé loos, maibé kuandu ita hanoin demais kona-ba neʼe, ita sei hatoʼo diskursu ho liafuan neʼebé aas liu no laʼós iha dalan neʼebé hanesan baibain. Diʼak atu hanoin kona-ba ideia sira iha ita-nia diskursu, duké hanoin kona-ba liafuan ida-idak neʼebé ita sei uza.

Ita mós presiza koʼalia iha dalan neʼebé hanesan baibain kuandu ita hetan entrevista iha reuniaun. Maski importante atu prepara didiʼak maibé labele lee ka dekór deʼit buat neʼebé ita sei hatete. Hatoʼo liafuan iha dalan neʼebé ita koʼalia baibain hodi rona hanesan ita koʼalia husi laran.

Maski ita uza dalan diʼak oioin atu hatoʼo diskursu, maibé se ita halo ida-neʼe demais liu, rona-naʼin sei haree katak ida-neʼe laʼós husi ita-nia laran. Porezemplu, ita presiza koʼalia liafuan sira ho momoos maibé se ita halo ida-neʼe demais liu, neʼe sei rona hanesan ita finje deʼit. Kuandu ita uza sinál ho liman no oin, neʼe bele halo ita-nia diskursu moris, maibé se halo ida-neʼe demais liu, neʼe bele halo ema la rona ba buat neʼebé ita koʼalia. Diʼak atu hasaʼe lian hodi ema bele rona, maibé kuidadu atu la halo ita-nia lian makaʼas liu. No maski diʼak atu hatoʼo diskursu ho laran-manas maibé presiza kuidadu atu la haree hanesan foti-an. Kuandu ita koʼalia ho lian neʼebé tun-saʼe iha tempu neʼebé loos, no koʼalia ho laran-manas no ho sentimentu, ita presiza halo ida-neʼe iha dalan neʼebé la dada atensaun ba ita-nia an no halo rona-naʼin la gosta.

Ema balu toman atu koʼalia hodi uza liafuan aas, maski sira la hatoʼo diskursu. Ema balu fali toman atu koʼalia iha dalan seluk. Maski nuneʼe, buat neʼebé importante mak atu aprende koʼalia iha dalan neʼebé diʼak iha ita-nia moris loroloron nian nuʼudar ema kristaun. Tanba se ita halo hanesan neʼe, sei sai fasil liu atu koʼalia iha dalan neʼebé diʼak kuandu ita hatoʼo diskursu.

Lee iha ema nia oin. Atu lee iha dalan neʼebé hanesan baibain iha ema nia oin, ita presiza duni hakaʼas an. Atu bele halo ida-neʼe, hanoin kona-ba saida mak pontu importante husi informasaun neʼebé ita atu lee. Diʼak atu hanoin nafatin kona-ba pontu sira-neʼe, selae ita sei lee deʼit liafuan no la hatoʼo informasaun neʼe nia arti. Diʼak mós atu husu ema kona-ba oinsá atu temi ho loos liafuan neʼebé ita ladún hatene. Treinu lee ho lian hodi bele halo ita-nia lian tun-saʼe iha dalan neʼebé loos, no mós treinu atu lee liafuan sira nuʼudar grupu hodi bele fó sai ideia ida-idak. Treinu hanesan neʼe beibeik toʼo ita bele lee ho moos. Koko atu hatene didiʼak informasaun hodi nuneʼe kuandu ita lee, ida-neʼe sei rona hanesan ita koʼalia ba malu. Neʼe katak ita lee iha dalan neʼebé hanesan baibain.

Baibain kuandu ita lee iha ema nia oin, ita lee informasaun husi ita-nia livru sira. Porezemplu, ita lee Bíblia kuandu hatoʼo diskursu iha Eskola Serbisu Kristaun nian, kuandu haklaken, no mós kuandu hatoʼo diskursu husi plataforma. Irmaun sira hetan knaar atu lee parágrafu sira husi Estudu Livru Haklaken no husi Estudu Bíblia iha Kongregasaun. Irmaun balu hetan knaar atu lee diskursu manuskritu nian iha reuniaun boot ba loron tolu. Nuʼudar ita lee Bíblia ka buat seluk, no ida-neʼe temi ema nia liafuan, ita presiza lee liafuan sira-neʼe iha dalan neʼebé moris. Se informasaun neʼe temi liafuan husi ema barak, koko troka ita-nia lian uitoan kuandu lee ema ida-idak nia liafuan. Maski ita labele halo ida-neʼe demais liu, maibé ita presiza lee ho laran-manas no iha dalan neʼebé hanesan baibain.

Lee iha dalan neʼebé hanesan baibain sei halo fasil ba ema atu rona ba ita. Ida-neʼe la rona hanesan finje deʼit, no hatudu katak ita fiar duni informasaun neʼebé ita lee.