Oinsá mak ita bele hatene ema Kristaun neʼebé loos

Ema barak tebes dehan katak sira mak ema Kristaun. Maibé, sira iha fiar no morál neʼebé la hanesan. Entaun oinsá mak ita bele hatene ema Kristaun neʼebé loos?

1. Ema Kristaun katak sá?

Ema Kristaun katak Jesus nia dixípulu sira ka ema neʼebé laʼo tuir Jesus. (Lee Apóstolu 11:26.) Oinsá mak sira prova katak sira mak Jesus nia dixípulu? Jesus dehan: “Se imi sempre halo tuir haʼu-nia liafuan, imi mak haʼu-nia dixípulu duni.” (João 8:31) Neʼe katak ema Kristaun neʼebé loos tenke halo tuir Jesus nia hanorin sira. Jesus nia hanorin sira sempre bazeia ba Bíblia, tan neʼe ema Kristaun loos nia fiar mós tenke bazeia ba Bíblia.​—Lee Lucas 24:27.

2. Oinsá mak ema Kristaun loos hatudu domin?

Jesus hanorin ninia dixípulu sira: “Hadomi malu hanesan haʼu hadomi imi.” (João 15:12) Oinsá Jesus hatudu katak nia hadomi ninia dixípulu sira? Nia gasta tempu ho sira, fó korajen ba sira, no ajuda sira. Nia mós fó ninia moris ba sira. (1 João 3:16) Nuneʼe mós, ema Kristaun neʼebé loos hatudu domin laʼós deʼit ho liafuan. Sira hatudu domin ba malu liuhusi liafuan no mós hahalok.

3. Ema Kristaun loos badinas halo serbisu saida?

Jesus fó serbisu ba ninia dixípulu sira. “Nia haruka sira atu bá haklaken Maromak nia Ukun.” (Lucas 9:2) Ema Kristaun iha tempu uluk la haklaken deʼit iha sira-nia fatin adorasaun nian, maibé mós iha fatin públiku no husi uma ba uma. (Lee Apóstolu 5:42 no 17:17.) Ema Kristaun loos ohin loron mós haklaken lia-loos husi Bíblia iha fatin naran deʼit neʼebé ema iha. Sira hadomi ema seluk, tan neʼe sira kontente uza sira-nia tempu no enerjia atu haklaken kona-ba Bíblia nia mensajen neʼebé fó kmaan no esperansa ba ema neʼebé sira hasoru.​—Marcos 12:31.

KEʼE KLEʼAN

4. Sira buka lia-loos husi Bíblia

Laʼós ema hotu neʼebé bolu sira-nia an Kristaun hafolin lia-loos husi Bíblia. Loke VÍDEO, depois koʼalia hamutuk kona-ba pergunta tuirmai.

VÍDEO: Kristaun falsu nia hanorin komesa habelar (5:11)

• Oinsá mak igreja balu neʼebé bolu sira-nia an nuʼudar Kristaun la hanorin buat neʼebé Jesus haruka?

Jesus hanorin lia-loos husi Maromak nia Liafuan. Lee João 18:37, depois koʼalia hamutuk kona-ba pergunta tuirmai:

• Tuir buat neʼebé Jesus hatete, oinsá mak ita bele hatene ema Kristaun neʼebé “halo tuir lia-loos”?

5. Sira haklaken lia-loos husi Bíblia

Antes Jesus saʼe ba lalehan, nia fó knaar ida ba ninia dixípulu sira neʼebé halaʼo toʼo ohin loron. Lee Mateus 28:19, 20 no Apóstolu 1:8, depois koʼalia hamutuk kona-ba pergunta tuirmai:

• Ema Kristaun loos tenke haklaken toʼo bainhira no toʼo iha neʼebé?

6. Sira halo tuir buat neʼebé sira hanorin

Saida mak halo Tom fiar katak nia hetan ona relijiaun Kristaun neʼebé loos? Loke VÍDEO, depois koʼalia hamutuk kona-ba pergunta tuirmai.

VÍDEO: Haʼu rende ona ho relijiaun (5:20)

• Iha vídeo neʼe, saida mak halo Tom la fiar ba relijiaun?

• Tanbasá nia fiar katak nia hetan ona lia-loos?

Hahalok mak importante liu fali liafuan. Lee Mateus 7:21, depois koʼalia hamutuk kona-ba pergunta tuirmai:

• Saida mak importante liu ba Jesus, ita hatete deʼit katak ita fiar, ka ita hatudu liuhusi hahalok?

7. Sira hadomi malu

Ema Kristaun loos prontu tau sira-nia moris iha perigu laran atu ajuda sira-nia maluk Kristaun. Loke VÍDEO, depois koʼalia hamutuk kona-ba pergunta tuirmai.

VÍDEO: Nia prontu atu fó ninia moris (2:55)

• Iha vídeo neʼe, tanbasá mak Lloyd tau ninia an iha perigu laran atu ajuda irmaun Johansson?

• Tuir Ita-nia hanoin, ninia hahalok neʼe tuir duni ema Kristaun neʼebé loos ka lae?

• Oinsá mak ema Kristaun loos nia haree kona-ba ema husi rasa no nasaun seluk?

• Oinsá mak sira hatudu ida-neʼe durante tempu funu?

PONTU IMPORTANTE

Ema Kristaun neʼebé loos halo tuir Bíblia nia hanorin, hatudu domin neʼebé loos ba malu, no haklaken lia-loos husi Bíblia.

Rezumu

• Saida mak hun ba ema Kristaun loos nia fiar?

• Ita bele hatene ema Kristaun loos liuhusi sira-nia hahalok saida?

• Ema Kristaun loos halaʼo serbisu saida?

BUKA-HATENE LIUTÁN

Aprende liután kona-ba relijiaun ida neʼebé hakaʼas an atu halo tuir Jesus nia ezemplu no ninia hanorin sira.

Testemuña ba Jeová mak ema hanesan saida? (1:13)

Haree oinsá madre ida ikusmai hetan família espirituál neʼebé loos.

“Sira uza Bíblia atu hatán ba haʼu-nia pergunta hotu!” (Informasaun husi Livru Haklaken)

Haree oinsá ema Kristaun neʼebé loos hatudu domin ba sira-nia maluk Kristaun neʼebé kona dezastre.

Ajuda ita-nia irmaun-irmán sira bainhira dezastre akontese​—Vídeo badak (3:57)

Haree oinsá ema Kristaun iha tempu uluk no ohin loron kumpre buat neʼebé Jesus hatete atu hatudu katak sira mak Jesus nia dixípulu duni.

“Saida mak hatudu ema Kristaun neʼebé loos?” (Informasaun husi Livru Haklaken)