LISAUN 32
Maromak nia Ukun hahú ona!
Maromak nia Ukun hahú ona iha lalehan iha tinan 1914. Iha tempu hanesan, loron ikus sira husi ema nia ukun mós komesa. Oinsá mak ita bele hatene? Haree toʼok Bíblia nia profesia balu no kompara ho buat oioin neʼebé akontese iha mundu neʼe no oinsá ho ema nia hahalok husi tinan 1914 toʼo agora.
1. Bíblia fó sai profesia kona-ba saida?
Livru Daniel fó sai katak Maromak nia Ukun sei hahú bainhira “tempu hitu” foin remata. (Daniel 4:16, 17) Tinan barak liutiha, Jesus refere ba tempu hitu neʼe nuʼudar “tempu neʼebé hili tiha ona ba nasaun sira”, no nia hatete katak tempu neʼe seidauk remata. (Lucas 21:24) Ita sei aprende katak tempu hitu neʼe remata iha tinan 1914.
2. Husi tinan 1914, mundu nia situasaun no ema nia hahalok sai oinsá?
Jesus nia dixípulu sira husu ba Jesus: “Sinál saida mak sei hatudu katak Ita toʼo ona mai no mundu neʼe nia rohan mai ona?” (Mateus 24:3) Atu hatán ba pergunta neʼe, Jesus fó-hatene nanis kona-ba buat oioin neʼebé sei akontese kuandu nia komesa ukun nuʼudar liurai iha lalehan. Akontesimentu balu neʼe inklui funu, rai-hamlaha no rai-nakdoko. (Lee Mateus 24:7.) Bíblia mós fó sai nanis katak ema nia hahalok iha “loron ikus sira” halo moris sai “susar atu tahan”. (2 Timóteo 3:1-5) Hahú husi tinan 1914, ita haree ho klaru katak Bíblia nia profesia kona-ba mundu nia situasaun no ema nia hahalok sira sai loos daudaun.
3. Tanbasá mundu sai aat liután husi tempu neʼebé Maromak nia Ukun hahú?
Lakleur depois Jesus sai Liurai ba Maromak nia Ukun, nia funu hasoru Satanás ho anju aat sira iha lalehan no Satanás lakon. Bíblia hatete katak Satanás “soe tun tiha ba rai hamutuk ho ninia anju sira”. (Apokalipse 12:9, 10, 12) Satanás sai hirus makaʼas tanba hatene katak lakleur tan nia sei lakon ba nafatin. Nia halo buat aat oioin no hamosu susar iha mundu, tan neʼe ohin loron situasaun sai aat tebes! Maibé Maromak nia Ukun sei halakon problema sira-neʼe hotu.
KEʼE KLEʼAN
Haree oinsá mak ita hatene katak Maromak nia Ukun hahú ona iha tinan 1914 no oinsá mak ida-neʼe kona Ita rasik nia moris.
4. Bíblia nia profesia fó sai kona-ba tinan 1914
Maromak fó mehi ida ba Liurai Babilónia naran Nabukodonozór atu fó-hatene nanis kona-ba buat neʼebé sei akontese iha futuru. Mehi neʼe no Daniel nia esplikasaun hatudu katak profesia neʼe sei aplika ba Nabukodonozór nia ukun no mós ba Maromak nia Ukun.—Lee Daniel 4:17.a
Lee Daniel 4:20-26, depois koʼalia hamutuk kona-ba pergunta tuirmai:
(A) Nabukodonozór haree saida iha ninia mehi?—Haree versíkulu 20 no 21.
(B) Saida mak sei akontese ba ai-hun neʼe?—Haree versíkulu 23.
(C) Saida mak sei akontese iha “tempu hitu” nia rohan?—Haree versíkulu 26.
Oinsá mak mehi kona-ba ai-hun boot liga ho Maromak nia Ukun
PROFESIA (Daniel 4:20-36)
Ukun
(A) Ai-hun boot ida
Ukun para ba tempu balu
(B) “Tesi tiha ai-hun neʼe”, no husik toʼo “tempu hitu liu tiha”
Ukun neʼe hahú fali
(C) “Ita-nia ukun sei sai fali Ita-nian”
Bainhira profesia neʼe sai loos ba dala primeiru . . .
(D) Ai-hun neʼe reprezenta sé?—Haree versíkulu 22.
(E) Oinsá mak ninia ukun para ba tempu balu?—Lee Daniel 4:29-33.
(F) Saida mak akontese ba Nabukodonozór bainhira “tempu hitu” remata?—Lee Daniel 4:34-36.
SAI LOOS BA DALA PRIMEIRU
Ukun
(D) Nabukodonozór, Liurai Babilónia
Ukun para ba tempu balu
(E) Depois 606 AEC, Nabukodonozór sai bulak no labele ukun ba tinan hitu
Ukun neʼe hahú fali
(F) Nabukodonozór nia hanoin normál filafali no halaʼo fali ninia ukun
Bainhira profesia neʼe sai loos ba dala segundu . . .
(G) Ai-hun neʼe reprezenta sé?—Lee 1 Krónikas 29:23.
(H) Oinsá mak ninia ukun para ba tempu balu? Oinsá mak ita bele hatene katak ukun neʼe para hela bainhira Jesus iha mundu?—Lee Lucas 21:24.
(I) Bainhira no iha neʼebé mak ukun neʼe harii fali?
SAI LOOS BA DALA SEGUNDU
Ukun
(G) Liurai Izraél sira neʼebé reprezenta Maromak nia ukun
Ukun para ba tempu balu
(H) Jeruzalein naksobu, la iha ema ida husi jerasaun liurai nian mak ukun durante tinan 2.520
Ukun neʼe hahú fali
(I) Jesus hahú ninia ukun iha lalehan nuʼudar Liurai ba Maromak nia Ukun
Tempu hitu mak kleur oinsá?
Parte balu husi Bíblia ajuda ita atu komprende parte seluk iha Bíblia laran. Porezemplu livru Apokalipse hatete katak tempu tolu ho balu mak loron 1.260. (Apokalipse 12:6, 14) Entaun tempu hitu mak tempu tolu ho balu dala rua, neʼe katak loron 2.520. Dala ruma Bíblia uza loron ida atu refere ba tinan ida. (Ezequiel 4:6) Nuneʼe mós ho profesia kona-ba tempu hitu iha livru Daniel. Tempu hitu neʼe reprezenta tinan 2.520.
5. Mundu nia situasaun iha mudansa boot husi tinan 1914
Jesus fó-hatene nanis kona-ba mundu nia situasaun sei sai oinsá kuandu nia sai Liurai. Lee Lucas 21:9-11, depois koʼalia hamutuk kona-ba pergunta tuirmai:
Ita rasik haree ka rona ona kona-ba situasaun saida deʼit?
Apóstolu Paulo esplika kona-ba ema nia hahalok sei sai oinsá durante loron ikus sira kuandu ema nia ukun besik ona atu lakon. Lee 2 Timóteo 3:1-5, depois koʼalia hamutuk kona-ba pergunta tuirmai:
Tuir Ita-nia haree, ema barak ohin loron hatudu hahalok saida deʼit?
6. Maromak nia Ukun motiva ita atu halo buat ruma
Lee Mateus 24:3, 14, depois koʼalia hamutuk kona-ba pergunta tuirmai:
Serbisu importante saida mak hatudu katak Maromak nia Ukun hahú ona?
Oinsá mak Ita bele hola parte iha serbisu neʼe?
Maromak nia Ukun hahú ona, no lakleur tan sei kontrola buat hotu iha mundu. Lee Ebreu 10:24, 25, depois koʼalia hamutuk kona-ba pergunta tuirmai:
Tanba ita “haree loron neʼe besik daudaun ona”, ita presiza halo saida?
Kuandu ita aprende ona buat neʼebé bele ajuda no salva ema seluk, neʼe book Ita atu halo saida?
KARIK EMA SEI HUSU: “Tanbasá mak Testemuña ba Jeová koʼalia beibeik kona-ba tinan 1914?”
Ita sei hatete saida?
PONTU IMPORTANTE
Bíblia nia profesia no mundu nia situasaun hatudu duni katak Maromak nia Ukun hahú ona. Ita hatudu katak ita fiar ida-neʼe hodi haklaken kona-ba neʼe no tuir reuniaun sira.
Rezumu
Saida mak akontese depois “tempu hitu” remata?
Saida mak ajuda Ita atu fiar metin katak Maromak nia Ukun hahú ona iha tinan 1914?
Oinsá mak Ita bele hatudu sai Ita-nia fiar katak Maromak nia Ukun hahú ona?
BUKA-HATENE LIUTÁN
Buka-hatene buat neʼebé matenek-naʼin sira hatete kona-ba mudansa iha mundu husi tinan 1914.
“Bainhira ema nia morál sai aat liu” (Matan-moris bá!, Abríl 2007)
Lee oinsá mak profesia iha Mateus 24:14 fó impaktu ba mane ida nia moris.
“Haʼu hadomi baseball liu fali buat seluk!” (Livru Haklaken No. 3 2017)
Oinsá ita bele hatene katak profesia iha Daniel kapítulu 4 aplika ba Maromak nia Ukun?
“Horibainhira mak Maromak nia Reinu hahú ninia ukun? (Parte 1)” (Livru Haklaken, 1 Outubru 2014)
Saida mak hatudu katak “tempu hitu” iha Daniel kapítulu 4 remata ona iha tinan 1914?
“Horibainhira mak Maromak nia Reinu hahú ninia ukun? (Parte 2)” (Livru Haklaken, 1 Janeiru 2015)
a Haree informasaun rua ikus iha parte “Buka-hatene liután” husi lisaun neʼe.