LISAUN 06
Oinsá mak moris hahú?
‘Maromak mak hun ba moris.’ (Salmo 36:9) Ita fiar ida-neʼe ka lae? Ema balu fiar katak moris mosu mesak deʼit no la iha ida mak kria. Se neʼe mak loos, entaun ita-nia moris la iha objetivu. Maibé se Maromak Jeová mak Kriadór ba moris, neʼe katak moris iha objetivu loos ka lae?a Haree oinsá mak Bíblia esplika kona-ba moris nia hun no tanbasá ita iha razaun neʼebé diʼak atu fiar katak neʼe mak loos.
1. Oinsá mak universu hahú?
Bíblia hatete: “Horiuluk kedas Maromak kria lalehan no rai.” (Génesis 1:1) Sientista barak fiar katak universu la mosu mesak deʼit. Oinsá mak Maromak kria universu? Nia uza ninia espíritu santu, neʼe mak ninia forsa neʼebé ativu atu halo buat hotu iha universu, inklui galáksia, fitun no planeta sira.—Génesis 1:2.
2. Tanbasá mak Maromak kria mundu?
Jeová “kria rai laʼós saugati deʼit, maibé nia kria rai atu ema bele hela bá”. (Isaias 45:18) Nia halo ita-nia planeta furak tebes no sai ita-nia hela-fatin permanente. (Lee Isaias 40:28 no 42:5.) Sientista sira dehan katak mundu mak espesiál tebes. Sira la hetan planeta seluk neʼebé iha buat hotu ba ema atu bele moris.
3. Saida mak halo ema la hanesan ho animál?
Depois halo tiha mundu, Jeová kria moris hotu iha laran. Primeiru, nia kria ai-horis no animál sira. Depois, “Maromak kria ema tuir ninia ilas”. (Lee Génesis 1:27.) Saida mak halo ema la hanesan ho kriasaun seluk? Tanba Maromak kria ita tuir ninia ilas, ita iha abilidade atu halo tuir ninia hahalok sira hanesan domin no justisa. Nia mós kria ita ho abilidade atu aprende língua oioin, hafolin buat furak sira, no gosta múzika. No la hanesan animál sira, ita bele adora ita-nia Kriadór.
KEʼE KLEʼAN
Haree evidénsia neʼebé hatudu katak moris hotu la mosu mesak deʼit no iha duni Kriadór ida neʼebé kria buat hotu neʼe. Ita mós sei aprende kona-ba oinsá ema nia hahalok sira hanorin ita kona-ba Maromak.
4. Maromak mak kria moris hotu
Ema hetan gaba bainhira sira halo sasán ruma neʼebé kopia tuir buat neʼebé iha natureza. Se nuneʼe, tuir loloos sé mak tenke hetan gaba kona-ba kriasaun sira? Loke VÍDEO, depois koʼalia hamutuk kona-ba pergunta tuirmai.
Saida deʼit mak ema halo ona hodi kopia tuir natureza sira?
Ema mak halo planu no harii uma ida-idak. Maibé sé mak halo planu no kria buat hotu iha natureza? Lee Ebreu 3:4, depois koʼalia hamutuk kona-ba pergunta tuirmai:
Kriasaun saida deʼit mak Ita gosta?
Lójiku ka lae atu fiar katak Maromak mak kria universu no buat hotu? Tanbasá?
Ita hatene ka lae?
Ita bele hetan informasaun no vídeo sira kona-ba tópiku neʼe iha jw.org/tdt “Maromak mak kria ka lae?” no “Ema nia hanoin kona-ba oinsá moris hahú”.
“Tuir loloos, ema mak harii uma ida-idak, maibé Maromak mak harii buat hotu”
5. Bíblia nia istória kona-ba kriasaun mak lójiku
Iha Génesis kapítulu 1, Bíblia esplika kona-ba mundu nia hahú no moris hotu mai husi neʼebé. Ita bele fiar ba istória neʼe ka lae? Loke VÍDEO, depois koʼalia hamutuk kona-ba pergunta tuirmai.
Bíblia hanorin katak Maromak kria mundu no buat hotu iha mundu iha loron neen ho oras 24 deʼit ka lae?
Ita hanoin katak Bíblia nia hanorin kona-ba kriasaun mak lójiku no bele tau fiar ka lae? Tanbasá?
Lee Génesis 1:1, depois koʼalia hamutuk kona-ba pergunta tuirmai:
Sientista sira dehan katak universu la mosu mesak deʼit. Oinsá mak sira-nia hanoin apoia liafuan neʼebé ita foin lee iha eskritura neʼe?
Ema balu hanoin katak Maromak uza evolusaun atu kria moris hotu. Neʼe katak sira hanoin Maromak kria sélula kiʼik neʼebé bele troka an sai fali animál oioin. Lee Génesis 1:21, 25, 27, depois koʼalia hamutuk kona-ba pergunta tuirmai:
Bíblia hanorin katak Maromak uza evolusaun atu hamosu ikan, animál no ema ka lae? Ka nia kria animál tuir sira “ida-idak nia modelu”?
6. Ema mak Maromak nia kriasaun neʼebé úniku
Ita la hanesan ho animál sira neʼebé Jeová kria. Lee Génesis 1:26, depois koʼalia hamutuk kona-ba pergunta tuirmai:
Tanba Maromak kria ita tuir ninia ilas, ita iha abilidade atu hatudu domin no laran-sadiʼa. Neʼe hatudu Maromak iha hahalok saida deʼit?
EMA BALU DEHAN: “Bíblia nia istória kona-ba kriasaun mak inventa deʼit.”
Ita hanoin oinsá? Tanbasá?
PONTU IMPORTANTE
Jeová mak kria universu no moris hotu.
Rezumu
Bíblia hanorin saida kona-ba oinsá universu hahú?
Maromak uza evolusaun atu hamosu kriatura oioin, ka nia mak kria buat hotu?
Saida mak úniku husi ita ema?
BUKA-HATENE LIUTÁN
Haree ezemplu husi natureza neʼebé hatudu katak iha duni Kriadór.
“Saida mak ita aprende husi natureza?” (Matan-moris bá!, Setembru 2006)
Haree oinsá aman ida esplika Bíblia nia hanorin kona-ba kriasaun ba ninia oan.
Haree toʼok Bíblia no teoria evolusaun apoia malu ka lae.
“Maromak uza evolusaun atu kria kriatura oioin ka lae?” (Informasaun iha jw.org/tdt)
Haree toʼok se sientista sira-nia hanoin no mós fosil sira hatudu katak moris hotu iha hun ka mosu mesak deʼit.
Asal Mula Kehidupan—Lima Pertanyaan yang Patut Direnungkan (broxura)