Lia-loos kona-ba Armagedon

“Espíritu diabu nian . . . bá bolu liurai sira hotu rai neʼe nian atu . . . hamutuk iha fatin ida naran ‘Armagedon’.”—APOKALIPSE 16:14, 16.

ARMAGEDON mak fatin ida nia naran. Maibé fatin neʼe laʼós fatin loloos neʼebé ita bele hetan iha mundu neʼe.

Se nuneʼe, liafuan Armagedon loloos katak sá? Tansá mak dala barak ema uza liafuan “Armagedon” atu koʼalia kona-ba akontesimentu ruma hanesan funu?

Halibur hamutuk iha fatin ida naran Armagedon

Liafuan husi lia-ebraiku neʼebé tradús nuʼudar Armagedon iha arti “Foho Megido”. Maski la iha foho loloos neʼebé naran Megido, maibé iha duni fatin ida neʼebé naran Megido. Bele hetan Megido iha fatin neʼebé dalan boot rua hasoru malu iha parte oeste husi rai neʼebé Maromak fó ba ema Israel antigu. Ema halo funu boot barak besik fatin neʼe. Tan neʼe, ikusmai ema komesa uza naran Megido atu reprezenta funu.a

Maibé, buat neʼebé importante kona-ba Megido mak laʼós kona-ba funu saida mak ema halo iha neʼebá, maibé kona-ba tanbasá mak ema halo funu sira-neʼe. Megido mak parte husi rai neʼebé Maromak promete atu fó ba ema Israel. (Êxodo [Keluaran] 33:1; Josué [Yosua] 12:7, 21) Maromak promete ba ema Israel katak nia sei proteje sira husi sira-nia inimigu, no nia halo nuneʼe duni. (Deuteronômio [Ulangan] 6:18, 19) Porezemplu, iha Megido mak Maromak Jeová halo milagre hodi proteje ema Israel husi rai-Kanaan nia Liurai naran Jabin, ninia xefe tropa naran Sísera no sira-nia tropa. —Juízes (Hakim-Hakim) 4:14-16.

Entaun, liafuan “Armagedon” reprezenta buat ida neʼebé importante. Armagedon mak funu entre forsa boot rua.

Livru Apokalipse fó-hatene nanis kona-ba buat neʼebé sei akontese iha futuru, bainhira Satanás no ninia anju aat sira sei book ukun-naʼin sira iha mundu neʼe atu halibur sira-nia tropa iha Armagedon hodi ataka Maromak nia povu, no koko atu hapara sira-nia serbisu. Rezultadu husi neʼe mak ema rihun ba rihun sei mate kuandu Maromak manán hasoru ninia inimigu sira neʼebé kontra hasoru nia.—Apokalipse 19:11-18.

Bíblia hatete katak Maromak “laran-sadiʼa, la hirus lalais, no iha laran-diʼak neʼebé nakonu ho domin”. (Neemias [Nehemia] 9:17) Entaun, oinsá mak Maromak neʼebé iha hahalok sira-neʼe bele oho ema rihun ba rihun? Atu ajuda ita komprende tansá Maromak halo ida-neʼe, ita presiza buka resposta ba pergunta tolu tuirmai neʼe: (1) Sé mak hahú funu neʼe? (2) Tansá mak Maromak envolve an iha funu neʼe? (3) Funu neʼe sei lori rezultadu diʼak saida ba rai no ema iha rai?

1. SÉ MAK HAHÚ FUNU NEʼE?

La’ós Maromak, maibé ninia inimigu sira, “liurai sira hotu rai neʼe nian” mak sei hahú funu Armagedon ho hakarak atu halakon ema diʼak sira. Tansá sira hahú funu neʼe? Tanba hanesan ema neʼebé kontrola boneka, Satanás sei kontrola ukun-naʼin no forsa militár sira iha mundu neʼe no book sira atu ataka ema neʼebé adora Maromak Jeová. Maibé Maromak sei la husik ida-neʼe akontese, nia sei proteje ninia povu.—Apokalipse 16:13, 14; 19:17, 18.

Ohin loron, iha rai balu ema iha direitu atu fó sai sira-nia hanoin, no livre atu hili relijiaun rasik. Tan neʼe ema la fiar katak governu sira sei ataka hodi halakon relijiaun. Maibé tuir loloos, buat neʼebé hanesan akontese ona iha tempu uluk no akontese daudauk iha ita-nia tempu.b Maski nuneʼe, iha buat rua neʼebé la hanesan entre buat neʼebé akontese iha tempu uluk no Armagedon. Primeiru, iha Armagedon, governu sira sei la ataka Maromak nia povu iha nasaun ida deʼit, maibé iha mundu tomak. Segundu, iha tempu neʼe, Maromak Jeová sei uza ninia kbiit iha dalan neʼebé boot liu fali tempu uluk. (Jeremias [Yeremia] 25:32, 33) Bíblia koʼalia kona-ba funu neʼe nuʼudar “funu iha loron boot Maromak kbiit waʼin nian”.

2. TANSÁ MAK MAROMAK ENVOLVE AN IHA FUNU NEʼE?

Maromak Jeová hanorin sira neʼebé adora nia atu moris iha dame no hadomi sira-nia inimigu. (Miquéias [Mikha] 4:1-3; Mateus 5:43, 44; 26:52) Entaun, Maromak nia povu sei la uza kilat atu proteje sira-nia an bainhira Maromak nia inimigu ataka sira. Se Maromak la envolve an atu salva ninia povu, sira hotu sei mate. Tan neʼe, funu neʼe envolve Maromak Jeová nia naran. Se Maromak nia inimigu konsege halakon ninia povu, ema sei hatete katak Maromak Jeová la hadomi ninia povu, la halo buat neʼebé loos, no la iha kbiit. Maibé ida-neʼe sei la akontese!—Salmo (Mazmur) 37:28, 29.

Maromak lakohi atu halakon ema ida, tan neʼe nia fó avizu kona-ba saida mak nia sei halo. (2 Pedro 3:9) Ita bele lee istória barak iha Bíblia kona-ba oinsá Maromak salva ninia povu husi inimigu neʼebé ataka sira, no istória sira-neʼe sai nuʼudar avizu mai ita. (2 Reis [2 Raja-Raja] 19:35) Bíblia mós fó avizu katak iha futuru bainhira Satanás no ukun-naʼin mundu neʼe nian ataka Maromak nia povu, Maromak Jeová sei envolve an dala ida tan hodi uza ninia kbiit atu hasoru ninia inimigu. Tuir loloos, Maromak nia Liafuan fó-hatene nanis katak Jeová sei halakon ema aat sira. (Provérbios [Amsal] 2:21, 22; 2 Tesalonika 1:6-9) Iha tempu neʼebá, Maromak nia inimigu sira sei hatene ho klaru katak sira funu hasoru Maromak rasik, Ida neʼebé Forsa Boot Liu Hotu.—Ezequiel (Yehezkiel) 38:21-23.

3. FUNU NEʼE SEI LORI REZULTADU DIʼAK SAIDA?

Funu Armagedon sei lori rezultadu diʼak, ema rihun ba rihun sei hetan salvasaun. Tuir loloos, ida-neʼe sei hahú dame iha mundu tomak.—Apokalipse 21:3, 4.

Livru Apokalipse koʼalia kona-ba “ema-lubun boot” neʼebé sei hetan salvasaun husi funu neʼe. (Apokalipse 7:9, 14) Ho Maromak nia ajuda, ema sira-neʼe sei halo Maromak Jeová nia hakarak uluk nian, neʼe mak atu halo mundu tomak sai hanesan jardín Eden.

Ita hatene bainhira mak Maromak nia inimigu sei ataka ninia povu?

[Nota–rodapé]

[Dezeñu iha pájina 6]

Maromak Jeová salva ninia povu iha tempu uluk hodi halakon sira-nia inimigu

[Dezeñu iha pájina 7]

Maromak Jeová sei salva fali ninia povu iha funu Armagedon