“Ukun-fuan ulukliu hotu mak ida neʼebé loos?”

Saida mak Maromak hakarak ita atu halo? Iha ukun-fuan neʼebé barak tebes neʼebé ita tenke halo tuir ka lae? Lae. Tuir Jesus Kristu, buat neʼebé Maromak hakarak ita atu halo, bele esplika ida-neʼe ho liafuan ida deʼit.—Lee Marcos 12:28-31.

Ulukliu, hanoin toʼok situasaun neʼebé Jesus temi ninia liafuan iha Marcos 12:28-31. Iha loron 11, fulan-Nisan, loron balu antes Jesus mate, nia hanorin iha templu. Ninia inimigu sira koko husu pergunta balu atu halo nia koʼalia sala. Dala ida-idak, Jesus nia resposta sira halo sira nonook. Depois, sira husu pergunta neʼe ba Jesus: “Ukun-fuan ulukliu hotu mak ida neʼebé loos?”—Versíkulu 28.

Pergunta neʼe susar. Tanbasá? Husi ukun-fuan 600 liu neʼebé parte husi Moisés nia Ukun-Fuan, ema judeu balu sente katak iha ukun-fuan balu neʼebé importante liu fali ukun-fuan seluk. Maibé ba ema seluk, sira hanoin katak ukun-fuan hotu importante, no sala atu haree katak ukun-fuan ida todan liu fali ida seluk. Oinsá mak Jesus sei hatán pergunta neʼe?

Jesus hatán hodi temi ukun-fuan rua, laʼós ida deʼit. Primeiru, nia hatete: “Ó sei hadomi Naʼi, ó-nia Maromak ho ó-nia fuan tomak, ho ó-nia klamar tomak, ho [ó-nia] hanoin tomak no ho ó-nia kbiit tomak.” (Versíkulu 30, Deuteronômio [Ulangan] 6:5) Liafuan “fuan”, “klamar” ka moris, “hanoin” no “kbiit”, liafuan sira-neʼe iha arti neʼebé besik hanesan.a Eskritura neʼe nia arti mak: Presiza hadomi Maromak Jeová ho ita-nia an tomak no ho buat hotu neʼebé ita iha. Livru ida neʼebé esplika kona-ba Bíblia hatete: “Ita presiza hadomi Maromak iha dalan neʼebé kompletu.” Se ita hadomi Maromak hanesan neʼe, ita sei hakaʼas an atu moris tuir dalan neʼebé nia simu.—1 Joao 5:3.

Segundu, Jesus hatete:“Ó sei hadomi ó-nia maluk nuʼudar ó-nia an rasik.” (Versíkulu 31, Levítico [Imamat] 19:18) Domin ba Maromak no domin ba maluk sira mak buat rua neʼebé iha ligasaun ba malu. Oinsá? Tanba se ita hadomi Maromak, ita mós sei hadomi ita-nia maluk. (1 Joao 4:20, 21) Se ita hadomi ita-nia maluk hanesan ita-nia an rasik, ita sei hatudu hahalok ba sira hanesan buat neʼebé ita hakarak sira hatudu mai ita. (Mateus 7:12) Se ita hotu halo nuneʼe, ita hatudu katak ita hadomi Maromak neʼebé kria ita tuir nia ilas.—Gênesis (Kejadian) 1:26.

Ukun-fuan atu hadomi Maromak no maluk sira importante ka lae? Sin, importante duni. Jesus hatete: “La iha tan ukun-fuan neʼebé boot liu sira-neʼe.” (Versíkulu 31) Iha livru Mateus neʼebé mós konta kona-ba istória neʼe, Jesus hatete katak ukun-fuan rua neʼe mak ukun-fuan hotu nia hun.—Mateus 22:40.

La susar atu halo Maromak kontente. Buat hotu neʼebé Maromak hakarak ita atu halo, bele esplika ho liafuan ida deʼit, neʼe mak domin. Husi tempu uluk kedas Maromak hakarak nia atan sira atu hadomi nia, no ida-neʼe mak ninia hakarak ba nafatin. Maibé domin neʼe laʼós deʼit buat neʼebé ita sente. Ita hatudu ita-nia domin liuhusi ita-nia hahalok. (1 Joao 3:18) Diʼak atu aprende oinsá ita bele haburas no hatudu ita-nia domin ba Jeová, Maromak domin nian.—1 Joao 4:8.