Ajuda ema foun atu bele hasoru terus
1 Kuandu ema komesa atu estuda Bíblia no “buka atu moris” tuir Maromak nia hakarak, Satanás hakaʼas an atu ataka sira. (2 Tim 3:12) Karik sira-nia kolega iha serbisu-fatin, eskola, ka viziñu fó susar ba sira. Susar liu mak kuandu sira-nia família rasik fó susar ba sira.—Mt 10:21; Mc 3:21.
2 Bíblia hatete nanis kona-ba susar neʼe: Ema neʼebé foun tenke hatene katak ema sei fó susar ba sira no ida-neʼe hatudu katak sira mak Kristu nia dixípulu loloos. (Joao 15:20) Dala ruma ema kontra hasoru ita tanba sira iha hanoin neʼebé sala kona-ba Testemuña ba Jeová. Hanoin-hetan katak ita bele hetan ksolok neʼebé loos kuandu ema hamoe ita tanba ita halo tuir Jesus no halo tuir Maromak. (Apos 5:27-29, 40, 41) Ajuda ema neʼebé foun atu fiar katak Maromak Jeová nafatin apoia sira ho domin. (Sal 27:10; Mc 10:29, 30) Hodi laran-metin nafatin, sira hatudu katak sira apoia Maromak Jeová nia direitu atu ukun.—Prov 27:11.
3 Koñesimentu loos mak importante: Ajuda Ita-nia estudante Bíblia nian atu hatene katak importante atu kontinua hetan koñesimentu loos maski hasoru susar oioin. Satanás haterus sira atu koko satan netik buat neʼebé sira aprende hodi lia-loos sira-neʼe labele sai abut iha sira-nia laran. (Prov 4:23; Lc 8:13) Sira tenke kontinua atu hetan koñesimentu loos husi Maromak nia Liafuan hodi bele metin nafatin iha fiar.—Sal 1:2, 3; Kol 2:6, 7.
4 Presiza atu tahan: Iha situasaun neʼebé susar tebetebes, importante duni atu tahan, no ida-neʼe bele lori ba salvasaun. (Lc 21:16-19) Kuandu ema neʼebé foun tahan hasoru susar, sira no mós ema seluk hetan rezultadu diʼak. Sira bele haree rasik Maromak Jeová nia forsa atu haraik bensaun barak ba sira neʼebé tahan ho laran-metin.—Tgo 1:12.
5 Apóstolu Paulo haksolok tanba ninia irmaun-irmán sira iha Tesalonika laʼo ba oin nuʼudar ema kristaun. Paulo mak ajuda atu tama iha lia-loos, no nia agradese ba Maromak tanba sira. (2 Tes 1:3-5) Ita hotu mós bele sente haksolok hanesan apóstolu Paulo bainhira ita ajuda ita-nia estudante Bíblia nian atu bele hasoru terus no tahan terus neʼe.