Pergunta husi haklaken-naʼin
◼ Kuandu ita kopia ka grava diskursu neʼebé ita rona iha reuniaun sira, ita bele fahe ida-neʼe ba malu ka lae?
Diskursu sira neʼebé bazeia ba Bíblia sempre halo ita laran-manas no hametin ita-nia fiar. (Apos 15:32) Tan neʼe, ita gosta atu fahe informasaun sira-neʼe ba ita-nia maluk neʼebé la tuir reuniaun iha tempu neʼe. Ho teknolojia oioin, ohin loron sai fasil liu ba ita atu grava diskursu sira no fahe ba ema seluk. Ita-nia irmaun-irmán balu mós rai-hela diskursu sira neʼebé sira grava ona, inklui diskursu neʼebé hatoʼo iha tinan barak liubá, no sira fahe gravasaun neʼe tanba sira hanoin katak ida-neʼe bele ajuda maluk seluk. Irmaun-irmán balu fali kria Web site iha internét no tau diskursu sira-neʼe atu ema seluk bele foti.
Klaru katak la sala atu grava diskursu atu Ita rasik ka Ita-nia família mak rona. Dala ruma, katuas sira iha kongregasaun mós halo arranju atu grava diskursu sira atu fó ba irmaun ka irmán neʼebé la bele tuir reuniaun sira tanba moras ka razaun seluk. Maski nuneʼe, ladún diʼak atu fahe ba malu diskursu sira neʼebé ita kopia ka grava ona. Tanbasá?
Dala barak, diskursu-naʼin sira hatoʼo diskursu hodi tuir kongregasaun ka irmaun-irmán iha área neʼe nia presiza, tan neʼe fasil atu ita komprende sala se ita la hatene situasaun neʼebé sira hasoru. No mós, susar ba ita atu hatene ho loloos sé mak hatoʼo diskursu neʼe no bainhira, atu ita bele fiar katak informasaun neʼe mak loos no laʼós tuan ona. (Lc 1:1-4) Liután neʼe, kuandu ita fahe ba malu diskursu neʼebé ita kopia ka grava ona, ida-neʼe bele book ita-nia maluk balu atu gaba demais diskursu-naʼin ruma no bele mós book diskursu-naʼin atu gaba an.—1 Kor 3:5-7.
Atan laran-metin no matenek hakaʼas an atu fahe ai-han espirituál neʼebé natoon no iha “oras loloos”. (Lc 12:42) Ida-neʼe inklui halo arranju kona-ba diskursu sira neʼebé hatoʼo iha kongregasaun, no mós halo gravasaun neʼebé ita bele foti husi Web site jw.org. Ita fiar katak atan laran-metin no matenek no ninia Grupu Administradór sei fó buat neʼebé ita presiza atu ita bele nafatin iha fiar neʼebé metin.—Apos 16:4, 5.