LESOGNE 15
Nagnino Rehe ro Toko’e Hanohy Hianatse Baiboly?
1. Inogne ty soa ho azo’o naho tohiza’o avao ty fianara’o Baiboly?
Azo antoke fa nitombo ty hatea’o i Jehovah, naho fa nianatse ty fampianaragne fototse agnate Baiboly ao rehe. Faie mila ampitomboegne ze hatea zay. (1 Petera 2:2) Hiharine i Jehovah isan’andro rehe naho manohy mianatse Baiboly, sady hahazo i havelogne nainai’ey.—Vakio Jaona 17:3; Joda 21.
Hihamafe ty finoa’o naho mitombo ty raha fanta’o agnate Baiboly ao. Hahavita hampifale i Jehovah rehe, naho mafe finoagne. (Hebreo 11:1, 6) Ho vognogne hibebake ama’e rehe, sady hagnova ty fomba mahazatse azo.—Vakio Asan’ny Apostoly 3:19.
2. Vognogne hizara ty raha nianara’o agnate Baiboly ao vao rehe?
Azo’o atao soa ty miharine i Jehovah
Mahafinaritse ty magnambara i talily soay. Azo antoke areke fa ho tea’o ty hizara amy ty hafa ze raha nianara’o. Tohizo avao ty fianara’o, le ho hai’o ty hampiasa andinin-teny mba hagnazavagne ty raha inoa’o.—Vakio Romanina 10:13, 14.
Azo’o atao hey ty mirehake amy ty nama’o naho ty longo’o. Faie mahaia manahatsahatse. Ko le avy le mirehake tie diso ty fivavaha’e, fa ze raha ampitamaen’Andrianagnahare ro rehafo ama’e. Ho tohigne ty fo’e naho soa fagnahy ama’e rehe.—Vakio 2 Timoty 2:24, 25.
3. Inogne ty soa ho azo’o naho mikezake mafe lognandro?
Handroso ara-pagnahy rehe naho manohy mianatse Baiboly. Ho longo maifitse i Jehovah ka rehe. Horambese’e ho agnisa ty keleia’e rehe.—Vakio 2 Korintianina 6:18.
4. Inogne ty fikezahagne mbe toko’e hatao’o?
Ko ajanogne ty fianara’o Baiboly, amy izay rehe mandroso ara-pagnahy lognandro. (Hebreo 5:13, 14) Tohizo amy ty boke Inogne Vata’e ty Raha Ampianare ty Baiboly?, ty fianara’o miharo amy ty Vavolombelo i Jehovah. Arakarake ty ianara’o ty Saontsin’Andrianagnahare ty hahasoa ty fiaigna’o.—Vakio Salamo 1:1-3; 73:27, 28.
Boake amy i Jehovah, i Andrianagnahare falefaley, i talily soay. Harine aze rehe naho miharo amo o mpanompo’e reo. (Hebreo 10:24, 25) Tohizo ty kezake atao’o mba hanompoagne i Jehovah. Hahazo i fiaignagne vata’ey rehe amy ty fara’e, ty dika izay i havelogne nainai’ey. Tsy misy raha soa mandikoatse tihoe longo maifitse i Jehovah!—Vakio 1 Timoty 1:11; 6:19.