Nagnomagne ty Lala i Mesia ty Jaona

Nanjare mpaminany ty Jaona ana-dahy i Zakaria naho i Elisabeta, naho fa nibey. Nirahe i Jehovah hampianatse miomba ty hahavia i Mesia reke. Tsy nitory tamy ty synagoga ndra tagnate tanàgne reke, fa tan-tane efetse agne. Ndaty maro boake a Jerosalema ao naho amy ty faritse i Joda, ty niavy hitsanogne aze. Nampianatse reke tie toko’e hisintake amy ty fomba rati’e o ndatio naho te hampifale an’Andrianagnahare. Maro ty ndaty nibebake naho fa nitsanogne aze, le natao’e badisa tamy ty Renerano i Jordana ao.

Tsotra ty fiaigna i Jaona. Holin-drameva ty akanjo’e sady valala naho tantele ty fihane’e. Maro ty ndaty tondregne tamy i Jaona. Ndra o Fariseo naho o Sadoseo mpiavognavogne reo, le niavy mba hagnente aze. Hoe ty Jaona tamy iareo: ‘Mibebaha sady miovà amy ty fomba rati’areo. Tsy tihoe ana i Abrahama nareo le ho anan’Andrianagnahare.’

Maro ty Jiosy nagnontane i Jaona tie: ‘Ino ty hatao’ay naho te hampifale an’Andrianagnahare?’ Le hoe reke: ‘Naho managne akanjo roe rehe, le meo raike ze tsy managne.’ Tea’e hampianaregne i mpanonjohy aze rey, fa toko’e ho tea ndaty iareo naho te hampifale an’Andrianagnahare.

Hoe ty Jaona tamy ze ndaty mpitake haga: ‘Manoa ty maregne fa ko mangalatse.’ Hoe ka reke tamo o maramilao: ‘Ko manao aferafera sady ko mavande.’

Maro ty ndaty te hahafantatse i Jaona. Hoe o mpisorogneo naho o Levitao: ‘Ia reheo?’ Le hoe reke: ‘Izaho ro feo rei’areo an-tane efetse agne. Naminany ty Isaia fa izaho ro hampiheregne o ndatio amy i Jehovah.’

Niteà o ndaty ty raha nampianare i Jaona. Maro ty nieretseretse kera i Jaona ro Mesia. Faie hoe reke: ‘Mbe ho avy ty lahibey mihoatse ahy. Tsy fagnevako ndra ty hamaha ty kapa’e. Izaho manao badisa amy ty rano, fa i reke hanao badisa amy ty fagnahy masigne.’