Nagnino Rehe ro Mila Manokan-tegna Hoahy i Jehovah?

‘Nisy anjely i Andrianagnahare tompokoy nitsangagne tagnilako teo taniankale.’​—ASA. 27:23.

1. Ino ty dingagne fa natao i hatao badisa rey, sady ino ty fagnonteneagne boake amy izay?

“MIOREGNE amy ty solovoy i Jesosy Kristy, fa nibebake noho ty fahota’o vao rehe le nanokagne ty tegna’o hoahy i Jehovah mba hanao ty zoton’arofo’e?” Io ty agnisa i fagnonteneagne roe valea ze hatao badisay, amy ty fara i lahajaka i badisay. Nagnino o Kristianao ro mila manokan-tegna hoahy i Jehovah? Ino ty soa azo boake amy izay? Nagnino tikagne ro tsy maintsy manokan-tegna ho an’Andrianagnahare naho te hanompo aze amy ty fomba ankasitraha’e? Mba hamaleagne izay, le andao heike hodinehentikagne ty atao tihoe manokan-tegna.

2. Ino ty dika tihoe manokan-tegna hoahy i Jehovah?

² Ino ty dika tihoe manokan-tegna ho an’Andrianagnahare? Mareho ty raha nirehafe i apostoly Paoly miomba ty fifandrambesa’e taman’Andrianagnahare. “Andrianagnahare tompoko” hatasa’e tagnatreha i niarake tama’e tamy i sambo fa ho rendrekey. (Vakio ty Asan’ny Apostoly 27:22-24.) Fanagna i Jehovah o tena Kristianao iaby. Faie “ambane fahefa i ratỳ” ty tontolo toy. (1 Jaona 5:19) Manjare fanagna i Jehovah o Kristianao, naho fa eké’e ty fanokanan-tegna atao iareo amy ty alala ty vavake. Vava atao ty tsikiraidraike ty fanokanan-tegna hoe izay. Atao badisa agnate rano ao i ndatỳ afara izay.

3. Ino ty dika i badisa i Jesosỳ, sady ino ty atao ty mpanonjohy ty lia’e mba hanahafagne aze?

³ Nagnomey modely ho antikagne ty Jesosy naho fa nifily ty hanao ty zoton’arofon’Andrianagnahare. Fa voatokagne ho an’Andrianagnahare reke, satria naterake tamo o firenena voatokagne ho an’Andrianagnahareo, le ty firene o Israelio. Faie nanao raha mandikoatse ty nitaké i Lalànay ty Jesosy naho fa natao badisa. Rehafe ty Baiboly fa nirehake reke tie: “Intoy raho avy hanao ty zoton’arofo’o Andrianagnahare!” (Heb. 10:7; Lioka 3:21) Ty badisa i Jesosy areke le midika fa nanolotse ty tegna’e ho an’Andrianagnahare mba hanao ty zoton’arofo’e reke. Manao hoe izay ka ty mpanonjohy ty lia’e naho fa atao badisa. Faie ty badisa iareo agnate rano ao le mampiseho amy ty ndaty maro fa nanokan-tegna ho an’Andrianagnahare tamy ty alala ty vavake reke.

Ty Soa azo ze Manokan-tegna

4. Mila magneke hanao inogne o mpinamagneo, naho henteagne ty finamagna i Davida naho i Jonatana?

⁴ Tena raharaha lahibey o fanokanan-tegnao fa tsy fifagnekeagne avao. Faie nagnino tikagne ro handrambe soa naho manokan-tegna? Dineho moa ty soa azo naho fa manao fifagnekeagne ama o ndaty! Naho te handrambe soa boake amy ty fanagnagne namagne ohatse rehe, le tsy maintsy magneke ty adidy toko’e hatao amy izay. Agnisa izay tihoe mila mikarakara i nama’oy rehe. Rehafe ty Baiboly fa tena niambake ty finamagna i Davida naho i Jonatana. Nanao fifagnekeagne iaby aza iareo roe lahy. (Vakio ty 1 Samoela 17:57; 18:1, 3.) Tsy ampe ty mpinamagne hanao fifagnekeagne zao. Faie mifankatea o mpinamagneo naho fa sambe mahatsapa ty adidi’e toko’e hifanao soa.​—Ohab. 17:17; 18:24.

5. Mila manao inogne o mpanompò naho te handrambe soa maharetse boake amy ty tompo’e soa fagnahy?

⁵ Mandrambe soa ka ty ndaty hafa naho fa manao fifagnarahagne amy ty hafa, arake ty trea amy ty Lalàna nimean’Andrianagnahare o Israelitao. Ho voaro ohatse o mpanompò naho manao fifagnarahagne maharetse amy ty tompo’e soa fagnahy, sady magneke ho fanagna’e nainai’e. Hoe tasa i Lalànay: “Faie naho mizizo reke tie: ‘Tena teako i tompokoy naho i valy aman’anakoy, le tsy te hiala raho sady tsy te ho ndaty afake’, le ho ente i tompo’ey miharine an’Andrianagnahare reke, le hankigne’e amy i lalagney ndra amy i tolàgney eo, le hirifa’e amy ty finjaitse kiraro ty sofi’e, sady ho mpanompo’e agnate ty fotoagne tsy misy fara’e reke.”​—Eks. 21:5, 6.

6, 7. a) Ino ty soa azo ty ndaty manao fifagnekeagne? b) Ino ty ampianare izay antikagne miomba ty fifandrambesagne amy i Jehovah?

⁶ Tena raha lahibey ka ty fifagnekeagne atao o mpivalio, ndaty ty anoagne fifagnekeagne fa tsy taratasy. Tena tsy ho azo antoke ty fiaigna ty ndaty roe miharo tragno faie tsy misoratse, sady hanao hoe izay ka ty fiaigna ty ana iareo. Hagniry handamigne aman-katea ty olagne miseho o mpivaly ara-dalàna nifagneke hagnatanterake ty voadi’eo, satria izay ty také ty Soratse Masigne.​—Mat. 19:5, 6; 1 Kor. 13:7, 8; Heb. 13:4.

⁷ Nandrambe soa ty ndaty taloha satria nanao fifagnarahagne tamy ty varotse naho ty asa. (Mat. 20:1, 2, 8) Mandrambe soa ka ohatse tikagne naho manao fifagnarahagne an-tsoratse, aloha ty hanoagne raharaham-barotse ndra hiasagne amy ty orinasa raike. Magnasoa ty fifandrambesa ty mpinamagne naho ty mpivaly vaho ty mpiasa naho ty patorò ty fanoagne fifagnekeagne. Tsy vao mainke hagnasoa ty fifandrambesantikagne amy i Jehovah vao ty fanokanan-tegna ho aze? Andao hodinehentikagne ty soa niazo i ndaty taloha rey, naho fa nanokan-tegna hoahy i Jehovah Andrianagnahare iareo. Hohenteantikagne ka tie nagnino o fanokanan-tegnao ro tsy fifagnekeagne avao.

Nandrambe Soa o Israelitao Satria Nanokan-tegna

8. Midika inogne hoahy o Israelitao tihoe voatokagne ho an’Andrianagnahare?

⁸ Nanjare firenena voatokagne hoahy i Jehovah o Israelitao, naho fa nanao voady tama’e. Nampivorien’Andrianagnahare marine i Vohitse Sinaỳ teo iareo, le izao ty saontsi’e tamy iareo: “Naho magnorike ty raha rehafeko nareo, sady magnaja ty fifagnekeagne hataoko ama’areo, le ho fanagnako manokagne filieko boake amo o firenenao iaby nareo.” Niarake namale iareo tie: “Vognogne hanao ze raha nisaontsie i Jehovah zahay.” (Eks. 19:4-8) Tsy tihoe nagneke ty hanao raha avao o Israelitao naho fa nanjare firenena voatokagne, fa nanjare fanagna i Jehovah ka. Tena nihevetse iareo ho ‘fanagna’e manokagne’ ty Jehovah.

9. Ino ty soa nirambese o Israelitao, noho iareo voatokagne ho an’Andrianagnahare?

⁹ Nandrambe soa o Israelitao naho fa nanjare fanagna i Jehovah. Tsy nivalike tamy iareo ty Jehovah sady nikarakara iareo, manahake ty atao ty baba bey hatea amy ty ana’e. Hoe ty Andrianagnahare tamy iareo: “Misy ampela magnaligno ty ana’e mbe minono vao, le tsy tretréze’e i ana’e natera’ey? Ndra tie magnaligno aza i ampela rey, le iraho tsy mba hagnaligno azo.” (Isaia 49:15) Nimea i Jehovah iareo i Lalànay mba hitari-dalagne iareo. Nirahe’e ka o mpaminanio mba hampahery iareo, naho o anjelio mba hiaro iareo. Hoe i mpanao salamoy: “Misaontsy ty saontsi’e amy i Jakoba reke. Le saontsie’e amy Israely ty fitsipi’e naho ty lilim-pitsarà’e. Tsy nanao hoe izay amy ty firenena hafa reke.” (Sal. 147:19, 20; vakio ty Salamo 34:7, 19; 48:14.) Nikarakara i firenena voatokagne ho azey ty Jehovah tie taloha. Hikarakara ze manokan-tegna ho aze ka reke tie amy izao.

Nagnino Tikagne ro Toko’e Hanokan-tegna ho an’Andrianagnahare?

10, 11. Agnisa ty keleiam-bey i Jehovah vao tikagne naho vaho aterake? Hazavao.

¹⁰ Va’e manao hoe izao ty ila’e naho fa mieretseretse tihoe hanokan-tegna naho hatao badisa ndra tsy hatao: ‘Tsy maintsy manokan-tegna ho an’Andrianagnahare vao raho vaho afake manompo aze?’ Hazava amantikagne zay naho dinehentikagne ty toerantikagne agnatrehan’Andrianagnahare eo. Tadidio fa nanota ty Adama, le tsy agnisa ty keleian’Andrianagnahare sasa tikagne naho vaho aterake. (Rom. 3:23; 5:12) Tena mila manokan-tegna ho an’Andrianagnahare areke tikagne, mba hagnekea’e antikagne ho agnisa i keleiam-bei’ey. Ino ty anto’e?

¹¹ Toko’e ho afake namindra aigne voririke tamantikagne i babantikagney, faie tsy izay ty raha niseho. (1 Tim. 6:19) Vaho terake tikagne, le fa tsy agnisa ty anan’Andrianagnahare. Tafasarake tamy i Mpamorogne sady Baba bey hateay ty tarana o ndatio, naho fa nanota i mpivaly voaloha’ey. (Ampitahao amy ty Deoteronomia 32:5.) Tsy agnisa ty keleiam-bey i Jehovah o ndatio nanomboke teo, sady tafasarake tama’e.

12. a) Akore ty hahavy o ndaty tsy voririkeo hanjare keleian’Andrianagnahare? b) Ino ty dingagne tsy maintsy atao aloha ty badisa?

¹² Faie afake mangatake aman’Andrianagnahare tikagne tsikiraidraike, mba hagnekea’e antikagne ho agnisa i keleia’e misy o mpanompo’eo.a Akore ty himeteza izay ie amy izao tikagne mpanota? Hoe ty apostoly Paoly: ‘Fa tamy itikagne mbe nifahavaloy ro nampilongoegne taman’Andrianagnahare, tamy ty nimateza i Ana’ey.’ (Rom. 5:10) Naho fa atao badisa tikagne, le mangatake aman’Andrianagnahare mba hanagne feo ty fieretseretagne malio le hahazo sitrake ama’e. (1 Pet. 3:21) Faie misy dingagne tsy maintsy atao aloha ty badisa. Tsy maintsy mahafantatse an’Andrianagnahare tikagne, mianatse mitoky ama’e, mibebake sady miova. (Jaona 17:3; Asa. 3:19; Heb. 11:6) Mbe misy raha hafa mila atao ka aloha ty hagnekean’Andrianagnahare antikagne ho agnisa ty keleia’e. Ino zay?

13. Nagnino ro ara-dalàna naho manao voady mba hanokan-tegna ho an’Andrianagnahare ty ndaty te ho agnisa ty keleia’e?

¹³ Mila manao voady amy i Jehovah heike ty ndaty tafasarake tama’e, vaho ho afake ho agnisa ty keleiagne misy ty mpanompo’e ankasitraha’ey. Ino ty anto’e? Intoy misy ohatse: Soa fagnahy tamy ty bode raike ty loha ty keleiagne nihajaegne toy, le te hanangagne aze ho ana’e. Malaza ho ndaty soa fagnahy i lahilahỳ, faie tea’e hanao fifagnekeagne ama’e heike i ajajay, vaho hatsanga’e ho ana’e. Hoe areke i lahilahỳ: “Mila fantareko heike naho ho tea naho hagnaja ahy rehe, vaho hekeko ho anako.” Tsy heké i lahilahỳ ho agnisa ty keleia’e i ajajay, naho tsy vognogne hanao voady ama’e. Tsy ara-dalàna vao zay? Hoe izay ka fa ze vognogne hanao voady mba hanokan-tegna hoahy i Jehovah avao ro heké’e ho agnisa ty keleia’e. Hoe ty Baiboly: ‘Atoloro’areo mba ho sorogne velogne naho masigne sady ankasitrahan’Andrianagnahare ty vata’areo.’​—Rom. 12:1.

Porofo ty Hatea Naho ty Finoagne

14. Nagnino ty fanokanan-tegna ro porofo ty hatea?

¹⁴ Tena teantikagne ty Jehovah kanao mivoady hanokan-tegna ho aze tikagne. Mitovitovy amy ty voadim-panambaliagne avao zay. Atoro i lahilahy kristianay fa tea’e ty ampela raike, naho fa mivoady reke fa tsy hivalike ama’e, ndra ino ndra ino ty raha hiseho. Fifantagne amy i ndatỳ iaby aza io, fa tsy fampitamaegne hanao raha avao. Fanta i lahilahy kristianay fa tsy afake ty hanambaly i ampelay reke, naho tsy manao voadim-panambaliagne. Tsy tena ho afake ty hahazo i tombotsoa ho agnisa ty keleia i Jehovah-y ka tikagne, naho tsy mivoady hanokan-tegna ho aze. Manokan-tegna ho an’Andrianagnahare areke tikagne ndra tie tsy voririke aza, satria teantikagne ty hanjare ho fanagna’e sady tapa-kevetse ty tsy hivalike ama’e tikagne, ndra ino ndra ino ty raha hiseho.​—Mat. 22:37.

15. Nagnino ty fanokanan-tegna ro porofo ty finoagne?

¹⁵ Porofoentikagne fa manam-pinoagne tikagne, naho manokan-tegna ho an’Andrianagnahare. Ty finoagne i Jehovah ty mahavy antikagne hatoky fa mahasoa antika ty miharine aze. (Sal. 73:28) Fantantikagne fa tsy ho mora avao tihoe miharo lia aman’Andrianagnahare sady miaigne amy ty “taranake tsy maregne naho raty fagnahy” toy eto. (Fil. 2:15; 4:13) Faie matoky tikagne fa hitahy ty kezake ataontikagne ty Andrianagnahare, arake ty fa nampitamae’e. Tsy voririke tikagne, faie matoky fa hiferegnesa i Jehovah ndra tie manao hadisoagne aza. (Vakio ty Salamo 103:13, 14; Romanina 7:21-25.) Mino tikagne fa hamale soa antikagne ty Jehovah, noho itikagne tapa-kevetse ty tsy hivalike.​—Joba 27:5.

Mahasambatse ty Manokan-tegna

16, 17. Nagnino ro mahasambatse ty manokan-tegna hoahy i Jehovah?

¹⁶ Sambatse ze ndaty manokan-tegna hoahy i Jehovah, satria magnomey ty tegna’e ho aze. Tena maregne ty reha i Jesosy toy: “Mahasambatse vata’e ty magnomey ty amy tie mandrae.” (Asa. 20:35) Tena sambatse ty Jesosy satria nagnomey, tagnate ty fanompoa’e tan-tane etoa. Mba hagnampeagne ty hafa hahazo i fiaignagney, le tsy mba nitofatofa reke, ndra nihinagne, ndra nampiadagne ty tegna’e tamy ty fotoagne ila’e. (Jaona 4:34) Nahafinaritse aze ty nampifale ty arofo i Jehovah. Hoe reke: “Manao raha mahafale aze lognandro raho.”​—Jaona 8:29; Ohab. 27:11.

¹⁷ Natoro i Jesosy i mpanonjohy ty lia’e rey areke ty fomba fiaignagne mahafa-po, le hoe reke: “Naho misy te hagnorike ahy, le tsy maintsy mandietse ty vata’e reke.” (Mat. 16:24) Harine i Jehovah tikagne naho manao izay. Aia ka ty mbe hahatreavantikagne fikarakaragne tena soa hoe izay?

18. Nagnino tikagne ro ho sambatse naho miaigne mifagnarake amy i fanokanan-tegnantikagney?

¹⁸ Tsy manahake ty manokan-tegna hoan’o ndaty ty manokan-tegna hoahy i Jehovah, satria mahasambatse ty miaigne mifagnarake amy io sady manao ty zoton’arofo i Jehovah. Maro ohatse ty nanokagne ty fiaigna’e hipaliavagne harena naho fanagnagne, faie tsy tena sambatse naho afa-po iareo. Faie ty ndaty manokan-tegna hoahy i Jehovah sambatse avao. (Mat. 6:24) Sambatse reke satria voninahitse ho aze tihoe “mpiara-miasa aman’Andrianagnahare.” Faie tsy manokan-tegna hoahy ty asa raike reke, fa hoahy i Andrianagnahare mahay mankasitrakey. (1 Kor. 3:9) Andrianagnahare avao ro tena mahay mankasitrake ty fahafoezan-tegna ty ndaty tsy mivalike. Hahere’e ho tanora aza iareo, mba ho afake handrambe soa nainai’e amy ty fikarakara’e.​—Joba 33:25; vakio ty Hebreo 6:10.

19. Ino ty fitahiagne ho azo ze manokan-tegna hoahy i Jehovah?

¹⁹ Manjare mifandrambe marine amy i Jehovah rehe, naho fa manokan-tegna ho aze. Hoe ty Baiboly: “Magnarinea an’Andrianagnahare, le hagnarine anareo reke.” (Jak. 4:8; Sal. 25:14) Hodinehentikagne amy ty lahatsoratse magnarake tie, nagnino tikagne ro tena tsy hanegnegne naho mifily ty ho fanagna i Jehovah.

[Fagnamarehagne ambane peje]

Akore ty Hamalea’o Iretoa?

• Ino ty dika tihoe manokan-tegna ho an’Andrianagnahare?

• Ino ty soa ho azontikagne naho manokan-tegna tikagne?

• Nagnino o Kristianao ro mila manokan-tegna hoahy i Jehovah?

[Sare]

Ho sambatse avao tikagne naho miaigne mifagnarake amy ty fanokanan-tegnantikagne