Debà Mahaliagne: Ino o Fagnahy Masigne Zao?

TEA o Vavolombelo i Jehovah-o ty mirehake miomba ty Baiboly amy ty mpiharo tanàgne ama’e. Misy fagnonteneagne manahiran-tsaigne azo vao? Misy tea’o ho fantatse vao ty miomba ze raha inoa ty Vavolombelo i Jehovah naho ze raha fanoe iareo? Ko misalasala areke magnontane izay amy ze Vavolombelo i Jehovah mifankatrea ama’o. Ho fale reke hamale izay.

Hoe izao ty debà mahaliagne fanoe ty Vavolombelo i Jehovah amo o ndatio. Andao hatao tihoe Vorisoa ty Vavolombelo i Jehovah, le i Lambosindrae i ndaty ifampirehafagney.

Ino o fagnahy masigne zao arake ty heve’o?

Lambosindrae: Nao zao nareo Vavolombelo i Jehovah-o tsy mino o fagnahy masigneo? Tsy Kristiana zane nareo.

Vorisoa: Magnomey toky azo aloha raho fa Kristiana zahay. Mino i Jesosy Kristy raho kanao avy ama’o etoa t’androany. I reke zao ty nandily i mpiana’e rey mba hitory. Faie naho ty ama’o, inogne moa o fagnahy masigne zao?

Lambosindrae: Ndaty fahatelo amy i Andrianagnahare telo miharo raikey, i mpagnampe nirehafe i Jesosy tie halefa’e ho antikagney. Tena lahibey o fagnahy masigneo tie amako, le teako hisy heri’e amy ty fiaignako.

Vorisoa: Izay vata’e aloha ty fihevera ty ndaty maro o fagnahy masigneo. Fa nandineke ze raha ampianare ty Baiboly miomba izay raho, managne fotoagne kedekede vao rehe fa teako ho rehafegne ama’o zay.

Lambosindrae: Eka tsy magnahy!

Vorisoa: I Vorisoa aloha ty agnarako. Asa ia ka ty azo?

Lambosindrae: Lambosindrae.

Vorisoa: Fale mahafantatse azo. Ko matahotse rehe fa tsy ho lava rehake raho. Nirehake rehe teoy fa mpagnampe o fagnahy masigneo. Tena maregne zay. Faie naho ty ama’o, mitovy aman’Andrianagnahare vao o fagnahy masigneo?

Lambosindrae: Eka, izay ty nampianaregne ahy.

Ndaty vao o fagnahy masigneo?

Vorisoa: Andao tikagne hagnente andinin-teny mba hahatreavantikagne tie, ndaty tsy trea maso vao o fagnahy masigneo. Va’e fa fanta’o toy. Hoe ty Asan’ny Apostoly 2:1-4: “Nivory tamy ty toeragne raike iareo iaby, tamy ty andro Pentekosta. Le nisy feo mafe niavy tampoke boake an-dagnitse agne hoe tioke mafe, le nameno i tragno nitoboha iareoy. Le nisy lela maro hoe afo niseho tamy iareo, le nizarazara tambone iareo eo tsikiraidraike zay. Le sambe feno fagnahy masigne iareo iaby, le nirehake tamy ty firehake maro sambe hafa, amy ze nampirehafe i fagnahỳ aze.”

Lambosindrae: Haiko soa o tantara iohoe.

Vorisoa: Nao hey, ty ndaty raike vao azo fenoegne ndaty raike hafa?

Lambosindrae: Tsy mete aloha zay!

Vorisoa: Andao ndraike tikagne hagnente ty andine’e faha-17, amo o toko iohoe avao. Izao ty rehafe ty tapa’e voaloha’e: “‘Amy ty andro fara’e’, hoe ty Andrianagnahare, le ‘handatsahako ampaha’e amy ty fagnahiko ty karaza-nofotse iaby.’” Mete vao naho tihoe Andrianagnahare handatsake ampaha’e amy ty Andrianagnahare mitovy ama’e?

Lambosindrae: Tsy mete zay.

Vorisoa: Mahaliagne ka ty reha i Jaona Mpanao Badisa miomba o fagnahy masigneo toy. Amy Matio 3:11 ao ty misy aze. Mba vakio moa ajafady!

Lambosindrae: “Izaho manao badisa anareo amy ty rano noho ty fibebaha’areo. Faie i hoavy afarako aoy mahery noho iraho, le tsy fagneva hagnafake ty kapa’e raho. I reke ro hanao badisa anareo amy ty fagnahy masigne naho amy ty afo.”

Vorisoa: Misaotse. Hanoagne ino hoe reke i fagnahy masigney arake ty rehafe’e eo?

Lambosindrae: Hanoagne badisa.

Vorisoa: Maregne zay. Mareho fa nirehake miomba ty badisa amy ty afo ka ty Jaona. Mazava ho aze fa tsy ndaty o afò. Arake ty heve’o, le midika vao o andine’e iohoe fa ndaty o fagnahy masigneo?

Lambosindrae: Aha’a!

Vorisoa: Mazava areke arake izay fa tsy ndaty o fagnahy masigneo.

Lambosindrae: Maregne aloha zay!

Nagnino io ro atao tihoe “mpagnampe”?

Vorisoa: Nirehake rehe teoy tie “mpagnampe” o fagnahy masigneo. Izay vata’e ty rehafe i Jesosy amy Jaona 14:26 ao. Andao hovakientikagne: “I mpagnampey, le ty fagnahy masigne, i nirahe i Rae amy ty agnarakoy, io ro hampianatse anareo ze kila raha, sady haniahy anareo ze raha nirehafeko tama’areo.” Misy mampiasa o andine’eo mba hirehafagne fa ndaty o fagnahy masigneo satria afake magnampe naho mampianatse.

Lambosindrae: Ie, izay avao aloha ty niheverako aze.

Vorisoa: Faie va’e ho saren-drehake i nampiasae i Jesosy teoy, fa tsy tihoe ara-bakiteny. Mareho ohatse ty nirehafe’e amy Lioka 7:35 ato toy: “Faie ty fahendrea o ndatio avao ty hamaregne ty ana’e iaby.” Mirehake o andine’eo fa managne anake o fahendreagneo. Azo rambesegne ara-bakiteny vao zay?

Lambosindrae: Aha’a, mazava bey zay fa saren-drehake.

Vorisoa: Maregne zay. Ty tea i Jesosy ho rehafegneo, le tihoe vokatse ty atao o ndatio ro magnaporofo naho hendre reke ndra tsy hendre. Mateteke ty Baiboly ro mirehake miomba ty raha tsy managn’aigne ho sahala ndaty. Tika aza manao izay amy ty fiaignagne andavanandro. Mateteke ohatse tika mirehake tie: “Sokafo i lafinetey mba hidira i masoandroy.”

Lambosindrae: Ndra i raho ka aza mirehake izay.

Vorisoa: Midika vao zay fa hizilike an-tragno ao manahake o ambahinio i masoandroy?

Lambosindrae: Ah’a, tsy izay! Saren-drehake avao io.

Vorisoa: Va’e nampiasa saren-drehake ka vao ty Jesosy naho fa nirehake tie mpagnampe ndra mpampianatse o fagnahy masigneo?

Lambosindrae: Maregne zay naho i andinin-teny teo rey ro henteagne, satria alatsake amo o ndatio naho anoagne badisa o fagnahy masigneo. Faie naho tsy ndaty areke o fagnahy masigneo, le ino?

Ino Vata’e moa o Fagnahy Masigneo?

Vorisoa: Mamale izay ty Asan’ny Apostoly 1:8. Mba azo’o vakiegne vao?

Lambosindrae: “Hahazo hery ka nareo naho fa avy ama’areo i fagnahy masigney, le ho vavolombeloko a Jerosalema agne, naho a Jodia naho a Samaria, sady amy ty faritse fara’e lavitse amy ty tane toy iaby nareo.”

Vorisoa: Mareho fa nirehake ty Jesosy tie, hahazo hery ze mahazo i fagnahy masigney. Boake aia o hery iohoe, arake i andine’e nivakientikagne taloha teo rey?

Lambosindrae: Boake aman’Andrianagnahare Rae.

Vorisoa: Maregne zay. O Fagnahy masigneo avao ro hery nampiasaen’Andrianagnahare mba hamorognagne ze kila raha. Hoe ty Genesisy 1:2: “Nihelahela tambone rano ey ty hery ampiasaen’Andrianagnahare.” Ty rehake hebreo nadika tihoe ‘hery ampiasaegne’ etoagne, le midika tihoe “fagnahy.” Io i hery tsy trea maso ampiasaen’Andrianagnahare mba hagnatanterahagne ty raha safirie’e naho hampahafantaragne ty zoton’arofo’ey. Intoy misy andine’e fara’e teako hatoro azo: Lioka 11:13. Mba azo’o vakiegne ajafady?

Lambosindrae: “Inareo aza ndra tie raty fagnahy, mahafantatse hagnomey raha soa hoahy ty ana’areo, somandrake i Rae an-dagnitse agney! Hagnomey fagnahy masigne hoahy ze mangatake ama’e vata’e reke!”

Vorisoa: Trea eo fa i Rae ro managne fahefagne amy i fagnahy masigney, le magnomey aze ze mangatake ama’e. Mitovy amy i Rae vao o fagnahy masigneo, arake izay?

Lambosindrae: Aha’a, azoko ty tea’o ho rehafegne.

Vorisoa: Tsy hitagne azo ela etoagne raho, faie misy fagnonteneagne raike toy, hamintignantikagne i rehakey. Ino o fagnahy masigneo, arake i andinin-teny nitreantikagne rey?

Lambosindrae: Hery ampiasaen’Andrianagnahare.

Vorisoa: Maregne zay. Naho fa nirehake ty Jesosy amy Jaona 14:26 ao fa mpagnampe ndra mpampianatse i fagnahy masigney, le saren-drehake ty nampiasae’e satria tsy ndaty i fagnahy masigney.

Lambosindrae: Tsy mba nifantako zay tie taloha.

Vorisoa: Misy raha tena mampahery azontikagne ianaragne tamy i reha i Jesosỳ.

Lambosindrae: Ino zay?

Vorisoa: Afake mangatake fagnahy masigne aman’Andrianagnahare tikagne mba hagnampe antikagne naho fa misy olagne, ndra mba hahafantarantikagne ty miomba Aze.

Lambosindrae: Mahaliagne ahy zay, fa lignaso fa ho dineheko soa.

Vorisoa: Aloha ty handehanako, le misy hevetse mba teako ho saintsaigne’o toy. Hery ampiasaen’Andrianagnahare o fagnahy masigneo, le azo’e ampiasaegne mba hagnatanterahagne ze raha tea’e, sa tsy izay?

Lambosindrae: Izay vata’e.

Vorisoa: Faie nagnino ro mbe tsy mampiasa o hery tsy misy fetra’e iohoe mba hagnafoagnagne o fahantragneo, naho o haratiagne an-tane etoy io reke? Fa nieretseretse izay vao rehe?a

Lambosindrae: Fa nieretseretse izay raho.

Vorisoa: Tea’o vao naho miheregne atoy raho amy ty here ty androany, le mirehake ty miomba izay tikagne?

Lambosindrae: Eka tena teako zay. Amy heregnandro zay e!

[Fagnamarehagne ambane peje]