Boake Aman’Andrianagnahare Vao ty Firehafagne Amy ty Firehake Tsy Fantatse?
“HOE ty Mamonjy: “Maro ty ndaty am-piangona’ay ao hoe mahazo fagnahy masigne, le mirehake amy ty firehake tsy fantatse. Faie raty findesam-batagne ty ila’e amy iareo. Iraho mba nikezake ho soa findesam-batagne sady nivavake, faie tsy mahay mirehake amy ty firehake tsy fantatse. Tena tsy azoko!”
Hoe ilatsaha ty fagnahy masigne zay iaby ka ty mpiara-mivavake amy i Hary, le mirehake amy ty firehake tsy fantatse. Hoe reke: “Tena hejeko, naho fa mivavake raho, le misy korakorake tampoke amy ty rehake tsy fantatse. Ndra i ndatỳ aza tsy mahafantatse ty raha rehafe’e. Tsy misy mandrambe soa boake ama’e. Faie tsy toko’e hahasoa vao reke naho toe boake amy ty fagnahin’Andrianagnahare?”
Mahaliagne ty raha rehafe i Mamonjy naho i Hary. Boake aman’Andrianagnahare vata’e vao ty firehafagne amy ty firehake tsy fantatse amy izao? Andao hey hohenteantikagne ty raha niseho, naho fa nanjare nahay firehake sambe hafa o Kristiana tamy ty taonjato voaloha’eo.
“Nirehake amy ty Firehake Sambe Hafa”
Treantikagne amy Baiboly ao fa nisy lahilahy naho ampela nanjare nahay firehake tsy mba nianara’e. Tamy ty Pentekosta taogne 33 ty nisehoa izay voaloha’e, heregnandro tsiampeampe tafara ty nimateza i Jesosy Kristy. “Sambe feno fagnahy masigne” i mpianatse 120 teo ho eo ta Jerosalema taoy, “le nirehake tamy ty firehake maro sambe hafa.” Nisy ndaty boake an-tane hafa agne ty teo, le ‘nigagan-draha iareo satria sambe naharey i mpianatse rey nirehake tamy ty fireha iareo iaby.’—Asan’ny Apostoly 1:15; 2:1-6.
Mirehake ty Baiboly fa nisy mpianatse hafa ka nimeagne o fahaiagne mahalatsa iohoe. Nahazo hery ty fagnahy masigne ohatse ty apostoly Paoly, le nanjare nahay firehake maro. (Asan’ny Apostoly 19:6; 1 Korintianina 12:10, 28; 14:18) Faie nisy anto’e soa kanao ty Andrianagnahare nagnomey o fahaiagne mahalatsa iohoe. Ino ze anto’e zay?
Famantaragne Boake Aman’Andrianagnahare
Nisy Kristiana nanjare nahay firehake sambe hafa ty ta Korinto ao. Nanoratse hoahy iareo ty Paoly, le nirehake fa “famantaragne hoahy ze tsy mpino ty firehafagne amy ty firehake sambe hafa.” (1 Korintianina 14:22) O fahaiagne mahalatsa iohoe naho ty fahaiagne hafa areke, le porofo fa nankasitrahan’Andrianagnahare ty fiangonagne kristiana vaho naoregne. Hoe famantaragne manondro i raha rey mba hahatreava ze ndaty tena tea ty hamarenagne tie ia ty vahoan’Andrianagnahare.
Tsy rehafe ty Baiboly tie nanjare nahay firehake mbe tsy nianara’e i mpaminany taloha rey, agnisa izay ty Jesosy. I mpiana i Jesosy rey avao ty nimeagne ze fahaiagne mahalatsa zay sady anto’e soa ty nanoagne aze.
Natao mba Hitoriagne i Talily Soay
O Jiosio avao hey ty nirehafa i Jesosy mba hitoria i mpiana’e rey tamy ty voaloha’e. (Matio 10:6; 15:24) Tsy le nandeha ivela ty faritane o Jiosio areke iareo. Faie niova zay.
Tamy ty namelomagne i Jesosy tamy ty mate tamy ty taogne 33, le nirehafe’e i mpanonjohy ty lia’e rey mba “hampianatse ty ndaty amy ze kila firenena iaby.” Nirehake ka reke fa ho vavolombelogne “amy ty faritse fara’e lavitse amy ty tane toy iaby” iareo. (Matio 28:19; Asan’ny Apostoly 1:8) Mba hahavitagne izay, le nila nahay firehake hafa ankoatse ty firehake hebreo iareo.
Faie ‘ndaty tsy le nianatse sady tsotra’ ty ankamaroa i mpianatse rey. (Asan’ny Apostoly 4:13) Akore areke ty hitoriagne amy ty faritse lavitse agne, ie amy izao ty firehake agne aza tsy hai’e, ndra mbe lia’e naho nirey iareo? Nahazo fahaiagne mahalatsa boake amy ty fagnahy masigne ty ila’e tamo o Kristiana bey zotom-po rehoe, le afake nitory tamy ty firehake tsy nianara’e.
Anto’e roe lahibey areke ty nilagne ty firehafagne amy ty firehake sambe hafa. Voaloha’e, famantaragne io fa nankasitrahan’Andrianagnahare o Kristiana reo. Faharoe, tena nilaegne io mba hitoriagne tamy ty ndaty sambe hafa firehake. Mahafeno o fepetse roe rehoe vao ty fivavahagne mirehake amy ty rehake tsy fantatse amy izao?
Famantaragne Boake Aman’Andrianagnahare vao ty Firehake Tsy Fantatse amy Izao?
Aia ty toko’e hisiagne famantaragne manondro lalagne, naho teagne ho trea o ndaty maro reke? Agnate tragno vao? Mazava ho aze fa tsy izay. Rehafe ty Baiboly fa tamy i Pentekostay, le “ndaty maro” ro nandalo, le nahatrea i mpianatse rey nanjare nahay firehake sambe hafa. Ty voka izay, le “nitovogne ndaty toko’e ho telo arivo” i Kristiana rey. (Asan’ny Apostoly 2:5, 6, 41) Naho misy ndaty mirehake amy ty rehake tsy fantatse, ie amy izao am-piangonagne ao avao, ho famantaragne hoahy ty ndaty tsy mpino maro vao zay?
Rehafe ty Baiboly fa mifanohetse amy ty asa ty fagnahy masigne ty fijangajangagne naho ty “asa ty nofotse” hafa, sady “tsy handova ty Fanjakàn’Andrianagnahare ze mpanao ireo.” (Galatianina 5:17-21) Akore areke naho misy ndaty raty findesam-batagne faie mirehake amy ty firehake tsy fantatse? Va’e hieretseretse rehe tie: ‘Andrianagnahare vao le hagnomey ty fagnahy masi’e hoahy ty ndaty misatry raha manao ty raha andrarà ty Saontsi’e? Tsy hoe mamitake vao zay?’ Hoe famantaragne manondro lalagne diso zay.
Natao mba Hitoriagne vao ty Firehafagne ty Firehake Tsy Fantatse amy Izao?
Nitreantikagne teo fa ty anto’e faharoe nirehafa ty Kristiana taloha tamy ty firehake sambe hafa, le mba hitoriagne. Akore i mpivavake mirehake amy ty firehake tsy fantatse amy izaò? Mampiasa izay mba hitoriagne amy ty ndaty sambe hafa firehake vao iareo? Tadidio fa boake amy ty tane maro i ndaty niavy ta Jerosalema tao tamy Pentekosta taogne 33 rey, sady azo iareo soa ty firehake sambe hafa nampiasae i mpianatse nilatsaha ty fagnahy masigne rey. Faie tsy hoe izay ty amy izao. Tsy misy heve’e sady tsy misy mahazo ty raha rehafe o mirehake amy ty firehake tsy fantatseo.
Tena tsy mitovy amy ty firehake sambe hafa nampiasae i mpiana i Jesosy nahazo fagnahy masigne rey, ty firehake tsy fantatse amy izao. Naho ty maregne, le tsy nirehafegne sasa tie nisy ndaty nahazo ze fahaiagne miambake zay naho fa nimate i apostoly rey. Tsy mahagaga o mpamaky Baibolio zay. Toe fa nirehafe i apostoly Paoly fa “hajanogne” i fahaiagne mahalatsa rey, agnisa izay ty firehafagne amy ty firehake tsy fantatse. (1 Korintianina 13:8) Akore areke ty hamantaragne ze managne fagnahy masigne amy izao?
Ia ty Tena Managne o Fagnahy Masigneo?
Fanta i Jesosy fa hijanogne ty fahaiagne mirehake sambe hafa afara kede ty hioregna ty fiangonagne kristiana. Famantaragne hafa areke ty nirehafe’e taloha ty nimateza’e, le io avao ro ho mareke hamantaragne ty tena mpiana’e. Hoe reke: “Naho mifankatea nareo, le izay ty hahafantara ze kila ndaty fa mpianako nareo.” (Jaona 13:35) Rehafe i andine’e mirehake fa hijanogne i fahaiagne mahalatsay fa: “Tsy ho levogne nainai’e ty hatea.”—1 Korintianina 13:8.
Ty hatea ro voaloha’e amy ty “vokatse ty fagnahy” sive. (Galatianina 5:22, 23) Ze tena mifankatea areke ro managne fagnahy masigne sady ankasitrahan’Andrianagnahare. Ankoatse izay, le ty fiadanagne ty fahatelo amy ty vokatse ty fagnahy. Mikezake ho tea filongoagne areke ze managne fagnahy masigne, le tsy malaigne ndaty ndra magnavakavake ndra tea aly.
Tadidio ka i faminania i Jesosy amy ty Asan’ny Apostoly 1:8 aoy. Nirehake reke fa hahazo hery i mpiana’e rey, le ho vavolombelo’e “amy ty faritse fara’e lavitse amy ty tane toy.” Nirehake ka reke fa hitohy “amparake ty fiafarà ty tontolo toy” ty asa fitoriagne. (Matio 28:20) O asa atao magneran-tane iohoe areke ty agnisa ty famantaragne ze mahazo ty fagnahy masigne.
Akore ty heve’o? Ia ty trea’o fa managne ty fagnahy masigne amy izao? Ia ty maneho ty vokatse ty fagnahy magneran-tane, lohotsie fa ty hatea naho ty fiadanagne, le tsy mete mandeha mialy ndra tie enjehe ty fitondram-panjakagne aza? (Isaia 2:4) Ia ty mikezake mifaly ty asa ty nofotse, ohatse fijangajangagne, le roahe’e tsy ho agnisa ty fiangona’e ze tsy mete mibebake? (1 Korintianina 5:11-13) Ia ty mitory magneran-tane fa ty Fanjakàn’Andrianagnahare avao ro fanantenagne hoahy o ndatio?—Matio 24:14.
Tsy misalasala ty mpamokatse ty gazete toy mirehake fa managne fagnahy masigne ty Vavolombelo i Jehovah, satria magnorike o raha rehafe ty Baiboly rehoe. Mikezaha areke hahafantatse ty miomba iareo. Amy izay le ho trea’o naho vahoake ankasitrahan’Andrianagnahare vata’e iareo!