Inogne ty Azo’o Atao mba Hahafinaritse Azo ty Mamaky Baiboly?

Mahakamo azo sa mahafinaritse azo ty mamaky Baiboly? Miankigne amy ty fomba famakia’o aze avao zay. Akore areke ty hahavy ty famakia’o Baiboly hahafinaritse? Misy soso-kevetse tsiampeampe retoa:

Mifiliana fandikan-drehake maregne soa sady tsy ila’e fa haehae rey. Tsy ho azo’o ze raha vakie’o agnate Baiboly ao sady tsy le hahafinaritse azo ka ty mamaky aze naho maro rehake sarotse sady fa haehae ty agnate’e ao. Fandikan-drehake mora azo naho manohigne fo vaho maregne soa areke ro jobogno.a

Mampiasà fitaovagne elektronike. Fa misy amy ty endreke elektronike zao ty Baiboly. Azo vakiegne amy Internet ao zao ty Baiboly ila’e, ndra azo’o afindra amy ty ordinatera, tablety ndra telefony. Afake agnenteagne malaky ty andinin-teny mifandrambe amy ze andinin-teny vakie’o, ndra ahafaha’o mampitaha fandikan-drehake maromaro ty ila’e amy i Baiboly ao rey. Afake mitsanogne Baiboly nalaem-peo ka rehe naho tea’o zay. Maro zao ty ndaty mitsanogne io naho fa mandeha tobile, manao ty tolon-draha iareo, ndra manao raha hafa. Akore ka naho mba magnandragne manao ty raike amy ireo?

Mampiasà fitaovagne fikarohagne. Naho ihe mampiasa fitaovagne fikarohagne naho fa mamaky Baiboly, le handrambe soa maro. Misy sare-tane mampiseho ty toeragne voarehake amy Baiboly ao ohatse ty agnate irey ao, le afake magnampe azo hangalake sare an-tsaigne ty raha miseho amy i raha vakie’oy. Afake magnampe azo hahatakatse soa ty raha rehafe o Baibolio ka ty lahatsoratse ila’e manahake ty amy ty gazete toy naho amy ty fizaràgne tihoe “Fampianaran’ny Baiboly” amy tragnom-poraro’ay amy jw.org/mg ao.

Ovaovao ty fomba amakia’o aze. Va’e tsy le tea’o loatse varagne naho atomboke boake am-boaloha’e ty famakiagne Baiboly. Ze boke mahaliagne azo areke ro vakio. Azo’o atao zao ty mijobogne ze boke misy ty tantara o ndaty malaza rehafegne amy Baiboly ao rey naho tea’o ho fantatse ty miomba aze. Agnisa izay zao o ndaty rehafegne amy i efajoro tihoey: “Dineho Soa ty Raha Rehafe o Baibolio, le Fantaro ty Miomba ty Ndaty Voarehake Ao.” Azo’o alahatse arake ty foto-kevetse ka ty famakiagne aze, ndra vakiegne mifagnarake amy ty fotoagne nisehoa i tantaray. Mba andramo hey moa ty raike amy ireo!