Loharanon-kevetse amy ty Fanompoagne Naho Ty Fiaignantika Kristiana
© 2025 Watch Tower Bible and Tract Society of Pennsylvania
7-13 JOLAY
HARENA AMY TY SAONTSIN’ANDRIANAGNAHARE OHABOLANA 21
Toro Lalagne Feno Fahendreagne Mahasambatse ty Fanambaliagne
Ino ty Hagnampe Azo Handrambe Fanapahan-kevetse Soa?
Tsy soa ty fanapahan-kevetse rambesegne memeke. Mampitao hoe izao ty Ohabolana 21:5: “Mandamigne mialoha ze hatao’e ty ndaty mazoto, le izay ty mahavy ty raha atao’e ho tomombagne, fa ze ndaty memeke hahantra.” Tsy toko’e ho memeke hanambaly ohatse ty tanora raike ndra tie poteke amy ty ndaty raike aza. Naho tsy izay, le va’e ho tanterake ama’e ty reha ty Anglisy raike mpanoratse tantara an-tsehatse, tamy ty fiatomboha ty taonjato faha-18 atao tihoe William Congreve toy. Hoe reke: “Le vata’e hanegnegne tomboke aman-tagnagne ze memeke hanambaly.”
g 7/08 7 § 2
Ino ty Hagnampe Azo Hanagne Tokatragno Sambatse?
Mikezaha hiambane. “Ko tea aly ndra mirohake fa mikezaha hiambane, le hevero ho ambone noho inareo ty hafa.” (Filipianina 2:3) Mifagnomey tsiny o mpivalio naho fa misy olagne fa tsy i olagney ro alami’e. Izay mateteke ty mahavy iareo mialy. Faie naho miambane rehe, le handefetse fa tsy lava hizizo avao tie ihe ty managne ty tò.
w06 15/9 28 § 13
“Mifalea amy ty Valy ty Fahatanora’o”
13 Akore naho ty fomba fifampidesa’areo ro miterake olagne? Mitake kezake ty famahagne izay. Andao hatao tihoe nifanao rehake mandratse nareo kindraike faie nanjare mateteke zay tie amy izao. (Ohabolana 12:18) Manimba ty fifandrambesa o mpivalio zay, arake ty nitreantika tamy i lahatsoratse talohay. Hoe ty ohadrehake raike amy Baiboly ao: “Ndraleo mipetrake am-patrambey agne ta tie hiharo tragno amy ty ampela tea aly sady masiatsiake.” (Ohabolana 21:19) Naho ampela manam-baly rehe sady hoe izay ty an-tokatragno’o ao, le magnontenea tegna tie: ‘Sarotse amy i valiko vao ty miarake amako noho ty toetseko?’ Hoe ty Baiboly amy ty lahilahy manam-baly: “Teavo avao ty vali’areo sady ko asiahagne loatse reke.” (Kolosianina 3:19) Naho lahilahy manam-baly areke rehe, le magnontenea tegna tie: ‘tsy miraharaha ty fihetseham-po i valiko vao raho hafara’e alaem-pagnahy hipay fampionognagne amy ty ndaty hafa agne reke?’ Mazava hoaze fa tsy afa-tsiny ze magnitsakitsa-baly. Soa areke naho rehafegne ze raha manahiragne fa tsy misy aetaketake.
Vatosoa Ara-pagnahy
w05 15/1 17 § 9
Tanterake i Fahitagne Miomba i Fanjakàn’Andrianagnahareỳ
9 Tsy ndaty tsotra mitingitse birike sasa ty Jesosy tie amy izao fa Mpanjaka mahery. Hoe mitingitse sovala ty fanehoagne aze. Irehafagne aly o sovalao tie amy Baiboly ao. (Ohabolana 21:31) Hoe ty Apokalypsy 6:2: “Nahatrea sovala foty raho. Nanagne folesidoro i nitingitse azey sady nimeagne satro-boninahitse. Niakatse reke mba handrese naho hamita ty fandresea’e.” Hoe ka ty Davida miomba i Jesosy: “Hagnitatse ty fahefà’o boake a Ziona ao ty Jehovah, le hoe reke: ‘Anjakao tanterake ty fahavalo’o.’”—Salamo 110:2.
14-20 JOLAY
HARENA AMY TY SAONTSIN’ANDRIANAGNAHARE OHABOLANA 22
Toro Lalagne Feno Fahendreagne Magnampe amy ty Fitezagne Anake
Ampeo ty Ana’areo mba Hahay Hanao Safidy Soa Naho fa Bey?
7 Saintsaigno zao naho manambaly rehe sady mieretseretse ty hiterake nareo: ‘Ndaty miambane naho tea raha ara-pagnahy vao zahay? Va’e ho agnisa ty ndaty jobogne i Jehovah ho rae aman-drene hahay hiteza ajaja vao zahay?’ (Sal. 127:3, 4) Saintsaigno ka zao naho managn’anake rehe: ‘Ampeako vao o anakò hahatsapa tie tena ilaegne ty miasa mafe?’ (Mpito. 3:12, 13) ‘Manao ze fara heriko vao raho mba hiarovagne ty anako amy ze raha va’e hanimba aze amy ty tontolo i Satana toy?’ (Ohab. 22:3) Maregne fa tsy afake hiaro aze amy ze kila raha sarotse va’e hanjò aze nareo. Tsy ho vita’areo ty hanao izay. Faie afake magnampe ty ana’areo tsikedetsikede nareo mba ho vognogne hiatreke ty raha va’e hiseho amy ty fiaigna’e sady ampianaro hiantehetse amy ty Saontsin’Andrianagnahare reke. (Vakio ty Ohabolana 2:1-6.) Naho misy longo’areo ohatse misintake amy i Jehovah, le ampeo amy ty alala ty Baiboly iareo mba hahatakatse tie tena ilaegne ty tsy mivalike amy i Jehovah. (Sal. 31:23) Ndra naho misy longo’areo mate, le atoro iareo ze andinin-teny afake magnampe aze hahavita hiatreke ty alahelo’e.—2 Kor. 1:3, 4; 2 Tim. 3:16.
w19.12 26 § 17-19
Ampianaro ho Tea i Jehovah ty Ana’o
17 Atomboho aloha arake ze azo atao ty fampiofagnagne aze. Misy voka’e soa ty fanoagne izay. (Ohab. 22:6) “Mbe niajaja” ohatse ty Timoty, le fa nampianare i Eonika rene’e vaho i Loisa bebei’e. (2 Tim. 1:5; 3:15) Voka’e, nanjare niarake tamy i Paoly reke naho fa nibey.
18 Enegne ty ana i Jean-Claude naho i Peace. Mitoboke a Côte d’Ivoire agne iareo. Nahavita nagnampe i ana iareo rey ho tea naho hanompo i Jehovah iareo. Ino ty nagnampe iareo hahavita izay? Nikezake nanahake i Eonika naho i Loisa iareo. Hoe iareo mirovaly: “Mbe nikede i ana’ay rey, le fa nalente’ay tsikedetsikede tan-tsay iareo ao ty Saontsin’Andrianagnahare. Vaho naterake iareo tamy izay.”—Deot. 6:6, 7.
19 Ino ty dika tihoe ‘mandeteke tsikedetsikede’ ty Saontsin’Agnahare an-tsay ty ana’o ao? Midika tihoe “mampianatse naho magnerenkeregne mateteke” zay. Mila miarake mateteke amy ty ana’e ty rae aman-drene mba hahafaha’e hahavita izay. Kindraike, le va’e hahasoregne ty magnerenkeregne amo o ajajao ty raha toko’e hatao’e. Faie toko’e ho tadidie o rae aman-dreneo fa magnampe ty ana’e mba hahazo naho hampihatse ty raha rehafe ty Saontsin’Agnahare ty fanoa iareo izay.
w06 1/4 9 § 4
Fitsikombe Soa Hoahy ty Ana’o vao Rehe?
Mazava hoaze fa le ajaja avao ty ajaja. Mitangingigne ty ila’e ndra marengerenge. (Genesisy 8:21) Ino areke ty azo o rae aman-dreneo atao? Hoe ty Baiboly: “Am-pò o ajajao ao ty negne, fa ty fikiso fandilovagne ty hahavy aze hihalavitse izay.” (Ohabolana 22:15) Misy mihevetse fa tsy toko’e hampiasaegne sasa o fomba fitezagne iohoe satria mafe loatse sady fa lany andro. Maregne fa mandrara antika tsy hanao rehake maharare ndra haràn-tagnagne ty Baiboly. Faie misy heve’e hafa ka ty rehake tihoe “fikiso” ndra tie azo rambesegne ara-bakiteny aza. Ty fahefà o rae aman-dreneo ty teagne horehafegne etoagne. Faie toko’e hampihare iareo amy ty fomba hentetse naho aman-katea ty fahefà iareo sady ty hahasoa i ajajay nainai’e ty tanjogne.—Hebreo 12:7-11.
Vatosoa Ara-pagnahy
Mifalea amy ze Tombotsoa Anagna’o
11 Hoe izay ka fa hitombo ty hafaleantika naho miasa mafe arake ze vitantikagne tika mba hanoagne ze andraikitse mey i Jehovah antika. Mikezaha ‘hifantoke soa’ amy ty asa fitoriagne naho hiara-hiasa amo o fiangonagneo. (Asa. 18:5; Heb. 10:24, 25) Omano soa ka ty fivoriagne iaby, amy izay rehe afake magnomey toin-drehake mampahery. Hevero ho lahibey ze anjara meigne azo amy i fivoriagne andavanandroy. Anò ara-potoagne ka ze asa ampanoegne azo amo o fiangonagneo eo, le mikezaha mba ho azo atokisagne. Ko mieretseretse tie tsy le tena raha lahibey i raha ampanoegne azoy, le tsy voatere mandany fotoagne hanoagne aze rehe. Mikezaha mafe mba hampitombo ty fahaia’o i asay. (Ohab. 22:29) Naho miasa mafe hoahy i Jehovah rehe, le hihasoa ty fifandrambesa’o ama’e, sady tena ho fale rehe. (Gal. 6:4) Naho ndaty hafa ka ro mahazo i andraikitse nirie’oy, le tsy ho boseke rehe fa hiarake hifale ama’e.—Rom. 12:15; Gal. 5:26.
21-27 JOLAY
HARENA AMY TY SAONTSIN’ANDRIANAGNAHARE OHABOLANA 23
Toro Lalagne Feno Fahendreagne Miomba ty Finoman-toake
w04 1/12 19 § 5-6
Mahaia Manahatsahatse Naho fa Minon-toake
5 Akore naho minon-toake ty ndaty raike faie mitao soa mba tsy ho trea tie mamo? Tsy trea tie mamo ty ndaty ila’e ndra tie fa maro aza ty toake ninome’e. Faie mamita-tegna tika naho mieretseretse tie tsy mampagnino zay. (Jeremia 17:9) Va’e hanomboke hiankin-doha amy ty toake hey ty ndaty raike amy ty voaloha’e faie hanjare handevoze ty “divay” amy ty fara’e. (Titosy 2:3) Izao ty nirehafe ty mpanoratse raike atao tihoe Caroline Knapp miomba izay: “Tsy le avy le manjare mamolava ty ndaty raike fa mandeha tsikedetsikede zay.” Tena fandrike mahafate vata’e ty finoman-toake losotse loatse!
6 Dineho ka i fampitaoa i Jesosy tihoekey tie: “Mitaoa nareo mba tsy hihinagne maro loatse naho hinon-toake losotse vaho hinekoneko miomba ty raha paliae’areo. Tsy mone tsy hampoize’areo ty hiavia ze andro zay, manahake o biby voafandrikeo. Ty anto’e, tsy hisy afake hilay o andro iohoe ze kila ndaty ambone tane etoy.” (Lioka 21:34, 35) Va’e hanjare hiroro naho ho kamo amy ty lafi’e ara-pagnahy ty ndaty raike naho magnaram-po amy ty finoman-toake ndra tie mbe tsy mamo aza. Akore naho amo o fotoagne iohoe ty iavia i andro i Jehovah-y?
it “Fahamamoana” § 3
Hamamoagne
Rarà ty Baiboly. Melohe ty Baiboly ty hamamoagne. Magnazava ty voka ty finoman-toake losotse loatse ty mpanoratse ty Ohabolana. Tena maregne vata’e sady azo porofoegne ara-tsiansa ty fagnazavagne omei’e. Hoe reke: “Ia ty managne olagne? Ia ty tsy mahazo aigne? Ia ty tea mialy? Ia ty bey taraigne? Ia ty maradratse tsy amy ty anto’e? Ia ty mena maso? Tsy ia fa ze tsy mete miala am-poto o divaio eo naho ze militse mba hipay divay misy fangaro’e. Ko magnente ty hamena o divaio naho ty familepile’e agnate kope ao [tena mampitelegn’ive, mamilepiletse] vaho ty maha mora inomegne aze [malama avao ty figoagoa’e an-tenda agne]. Fa hanifatse manahake o menaragneo reke amy ty fara’e sady hagnakatse poizigne manahake o meregneo [mamparare (manimba ty sela ty ate) naho manimba saigne (mampirehadrehake fahatane naho mampifanintogne), sady tena mahafate]. Hahatrea raha hafahafa ty maso’o [misy voka’e amy ty betro o toakeo, hafarà’e tsy afake miasa ty faritse mifehe ty fihetseke. Manjare tsy mahafehe-tegna i ndatỳ, mahita raha tsy misy, naho tsy mahatadidy raha. Mamorogne tantara mahalatsa reke mba hanakonagne izay sady le hoe raha maregne zay ty fitantarà’e aze. Manjare vani’e iaby ty raha tsy vani’e]. Hisy eretsere-draty hitiry ka ty am-po’o ao [tsy mifehe-tegna sasa reke fa le fa akare’e iaby ze raha an-tsai’e ao naho am-po’e ao].”—Oh 23:29-33; Ho 4:11; Mt 15:18, 19.
Hazavae ty mpanoratse ty Ohabolana ty raha tsapa o ndaty mamò: “Hanahake ty ndaty miroro ampagnivoa i riakey ey rehe [hoe raha indese i ranoy milenteke, le hafarà’e tsy mahatsiaro tegna], sady hanahake ty ndaty miroro an-dengo ty fagnenjagnan-day o sambòd ey [ey ty tena ahareizagne ty fiezegneze o sambò. Midika zay tie tena atahoragne ty fiay i ndaty mamoy satria va’e ho azon-doza reke, ho tapake lalan-dra, hialy ama o ndaty naho ty maro hafa.] Le hirehake rehe tie: ‘Jinera’e raho faie tsy naharey narare. Nifofohe’e raho, faie tsy nitsiaroko [mirehake raike reke ty mirehake io. Tsy rei’e ty raha tena nahazo aze naho ty jera aze.] Ombia areke raho ro hifoha mba hipaliavako divay indraike? [Tsy maintsy miroro reke mba hampisava i hamamo’ey faie fa andevoze i toakey reke, le handeha hipay indraike.]’” Hahantra reke sady ho lany vola, tsy ho azo atokisagne sasa vaho tsy hahavita hiasa.—Oh 23:20, 21, 34, 35.
Vatosoa Ara-pagnahy
w04 1/11 31 § 2
Fagnonteneagne Boake amo o Mpamakio
Va’e ho famantaragne ty hatea hanegne ohatse ty havondrahagne. Faie tsy voatere ho lava izay avao ty mahavy ty ndaty raike ho vondrabey. Va’e ho aretegne ty mahavy o ndatio ho vondrabey. Manaranake ka io kindraike. Toko’e hotadidientikagne ka fa toe-batagne ty havondrahagne, fa ty hatea hanegne toe-tsaigne. Rehafe o diksionerao fa ty ndaty vondrabey, le ‘ndaty be jabora, be menaka, naho boda’e.’ Ty ndaty tea hanegne ka le “ndaty lava magniry ty hihinagne naho hinogne avao ndra ndaty mihinagne naho minogne tafahoatse loatse.” Tsy ty habey ty ndaty raike areke ty hitsaragne tie tea hanegne reke ndra tsy tea hanegne fa ty toe-tsai’e naho fa mahatrea o hanegneo. Va’e ho antognontogno’e ndra mahia ty ndaty raike faie tea hanegne. Sambe hafa ka ty lanja ndra ty habey heveregne ho antogno’e amy ty tane tsikiraidraike.
28 JOLAY–3 AOGOSITRA
HARENA AMY TY SAONTSIN’ANDRIANAGNAHARE OHABOLANA 24
Mivognona Hiatreke Raha Sarotse
it “Fanenjehana” § 16
Fagnenjehagne
Sarobily amy ty Kristiana ka ty loka hoazo ze miaretse. Hoe ty Jesosy: “Sambatse ze enjehegne noho ty hamaregnagne satria hoahy iareo i Fanjakà i lagnitseỳ.” (Mt 5:10) Mahazo hery ze enjehegne satria fanta’e tie mbe hovelomegne ty mate sady hai’e ka tie ia ty nampitamà izay. Izay ty magnampe iareo tsy hivalike aman’Andrianagnahare ndra tie magnorohoro ty hamono iareo aza o mpagnenjekeo. Tsy matahotse ty homate iareo satria hay iareo tie ninday soa hoahy iareo ty fahafateza i Jesosy. (He 2:14, 15) Miankigne amy ty toe-tsay ty Kristiana raike ty hahavita’e tsy hivalike naho fa misy fanoheragne mafe. “Mikezaha mba hanagne ty toe-tsaigne nanagna i Kristy Jesosy Tompo toy: ... nankatò sady nagneke ty ho mate, zane hoe ho mate amy i hazo fijaleagney ey” reke. (Fi 2:5-8) “Niaretse i hazo fijaleagney reke noho i hafaleagne natao aloha’eoy, le tsy nampagninogne aze ty ho salatse.”—He 12:2; henteo ka ty 2Ko 12:10; 2Te 1:4; 1Pe 2:21-23.
w09 15/12 18 § 12-13
Mifalea Avao Ndra tie Misy Olagne Aza
12 Hoe ty Ohabolana 24:10: “Naho kivy rehe naho fa miatreke raha sarotse, le ho kidikidy ty heri’o?” Hoe ka ty ohabolana raike hafa: “Kivy o ndatio naho fa malahelo ty fo’e.” (Ohab. 15:13) Kivy loatse ty Kristiana ila’e, le hafarà’e tsy mamaky Baiboly naho tsy misaintsaigne sasa. Manjare fahazaragne avao ty mivavake tie ama’e sady va’e hitokatokagne reke fa tsy te hiarake amy ty Kristiana nama’e. Loza vata’e ty voka ty hakiviagne naho maharetse.—Ohab. 18:1, 14.
13 Toko’e hampifantohentika amy ze raha mahafinaritse naho mahafale amy ty fiaignagne ty saintika. Hoe ty Davida: “O Andrianagnahare, ty manao ty zoton’arofo’o ty mahafinaritse ahy.” (Sal. 40:8) Tsy toko’e ho ty fanompoantika i Jehovah areke ro hajanontika naho fa misy olagne mahazo antikagne. Tena magnafake alahelo ty fanoagne raha mahafale. Misaontsy amantika ty Jehovah tie mahafinaritse naho mahasambatse ty mamaky vaho mandineke ty Saontsi’e tsy tapake. (Sal. 1:1, 2; Jak. 1:25) Amy Baiboly ao naho am-pivoriagne agne ty misy “rehake mahafinaritse,” mampahery sady mahafale ty fontika.—Ohab. 12:25; 16:24.
Fagnonteneagne Boake amo o Mpamakio
Hoe ty Ohabolana 24:16: “Va’e ho tonta impito ty ndaty maren-tane, faie le mbe hahafoha avao.” Te hirehake vao o andine’e iohoe tie ndra tie manota amy i Jehovah mateteke aza ty ndaty raike, le havela’e avao ty helo’e?
Naho ty maregne, le tsy izay ty tea o andine’e iohoe horehafegne. Fa inogne? Mirehake ndaty raike miatreke olagne ndra raha sarotse isan-karaza’e io faie vita’e ty miaretse izay.
Trea amy ireo fa tsy mirehake miomba ty ndaty raike manao fahotagne ty Ohabolana 24:16, fa mirehake ndaty raike miatreke raha sarotse ndra olagne isan-karaza’e. Va’e hiherenkeregne aza i olagne mahazo aze rey. Va’e harare ndra hiatreke olagne hafa ohatse ty ndaty maren-tane amy ty tontolo raty toy eto amy hinane izao. Ndra va’e henjehe ty fanjakagne reke noho ty raha inoa’e. Faie matoky reke fa hanohagne naho hagnampe aze hahavita hiaretse ze raha rezay ty Andrianagnahare. Saintsaigno areke zao: ‘Impire zay raho ro nahatrea tie lava ampean’Andrianagnahare avao o vahoa’eo naho fa miatreke raha sarotse?’ Matoky areke tika fa “manohagne ze tonta ty Jehovah”, sady mampionogne naho mampahery ze kivy.—Sal. 41:1-3; 145:14-19.
Vatosoa Ara-pagnahy
w09 15/10 12
Fagnonteneagne Boake amo o Mpamakio
Tamy ty andro ty Baiboly, le nila nagnontane tegna ty lahilahy te hagnoren-tokatragno tie: ‘Fa vognogne hamelom-baly aman’anake vao raho?’ Tsy toko’e hagnoren-tokatragno hey reke naho tsy niasa. Zane hoe nikarakara ty tete’e naho ty vole’e. Hoe izao areke ty nandikà ty Baiboly Dikan-drehake Anglisy amy izao ty Ohabolana 24:27: “Mbe ko mamboatse tragno naho magnoren-tokatragno hey naho tsy tihoe fa voasa ty tete’o sady fa azo’o antoke tie fa mahavelon-tegna rehe.” Mbe mihatse vao io tie amy izao?
Ie. Mila vognogne soa ze lahilahy te hanambaly satria tena andraikitse lahibey ty fanambaliagne. Mila miasa reke naho tsy tihoe mana-kandra mikalagne aze tsy hahavita izay ndra marare mafe. Tsy izay avao fa mila vognogne haneho hatea amy ty keleia’e naho hampianatse iareo miomba an’Andrianagnahare ka reke. Ty anto’e, mirehake ty Baiboly tie raty noho ty tsy mpino ze tsy manao ireo! (1 Tim. 5:8) Mila magnontane tegna areke ze lahilahy te hagnoren-tokatragno tie: ‘fa mahavelom-baly aman’anake vao raho? Ho vitako vao ty handrisike iareo hanompo an’Andrianagnahare? Ho vitako vao ty hampianatse Baiboly iareo tsy tapake?’ Asongady ty Baiboly fa tsy maintsy atao reo.—Deot. 6:6-8; Efes. 6:4.
Toko’e hisaintsaigne soa ty Ohabolana 24:27 areke ty lahilahy te hanam-baly. Mila mandine-tegna ka ty ampela tie vognogne hanao ty andraiky ty ampela manam-baly naho ty rene vao reke. Mila mieretseretse soa ka ze te hanagn’anake. (Lioka 14:28) Handrambe soa ze mpanompon’Agnahare manao izay satria tsy hanegnegne sady hanagne tokatragno sambatse.
4-10 AOGOSITRA
HARENA AMY TY SAONTSIN’ANDRIANAGNAHARE OHABOLANA 25
Toro Lalagne Hagnampe Antika Hampiasa Soa ty Fahaiantika Mirehake
w15 15/12 19 § 6-7
Mitaoa Soa amy ty Raha Horehafe’o
6 Toko’e hifily soa ty fotoagne hirehafantikagne tika satria hoe ty Ohabolana 25:11: “Hoe poma volamena apetrake amy ty raha volafotsy nisokiregne ty rehake atao amy ty fotoagne mete.” Fa soa i poma volamenay faie vao mainke soa reke naho apetrake amy ty raha volafotsy nisokiregne. Hoe izay avao ka fa vao mainke hahafinaritse naho hisy voka’e soa ty rehantika naho mahay mifily ty fotoagne hirehafagne aze tikagne. Akore ty anoagne izay?
7 Va’e ho tena ilae i ndaty irehafantikagney ty raha horehafentika, faie tsy hisy voka’e soa ama’e zay naho tsy mahay mifily fotoagne mete soa hirehafagne tika. (Vakio ty Ohabolana 15:23.) Nisy horohoron-tane naho tsunami ohatse tamy ty faritse atignana i Japon agne, tamy Marsa 2011, le tanàgne maro ty nirava. Ndaty 15000 ty nimate. Nijale ka ty Vavolombelo i Jehovah tagne faie nikezake nampionogne ze nizoem-boigne tamy ty alala ty Baiboly avao iareo. Bodista ty ankamaroa o ndaty reo, le tsy le mahafantatse ndra tena tsy mahafantatse ty raha ampianare ty Baiboly. Faie vaho tsiela loatse i lozay, le nitrea o mpitorio tie mbe tsy toko’e hirehake miomba ty fitsanganagne amy ty mate iareo. Ndraleo iareo areke nampionogne o ndatio sady nagnazava tamy iareo ty anto’e mahavy o ndaty soa fagnahio ho zoem-boigne boake amy Baiboly ao.
w15 15/12 21 § 15-16
Mitaoa Soa amy ty Raha Horehafe’o
15 Tsy ty raha rehafentika avao ro mila itaoantika fa ty fomba hirehafantikagne aze ka. Naho fa nanao lahajaka tamy i sinagoga i Nazareta aoy ty Jesosy, le “nigaga noho ty rehake fanjaka nirehafe’e” o ndatio. (Lioka 4:22) Manohigne ty fo ty rehake mahafinaritse sady tsy mampihegne ty lanja ty raha rehafentika fa vao mainke aza mahavy aze handrese lahatse o ndatio. (Ohab. 25:15) Afake manahake i Jesosy tika, le mikezake ty ho soa fagnahy naho hagnaja ty hafa sady tsy handratse ty fo’e. Nisy vahoake nikezake ty hihaogne tamy i Jesosy mba hitsanogne aze. Niferegnesa’e iareo naho fa nitrea’e, le “nanomboke nampianatse iareo raha maro reke.” (Mar. 6:34). Tsy mba nasiake ka reke ndra tie nisy nanivetive aza.—1 Pet. 2:23.
16 Kindraike, le tsy soa fagnahy tika ndra tsy mifily raha horehafegne naho fa mirehake amy ty ndaty mifankazatse amantika. Va’e mivantambatagne loatse tika naho fa mifampirehake amy ty keleiantika ndra amy ty namantika maifitse agnivo ty fiangonagne eo. Tsy mba nasiake tamy i mpiana’e rey ty Jesosy ndra tie nifandrambe maifitse tamy iareo aza. Nialy hevetse mateteke ohatse i mpiana’e maifitse aze rey tie ia ty ambonembone amy iareo. Nisoa fagnahy tamy iareo ty Jesosy, le o ajajao ro natao’e ohatse mba hagnitsiagne iareo. (Mar. 9:33-37) Afake manahake aze ka o androanavio, le mikezake ty ho ‘soa fagnahy’ naho fa magnomey torohevetse.”—Gal. 6:1.
w95 1/4 17 § 8
Amy ty Fomba Akore ty Hifandrisihantika Haneho Hatea Naho Hanao Asa Soa?
8 Va’e hifandrisike amy ty alala ty modely omeintika tikagne iaby amy ty fanompoagne i Andrianagnaharentikagney. Azo antoke fa nandrisike o mpitsanogne azeo ty Jesosy. Nitea’e ty asa fanompoagne Kristiana sady nimea’e hasi’e. Hoe hanegne io hoe reke tie ama’e. (Jaona 4:34; Romanina 11:13) Va’e hifindra ty fahazotoagne hoe izay. Azo’o atoro hoe izay ka vao ty fifaleagne tsapa’o amy ty fanompoagne? Zarao amy ty hafa agnivo ty fiangonagne eo ty raha soa nitrea’o faie ko mirohake naho fa manao izay. Naho manasa ndaty hiarake hihinagne ama’o rehe, le henteo tie kera azo’o ampeagne iareo mba hahatrea fifaleagne naho fa mirehake miomba i Jehovah, i mpamorogne antikagney amy ty hafa.—Ohabolana 25:25.
Vatosoa Ara-pagnahy
it “Fahalemem-panahy” § 10
Hasoa Fagnahy
Maleme fagnahy ty ndaty raike naho manam-pinoagne sady misy ianteheragne. Tsy mora mikorontan-tsaigne reke sady lava misaigne soa avao. Faie tsy maleme fagnahy reke naho minekoneko, kivy, tsy manam-pinoagne, tsy manan-draha tamaegne naho mamoe fo. Izao ty rehafe ty ohabolana miomba ty ndaty tsy maleme fagnahy: “Manahake o tanàgne rava tsy misy manda sasao ty ndaty tsy mahafehe ty haboseha’e.” (Oh 25:28) Mora mandrambe naho mino heve-diso reke, le manaotao fahatane avao.
11-17 AOGOSITRA
HARENA AMY TY SAONTSIN’ANDRIANAGNAHARE OHABOLANA 26
Ihalaviro Ze “Ndaty Gege”
it “Orana” § 9
Oragne
Fizaràn-taogne. Fahavaratse naho asotry avao ty tena fitrea tamy i Tane Nampitamaegney agne. Fotoagne isia ty hain-tane naho oragne o fizaràn-taogne reo. (Ampitahao Sl 32:4; To 2:11, f.a.p.) Zara’e naho misy oragne ty antegnategna ty volagne Avrily hatrake amy ty antegnategna ty volagne Oktobra. Amo o fotoagne reo ty famoriam-bokatse. Mirehake ty Ohabolana 26:1 fa hafahafa naho misy oragne ty fotoagne famoriam-bokatse. (Ampitahao 1Sa 12:17-19.) Tsy tihoe lava avy avao i oragney amy ty fotoa ty oragne, fa mba misy fotoagne mibeake ka i masoandroy. Manintsigne ka ty andro amy io, le maharey manara o ndatio naho fa trà ty oragne. (Ezr 10:9, 13) Tena mahafale areke ty mahatrea toeragne mete soa azo ialofagne.—Is 4:6; 25:4; 32:2; Jb 24:8.
w88 1/1 19 § 12
Miterake Fiadanagne ty Fagnanaragne
12 Tsy maintsy andrambesagne fepetse hentetse manahake i amy Ohabolana 26:3 aoy ty ndaty ila’e naho fa anaregne. Izao ty rehafegne ao: “Natao hoahy ty sovala ty karavasy, ty lamboridy hoahy ty birike, le ty fikiso natao hoahy ty lambosy ty gege.” Nenga i Jehovah hihara ty loza voka ty natao’e o Israelita mpanompo’eo kindraike. Ty anto’e, “nigoreve tsy hagnorike ty saontsin’Andrianagnahare iareo sady tsy nahoa iareo ty toroheve i Fara’e Amboney. Nenga’e hiatreke fahoriagne areke iareo mba hahavy iareo hiambane agnate fo’e agne. Tafintohigne iareo sady tsy nisy nagnampe. Nipay vonje tamy i Jehovah areke iareo naho fa tagnate ty sarotse, le nivonje’e tamy ty haorea iareo.” (Salamo 107:11-13) Faie nisy ka ty gege, le nitangingigne fa tsy nimete nitsanogne ndra inogn’ino karaza fagnanaragne natao tama’e. Hoe ty Baiboly: “Ze fa nanaregne mateteke faie mbe mitangingigne avao, le ho torotoro tampoke sady tsy hositragne sasa.”—Ohabolana 29:1.
it “Malemy Tongotra” § 10
Maleme Tomboke
Ohadrehake. Hoe ty Solomona Mpanjaka hendre: “Manahake ty ndaty manapake ty tombo’e [le manjare maleme tomboke] naho mandratse ty vata’e ty ndaty magnankigne andraikitse amy ty gege.” Tena ho sahiragne ze ndaty magnankigne ty andraiki’e amy ty gege. Azo antoke fa tsy handeha soa i ndraikitsey, le hiterake fate antoke ho aze.—Oh 26:6.
Vatosoa Ara-pagnahy
it “Adala” § 6
Gege
Hoe ty Ohabolana 26:4: “Ko mamale ty minegne arake ty hagegea’e.” Ty dika izay le tihoe ko magnorike ty fatao o gegeo naho fa misy alihevetse. Miombom-kevetse amy ty gege ze manao izay, le manjare manahake aze avao ka. Faie mirehake ty Ohabolana 26:5 tie: “valeo arake ty hagegea’e” ty gege. Akore ka zao? Mila dinehegne soa ty heve’e, le abaribary ama’e ty maha diso aze. Atoro aze ka tie tsy arakarake ty nieretserete’e ty ho voka ty heve’e fa hafa tanterake. Va’e hahasoa ty fanoagne izay.
18-24 AOGOSITRA
HARENA AMY TY SAONTSIN’ANDRIANAGNAHARE OHABOLANA 27
Ino ty Soa Rambesentika Boake amy ty Tena Namagne?
Sarobily amy i Jehovah ty Mpanompo’e Miambane
12 Mankasitrake ze torohevetse meagne aze ty ndaty miambane. Intoy misy ohatse: Andao hatao tihoe am-pivoriagne agne rehe, le mirehake amy ty mpiara-manompo maromaro. Nitoka azo ty raike amy iareo naho fa niavy eo sady nirehake tie misy ravembalahazo ty nife’o. Tsy maintsy ho megnatse aloha rehe! Faie soa avao fa nirehafe’e rehe. Tsy hisaotse aze vao rehe? Tea’o aza naho mba nisy nirehake azo talohaloha. Hoe izay ka ty toko’e hotsapantika naho fa misy mpiara-manompo bey herim-po, le magnomey torohevetse antika. Toko’e hiambane tika, le hankasitrake ty natao’e sady hihevetse aze ho namagne fa tsy fahavalo—Vakio ty Ohabolana 27:5, 6; Gal. 4:16.
it “Mpiara-monina” § 11
Mpiara-monegne
Faie risihe ty Ohabolana tika mba hino naho hatoky namagne sady hitoka iareo amy ty fotoan-tsarotse: “Ko engagne ty nama’o ndra ty nama i baba’o. Sady ko militse an-tragno ty rahalahi’o ao naho fa miatreke raha sarotse rehe. Aleo namagne [sha·khenʹ] marine eo ta tie rahalahy lavitse agne.” (Oh 27:10) Hoe te hirehake i mpanoratsey tie eto tie sarobily lavitse ty namagne mitoboke marinerine ey, le ama’e agne ty toko’e hipaliavagne fagnampeagne fa tsy amy ty longo maifitse manahake ty rahalahy naho lavitse ty misy aze. Ty anto’e, tsy afake hagnampe reke.
Ry Tanora, Tea’areo vao ty ho Sambatse amy ty Fiaignagne?
7 Misy lesogne raike ianarantika boake amy ty fanapahan-kevetse raty natao i Joasy. Tsy ino zay, fa ze namagne hagnampe antika hanao ty soa avao ro toko’e hataontika namagne. Ty dika izay, ze ndaty tea i Jehovah naho magniry ty hampifale aze. Afake minamagne amy ze ndaty mbe zokentika naho mbe zaintika tika. Tsiarovo fa mbe zoke i Joasy lavitse ty Joiada ragne’e. Dineho zao naho fa mifily namagne rehe: ‘Magnampe ahy hampitombo ty finoako i Jehovah vao iareo? Magnorike ty fitsipy i Jehovah vao iareo sady mandrisike ahy hanao izay ka? Mirehake miomba i Jehovah naho ty raha nianara’e boake amy Baiboly ao vao iareo? Magnaja ty fitsipin’Agnahare vao iareo? Ty raha teako ho rey avao vao ty rehafe iareo sa vany iareo ty magnitsy ahy naho fa paliaeko zay?’ (Ohab. 27:5, 6, 17) Naho ty maregne le tsy misy anto’e toko’e ipaliava’o i nama’o rey naho tsy tea i Jehovah iareo. Faie naho tea i Jehovah ty nama’o, le mipiteha ama’e fa hagnampe azo avao iareo.—Ohab. 13:20.
Vatosoa Ara-pagnahy
w06 15/9 19 § 11
Hevetse Misongadigne amy ty Boke Ohabolana Ao
27:21. Hoe izao ty andikagne ty tapa’e fara’e amo o andine’e iohoe amy ty Baiboly ila’e: ‘Natao hitsapagne hevetse o ndatio ty rehake fideragne aze.’ Afake mampibaribary ty tena toetsentika ty rehake fideragne atao o ndatio amantikagne. Trea tie miambane tika naho magneke tie noho i Jehovah ty nahavy antika nahavita raha soa. Mibaribary ka tie miambane tika naho ohatse mandrisike antika hanompo i Jehovah avao i rehake fideragney. Faie hotrea ka tie tsy miambane tika naho ohatse mahavy antika hiheve-tegna ho ambone i rehake fideragney.
25-31 AOGOSITRA
HARENA AMY TY SAONTSIN’ANDRIANAGNAHARE OHABOLANA 28
Ino ty Tsy Mampitovy ty Ndaty Maregne Naho ty Raty Fagnahy?
w93 15/5 26 § 1
Magnorike i Jehovah amy ty Fomba Feno vao Rehe?
“FENO toky manahake o lionao ty ndaty maregne.” (Ohabolana 28:1) Maneho finoagne iareo, matoky naho miantehetse amy ty Saontsin’Andrianagnahare sady bey herim-po, le mandroso amy ty fanompoagne i Jehovah ndra inogn’ino loza atrehe’e.
it “Fahiratan-tsaina” § 9
Fahiratan-tsaigne
Miala amy ty nihirifa’e. Kanao mandika ty lalàn’Andrianagnahare ty ndaty raike, le midika zay tie fa nanomboke tsy nidare an’Agnahare reke naho fa nanapa-kevetse ndra naho fa nisy raha nieretserete’e hatao. (Jb 34:27) Magnorike ty fo’e reke, le tsy trea’e tie raty ty atao’e sady tsy manam-pahendreagne sasa reke. (Sl 36:1-4) Va’e hirehake reke tie manompo an’Agnahare, ie amy izao lily o ndaty ty tena tea’e naho atao’e ambone noho ty an’Andrianagnahare. (Is 29:13, 14) Raty findesam-batagne reke faie hevere’e ho “fihisagne” avao zay (Oh 10:23) Manjare maloto, mate eretseretse naho tsy misaigne reke, le va’e hieretseretse tie tsy maha onigne ty raty atao’e i Andrianagnahare tsy trea masoy. Tsy mahira-tsaigne zane ty Andrianagnahare hoe reke. (Sl 94:4-10; Is 29:15, 16; Je 10:21) Trea amy ty raha atao’e tie “tsy misy ze o Jehovah zao” tie ama’e. (Sl 14:1-3) Tena tsy midare i Jehovah reke. Tsy tarihe ty fitsipin’Agnahare reke hafarà’e diso ty fahatreava’e ty raha misy sady tsy azo’e soa. Tsy fanta’e soa ka tie inogne iaby ty raha voakasike amy izay sady tsy mahay mandrambe fanapahan-kevetse reke.—Oh 28:5.
g 7/10 6, efajoro
Ko Minekoneko amy ty Hamaray
Raha Sarobily Mandikoatse ty Vola Ino ty tena sarobily: Ty toetse soa sa ty vola? Dineho ty ohabolana retoa: “Aleo mahantra faie tsy mivalike ta tie mpagnarivo faie fetsefetse.”—Ohabolana 28:6. “Aleo mihinagne agnagne agnate ty fifankateavagne, ta tie mihinagne hena vondrake agnate ty fifankalaignagne.”—Ohabolana 15:17. Tsy tihoe manjare tsy misy vili’e areke ty ndaty raike naho tsy manam-bola. Ty toetse soa anagna’e ty tena lahibey. Naho fa nanjare tsy niasa ty valy i Rinah, le hoe reke tamy i ana’e rey: “Maro ty loha ty keleiagne magnenga ty valy aman’ana’e faie i baba’areo tsy hoe izay. Tena tea anareo reke sady nagnampe anareo hiatreke olagne maro. Tsy hahatrea baba hanahake aze nareo!”
Vatosoa Ara-pagnahy
w01 1/12 11 § 3
Mitaoa amy ty Aretem-po Ara-pagnahy
Fatokisan-tegna losotse loatse. Maro amo o ndaty marare fò ro nieretseretse tie salama soa. Mateteke, le tsy nieretseretse ndra tsy niraharaha ty hagnente fahasalamagne reke satria nihevetse tie tsy nila nanao izay. Va’e misy ka ty hieretseretse tie tsy hisy olagne ty fahasalama’e ara-pagnahy satria fa elaela ty naha Kristiana aze. Tsy nieretseretse ty hagnente fahasalamagne ara-pagnahy ndra handine-tegna reke naho tsy ty loza ara-pagnahy ro avy. Mahasoa ty mitadidy ty torohevetse miomba ty fatokisan-tegna losotse loatse nimea i apostoly Paoly toy: “Ze miheve-tegna ho fa mitsangagne, loneke mba hitao tsy mone ho tonta.” Fahendreagne ty magneke tie tsy voririke tika, le mila mandineke ty ara-pagnahintika lognandro.—1 Korintianina 10:12; Ohabolana 28:14.