Magnampe Antika Handrese o Tahotseo ty Hatea i Jehovah

1. Inogne iaby ty raha va’e hampatahotse antika?

DINEHO ty raha niaigna ty Vavolombelo i Jehovah ila’e retoa: Nite hanompo amy ty toeragne mipay mpitory maro agne ty Nestor naho i Mariab vali’e. Mba hahavità iareo izay, le nila nagnatsotra ty fomba fiaigna’e iareo. Faie natahotse iareo tie kera ho sahiragne naho tsy ampe ty fidiram-bola iareo. Nivoarara ty asantika tamy ty toeragne nisy i Biniam agne tamy ireke nanjare Vavolombelo i Jehovah-y. Nihai’e areke tie henjehegne reke satria agnisa ty vahoan’Andrianagnahare. Nampatahotse aze zay. Faie mbe ambonembone izay ty taho’e ty raha hatao o keleia’eo naho hay iareo tie niova ho Vavolombelo i Jehovah reke. Narare mafe ty Valerie satria nivoa ty kansera sady tena fa niraty o arete’e iohoe. Fa nikezake mafe reke nipay dokotera mpandrasa hagneke tsy hampilitse lio ama’e faie tsy nahita heike tamy ty voaloha’e. Azo antoke areke fa natahotse reke tie va’e ho mate tamy izay.

2. Nagnino tika ro mila mikezake mafe mba handrese o tahotseo?

² Fa niaigna’o vao o raha rehoe? Azo antoke fa niaigne amy izay ty ankamaroantikagne. Faie ilaegne ty mianatse mifehe o tahotseo satria naho tsy izay, le azo inoagne fa handrambe fanapahan-kevetse raty tika sady hisy voka’e raty amy ty fifandrambesantika amy i Jehovah zay. Toe izay ty tanjo i Satana. Mampiasa o tahotseo areke reke mba hahavy antika tsy hagnorike ty lily i Jehovah, agnisa izay ty lily tihoe mila mitory i talily soay tika. (Apok. 12:17) Raty fagnahy, tsy mitsitsy naho mahery ty Satana. Faie afake ty handrese aze rehe. Amy ty fomba akore?

3. Inogne ty hagnampe antika handrese i tahotse ampiasae i Satana rey?

³ Naho tena matoky tika tie tea naho lava manohagne antika avao ty Jehovah, le ho vitantika ty handrese i tahotse ampiasae i Satana rey. (Sal. 118:6) Nisy fotoagne niatreke raha mahakivy ty mpanoratse ty Salamo 118. Nanagne fahavalo maro reke. Nisy amy ireo aza ndaty ambone (andine’e faha-9, 10). Nisy fotoagne ka reke nialy saigne (andine’e faha-13). Le nisy andro reke nanare i Jehovah mafe (andine’e faha-18). Faie le mbe nirehake hoe izao avao o mpanao salamo iohoe: “Tsy hatahotse raho.” Fa nagnino reke ro nahatsiaro ho voaaro? Satria nihai’e tie tena tea aze ty Jehovah, i Rae’e an-dagnitse agney ndra tie nagnanatse aze aza. Nirese lahatse reke tie ndra inogn’ino raha atrehe’e, le vognogne ty hagnampe aze avao i Andrianagnahare’e bey hateay.​—Sal. 118:29.

4. Inogne iaby ty raha tsy hatahorantikagne naho itika matoky tie tea antika ty Jehovah?

⁴ Mila rese lahatse tika tie tea antika tsikiraidraike ty Jehovah. Naho itika rese lahatse amy izay, le ho vitantika ty handrese ty tahotse telo retoa: 1) tahotse kera tsy hahavelogne ty keleiantika; 2) tahotse ndaty, naho 3) tahotse ty ho mate. Nivita i rahalahy naho i rahavaventika nirehafegne tamy i fehentsoratse voaloha’e teo rey ty nandrese i raha nampatahotse iareo rey, satria natoky iareo tie tea iareo ty Jehovah.

TAHOTSE KERA TSY HAHAVELOGNE TY KELEIANTIKA

5. Inogne iaby ty raha va’e hampinekoneko ty loha ty keleiagne raike? (Henteo ty sare amy ty fogno ty gazete toy.)

⁵ O loha ty keleiagneo ty managne andraikitse voaloha’e hikarakara ty raha paliae ty keleia’e ara-nofo. (1 Tim. 5:8) Naho loha ty keleiagne areke rehe, le va’e ninekoneko tagnate i arete-manjamagney tie akore naho montso asa rehe. Va’e natahotse rehe tie kera tsy ho vita’o ty hagnomey hanegne hoahy ty keleia’o naho ty handoa hofan-tragno. Va’e ninekoneko ka rehe tie naho montso asa, le va’e tsy hahatrea asa hafa. Ndra ka rehe va’e hisalasala ty hagnegne ty lera iasa’o manahake i Nestor naho i Maria, i nirehafegne taloha teoy, satria kera ho sahiragne naho tsy ampe ty fidiram-bola’o. Maro ty ndaty nivita i Satana ty nikalagne aze tsy hanompo i Jehovah noho ty fampiasa’e ze tahotse zay.

6. Inogne ty raha tea i Satana hinoantikagne?

⁶ Tea i Satana hino tika tie tsy midare antika tsikiraidraike ty Jehovah sady itika avao ro mila mialy mafe mba hamelogne ty keleiantikagne. Ty voka’e, va’e hieretseretse tika tie mila manao ze raha azontika atao mba tsy hahamontso asa antika, ndra tie va’e tsy hifagnarake amy ty toro lala ty Baiboly aza ty raha ila’e ataontikagne.

7. Inogne ty toky nimey i Jesosy antikagne?

⁷ Tsy misy ndaty mahafantatse i Andrianagnahare Raentikagney mandikoatse i Jesosy. Hoe reke: “Fa ony i Rae’areoy ze raha paliae’areo, ndra tie mbe tsy mangatake ama’e aza nareo.” (Mat. 6:8) Nihay i Jesosy fa vognogne hagnomey ze raha paliaentika ty Jehovah. Keleian’Andrianagnahare tika amy ty maha Kristiana antikagne. Afake matoky areke tika fa hanao raha mifagnarake amy i toro lalagne amy 1 Timoty 5:8 aoy ty Jehovah amy ty maha Loha ty keleiagne aze.

8. a) Inogne ty hagnampe antika tsy hatahotse tie ho vitantika ty hamelogne ty keleiantikagne? (Matio 6:31-33) b) Akore ty azontika anahafagne o mpivaly magnomey hanegne rahavave raike, atoro amo o sareo eò?

⁸ Naho itika rese lahatse tie tea antika naho o keleiantikagneo ty Jehovah, le hatoky tika tie hanagne ze raha paliaentikagne avao tika. (Vakio ty Matio 6:31-33.) Te hagnomey antika izay ty Jehovah, sady toe bey hatea naho matarike reke. Naho fa namboatse ty tane toy ohatse reke, le nisia’e raha maro mahafinaritse ty etoy fa tsy ze raha ilaentika mba hahavelogne antika avao. (Gen. 2:9) Fa kindraike le va’e raha sahaza antika avao ro anagnantika. Faie mila tadidientikagne tie kanao tika mbe managne irey le noho i Jehovah. (Mat. 6:11) Mila tsiaroventikagne ka fa tsy misy dika’e ze raha afoentikagne amy izao naho oharegne amy ty raha mea i Andrianagnaharentikagne bey hateay antika amy izao naho ty raha homei’e antika amy ty hoavy. Izay zao ty raha nitsapa i Nestor naho i Maria.​—Isaia 65:21, 22.

9. Inogne ty ianara’o boake amy i Nestor naho i Maria?

⁹ Nanagne tragno fanjaka naho asa bey karama ty Nestor naho i Maria tie ta Kolombia agne. Hoe iareo: “Nieretseretse ty hagnatsotra ty fiaigna’ay naho hampitombo ty fanompoa’ay zahay. Faie natahotse zahay tie kera ho sahiragne naho tsy ampe ty fidiram-bola’ay.” Inogne ty nagnampe iareo handrese ze tahotse zay? Nisaintsaigne ty fomba maro nanoroa i Jehovah ty hatea’e iareo ty Nestor mirovaly. Nirese lahatse areke iareo tie hikarakara iareo avao ty Jehovah naho miala amy i asa iareo bey karamay iareo. Navily iareo ka i tragno iareoy, le nifindra amy ty firenena hafa nipay mpitory maro agne iareo. Akore ty fahatreava iareo i fanapahan-kevetse nirambese iareoy? Hoe ty Nestor: “Nitrea’ay maso ty fahatanteraha ty Matio 6:33, satria lava nanagne ze raha ilae’ay ara-nofo avao zahay. Mahatsiaro ho sambatse ka zahay.”

TAHOTSE NDATY

10. Nagnino ro ara-dalàna o ndatio naho mifankatahotse?

¹⁰ Nanao raha mba hampijaleagne ty hafa o ndatio tafara ty nanotà i Adama naho i Eva. (Mpito. 8:9) Misy ohatse ty magnararaotse ty fahefà’e, ty mangalatse naho ty mamono ndaty. Misy ka ty mampijale naho magnorohoro ty mpiara-mianatse ama’e. Misy ndaty aza mahavita mampijale naho mijera ty keleia’e. Tsy mahalatsa areke naho mifankatahotse o ndatio. Akore ty agnararaota i Satana antika amo o tahotse ndaty iohoe?

11-12. Akore ty ampiasae i Satana o tahotse ndatio mba hamandrihagne antika?

¹¹ Ampiasae i Satana o tahotse ndaty iohoe mba hahavy antika hilefetse amy ty raha inoantika naho hikalagnagne antika tsy hitory sasa. Risihe’e ohatse o fanjakagneo mba handrara ty asantikagne naho hagnenjeke antika. (Lioka 21:12; Apok. 2:10) Maro ka ty ndaty amy ty tontolo i Satana toy eto, mampiparitake raha raty naho vande miomba antika Vavolombelo i Jehovah-o. Va’e hitsikike naho hanafike antika areke ze ndaty mino i vande rey. Toko’e hahagaga antika vao ze hafetsea i Satana rezay? Oho’o. Ty anto’e, fa nampiasa irey reke tamy ty andro o apostolio.​—Asa. 5:27, 28, 40.

¹² Faie tsy ty fagnenjehagne atao o fanjakagneo avao ty fitaovagne ampiasae i Satana mba hampatahoragne antika. Misy ndaty zao matahotse ty ho fihevera o longo’eo aze naho miova ho Vavolombelo i Jehovah. Mbe lakolako ty fatahora iareo ty hampijalegne aza ty fatahora iareo o keleia iareò. (Mat. 10:36) Tena tea iareo i keleia iareo rey sady tea iareo hahafantatse i Jehovah naho hotea Aze. Malahelo areke iareo naho fa mirehake raha raty miomba i Andrianagnahare maregney naho o mpanompo’eo ty longo iareo. Fa ndra tie eo zay, le nisy tamy i longo iareo nanohetse iareo rey nanjare mpanompo i Jehovah tafara tatoy. Faie akore naho tsy midare ndra tsy mifandrambe amantika sasa i longontika rey noho itika manompo i Jehovah? Inogne ty hataontika?

13. Nagnino ty fatokisantika ty hatea i Jehovah antika ro magnampe antika hahavita hiaretse ty fagnenjeha o keleiantikagneo antika? (Salamo 27:10)

¹³ Mampahery antika ty misaintsaigne ty rehake fanjaka amy Salamo 27:10 ao. (Vakio.) Naho itika mitadidy tie tena tea antika ty Jehovah le tsy hatahotse ty hiatreke fagnenjehagne. Hatoky ka tika tie hamale soa antika reke noho itika miaretse. Hagnomey ze raha paliaentika ara-nofo naho ara-pagnahy ty Jehovah, sady hampea’e ka tika mba ho tony naho ho falefale avao. Mihoatse lavitse ty fagnampeagne vita o ndatio ty fagnampea’e antika. Izay zao ty nitsapa i Biniam, i nirehafegne taloha tagney.

14. Inogne ty ianara’o boake amy i Biniam?

¹⁴ Niova ho Vavolombelo i Jehovah avao ty Biniam ndra tie fa nihai’e aza tie henjehegne reke. Dineho tie nagnino ty fahafantara’e tie tea aze ty Jehovah ro nagnampe aze handrese ty tahotse ndaty. Hoe reke: “Tena nimafe tsy arake ty nieretseretako aze i fagnenjehagney. Faie mbe niambonembone ty fatahorako ty fagnenjehagne atao o fanjakagneo ty fagnenjeha o keleiakò ahy. Natahotse ty hiova ho Vavolombelo i Jehovah raho satria nieretseretse tie kera ho diso tamà ty babako, le o keleiakò ka tsy hagnaja ahy sasa.” Faie ndra tie teo zay, le natoky ty Biniam tie lava mikarakara ze ndaty tea Aze avao ty Jehovah. Hoe ty Biniam: “Nisaintsaigneko ty fomba nagnampea i Jehovah o mpanompo’e nanagne olagne ara-bola naho nisy nitsaratsara vaho nenjehegneo. Haiko fa naho iraho mipiteke amy i Jehovah avao, le hitahy ahy reke. Mateteke nitsepahegne naho nampijalegne raho. Faie nitsapako tamy ty raha niaignako tamy irey fa tena magnampe antika vata’e ty Jehovah amy ty fotoagne ilantikagne aze naho itika tsy mivalike ama’e.” Nanjare hoe tena Rae i Biniam ty Jehovah, le o vahoa’eo ka nanoro tie tena keleia i Biniam vata’e.

TAHOTSE TY HO MATE

15. Nagnino ro ara-dalàna naho matahotse ty ho mate tika?

¹⁵ Rehafe ty Baiboly tie fahavalo o fateo. (1 Kor. 15:25, 26) Va’e hinekoneko tika naho fa mieretseretse ty ho mate, lohotsie naho marare mafe tika ndra ty ndaty teantikagne. Fa nagnino tika ro matahotse izay? Satria fa natao i Jehovah am-pontikagne ao ty fagniriagne ho velogne nainai’e. (Mpito. 3:11) Faie magnampe antika hanao raha mba hiarovagne ty fiaintika ze tahotse ty ho mate zay, naho haintika ty manahatsahatse aze. Io ohatse ty magnampe antika handrambe fanapahan-kevetse soa miomba ty raha hanentika naho ty sporo ataontika. Io ka ty mahavy antika hamonje dokotera naho fa marare, ndra tsy hanao raha va’e hagnoho-doza antika.

16. Akore ty agnararaota i Satana i tahotse ty ho mate amantikagne aoy?

¹⁶ Hay i Satana tie mamintika ty fiaintikagne. Nirehake reke tie nao hafoentikagne iaby zao ze kila raha anagnantika, ndra ty fifandrambesantika amy i Jehovah aza, mba hiarovagne ty fiaintikagne. (Joba 2:4, 5) Faie diso ze reha i Satana zay! Fa noho ‘ireke manan-kery hahavy o fateo’, le hararaote’e i tahotse amantikagne aoy mba hahavy antika hisintake amy i Jehovah. (Heb. 2:14, 15) Misy fotoagne reke mampiasa o ndaty fehe’eo mba hagnorohoro antika tie hovonoegne tika naho tsy miala amo o fivavahantikagneo. Ndra, kindraike ty Satana mahatrea tie mila fitsaboagne meke tika, le va’e ho hararaote’e zay mba hampanoagne raha hahavy antika hilefetse amy ty raha inoantikagne. Va’e ho seré o dokoterao ndra o longontika tsy Vavolombelogneo tikagne mba hagneke hampiliragne lio, ie amy izao mandika ty lilin’Agnahare tika naho manao izay. Ndra va’e hisy ndaty handrese lahatse antika hagneke hanao fitsaboagne mifanohetse amy ty toro lala ty Baiboly.

17. Nagnino tika ro tsy toko’e hatahotse ty ho mate, naho ty Romanina 8:37-39 ro henteagne?

¹⁷ Faie ndra tie tsy te ho mate aza tika, le haintika tie tsy hiova ty hatea i Jehovah antika naho sondia’e mate tika. (Vakio ty Romanina 8:37-39.) Naho fa mate ty nama i Jehovah, le hoe mbe velogne avao tie ama’e satria agnate ty fitadidia’e ao. (Lioka 20:37, 38) Mbe hovelome’e indraike iareo. (Joba 14:15) Nivilie’e lafo tika amy izay ho ‘afake ty ho velogne nainai’e.’ (Jaona 3:16) Haintika tie tena tea naho mikarakara antika ty Jehovah. Ndra aleo areke mitolike ama’e agne mba hipay fampionognagne naho hangatake fahendreagne vaho hery ama’e ta tie hisintake ama’e naho fa marare ndra horohoroegne ty hovonoegne. Izay zao ty raha natao i ry Valérie mirovaly.​—Sal. 41:3.

18. Inogne ty ianara’o boake amy i Valérie?

¹⁸ Tamy i Valérie ni-35 taogne le nifantatse tie nivoa ty kansera reke. Tsy le fitrea mateteke o kansera nahazo aze iohoe sady tena fa natahoragne. Dineho tie nagnino ty hatea i Jehovah ro nagnampe aze tsy hatahotse ty ho mate. Hoe reke: “Tena nitampoke anay mirovaly ty nahay tie kansera o mahazo ahio. Nila fandrasagne bey raho naho te ho velogne. Maro ty dokotera mpandrasa nitreako faie tsy nimete iareo naho tsy ampiliragne lio raho. Natahotse raho. Faie noho ty fahafantarako ty lilin’Agnahare, le tsy nimete hampiliragne lio ka raho. Nitreako tamy ty fiaignako amparake izay fa tena tea ahy ty Jehovah. Le izao ty fotoagne ahafahako manoro ty hateako aze ka. Isake tie naharey vaovao raty boake amo o dokoterao raho, le vao mainke tapa-kevetse ty hampirehareha i Jehovah fa tsy hagnenga i Satana handrese. Nisy dokotera nagneke handrasa ahy tsy nampiasa lio tamy ty fara’e sady le nivita soa avao i fandrasagney. Maregne fa mbe marare avao raho, faie lava nagnomey ze raha paliae’ay avao ty Jehovah. Tamy ty fivoriagne tamy ty fara heregnandro taloha i nahafantaragne i aretekoỳ ohatse, le nianatse ty lahatsoratse tihoe ‘Ahoana no Ahafahana Miatrika Olana?’ tika.c Tena nampahery anay o lahatsoratse iohoe, le naherenkere’ay nivakiegne avao. Ty lahatsoratse hoe io naho ty fanohizagne avao ty fahazaragne ara-pagnahy fatao’ay, le nagnampe anay mirovaly ho tony naho hahay handrambe fanapahan-kevetse soa.”

RESEO O TAHOTSEO

19. Inogne ty raha hiseho tsy ho ela?

¹⁹ Noho ty fagnampea i Jehovah, le vita ty Kristiana magneran-tane ty miatreke raha sarotse naho miaretse ty fanoheragne atao i Devoly. (1 Pet. 5:8,  9) Matokia fa ho vita’o ka zay. Tsy ho ela ty Jehovah, le hagnirake i Jesosy naho i hiarake hanjaka ama’e rey mba “handrava ty asa i Devoly.” (1 Jaona 3:8) Afara izay le ‘tsy hisy raha hampatahotse’ aze sasa o vahoa i Jehovah hanompo aze an-tane etoao. (Isaia 54:14; Mika 4:4) Faie amparake ty hiavia izay, le mila mikezake mafe tika mba handrese o tahotseo.

20. Inogne ty hagnampe antika handrese i raha mampatahotse antika rey?

²⁰ Tsy maintsy mikezake lognandro tika mba hampitombo ty fatokisantika tie tea naho miaro ty mpanompo’e ty Jehovah. Hagnampe antika amy izay ty fisaintsaignagne naho ty firehafagne amy ty hafa ty fomba niarova i Jehovah o mpanompo’e talohao. Azontika tadidiegne ka ty fomba nagnampea’e antika manokagne tamy ty olagne natrehentikagne. Ho vitantika areke ty mandrese o tahotseo naho fa itika ampea i Jehovah.​—Sal. 34:4.