Tahafo o Anjely Tsy Mivalikeo

1-2. a) Ino ty tsy mampitovy antika amo o anjelio? b) Ino ty itovizantika amo o anjelio?

NANJARE agnisa i keleiagne bey hatea manompo i Jehovah-y rehe naho fa nitaone’e hagnorike ty hamaregnagne. Agnisa o keleiagne iohoe ka o anjely an-tapetrisa’eo. (Dan. 7:9, 10) Naho fa mandineke ty miomba o anjelio tika, le mateteke ro mieretseretse tie tsy mitovy amantika iareo. Fa ela bey taloha ty namorognagne antika ohatse ty nampisy iareo. (Joba 38:4, 7) Mahery mandikoatse antika iareo. Masigne sady maregne mandikoatse antika ka o anjelio, le tsy ombia hanahake iareo tika satria tsy voririke.​—Lioka 9:26.

² Faie ndra tie eo ze tsy fitoviagne rezay, le maro avao ka ty raha mampitovy antika amo o anjelio. Afake mitsikombe ty toetse i Jehovah manahake iareo ohatse tika. Afake mifily ze raha teantika hatao manahake iareo ka tikagne. Managne ty agnarantika naho ty maha ie antika manokagne tika sady managne andraikitse sambe hafa amy ty fanompoagne i Jehovah, le hoe izay ka o anjelio. Mila manompo i Mpamorogney manahake o anjelio ka tikagne.​—1 Pet. 1:12.

3. Ino ty azontika ianaragne boake amo o anjely tsy mivalikeo?

³ Afake mampahery sady mampiana-draha maro antika ty modely soa omea o anjelio satria maro ty raha itovizantika amy iareo. Maro areke ty lesogne fanjaka azontika ianaragne boake amy iareo. Hotreantika ato tie, akore ty azontika anahafagne ty fiambanea o anjely tsy mivalikeo, ty hatea iareo o ndatio, ty fiareta iareo naho ty kezake atao iareo mba hiarovagne ty fahaliova o fiangonagneo.

MIAMBANE O ANJELIO

4. a) Akore ty ampisehoa o anjelio tie miambane iareo? b) Nagnino o anjelio ro miambane? (Salamo 89:7)

⁴ Miambane o anjely tsy mivalikeo. Mankatò ty toromareke boake amy i Jehovah iareo ndra tie managne fahaiagne naho hery vaho fahendreagne aza. (Sal. 103:20) Naho fa manao ty andraiki’e iareo, le tsy mirehareha amy ty raha vita’e ndra mampisengesenge ty hery miambake anagna iareo. Tena mahafale iareo ty manao ty zoton’arofo i Jehovah ndra tie tsy misy mahafantatse aza ty agnara iareo.a (Gen. 32:24, 29; 2 Mpanj. 19:35) Tsy mandrambe ty voninahitse toko’e hoahy i Jehovah iareo. Nagnino o anjelio ro miambane? Satria tena teà iareo sady hajae iareo ty Jehovah.​—Vakio ty Salamo 89:7.

5. Akore ty nampisehoa ty anjely raike tie niambane reke naho fa nagnitsy i apostoly Jaona? (Henteo ka i sarey.)

⁵ Misy tantara raike mampiseho ty fiambanea o anjelio toy. Tamy ty taogne 96, le nisy anjely raike tsy fantatse agnaragne nampiseho fahitagne tena mahalatsa tamy i Jaona. (Apok. 1:1) Akore ty nifihetse i Jaona naho fa nahita i fahitagney? Niankohoke tamy i anjelỳ reke mba hivavake ama’e. Faie le avy le nikalagne aze o anjely iohoe sady nirehake tie: “E! Ko manao hoe io! Mpanompo manahake azo naho manahake o rahalahi’ò avao raho ... Andrianagnahare ro ivavaho!” (Apok. 19:10) Tena niambane i anjelỳ! Tsy te homeam-boninahitse ndra hoderaegne reke. Le avy le nirisihe’e mba hivavake amy i Jehovah Andrianagnahare ty Jaona. Tsy nihevetse i Jaona ho ambane ka reke tamy izay. Ndra tie fa ela nanompoagne i Jehovah sady nahery nandikoatse i Jaona aza reke, le niambane sady nirehake tie mpanompo manahake i Jaona avao. Tsy nitrevoke ndra nasiake ka reke naho fa nagnitsy i Jaona fa nirehake taman-kasoa fagnahy. Nitaka’e varagne fa noho i Jaona nilatsa tamy i fahitagne nitrea’ey ty nahavy aze niankohoke tama’e.

6. Akore ty azontika anahafagne ty fiambanea o anjelio?

⁶ Akore ty azontika anahafagne ty fiambanea o anjelio? Manahake o anjelio, le tsy toko’e hirehareha ndra hipay tsiriry amy ty raha nivitantika tikagne. (1 Kor. 4:7) Tsy toko’e hieretseretse ka tika tie ambone noho ty hafa noho itika fa ela nanompoagne i Jehovah ndra noho ty tombotsoam-panompoagne ila’e anagnantika. Naho ty maregne, le arakarake ty anagnantika tombotsoam-panompoagne maro, ty vao mainke toko’e hahavy antika hiambane. (Lioka 9:48) Manahake o anjelio, le teantika ty hanompo ty hafa fa tsy hihevetse ty vatantikagne ho ambone.

7. Akore ty ampisehoantika tie miambane tika naho fa magnitsy ndra manoro hevetse ty hafa?

⁷ Afake mampiseho ka tika tie miambane naho fa magnitsy ndra manoro hevetse ty hafa, agnisa izay o mpiara-manompò ndra o ajajao. Va’e mila hentetse tika naho fa magnomey torohevetse. Faie manahake i anjely nanoro hevetse i Jaona taman-kasoa fagnahỳ, le azontika atao ka ty tsy hagnakivy naho fa manoro hevetse ndra tie hentetse aza. Naho ohatse tika tsy mihevetse ty tegnantika ho ambone, le hikezake hagnaja ty hafa sady ho soa fagnahy naho fa manoro hevetse aze boake agnate Baiboly ao.​—Kol. 4:6.

TEA NDATY O ANJELIO

8. a) Arake ty Lioka 15:10, akore ty anoroa o anjelio tie teà iareo o ndatio? b) Akore ty agnampea o anjelio antika amy ty asa fitoriagne? (Henteo ka i sarey.)

⁸ Teà o anjelio o ndatio. Tsy tihoe tsy midare ndra mihalavitse o ndatio iareo. Fale iareo naho fa mibebake ty ndaty raike nanao fahotagne lahibey ndra miheregne manompo i Jehovah indraike ty ndaty raike niala tamy ty hamaregnagne. Mahafale iareo ka ty mahatrea ndaty liagne mianatse ty hamaregnagne sady magnova ty fiaigna’e, le manompo i Jehovah. (Vakio ty Lioka 15:10.) Magnampe amy ty asa fitoriagne miomba i Fanjakagney ka o anjelio. (Apok. 14:6) Ndra tie tsy mitory mivantagne amo o ndatio aza iareo, le va’e hotarihe iareo mbamy ze ndaty te hianatse miomba i Jehovah mbeo ty mpitory raike. Ie aloha tsy tena azontikagne antoke tie manao izay amy ze kila ndaty iareo. Ty anto’e, afake mampiasa fomba hafa ty Jehovah mba hagnampeagne o ndatio ndra mba hitarihagne ty vahoa’e ho mbamy iareo mbeo. Agnisa izay ohatse ty fagnahi’e masigne. (Asa. 16:6, 7) Faie ndra tie eo zay, le mbe maro ty fomba ampiasà’e o anjeli’eo. Afake matoky areke tika tie hanohagne antika o anjelio naho fa mitory i talily soay tikagne.​—Henteo ty efajoro tihoe “Nivale ty Vavake Natao Iareo.”b

9. Akore ty azontika anahafagne ty hatea o anjelio o ndatio?

⁹ Akore ty azontika anahafagne ty hatea o anjelio o ndatio? Toko’e ho fale manahake o anjelio tika naho fa maharey fitaliliagne tie nisy ndaty raike nivoarae indraike. Azontika atao ty manalama aze sady magnomey toky aze tie teantikagne reke. (Lioka 15:4-7; 2 Kor. 2:6-8) Manahake o anjelio ka tika naho manao ze azontikagne atao mba hitoriagne i talily soay. (Mpito. 11:6) Manohagne antika o anjelio naho fa mitory i talily soay tikagne. Afake mipay fomba hanohagnagne o rahalahy naho o rahavaveo amy ty fanompoagne ka areke tika. Azontikagne atao ohatse ty miarake manompo amo o mpitory vaovaò, ndra magnampe ze bey taogne naho ze tsy salama mba ho afake hanompo.

10. Ino ty azontika ianaragne boake amy ty tantara i Sara?

¹⁰ Akore naho voafetra avao ty raha vitantika noho ty raha iaignantika? Afake mipay fomba hafa mba hiarahagne miasa amo o anjelio amy i asa fitoriagney tika. Dineho ty tantara i Sara,c rahavave a Inde agne. Nanao mpisava lalagne reke tagnate ty 20 taogne teo ho eo. Faie narare reke tafara izay, le tsy afake niala tam-pandreagne eo. Tena nikivy reke. Faie nahavy i Sara hifantoke amy ty lafesoan-draha ty fagnampea o keleia’e ara-pagnahio naho ty famakiagne Baiboly tsy tapake. Ie aloha tsy maintsy nampifagnarahe’e amy ty raha iaigna’e ty fanompoa’e. Fitoriagne an-telefony avao ty niazo’e natao noho ireke tsy afake nitoboke mba hanoratse taratasy. Niantso i fitiliha’e rey areke reke, le iareo ka ty nanoro aze ndaty hafa te hianatse Baiboly. Ty voka’e, tagnate ty volagne tsiampeampe le fa nitarike fampianaragne Baiboly 70 reke. Faie tsy afake nampianatse o ndaty reo iaby ty Sara. Nafindra’e tamy ty mpitory hafa areke ty ila’e amy i mpiana’e rey. Fa mivory ty ankamaroa o mpianatse Baiboly reo tie amy izao. Tena mahafale o anjelio ty miara-miasa amy ty rahalahy naho rahavave manahake i Sara satria manao ze azo’e atao iareo mba hanoagne i asa fitoriagney.

MIARETSE O ANJELIO

11. Akore ty fomba nampisehoa o anjely tsy mivalikeo fiaretagne?

¹¹ Modely amy ty fiaretagne o anjely tsy mivalikeo. Miaretse ty tsy rare’e naho ty haratiagne niseho tagnate ze agnarivo’e taogne zay iareo. Nahatrea i Satana naho o demoniao nanohetse i Jehovah zao ohatse iareo, ie amy izao nanompo i Jehovah niarake tamy iareo o anjely nanohetse reo. (Gen. 3:1; 6:1, 2; Joda 6) Mirehake ka ty Baiboly tie nisy anjely tsy nivalike raike nitohere ty demonia raike mahery. (Dan. 10:13) Ankoatse izay, tagnate ze fotoagne nisia o ndatio zay, le ndaty tsiampe avao ty nitrea o anjelio nagnorike ty fivavahagne maregne. Faie ndra tie eo ze raha iaby rezay, le mbe mazoto manompo i Jehovah naho falefale avao o anjely tsy mivalikeo. Fanta iareo fa hamoagne ze tsy rare’e iaby ty Andrianagnahare amy ty fotoagne mete.

12. Ino ty hagnampe antika hiaretse?

¹² Akore ty azontika anahafagne ty fiareta o anjelio? Va’e hahatrea tsy rare’e naho hisy hanohetse manahake o anjelio ka tika. Faie rese lahatse manahake iareo tikagne tie hagnafake ze kila haratiagne ty Jehovah amy ty fotoagne mete. “Tsy rokake manao ty soa” manahake o anjely tsy mivalikeo areke tika. (Gal. 6:9) Nampitamà ka ty Jehovah fa hagnampe antikagne hiaretse. (1 Kor. 10:13) Afake mangatake ty fagnahi’e masigne tika mba hagnampe antikagne hiaretse naho ho fale. (Gal. 5:22; Kol. 1:11) Akore ka naho miatreke fanoheragne rehe? Matokia i Jehovah fa ko matahotse. Hanohagne naho hagnatanjake azo avao reke.​—Heb. 13:6.

MIARO TY FAHALIOVA O FIANGONAGNEO O ANJELIO

13. Ino ty fanendreagne manokagne nimeagne o anjelio amo ze o andro fara’e zao? (Matio 13:47-49)

¹³ Nimea i Jehovah fanendreagne manokagne o anjelio amo ze o andro fara’e zao. (Vakio ty Matio 13:47-49.) Ndaty an-tapetrisa’e magneran-tane ro liagne amy i talily soay. Magnova ty fomba fiaigna’e ty ila’e amy iareo mba hahavy iareo hanjare ho Kristiana fa ty ila’e tsy hoe izay. Nitendregne mba “hagnambake ty ndaty raty fagnahy amy ty maregne” areke o anjelio. Midika zay tie nitendregne mba hiaro ty fahaliova o fiangonagneo iareo. Faie tsy midika zay tie tsy afake miheregne sasa ze ndaty niala amy ty hamaregnagne. Tsy tihoe le lia’e tsy hisy olagne sasa ka ty agnivo ty fiangonagne eo. Afake matoky tika fa hanao ze azo’e atao o anjelio mba hiarovagne ty fahaliova o fiangonagneo.

14-15. Akore ty azontika anahafagne ty fomba niarova o anjelio ty fahaliova o fiangonagneo? (Henteo ka i sare rey.)

¹⁴ Akore ty azontika anahafagne ty raha atao o anjelio mba hiarovagne ty fahaliova o fiangonagneo? Mila manao ze azontika atao tika mba hahavy o fiangonagneo halio findesam-batagne naho halio ara-pagnahy avao. Hahavita izay tika naho miaro ty fontikagne, le mifily soa ty ndaty ataontika namagne naho magnalavitse ze raha va’e hanimba ty fifandrambesantikagne amy i Jehovah. (Sal. 101:3) Afake magnampe o mpiara-manompò mba tsy hivalike amy i Jehovah ka tika. Ino zao ohatse ty toko’e hataontika naho fantantikagne tie nanao fahotagne lahibey ty raike amy ty mpiharo finoagne amantika? Noho ty hateantikagne aze, le risihentika reke mba hirehake amo o androanavio. Naho tsy manao izay reke, le itika ty toko’e hampahafantatse o androanavio i raha natao’ey. Teantikagne hahazo fagnampeagne ara-pagnahy malaky reke!​—Jak. 5:14, 15.

¹⁵ Mampalahelo fa nasintake o fiangonagneo ty ndaty ila’e nanao fahotagne lahibey. Naho izay ty raha miseho, le “tsy mifandrambe” amy iareo sasa tika.d (1 Kor. 5:9-13) Hahavy o fiangonagneo halio avao ze lamigne zay. Tsy izay avao fa maneho hasoa fagnahy amo o ndaty nasintakeo tika naho fa tsy mifandrambe amy iareo. Va’e hagnampe iareo hiheregne amy i Jehovah ty fanoantika izay. Miara-pale amy i Jehovah naho o anjelio tika naho fa miheregne iareo.​—Lioka 15:7.

16. Akore ty fomba azo’o anahafagne o anjelio?

¹⁶ Tena tombotsoa lahibey ho antika tihoe enga i Jehovah hianatse miomba o anjelio naho hiara-hiasa amy iareo. Lonike areke tika mba hanahake ty toetse soa iareo, le hiambane, hotea ndaty, hiaretse vaho hiaro ty fahaliova o fiangonagneo. Naho manahake o anjely tsy mivalikeo tika, le ho agnisa ty keleia i Jehovah nainai’e.