Soa ty Raha Nanoe i Samoela

Mbe niajaja ty Samoela le fa niasa naho nitoboke amy kivoho masigney ao. Tao ty nanompoa o ndatio i Jehovah. Fanta’o vao ty anto’e nitoboha’e ao? Andao tikagne handineke ty miomba i Hana rene i Samoela.

Fa ela ty nagniria i Hana anake faie tsy nanagn’anake aniany reke. Nivavake tamy i Jehovah reke mba hampea’e. Nanao vava reke tie naho managne ana-dahy, le hasese’e amy i kivoho masigney agne hitoboke naho hiasa ao. Nivalea i Jehovah i vavake nanoe’ey, le nitera-dahy reke. I Samoela ty agnaragne nimei’e aze. Nasese’e amy kivoho masigney agne vata’e ty Samoela naho fa nifeno telo ndra efatse taogne, hanompo i Jehovah.

I Ely ty mpisorombey tamy i kivoho masigney ao tamy izay. Niasa tao ka ty ana-dahi’e roe. Fanompoagne i Jehovah ty amy i kivoho masigney ao, le toko’e ho raha soa avao ty ao. Ao tsy ho haligno’o fa anjomba nanompoagne i Jehova o kivoho masigne zao. Tsy toko’ e hisy raha malotoloto ty agnate’e ao. Faie nitrea i Samoela nanao raha raty agnate’e ao i ana i Ely rey. Nanao raty ka vao ty Samoela?... Aha’a! Nanao soa avao reke fa izay ty nampianare i rae’e naho rene’e aze.

Toko’e ho natao i Ely akore i ana’e rey?... Toko’e ho nisazea’e sady tsy ho nampiasae’e an-tragno i Jehovah ao sasa iareo. Faie tsy nanao izay reke. Nivignetse tamy iareo miroanake ty Jehovah, le sinaze’e iareo.

Tamy ty halegne raike ty Samoela nisy nitoka aze. Nilay mbamy i Ely mbeo reke. Nirehake ty Ely tie: ‘Tsy nitoka azo raho.’ Naho fa niheregne fagnitelo’e i tokay, le nirehake tamy i Samoela ty Ely tie: ‘Naho mbe misy mitoka azo, le valeo tihoeke tie: “Misaontsia Jehovah fa hitsanogne azo raho.” Naho fa nanao izay ty Samoela, le hoe ty Jehovah: ‘Rehafo ty Ely fa nanao raty o keleia’eo, le ho sazeako.’ Nimora tamy i Samoela vao ty nirehake izay tamy i Ely?... Nisarotse! Faie nagneke i Jehovah reke ndra tie natahotse. Tsy nisaontsy raha vande ty Jehovah, fa le nisy namono i ana-dahy i Ely rey sady mbe nimate ka ty Ely.

Toko’e ho tsikombetikagne ty raha soa nanoe i Samoela. Tsy nanao raty reke ndra tie nanao raty ty ndaty niharo toboke ama’e. A ihe ka? Te hanahake i Samoela ka vao rehe? Naho ihe ro manahake aze, le hampifale i Baba naho i Nene vaho i Jehovah.