Akore ty Hagnasoa’o ty Vavake Atao’o?

1-2. a) Ino ty raha va’e hikalagne antika tsy hivavake amy i Jehovah? b) Akore ty ahafantarantika tie vognogne hijanjigne antika ty Jehovah?

MAHATSAPA vao rehe kindraike tie, miherenkeregne ty raha rehafe’o naho fa mivavake, ndra tsy tena laleke ty vavake atao’o ndra fahazaragne avao? Tsy irehe raike avao ty hoe izay. Noho ty rotoroto amy ty fiaignagne, le va’e hanao vavake memeke tika kindraike. Ndra ka va’e sarotse amantika ty mamborake amy i Jehovah ty fihetseham-pontika satria mete hahatsapa tika tie, tsy fagneva ty hagnantogne aze.

² Magnomey toky antika ty Baiboly tie, tsy ty raha rehafentika ty lahibey amy i Jehovah fa itika miambane, le mivavake ama’e amy ty fo. Hijanjigne ty “fihalalea ty mpandefetse” reke. (Sal. 10:17) Janjigne’e aman-kasoa fagnahy ze raha iaby rehafentika satria mitretré antika reke.​—Sal. 139:1-3.

3. Ino ty fagnonteneagne hodinehentika ato?

³ Va’e hieretseretse hoe izao tika: Nagnino tika ro tsy toko’e hisalasala ty hivavake amy i Jehovah? Akore ty hahavy ty vavake ataontika tena hisy heve’e laleke? Nagnino ty fisaintsaignagne i vavake amy ty fo amy Baiboly ao rey ro afake magnampe antika hagnasoa ty vavake ataontika? Ino ty azontika atao naho minekoneko loatse tika, le tsy haintika ty hirehafagne ty raha tsapantika amy i Jehovah? Andao tika handineke ty vale ireo.

KO MISALASALA MIVAVAKE AMY I JEHOVAH

4. Ino ty hagnampe antika tsy hisalasala ty hivavake amy i Jehovah? (Salamo 119:145)

⁴ Naho takantika tie, namagne tsy mivalike mipay ze hahasoa antika ty Jehovah, le tsy hisalasala ty hivavake ama’e tika. Nikezake nihevetse i Jehovah hoe izay ty mpanoratse ty Salamo 119 naho fa nivavake ama’e. Lava nisy olagne avao ty fiaigna’e. Nisy ndaty zao nagnaraty aze. (Sal. 119:23, 69, 78) Nialy tamy ty tsy fahavoririha’e ka reke. (Sal. 119:5) Ndra tie izay aza, le tsy natahotse namborake ty tam-po’e tao tamy i Jehovah reke.​—Vakio ty Salamo 119:145.

5. Nagnino tika ro tsy toko’e hagnenga ty raha tsapantika hikalagne antika tsy hivavake? Magnomeza ohatse.

⁵ Tea i Jehovah hivavake ama’e ndra tie ty ndaty nanao fahotagne lahibey aza. (Isaia 55:6, 7) Tsy toko’e hisy raha areke hengantika hikalagne antika tsy hivavake ama’e. Fanta ty mpinday rapolany raike fa tsy maintsy mifandrambe amy ty mpandrindra ty ambone ey reke naho fa mipay fagnampeagne. Toko’e hisalasala ty hiantso iareo vao reke satria matahotse kera ho afa-baraka noho ireke montso ndra nanao hadisoagne? Azo antoke fa tsy izay! Hoe izay ka fa naho misy fotoagne tika mahatsiaro ho montso ndra nanao hadisoagne, le tsy toko’e hisalasala ty hivavake amy i Jehovah.​—Sal. 119:25, 176.

AKORE TY HAHAVY TY VAVAKE ATAO’O HISY HEVE’E LALEKE?

6-7. Nagnino ty fisaintsaignagne i toetse i Jehovah rey ro magnampe antika hanao vavake misy heve’e laleke? Magnomeza ohatse. (Henteo ka i fagnamarehagne ambane pejey.)

⁶ Hanjare hisy heve’e laleke ty vavake ataontikagne, naho aborantika amy i Jehovah ty raha an-tsaintika laleke agne naho ze tena tsapantika naho fa itika mivavake ama’e. Ino areke ty azontika atao mba hagnasoagne ty vavake ataontikagne?

⁷ Saintsaigno i toetse i Jehovah rey.a Arakarake ty isaintsaignantika i toetse’e rey ty vao mainke hahavy antikagne tsy hisalasala hirehake ty an-tsaintika agne. (Sal. 145:8, 9, 18) Mpiarotegne ty baba ty rahavave raike atao tihoe Kristine. Hoe reke: “Tena nisarotse tamako ty nitoka i Jehovah tihoe Rae. Nieretseretse raho tie noho iraho tsy voririke, le va’e hienga ahy reke.” Ino ty toetse i Jehovah nagnampe aze? Hoe reke: “Nahavy ahike hahatsiaro ho voaro ty hatea i Jehovah naho ty tsy fivaliha’e. Fantako fa lava hagnampe ahike avao reke. Ndra tie tonta aza raho, le mbe horambese’e aman-katea avao. Magnampe ahy zay mba hirehake ama’e ty raha tena mahafale naho tena mahakivy ahy.”

8-9. Ino ty soa ila’e rambesentika naho mieretseretse ty raha horehafentika hey tika vaho mivavake? Hazavao.

⁸ Eretsereto ty raha horehafe’o. Azo’o atao ohatse ty mieretseretse ty fagnonteneagne tsiampeampe retoa aloha ty hivavahagne: ‘Ino ty olagne manokagne atreheko tie amy izao? Misy ndaty mipay ty famelan-keloko vao? Misy raha sarotse vaovao atreheko vao, le mila ty fagnampea i Jehovah raho mba handreseako aze?’ (2 Mpanj. 19:15-19) Azontika atao ka ty magnorike ty modely nenga i Jesosy, le misaintsaigne miomba ty raha azontika angatahegne amy i Jehovah miomba ty Tahina’e, i Fanjakà’ey vaho ty Zoton’arofo’e.​—Mat. 6:9, 10.

⁹ Naho fa nihay ty rahavave raike atao tihoe Aliska tie, nivoa ty kansera amy ty betro’e ty vali’e, le nisarotse tama’e ty nivavake. Hoe reke: “Tena nikivy raho, le tsy nihaiko ty raha horehafeko naho fa nivavake.” Ino ty nagnampe aze? Nagnazava hoe izao reke: “Aloha ty hivavahako, le nangalake fotoagne kede hey raho mba hieretseretako ty raha horehafeko. Zay ty nagnampe ahy mba tsy hifantoke avao amy ty tegnako naho fa nivavake. Nanjare tony raho naho fa nanao izay sady afake nivavake amy i Jehovah miomba ty raha sambe hafa.”

10. Nagnino tika ro tsy toko’e hanao vavake memeke? (Henteo ka i sare rey.)

¹⁰ Ko memeke naho fa mivavake. Misy heve’e ndra tie ty vavake fohe aza. Faie tena afake hirehake ze an-tsaintikagne agne tika naho tsy memeke naho fa mivavake.b Hoe ty Elijah, valy i Aliska: “Mikezake mivavake mateteke amy i Jehovah raho agnate ty andro raike. Faie vao mainke mifandrambe ama’e raho naho fa tsy memeke naho fa mivavake. Tsy tihoe tsy hahaligne ty itapera ty vavake ataoko ty Jehovah. Afake malake fotoagne soa areke raho mba hivavahagne ama’e.” Oharo zao: Mipaliava fotoagne naho toeragne ahafaha’o mivavake. Va’e hahafaha’o mampiboake feo zay, tsy misy mpagnelengelegne sady ahafaha’o tsy manao vavake memeke.

SAINTSAIGNO I VAVAKE AMY TY FO AMY BAIBOLY AO REY

11. Ino ty soa rambesentika naho misaintsaigne i vavake amy ty fo amy Baiboly ao rey tika? (Henteo ka ty efajoro tihoe “Mitovy amy ty Tsapa Iareo Vao ty Tsapa’o?”)

¹¹ Va’e hahasoa azo ty fisaintsaignagne i vavake amy ty fo naho i hira masigne ndra salamo amy Baiboly ao rey. Naho irehe mandineke ty fomba nirehafa i mpanompon’Agnahare rey ty raha tan-tsay iareo laleke agne, le handrisike azo hamborake ty am-po’o ao amy i Jehovah zay. Va’e hahatrea rehake fideragne vaovao azo’o ampiliregne amy i vavake atao’oy ao ka rehe. Va’e hifandrambe amy ty raha iaigna’o ka i vavake trea’oy.

12. Ino ty fagnonteneagne azontika saintsaignegne naho fa mamaky i vavake rey tika?

¹² Naho fa irehe mamaky i vavake amy ty Soratse Masigne ao rey, le dineho zao: ‘Ia ty mirehake eto toy, le inogne ty raha niseho tamy ty fotoagne nirehafa’e aze? Azoko rehafegne vao ty hevetse eto toy naho fa mivavake? Ino ty lesogne azoko ianaragne boake amy toy?’ Va’e mila manao fikarohagne fagnampe’e ka rehe mba hahatreava’o ty vale o fagnonteneagne rehoe. Tena ilaegne zay. Andao handineke ohatse tsiampeampe.

13. Ino ty lesogne raike ianarantika boake amy i Hana miomba ty vavake? (1 Samoela 1:10, 11) (Henteo ka i sarey.)

¹³ Vakio ty 1 Samoela 1:10, 11. Niatreke olagne lahibey roe ty Hana tamy tie ireke nanao o vavake iohoe. Betsiterake reke sady nanao ze hampalahelo aze avao ka i rafe’ey. (1 Sam. 1:4-7) Naho tsy mete afake ka ty olagne atrehe’o, ino ty azo’o ianaragne boake amy ty vavake natao i Hana? Nahatsiaro ho nainvankivagne reke naho fa nivavake ela tamy i Jehovah sady namborake ze tam-po’e tao. (1 Sam. 1:12, 18) Hahatsiaro ho maivankivagne ka tika naho ‘apetrantika amy i Jehovah ze raha magnavesatse’ antika, le rehafentika ama’e ty raha tsapantika miomba ty olagne atrehentika.​—Sal. 55:22.

14. a) Ino ka ty raha hafa azontika ianaragne boake amy i Hana? b) Nagnino ty fisaintsaignagne ty Soratse Masigne ro afake magnampe antika hahatrea raha maro horehafegne naho fa mivavake? (Henteo i fagnamarehagne ambane pejey.)

¹⁴ Nindese i Hana tamy i Ely Mpisorom-bey agne ty Samoela ana-dahi’e, taogne tsiampeampe tafara tatoy. (1 Sam. 1:24-28) Amy ty vavake amy ty fo raike natao’e, le nirehafe’e fa rese lahatse reke tie miaro naho mikarakara ty mpanompo’e tsy mivalike ty Jehovah.c (1 Sam. 2:1, 8, 9) Va’e tsy niafake i olagne natrehe i Hana tan-tokatragno’e aoy, faie nifantoke tamy ty fomba fa nitahia i Jehovah aze reke. Ino ty lesogne ho antika? Hahavita hiatreke raha sarotse ka tika naho mifantoke amy ty fomba nanohagna i Jehovah antika amparake izay.

15. Naho miatreke tsy rare’e tika, ino ty azontika ianaragne boake amy ty fihalalea i Jeremia mpaminany? (Jeremia 12:1)

¹⁵ Vakio ty Jeremia 12:1. Nikivy ty Jeremia kindraike naho fa nitrea’e tie hoe sambatse zay o ndaty raty fagnahio. Nisy voka’e tama’e ka ty fomba nindesa i Israelita nama’e rey aze. (Jer. 20:7, 8) Takantika soa ty raha tsapa’e naho fa itika mahatrea ndaty manao ty tsy maregne ndra mitsikike antika, ie amy izao iareo hoe miadagne zay. Ndra tie nirehafe i Jeremia tamy i Jehovah aza fa nahaboseke aze o raha rehoe, le tsy nitsaratsara i Jehovah reke tie manao ty tsy rare’e reke. Naho fa nitrea’e ty nandilova i Jehovah i vahoa’e nigoreve rey, le tsy maintsy nitombo ty fatokisa’e tie manao ty rare’e ty Andrianagnahare. (Jer. 32:19) Tsy toko’e hisalasala hirehake ty raha mahaboseke antika ka tikagne naho fa mivavake sady hatoky tie hagnitsy i tsy rare’e amy izao rey ty Jehovah amy ty fotoagne mete.

16. Naho voafetra ty azontika atao noho ty raha iaignantika, ino ty azontika ianaragne boake amy i Levita ni-ndevoy? (Salamo 42:1-4) (Henteo ka i sare rey.)

¹⁶ Vakio ty Salamo 42:1-4. Nisorate ty Levita raike nindevo tsy afake nanompo tamy i tempolỳ ao niarake tamo o Israelita nama’e reo o hira iohoe. Mirehake ty raha nitsapa’e i salamo nisorate’ey. Va’e hahatakatse soa ty raha tsapa’e tika naho ohatse tsy afake miboake ty tragnon-tika ndra migadra noho ty finoantika. Va’e hiovaova ty fihetseham-pontika faie soa naho rehafentika amy ty vavake zay. Hagnampe antika hahatakatse ty raha tena tsapantika naho ty raha tena lahibey ty fanoagne izay. Nitsapa i Levitay ohatse tie misy fomba vaovao ahafaha’e midera i Jehovah. (Sal. 42:5) Nisaintsaigne’e ka ty fomba nikarakara i Jehovah aze. (Sal. 42:8) Ty fihalaleagne aman’Agnahare, le hagnampe antika hahafantatse ty raha tsapantika, ho tony indraike sady hanagne hery hiaretagne.

17. a) Ino ty azontika ianaragne boake amy ty vavake natao i Jona mpaminany? (Jona 2:1, 2) b) Nagnino ty rehake ila’e boake amy Salamo ao ro afake magnampe antika naho fa itika miatreke raha sarotse? (Henteo i fagnamarehagne ambane pejey.)

¹⁷ Vakio ty Jona 2:1, 2. Tamy tie i Jona tan-tro i fian-beỳ ao ty nanao o vavake iohoe. Ndra tie tsy nankatò i Jehovah aza reke, le natoky tie hijanjigne aze ty Jehovah. Nampiasa rehake maro boake amy Salamod ao reke amy i fihalaleagne natao’ey. Va’e nahay soa o Salamo iohoe reke. Noho ty fisaintsaigna’e irey, le natoky reke fa hagnampe aze ty Jehovah. Naho itika ka mikezake mitadidy andine’e amy Baiboly ao, le va’e hotsiarontika rey sady hampahery antika naho fa itika mivavake amy i Jehovah amy itika miatreke raha sarotsey.

MAGNANTOGNA I JEHOVAH AMY TY ALALA TY VAVAKE AVAO

18-19. Naho fa sarotse amantika ty mirehake ty raha tsapantika, le ino ty fagnomezan-toky treantika amy Romana 8:26, 27 ao? Magnomeza ohatse raike.

¹⁸ Vakio ty Romana 8:26, 27. Misy fotoagne tika va’e hinekoneko bey loatse, le tsy haintika ty hirehafagne ty raha tsapantika. Faie tsy tihoe tsy misy magnampe tika. Amy ze fotoagne zay, le “mihalale” ho antika ty fagnahy masin’Agnahare. Amy ty fomba akore? Nampiasa ty fagnahi’e ty Jehovah mba handrisihagne i mpanoratse Baiboly rey hanoratse i vavake rey agnate ty Saontsi’e ao. Va’e heke i Jehovah ho fangatahantika areke i vavake amy ty Saontsi’e ao rey, le hovalea’e naho fa tsy haintika ty hirehafagne ty raha an-tsaintika ao.

¹⁹ Nagnampe ty rahavave Rosiana atao tihoe Yelena ze hevetse zay. Nisamboregne reke noho ireke nivavake naho namaky Baiboly. Tena nikivy bey ty Yelena, le sarotse tama’e ty nivavake. Hoe reke: “Naho fa iraho ninekoneko bey sady tsy nahatrea horehafegne, le nitsiaroko tie, azo i Jehovah ekegne ho fangatahako i vavake natao ty mpanompo’e taloha amy Baiboly ao rey ... Tena nampahery ahike zay tagnate i raha sarotse natrehekoy.”

20. Akore ty azontika agnomanagne ty saintika naho fa hivavake?

²⁰ Naho fa kivy tika, le va’e ho sarotse amantika ty hifantoke amy itika mivavakey. Mba hagnomanantika ty saintika, le azontika atao ty mitsanogne i Salamo nalaem-peo rey. Azontika atao ka ty manoratse ty raha tsapantika, manahake ty natao i Davida Mpanjaka. (Sal. 18; 34; 142; naho ty rehake mampizilike aze.) Mazava ho aze fa tsy misy fitsipike miomba ty fomba toko’e hagnomanantika ty vavake ataontika. (Sal. 141:2) Anò areke ze mete ama’o.

21. Nagnino tika ro toko’e hivavake amy ty fontika iaby?

²¹ Tena mampahery antika ty mahay tie, mahafantatse soa ty raha tsapantika ty Jehovah ndra tie mbe tsy mirehake aza tika. (Sal. 139:4) Faie tea’e ka ty mijanjigne antika mirehake ty fatokisantika aze. Ko misalasala areke mivavake amy i Rae’o an-dagnitse agney. Ampiasao ty rehake amy i vavake amy ty Saontsi’e ao rey. Mivavaha amy ty fo’o iaby. Rehafo ama’e ty raha mahafale naho mampalahelo azo. Ho ama’o eo avao ty Jehovah i tena Ragne’oy!