FAGNONTENEA O TANORAO
Afake Magnampe Ahy vao ty Baiboly?—Fizaràgne 2: Anò Mahafinaritse ty Famakia’o Baiboly
Hoe ty ajaja lahilahy raike atao tihoe Will: “Hoe mahakamo o Baibolio naho tsy hai’o soa ty fomba hamakiagne aze.”
Tea’o ho fantatse vao tie akore ty atao naho tea’o hahafinaritse azo ty famakia’o Baiboly? Hagnampe azo amy izay ty lahatsoratse toy.
Alao sare an-tsaigne ze vakie’o
Anò mitovy amy tihoe mahatrea i raha misehoy rehe. Azo’o atao ohatse zao:
Mifiliana tantara raike amy Baiboly ao tea’o hianaragne. Afake mifily raha niseho raike ndra fitantaragne raike amy i filazantsara rey ao rehe. Azo’o atao ka ty mifily tantara raike amy i manao tihoey: Tantara Tsanognagne amy jw.org ao.
Vakio i tantaray. Azo’o vakiegne raike ndra vakiegne mafe miarake amy ty nama’o ndra amy ze an-tragno’areo ao io. Ty raike ohatse, mamaky ty anjara i mpitantaray, le ty ila’e mamaky ty reha o ndaty amy i tantaray ao.
Misy soso-kevetse azo’o andramagne retoa:
Mamboara sare mifandrambe amy i tantaray. Afake manao sare maromaro mifampitohy rehe mba hitantaragne ze raha niseho. Sorato agnila ty sare tsikiraidraike eo ty raha niseho tamy igne.
Mamboara tabilò. Naho fa mamaky tantara o ndaty raike tsy nivalike ohatse rehe, le ampifandrambeso amy ty fitahiagne niazo’e ty toetse i ndatỳ naho ty raha natao’e.
Anò mitovy amy tihoe mpanao gazete rehe. Tantarao i raha nisehoy arakarake ty fahatreava ty ndaty sambe hafa aze. Le ampidiro amy i tihoey “fagnadihadiagne” natao tamy ze mpandrambe anjara fototse naho ty ndaty hafa nagnatre-maso aze.
Naho nanao raha tsy mete ty ndaty raike amy i tantaray ao, le eretsereto tie mete ho nanao akore ty niafara i tantaray naho nahay nanapa-kevetse reke. Eretsereto ohatse ty Petera i nandietse i Jesosỳ. (Marka 14:66-72) Ino ty toko’e ho natao i Petera tamy i reke nagnontenea i ndaty reỳ?
Naho mahay mamoron-kevetse rehe, le magnohara manoratse tantara mioregne agnate Baiboly ao. Ampiliro ao ty fianaragne azo’o rambesegne boake amy i tantaray.—Romanina 15:4.
Anò mitovy amy tihoe tena trea’o i tantaray!
Manoa fikarohagne
Va’e hahafantatse raha sarobily tsy nieretserete’o rehe naho mandineke ty pitsopitso’e. Rehake raike ndra roe avao, le va’e fa hisy dika’e bey.
Ampitahao ohatse ty Matio 28:7 naho ty Marka 16:7.
Nagnino ty Marka ro nampilitse pitsopitso’e tihoe kede sisa ty Jesosy, le hiseho amy i apostoly rey “naho amy i Petera?”
Soa ho fantatse: Tsy nahatrea maso ty raha nitantarae’e ty Marka. Azo antoke fa i Petera ro nitantara tama’e.
Fahalalagne sarobily: Tsy maintsy ho nahazo aigne ty Petera naho fa nifanta’e tie te hahatrea aze ty Jesosy. Fa nagnino? (Marka 14:66-72) Akore ty nampisehoa i Jesosy fa tena nama’e ty Petera? Akore ka ty hahavy azo ho tena namagne manahake i Jesosy?
Vao mainke hahafinaritse azo ty mamaky Baiboly, naho atao’o velombelogne i tantaray sady karohe’o ty pitsopitso’e!