Anjomba Midera i Mpagnanatse Lahibey Tsy Misy Hoe’ey

Tea i Jehovah ty mampianatse o vahoa’eo. Le izay ty nahavy ty fandamina’e nandamigne sekoly maro mba hampiofagnagne ty mpianatse hamita soa ty asa anendreagne aze. Agnisa i sekoly rey ty Sekoly ty Mpitory i Fanjakagney (SMIF). Tsy ty raha ianaragne amy i sekoly rey ao avao ty hasoae i fandaminagne ty amy hinane zao fa hasoae’e ka ndra i tragno anoagne i fiofagnagney rey. Ty tanjogne ama’e, le ty hahavy i mpampianatsey ho mora ama’e ty mampianatse sady ho mora amy i mpianatsey ka ty mianatse. Nagnino ty fagnomezagne atao’o ro magnampe anay hahatratse o tanjogne iohoe?

Maro i Mpianatsey Sady Soa ka i Toeragne Fianaragney

Tagnate ty taogne maro, le tamy ty Anjomba i Fanjakagney agne ndra tamy ty Anjomba Fanoagne Havoriambey ty nanoagne o sekoly ara-baibolio. Faie, nagnino tika ro nagnoregne naho nagnavao tragno maro mba hanoagne sekoly ara-baiboly? Retoa misy anto’e telo.

Maro ty raha ipaliagne ty mpitory nahavita SMIF. Hoe ty rahalahy Christopher Mavor mpagnampe ty Komity ty Fanompoagne amo o Filan-keve-pitantanagneo eo tie: “Maro ty birò i sampagne mirehake ama’ay tie mipay rahalahy naho rahavave maro mba hanompo amy i faritaney ey. Nanombatombagne zao ty sampa i Brezily tamy 2019 fa mpitory nahavita SMIF eo ho eo amy ty 7 600 ty paliae iareo mba hagnampe amy i faritane iareoy ey.” Nirehake ka ty sampa i Etazonia fa mipay mpisava lalagne maro iareo mba hampiofagne ty hafa amy i fandaharagne manokagne natao mba hitoriagne amy ty toeragne maro ndaty am-posetse eỳ, amo o fitolian-tsambò ey vaho am-pirizò agne. Maro ka ty rahalahy ilaegne mba hagnampe amy ty Sampan-draharaha ty Fagnoregnagne An-toeragne Eo naho ty Komity Mifandrambe amy ty Lapotaly. Afake magnampe amo o asa rehoe ty mpitory nahavita SMIF.

Mihamaro i mpianatsey. Amy ty sampagne maro agne, le maro mandikoatse ty isa ty mpianatse horambesegne ty isa ty mpitory manao fangatahagne. Ty sampa i Brezily zao ohatse, le mahavoarae fangatahagne miiake 2 500 eo ho eo isan-taogne. Faie noho i toeragney tsy ampe, le mpianatse 950 avao ty nirambesegne hanao i sekolỳ.

Toeragne itobohagne mete soa. Naho fa amy i Anjomba i Fanjakagney agne ndra amy ty Anjomba Fanoagne Havoriambey ty anoagne i sekolỳ, le mateteke ro amy ty tragno ty mpiara-manompo marine eo ty ivantagna i mpianatse rey. Mete soa o fandaharagne iohoe naho tsy ampe avao ty sekoly atao amy i toeragney eo isan-taogne. Faie naho maro ty sekoly atao ao, le tsy ho vita o mpitorio ty handrambe i mpianatse rey agnate ty volagne maromaro. Izay ty anto’e nagnomeagne iareo tragno marine i toeragne fianaragney sady natao mifagnarake amy ze raha ilae iareo.

Arakarake i toeragney ndra noho ty anto’e hafa, le va’e ho vola an-tapetrisa’e dolara amerikana ty lany amy ty tragno raike misy efetse fianaragne, tragno i mpampianatsey, tragno hoahy ty mpianatse 30 eo ho eo, vaho ty toeragne ampiasae iareo amy ty raha isan-karaza’e paliae iareo.

Ty Raha Mampiambake i Tragno Fanoagne Sekolỳ

Mateteke i tragno fanoagne sekoly rey ro atao amy ty toeragne bangigne sady lavidavitse i posetsey faie misy tognabile ndra taxi mpitaogne ndaty mandeha mbeo. Mete soa i toeragney naho amy ty toeragne maro mpitory afake magnampe mba hampandeha soa i sekolỳ naho hikojakoja i tragnoy naho ty fitaovagne ao.

Misy fagnajariam-boke, toeragne azo ianaragne, ordinatera, fitaovagne fanoagne pirinty naho fitaovagne hafa ty amy i tragno rey ao. Mateteke ka ro misy tragno fihinanagne afake iharoa i mpampianatsey naho i mpianatsey mihinagne ty ao. Tsy izay avao, fa mbe nasiagne toeragne malalake mba hanoagne sporo naho hihisagne ka ty ao.

Natao mete soa ka i tragno fianaragney. Izao ty raha nirehafe i Troy, miara-miasa amy ty Sampan-draharaha ty Fagnoregnagne Magneran-tane a Warwick agne: “Nangatake fagnampeagne tamy ty sampan-draharaha ty sekoly ta Patterson agne zahay naho fa nanao ty plany i tragno fianaragney, amy izay ho mora amy i mpianatsey ty mianatse ao. Natoro iareo anay ty toko’e hohabei’e naho ty pozipozi’e, ty karazan-jiro mete naho atao ao naho ty fitaovagne hampiasaegne amy ty feo naho ty video.” Nirehake hoe izao ka miomba ty fitaovagne mifandrambe amo o feò ty Zoltán mpampianatse amy ty SMIF, a Hongria agne: “Tsy nanagne mikrò zahay tamy ty voaloha’e, le tsy maintsy nitiahivegne mateteke o mpianatseo mba hirehake mafe. Faie amy hinane zao, le fa milamigne soa zahay satria misy mikrô isan-databatse.”

“Ambahiny Bey Asae i Jehovah”

Ino ty nivoka’e tamy i mpianatsey naho tamy i mpampianatsey naho fa nihasoaegne i tragno fanoagne sekolỳ? Hoe ty Angela, nagnatreke SMIF ta Palm Coast a Floride, a Etazonia agne: “Tena milamigne soa i toeragney. Milamigne iaby ka ze kila raha, agnisa izay i tragno fianaragney naho i tragno nivantagna’aỳ. Manjare afake mifantoke soa amy i fianaragney zahay voka izay.” Fa ty raha tena nitea ty mpampianatse raike a Hongria agne atao tihoe Csaba toy, le ty miarake mihinagne amy i mpianatse rey. Hoe reke: “Tsy matahotahotse anay o mpianatseo, le mitantara ama’ay ty raha niaigna’e. Nanjare nifanta’ay soa iareo voka izay, le igne ty nagnampe anay hampifagnarake i raha hianaragney amy ty raha paliae iareo.”

Rambese o mpianatseo naho o mpampianatseo ho fitahiagne boake amy i Jehovah ndra i “Mpagnanatse Lahibey Tsy Misy Hoe’ey” i fagnasoagne natao tamy i tragno fanoagne sekolỳ rey. (Isaia 30:20, 21) Hoe ty rahavave raike a Filipiny agne, boake nagnatreke SMIF tamy ty tragno nihavaozegne mba hanoagne sekoly: “Naniahy anay i toeragney fa tsy tihoe mpianatse avao zahay fa ambahiny bey nasae i Jehovah ka. Tea’e ho falefale zahay naho fa nianatse ty Saontsi’e.”

Ty fagnomezagne atao areo ro ahavitagne magnoregne, magnavao naho mikojakoja o tragno fanoagne sekolio. Maro ama’areo ty manao fagnomezagne amy ty alala ty donate.jw.org. Le vata’e misaotse anareo zahay noho ty fatariha’areo.