Akore ty Handaminagne ze Raha Manahiragne?

Ho tsiefa ty raha manahiragne ho tendreke anareo mirovaly ankandavà ty hiveloma’areo. Inogne ty anto’e? Va’e sambe hanagne ty heve’areo naho ty eretsere’areo nareo, ndra sambe managne ty hindesa’e ty fiaignagne. Va’e tsy ho boake ama’areo ty ifotora ty raha manahiragne, ndra ty raha miseho tsy ampoizegne.

Va’e tsy te hidare ty raha manahiragne manjò tikagne, faie mandrisike antikagne ty Baiboly mba handamigne aze. (Matio 5:23, 24) Ho hai’o ty handaminagne aze naho magnorike ty fanoroa ty Baiboly rehe.

1 REHAFO ZE RAHA MANAHIRAGNE AZO

INOGNE TY RAHA REHAFE TY BAIBOLY? “Misy andro irehafagne.” (Mpitoriteny 3:1, 7) Mipalià andro hirehafagne i raha manahiragney. Ambarao i vali’o ty manjò azo naho ty eretsere’o miomba i raha manahiragney. “Mirehafa ty maregne” lognandro. (Efesianina 4:25) Ko mialy amy i vali’o ndra tie manao akore ty habose’o naho ty fanahelo’o. Tsy hampialy ty rehake maleme anoe’areo naho tsy tsekatsekake ty mamale aze.—Ohabolana 15:4; 26:20.

Ko masiake ndra tie tsy teà’o ty heve i vali’o. Ko haligno fa toko’e hatoro’o tie tea naho miasy i vali’o rehe. (Kolosianina 4:6) Le avy le alamigno tsiela i raha manahiragney sady ko mifombo.—Efesianina 4:26.

INOGNE TY TOKO’E HATAO’O?

• Mipalià andro hirehafagne i raha manahiragney

• Ko tapahegne ty reha i vali’o fa toe mbe hirehake avao rehe naho fa tapetse ty aze

2 MITSANOGNA SOA SADY FANTARO TY TEÀ’E HATAO

INOGNE TY RAHA REHAFE TY BAIBOLY? “Atorò fa mifampikoko vata’e nareo. I nareo ty ho voaloha’e naho amy ty fifagnomeagne engegne.” (Romanina 12:10) Ko atao ambanen-draha ty fahaiagne mitsanogne. Toko’e ho fanta’o ty raha manjò i vali’o sady ‘miambanea’ naho fa mitsanogne aze. Anò ty hahafantara’o ty heve’e. (1 Petera 3:8; Jakoba 1:19) Ko manao sare mitsanogne avao. Apoho hey ze raha anoe’o, naho tsy mampagnino, le tsanogno soa ty raha rehafe i vali’o. Ndra agnonteneo reke tie tsy mampagninogne aze naho rehafe’e amy ty afara. Tsy “ho tsiela boseke” rehe naho fa tsy mahahaligno tie mpiragnetse nareo fa tsy mpirahambagne.—Mpitoriteny 7:9.

INOGNE TY TOKO’E HATAO’O?

• Tsanògno soa ty vali’o sady dineho soa ty raha rehafe’e, ndra tie tsy teà’o ty heve’e

• Eregneregno soa ty rehake teà’e ho rehafegne. Dineho soa ty ven-dreha’e naho ty toetoe ty feo’e

3 ORIHO ZE RAHA FA NIHAROAGNE LAHATSE

INOGNE TY RAHA REHAFE TY BAIBOLY? “Ahatreavagne tombo’e ze raha irokafagne, fa ho rarake ze miasa ty rehake avao.” (Ohabolana 14:23) Va’e hahatrea hevetse soa nareo handaminagne aze faie mbe tsy ampe aze. Ampahavio ka ze raha fa nilahare’areo. Va’e hikezake mafe nareo hagnatò izay faie tsy ho motso antoke. (Ohabolana 10:4) Hovalean-tsoa ty asa mafe anoe’areo mirovaly naho mifanohatohagne nareo.—Mpitoriteny 4:9.

INOGNE TY TOKO’E HATAO’O?

• Laharo’areo ty raha hatao ty tsikiraikiraike handaminagne i raha manahiragney

• Hentehenteo ty raha fa nikezaha’areo