Faminaniagne 6. Fitoriagne Magneran-tane
“Hotoriegne magneran-tane ty talily soa i fanjakagney toy.”—MATIO 24:14.
● Amy ty tokonose raike lavitse i Pasifike, amy ty Vondron-tokonose Tuamotu, ty itoboha i Vaiatea. Misy tokonose kedekede 80 ty magneragne o faritse iohoe, sady mirefe 802 900 kilometatse miheregne indroe, faie 16 000 eo ho eo avao ty ndaty mitoboke agne. Faie niavy tamy i Vaiatea agne naho ty mpiharo tanàgne ama’e agne o Vavolombelo i Jehovah-o. Tea iareo ty mizara ty talily soa i Fanjakàn’Andrianagnaharey amy ze ndaty iaby, ndra aia ndra aia ty misy iareo.
MAMPISEHO INO TY RAHA MISY? Maharey ty hafatse miomba i Fanjakagney ty ndaty magneragne ty zoron-tane iaby. Tamy 2010 avao ohatse, le 1 600 tapetrisa mahery ty lera lany o Vavolombelo i Jehovah-o nitoriagne ty talily soa tamy ty tane 236. Midika zay fa mitory 30 minitra eo ho eo isan’andro ty Vavolombelogne raike. Boke naho gazete vaho raha hafa miiake 20 000 tapetrisa mahery ty naboa iareo naho zinara iareo tagnate ty folo taogne lasa.
INO TY HEVE O NDATIO? Fa agn’arivo’e taogne ty nitoriagne o Baibolio.
MAREGNE VAO ZAY? Maregne fa maro ty nitory ty hafatse amy Baiboly ao. Faie fotoagne fohe avao ty ankamaroa’e ro nanao izay, sady tamy ty faritse kedekede avao ka. Ty Vavolombelo i Jehovah mitory magneran-tane amy ty ndaty an-jato’e tapetrisa, sady voalamigne soa zay. Nitory avao iareo ndra tie nanohetse mafe aza ty ila’e amy ty fikambanagne matanjake naho raty fagnahy hatrake amy izay.a (Marka 13:13) Tsy karamaegne iareo naho fa mitory, fa mahafoe ty fotoa’e, sady mizara boke naho gazete maimaimpoagne. Fagnomezagne foe o ndaty ty mampandeha ty asa iareo.
AKORE TY HEVE’O? Toriegne magneran-tane vao “ty talily soa i fanjakagney?” Ty fahatanteraha o faminaniagne iohoe vao va’e hidika fa hisy raha soa hiseho tsy ho ela?
[Fagnamarehagne ambane peje]
a Naho mipay fagnazavagne fagnampe’e, le henteo ty video tihoe “Nahatoky tao Anatin’ny Fitsapana” naho “Telozoro Volomparasy” (malagasy), vaho “Niorina Mafy ny Vavolombelon’i Jehovah Nanoloana ny Fanafihana Nazia” (frantsay), naboa ty Vavolombelo i Jehovah.
[Hevetse Lahibey]
“Hazoto hitory ty talily soa i Fanjakagney avao tikagne, naho mbe mienga antikagne hanao izay ty Jehovah. Hipay ze fomba iaby hitoriagne amo o ndatio tikagne.”—DIARIN’NY VAVOLOMBELON’I JEHOVAH 2010.