ኣቐዲምካ ፍርዲ—በዝስ ተለኺፍካ ዲኻ፧

ሰባት ነቶም ካባታቶም እተፈልየ ዜግነት፡ ዓሌት፡ ዘርኢ፡ ወይ ቋንቋ ዘለዎም ሰባት ጥራይ ዘይኰነስ፡ ነቶም እተፈልየ ሃይማኖት፡ ጾታ፡ ወይ ማሕበራዊ ደርቢ ዘለዎም ሰባት እውን ኣቐዲሞም ይፈርድዎም እዮም። ገሊኦም ንሰባት ብምኽንያት ዕድሚኦም፡ ትምህርቶም፡ ስንክልናኦም፡ ወይ ትርኢቶም ብኣሉታዊ ይፈርድዎም እዮም። ኰይኑ ግና፡ ኣቐዲሞም ይፈርዱ ኸም ዘለዉ ኸይመስሎም ይኽእል እዩ።

እሞኸ በዚ ኣቐዲምካ ፍርድስ ተለኺፍካ ዲኻ፧ መብዛሕትና፡ ካልእ ሰብ ኣቐዲሙ ኺፈርድ ከሎ ይርኣየና እዩ። ንሕና ኸምኡ ኽንገብር ከለና ግና ኣይርኣየናን እዩ። ከም ሓቂ ግና፡ ኵላትና ብእተወሰነ ደረጃ ኣቐዲምና ንፈርድ ኢና። ዴቪድ ዊልያምስ ዚብሃል ፕሮፌሰር ስነ ማሕበር፡ ሰባት ብዛዕባ ሓደ ጕጅለ ኣሉታዊ ነገር ዚሓስቡ እንተ ዀይኖም እሞ ምስ ሓደ ኻብቶም ጕጅለ ምስ ዚራኸቡ፡ “ነቲ ሰብ እቲ ኸይተፈለጦም ብእተፈልየ መገዲ እዮም ዚሕዝዎ” ይብል።

ንኣብነት፡ ኣብታ ዮቪሳ ዚነብረላ ኣብ ባልካን እትርከብ ሃገር፡ ውሑዳን ጕጅለ ኣለዉ። ዮቪሳ ኸኣ፡ “ዋላ ሓደ ኻብቶም ጕጅለ ጥዑይ ሰብ ዚኸውን ኣይመስለንን እዩ ነይሩ” ኢሉ ዝነበሮ ኣተሓሳስባ ይእመን። ኣስዕብ ኣቢሉ ድማ፡ “ኣቐዲመ እፈርድ ምንባረይ ግና ኣይፍለጠንን እዩ ነይሩ። ‘ስለምንታይሲ፡ እዚ ሓቂ እዩ’ ኢለ ንርእሰይ አእምና ነይረ” ይብል።

ሓያሎ መንግስትታት ንዓሌትነትን ንኻልእ ዓይነት ኣቐዲምካ ፍርድን ዚኽልክል ሕግታት የውጽኣ እየን። ይኹን እምበር፡ ኣቐዲምካ ፍርዲ ኣይጠፍአን። ስለምንታይ፧ ምኽንያቱ፡ እቲ ሕግታት እቲ ንተግባር ሰብ ጥራይ እዩ ዚኽልክል። ንሓሳባትን ንስምዒታትን ሰብ ኪቈጻጸር ኣይክእልን እዩ። ኣቐዲምካ ፍርዲ ድማ ኣብ ኣእምሮን ልብን ሰብ እዩ ዚጅምር። እሞ ደኣ ኣንጻር ኣቐዲምካ ፍርዲ ዚግበር ቃልሲ፡ ክንዕወተሉ ዘይንኽእል ቃልሲ ድዩ፧ ኣቐዲምካ ፍርድስ ፈውሲ ኣለዎዶ፧