ፍቕሪ ኣርእዮም

እቲ ጸገም

ኣቐዲምካ ናይ ምፍራድ ጸገም ቀልጢፉ ኣይጠፍእን እዩ። ከምቲ ንቫይረስ ንምውጋድ ግዜ ዜድልዮ፡ ኣቐዲምካ ናይ ምፍራድ ጸገም ንምውጋድ እውን ግዜን ጻዕርን የድልዮ እዩ። እሞ ደኣ ንኣቐዲምካ ፍርዲ ኻብ ውሽጥኻ ኣውጺእካ ንምጕሓፍ እንታይ ክትገብር ትኽእል፧

ስርዓት መጽሓፍ ቅዱስ

ስእልታት፦ 1. ሓደ እስያዊ ንሓደ ቡን ዝሓዘ ጸሊም ሰብኣይ ማዕጾ ኸፊቱ ይሕዘሉ። 2. እቲ ጸሊም ሰብኣይ ነቲ ሒዝዎ ዝመጸ ቡን ንመሳሕርቱ ይህቦም፣ ሓንቲ ኻብቶም መሳርሕቱ፡ እታ ኣቐዲማ እተራእየት ህንዳዊት እያ።

“ፍቕሪ ፍጽምቲ ማእሰር ሓድነት እያ እሞ፡ ልበስዋ።”—ቈሎሴ 3:14።

እዚ እንታይ ማለት እዩ፧ ንሰብ ጽቡቕ ምግባር፡ የቀራርብ እዩ። ንሰባት ፍቕርኻ ብዘርኣኻዮም መጠን፡ ኣቐዲምካ ኣይትፈርዶምን ኢኻ። ብዝያዳ ብዘፍቀርካዮም መጠን ከኣ፡ ኣብ ልብኻ ጽልእን ንዕቀትን ቦታ ይስእን እዩ።

ክትገብሮ እትኽእል

ስእልታት፦ 1. ሓንቲ ህንዳዊት ንሓንቲ ብዕድመ ዝደፍአ ጻዕዳ ሰበይቲ ኣስቤዛኣ ተሰኪማ ብመደያይቦ ተደይበላ። 2. እታ ብዕድመ ዝደፍአት ጻዕዳ ሰበይቲ ነቲ ኣቐዲሙ እተራእየ እስያዊ ብሽኮቲ ትህቦ።

ንኣባላት እቲ ብኣሉታዊ እትርእዮም ጕጅለ፡ ፍቕሪ እተርእየሉ መገድታት ሕሰብ። እዚ ተግባራት እዚ ግድን ዓብዪ ኪኸውን የብሉን። ካብዚ ዚስዕብ ንሓዲኡ ወይ ካብኡ ንላዕሊ ኽትገብር ፈትን።

ፍቕሪ ዜርኢ ንእሽቶ ነገር ብዝገበርካ መጠን፡ ካብ ኣቐዲምካ ፍርዲ ኽትርሕቕ ኢኻ

ንኣባላት እቲ ጕጅለ ማዕጾ ኸፊትካ ብምሓዝ ወይ ኣብ ህዝባዊ መጕዓዝያ ኾፍ መበሊ ብምሕዳግ፡ ጽቡቕ ጠባይ ኣርእዮም።
ቋንቋኻ ኣጽርዮም ዘይዛረቡ እኳ እንተ ዀኑ፡ ቍሩብ ከተዕልሎም ፈትን።
ኪርድኣካ ዘይከኣለ ነገር እንተ ገይሮም፡ ተዓገሶም።
ብዛዕባ ጸገማቶም እንተ ነጊሮምኻ፡ ደንግጸሎም።

ናይ ሓቂ ኣብነት፦ ናዛረ (ጊኒ-ቢሳው)

“ሓደ ግዜ፡ ንስደተኛታት ኣቐዲመ እፈርዶም ነይረ። ብዙሓት ስደተኛታት እናኣጠፋፍኡ ብማሕበራዊ ጥቕምታት ኸም ዚናበሩ፡ ብዙሓት ድማ ገበነኛታት ምዃኖም እየ ሰሚዐ። እዚ ኸኣ ከም ዘይቅበሎም ገይሩኒ ነይሩ። መብዛሕትኦም ሰባት ንስደተኛታት በዚ ኸምዚ ስለ ዚርእይዎም ግና፡ ነዚ ስምዒተይ ከም ኣቐዲምካ ፍርዲ ገይረ ኣይኰንኩን ዝርእዮ ነይረ።

“ደሓር ግና፡ እቲ ንስደተኛታት ዝነበረኒ ኣሉታዊ ኣረኣእያ፡ ኣቐዲምካ ፍርዲ ምዃኑ ተገንዚበ። እቲ ኣብ መጽሓፍ ቅዱስ ዚርከብ ግብራዊ ምኽሪ፡ ንዓታቶም ብዝያዳ ፍቕሪ ኸርኢ ሓጊዙኒ። ሕጂ ኣየርሕቖምን እየ። ብኣንጻሩ እኳ ደኣስ፡ ሰላም እብሎምን እዛረቦምን እየ። ንነፍሲ ወከፎም ብብሕቲ ኽፈልጦም እጽዕር እየ። ሕጂ ብዛዕባኦም ዘሎኒ ስምዒት ኣወንታዊ እዩ፣ ምሳታቶም ክኸውን ከለኹ እውን ጽቡቕ እዩ ዚስምዓኒ።”