ትዘራረብ ከም ዘለኻ ጌርካ ምቕራብ

ሰባት ብሓፈሻኡ ምስ ፈተውቶም ኪዘራረቡ ኸለዉ ፍዅስ እዩ ዚብሎም። እቲ ዚጥቀሙሉ ቓላት ኣብቲ ህሞት እቲ እዮም ዚመርጽዎ። ገሊኦም ውልቀ-ሰባት ስምዒቶም ብዚግባእ ዚገልጹ ኪዀኑ ኸለዉ: ገሊኦም ግን ስቕ በሃልቲ እዮም። በዚ ዀነ በቲ: ባህርያዊ ኣዘራርባ ምጥቃም ንዘረባ ማራኺ ይገብሮ እዩ።

ንሓደ ዘይትፈልጦ ሰብ ክትቀርቦ ኸለኻ ግን: ኣመና ኸም እትፈልጦ ጌርካ ወይ ንቓላትካ ኸይተጠንቀቕካ ምዝራብ ግቡእ ኣይኰነን። አረ ኣብ ገሊኡ ባህልታት እሞ ኸኣ: ኵሉ እቲ ምስ ዘይትፈልጦ ሰብ ዚግበር ዝርርብ ወግዓዊ ስርዓት ሓሊኻ እዩ ዚግበር። ግቡእ ኣኽብሮት ምስ ኣርኣኻዮ: በብቝሩብ ወግዓዊ ቛንቋ ብምንካይ ከምቲ ኣብ ካልእ ግዜ እተዘውትሮ ንቡር ኣዘራርባ ኽትስዕብ ትኽእል ኢኻ።

ካብ መድረኽ ክትዛረብ ከለኻ እውን ክትጥንቀቕ ኣሎካ። ኣዘራርባኻ ተራ ዕላል እንተ መሲሉ: ነቲ ክርስትያናዊ ኣኼባ ዘለዎ ርዝነት ኬፍኵሶ ይኽእል እዩ። ኣብ ገሊኡ ቛንቋታት ንዓብዪ ሰብ: ንመምህር: ንብዓል ስልጣን: ወይ ንወላዲ ኸተዘራርብ ከለኻ: እተፈልየ ቓላት ክትጥቀም ኣሎካ። (ኣብ ግብሪ ሃዋርያት 7:2፣ 13:16 ዚርከብ ቃላት ኣስተብህለሉ።) ንብዓልቲ ቤትካ ወይ ንናይ ቀረባ ፈታዊኻ ኸተዛርብ ከለኻ: እተፈልየ ቓላት ትጥቀም ኢኻ። እቲ ኣብ መድረኽ እንጥቀመሉ ኣዘራርባ እውን እምብዛ ወግዓዊ ኪኸውን እኳ እንተ ዘይብሉ: ክብሪ ዝሓለወ ግን ኪኸውን ኣለዎ።

እንተዀነ ግን: ንኣቀራርባ ብዘየድሊ ደረቕ ወይ እምብዛ ወግዓዊ ኼምስሎ ዚኽእል ረቛሒታት ኣሎ። ሓደ ኻብዚ: ኣቃውማ ምሉእ ሓሳብ ወይ ኣሰራርዓ ሓረጋት እዩ። ሓደ ሰብ ነቲ ኣብ ጽሑፍ ዘሎ መግለጺታት ከም ዘለዎ ኺደግሞ ኺጽዕር ከሎ: እዚ ጸገም እዚ ይፍጠር እዩ። እቲ ኣብ ጽሑፍ ዚሰፍር ቃል መብዛሕትኡ ግዜ ኻብቲ ኣብ ዘረባ እንጥቀመሉ ቓል እተፈልየ እዩ። ሓቂ እዩ: ንመደረ ኽትዳሎ ኸለኻ: ኣብ እተሓትመ ጽሑፍ ተመርኲስካ ኢኻ ምርምር እትገብር። ንመደረኻ መሰረት ዚዀነካ ኸኣ ብጽሑፍ ዚወሃበካ ኣስተዋጽኦ ኪኸውን ይኽእል እዩ። እንተዀነ ግን: ከምቲ ኣብቲ ጽሑፍ ዘሎ ጌርካ ሓሳባት እንተ ገሊጽካ: ወይ ኣብ መንጎ መደረኻ ኻብቲ ኣስተዋጽኦ ብቐጥታ እንተ ኣንቢብካ: መደረኻ ትዘራረብ ከም ዘለኻ ኺመስል ኣይክእልን እዩ። ትዘራረብ ከም ዘለኻ ጌርካ ንምቕራብ: ንሓሳባትካ ብናትካ ቓላት ግለጾ: እተሓላለኸ ኣቃውማ ምሉእ ሓሳብ ድማ ኣይትጠቐም።

ካልእ ረቛሒ ኸኣ ኣብ ፍጥነት እተርእዮ ለውጥታት እዩ። ኣብ መንጎ ቓላት ዘሎ ዕረፍቲ ኣመና ዚመሳሰል: ፍጥነትካውን ሓደ ዓይነት እንተ ዀይኑ: ዘረባኻ ደረቕን ወግዓውን እዩ ዚኸውን። ምስ ሰብ ኣብ እትገብሮ ዝርርብ: ፍጥነትካ ትቐያይር: እተፈላለየ ንውሓት ዘለዎ ዕረፍቲ ድማ ትገብር ኢኻ።

ልክዕ እዩ: ንብዙሓት ሰማዕቲ ኽትዛረብ ከለኻ: ዋላ እውን ምስ ካልእ ትዘራረብ ከም ዘለኻ ጌርካ ኣቕርቦ: ኣቓልቦኦም ምእንቲ ኽትስሕብ ድምጽኻ ኽትውስኽ: ብዝያዳ ኣትርር ኣቢልካ ኽትዛረብ: ከምኡውን ውዕዉዕ ስምዒት ወሲኽካ ኽትዛረብ ኣሎካ።

ኣብ ኣገልግሎት ትዘራረብ ከም ዘለኻ ዄንካ ንምቕራብ: መዓልታዊ ጽቡቕ ጌርካ ምዝራብ ልማድካ ኽትገብሮ ኣሎካ። ከምዚ ኺበሃል ከሎ: ብዙሕ ትምህርቲ የድልየካ ማለት ኣይኰነን። እንተዀነ ግን: ነቲ እትብሎ ብኣኽብሮት ንኺሰምዑኻ ዚድርኽ ኣዘራርባ ምምዕባል ሰናይ እዩ። ነዚ ኣብ ኣእምሮኻ ብምሓዝ: ኣብ መዓልታዊ ዝርርብካ ነዚ ነጥብታት እዚ ኽትዓየሉ የድልየካ እንተ ዀይኑ እስከ ርአ።

1. ምስ ጽቡቕ ሰዋስው ዚጋጮ ወይ ምስቶም ብኣነባብራኦም ንስርዓታት ኣምላኽ ዚጥሕሱ ሰባት ዜመድበካ ቓላት ኣይትጠቐም። ምስቲ ኣብ ቈሎሴ 3:8 ዚርከብ ምኽሪ ብምስምማዕ: ተሪር ወይ ብዕሉግ ቋንቋ ኣይትጠቐም። በቲ ኻልእ ሸነኽ ከኣ: መዓልታዊ እትጥቀመሉ ንዘረባ ዚኸውን ልሙድ ቃላት ምጥቃም ጌጋ የብሉን። መዓልታዊ ዚዝውተር ቃላት: ወግዓዊ እኳ እንተ ዘይኰነ: ተቐባልነት ግን ኣለዎ።

2. እተፈላለየ ሓሳባት ንምግላጽ ሓደ ዓይነት ቃላትን ሓረጋትን ደጋጊምካ ኣይትጠቐም። ሓሳባትካ ብንጹር ንምግላጽ ዚሕግዘካ ቓላት ተጠቐም።

3. ቅድሚ ምዝራብካ: ነቲ ኽትብሎ እትደሊ ሓሳባት ብንጹር ኣብ ኣእምሮኻ ብምሓዝ: ነቲ እተዛረብካዮ ሓሳባት ብዘየድሊ ኣይትደጋግሞ።

4. ንጽቡቕ ሓሳባት ብኣዝዩ ብዙሕ ቃላት ኣይትቕበሮ። እቲ ኺዝከር እትደልዮ ነጥቢ ብሓደ ቐሊል ምሉእ ሓሳብ ንጹር ጌርካ ናይ ምግላጽ ልማድ ይሃሉኻ።

5. ንኻልኦት ኣኽብሮት ብዜርኢ መገዲ ተዛረብ።.