ናይ ሓቂ ኣምላኽ መን እዩ፧

ሓደ ናይ ሓቂ ኣምላኽ ጥራይ እዩ ዘሎ፣ ስሙ ኸኣ የሆዋ እዩ። መጽሓፍ ቅዱስ፡ “ንስኻ፡ የሆዋ ዝስምካ፡ በይንኻ ኣብ ልዕሊ ዅላ ምድሪ ልዑል ምዃንካ ይፍለጡ” ይብል። (መዝሙር 83:18) ኣምላኽ፡ መንፈስ ስለ ዝዀነ፡ ክንርእዮ ኣይንኽእልን ኢና። ንሱ የፍቅረና እዩ፣ ንሕና ኸነፍቅሮ እውን ይደልየና እዩ። ብዘይካዚ፡ ንሰባት ከነፍቅሮም ይደልየና እዩ። (ማቴዎስ 22:35-40) ካብ ኵሉ ዝለዓለን ፈጣሪ ዅሉን እዩ።

እቲ ኣምላኽ ዝፈጠሮ ናይ መጀመርታ ፍጥረት፡ ሓያል መንፈሳዊ ፍጡር እዩ ነይሩ፣ ድሕሪ ግዜ፡ የሱስ ክርስቶስ ተባሂሉ ተጸዊዑ ኣሎ። የሆዋ ንመላእኽቲ እውን ፈጢሩ እዩ።

የሆዋ ኣብ ሰማይን . . . ኣብ ምድርን ንዘሎ ዅሉ ፈጠረ። ራእይ 4:11

የሆዋ ኣምላኽ፡ ከዋኽብትን ምድርን ኣብኡ ዘሎ ዅሉ ነገራትን ፈጠረ።—ዘፍጥረት 1:1።

ነቲ ናይ መጀመርታ ሰብ ዝዀነ ኣዳም፡ ካብ ሓመድ ምድሪ ገበሮ።—ዘፍጥረት 2:7።