ንሰበይቲ ሎጥ ዘክርዋ

ሎጥ ምስ ሓው ኣቦኡ ኣብርሃም ኣብ ምድሪ ከነኣን ይነብር ነበረ። ጥሪት ኣብርሃምን ሎጥን ኣዝየን ስለ ዝበዝሓ ኸኣ፡ እታ ምድሪ ንኽልቲኦም ኣይኣኸለቶምን። ኣብርሃም ከኣ ንሎጥ፡ ‘ብሓንሳእ ኣብ ሓደ ቦታ ኽንነብር ኣይንኽእልን ኢና። ናበየናይ ሸነኽ ክትከይድ ከም እትደሊ ምረጽ፣ ኣነ እውን ብኣንጻሩ ክኸይድ እየ’ በሎ። በዚ ኸምዝስ ኣብርሃም ንጥቕሚ ኻልእ ከም ዜቐድም ደይኰነን ኣርእዩ፧

ሎጥ ድማ ኣብ ጥቓ ሶዶም እትብሃል ከተማ፡ ጽቡቕ መሬት ረኣየ። ኣብኡ እኹል መሬትን ሳዕርን ነበረ። ስለዚ፡ ነቲ ቦታ እቲ መረጸ እሞ ምስ ስድራ ቤቱ ናብኡ ኸደ።

ነበርቲ ሶዶምን ነበርቲ እታ ኣብ ጥቓኣ እትርከብ ከተማ ጎሞራን ክፉኣት ነበሩ። ኣመና ኽፉኣት ስለ ዝነበሩ ድማ፡ የሆዋ ንኽልቲአን ከተማታት ኬጥፍአን ወሰነ። ንሎጥን ንስድራ ቤቱን ግና ኬድሕኖም ደለየ፣ ስለዚ፡ ዜጠንቅቕዎም ክልተ መላእኽቲ ሰደደሎም፣ ንሳቶም ከኣ፡ ‘ቀልጥፉ! ካብዛ ኸተማ ውጹ! የሆዋ ኼጥፍኣ እዩ’ በልዎም።

ሎጥ ግና ቀልጢፉ ኣይወጸን። የግዳስ፡ ደንጐየ። ስለዚ፡ እቶም መላእኽቲ ንሎጥን ንሰበይቱን ንኽልተ ኣዋልዱን ብኢዶም ሒዞም ተቐላጢፎም ካብታ ኸተማ ኣውጽእዎም። ድሕሪኡ፡ ‘ቀልጥፉ! ምእንቲ ህይወትኩም ኣምልጡ! ንድሕሪት ግልጽ ኣይትበሉ። ንድሕሪት ግልጽ እንተ ኢልኩም፡ ክትሞቱ ኢኹም!’ በልዎም።

ኣብ ከተማ ጾዓር ምስ በጽሑ፡ የሆዋ ኣብ ልዕሊ ሶዶምን ጎሞራን፡ ሓውን ዲንን ኣዝነመ። እተን ክልተ ኸተማታት ከኣ ምሉእ ብምሉእ ጠፍኣ። ሰበይቲ ሎጥ ትእዛዝ የሆዋ ኣፍሪሳ ንድሕሪት ግልጽ ምስ በለት ድማ፡ ሓወልቲ ጨው ኰነት! ሎጥን ኣዋልዱን ግና ንየሆዋ ስለ እተኣዘዝዎ፡ ካብቲ ጥፍኣት ደሓኑ። ሰበይቲ ሎጥ ብዘይምእዛዛ ብዙሕ ሓዚኖም ኪዀኑ ኣለዎም። ነቲ የሆዋ ዝሃቦም መምርሒ ብምስማዖም ግና፡ ተሓጒሶም እዮም።