ንየሆዋ እተመባጽዑሉ መብጽዓ

እስራኤላውያን ካብቲ ኻብ ግብጺ ዝወጹሉ ድሕሪ ኽልተ ወርሒ ኣቢሉ ኣብ ከረን ሲና በጽሑ እሞ ኣብ እግሪ እቲ ኸረን ሰፈሩ። ሙሴ ናብቲ ኸረን ምስ ደየበ ድማ፡ የሆዋ ንሙሴ፡ ‘ንእስራኤላውያን ኣነ እየ ኣድሒነዮም። እንተ ተኣዚዞምንን ሕግታተይ እንተ ሓልዮምን፡ ፍሉይ ህዝቢ ኪዀኑኒ እዮም’ በሎ። ሙሴ ኸኣ ካብቲ ኸረን ወሪዱ ንእስራኤላውያን፡ እቲ የሆዋ ዝበሎ ነገሮም። ንሳቶምከ እንታይ ምላሽ ሃቡ፧ ‘ኵሉ እቲ የሆዋ ዝበለና ንገብር’ ኢሎም መለሱሉ።

ሙሴ መሊሱ ናብቲ ኸረን ደየበ። ኣብኡ ኸኣ የሆዋ፡ ‘ድሕሪ ሰለስተ መዓልቲ ኽዛረበካ እየ። ነቶም ህዝቢ ናብ ከረን ሲና ኸይድይቡ ኣጠንቅቆም’ በሎ። ሙሴ ድማ ናብ እስራኤላውያን ወሪዱ፡ ንየሆዋ ንምስማዕ ኪዳለዉ ነገሮም።

ኣብታ ሳልሰይቲ መዓልቲ፡ እስራኤላውያን ኣብቲ ኸረን በርቅን ጸሊም ደበናን ረኣዩ። ብርቱዕ ነጕድን ደሃይ መለኸትን እውን ሰምዑ። ሽዑ፡ የሆዋ ብሓዊ ኣብቲ ኸረን ወረደ። እስራኤላውያን ከኣ ኣዝዮም ስለ ዝፈርሁ፡ ፈጥፈጥ በሉ። ብዘሎ እቲ ኸረን ኣዝዩ የንቀጥቅጥ ነበረ፣ ብትኪ እውን ተሸፊኑ ነበረ። እቲ ደሃይ መለኸት ከኣ እናበርትዐ ኸደ። ሽዑ፡ ኣምላኽ፡ ‘ኣነ የሆዋ እየ። ካልኦት ኣማልኽቲ ኣይተምልኽ’ በለ።

ሙሴ ድማ ናብቲ ኸረን ደየበ፣ የሆዋ ኸኣ ነቶም ህዝቢ ዚኸውን ሕግታት ሃቦ። እቲ ሕግታት ድማ ብኸመይ ከም ዜምልኽዎን ብኸመይ ኪመላለሱ ኸም ዘለዎምን ዚእዝዝ ነበረ። ሙሴ ኸኣ ነቲ ሕግታት ጸሓፎ እሞ ንእስራኤላውያን ኣንበበሎም። ንሳቶም እውን፡ ‘ኵሉ እቲ የሆዋ ዝበለና ንገብር’ ኢሎም ተመባጽዑ። እወ፡ ንኣምላኽ መብጽዓ ተመባጽዑሉ። ግናኸ፡ ሓልዮምዎዶ፧