ካብ ቃል ኣምላኽ ተምሃር

ስድራ ቤትካ ሕጕስቲ ኽትከውን እትኽእል ብኸመይ እያ፧

እዛ ዓንቀጽ እዚኣ፡ ኬተሓሳስበካ ዚኽእል ሕቶታት ኣበጊሳ፡ መልሱ ኣብ መጽሓፍ ቅዱስካ ኣበይ ከም እትረኽቦ ኽትሕብረካ እያ። ናይ የሆዋ መሰኻኽር፡ ብዛዕባ መልሲ እዚ ሕቶታት እዚ ኼመያይጡኻ ባህ እዩ ዚብሎም።

1. ሕጕስቲ ስድራቤት ንምምስራት፡ ሕጋዊ መርዓ ኣገዳሲ ዝዀነ ስለምንታይ እዩ፧

መስራቲ መርዓ፡ እቲ ሕጉስ ኣምላኽ ዝዀነ የሆዋ እዩ። ሕጋዊ መርዓ፡ ኣብ መንጎ ሰብኣይን ሰበይትን ጽቡቕ ምሕዝነት ከም ዚህሉ ጥራይ ዘይኰነስ፡ ቈልዑ ንምዕባይ ዚኸውን ባህ ዜብል ሃዋህው ከም ዚህሉ ስለ ዚገብር፡ ንሓጐስ ስድራ ቤት ኣገዳሲ እዩ። ኣምላኽ ንመርዓ ብኸመይ እዩ ዚርእዮ፧ ነባርን ሕጋውን ጥምረት ኪኸውን እዩ ዚደሊ። (ሉቃስ 2:1-5) ብዘይካዚ፡ ሰብኣይን ሰበይትን ንሓድሕዶም እሙናት ኪዀኑ እዩ ዚደሊ። (እብራውያን 13:4) የሆዋ ንክርስትያናት፡ ኪፋትሑን እንደገና ኺምርዓዉን ዚፈቕደሎም፡ መጻምድቶም እንተ ዘምዩ ጥራይ እዩ።​—ማቴዎስ 19:3-6, 9 ኣንብብ።

2. ሰብኣይ ሰበይትን ንሓድሕዶም ኪተሓላለዩ ዘለዎም ብኸመይ እዮም፧

የሆዋ ንሰብኣይን ንሰበይትን፡ ኣብ ሓዳር ንሓድሕዶም ኪደጋገፉ ኢሉ እዩ ፈጢርዎም። (ዘፍጥረት 2:18) ሰብኣይ ርእሲ ስድራ ቤት ከም ምዃኑ መጠን፡ ንስድራ ቤቱ ዜድልዮም ስጋዊ ነገራት ናይ ምምላእን ብዛዕባ ኣምላኽ ናይ ምምሃርን ቀንዲ ሓላፍነት ኣለዎ። ንሰበይቱ፡ ጥቕሚ ርእሳ እትስውእ ፍቕሪ ኼርእያ ኣለዎ። ሰብኣይን ሰበይትን ንሓድሕዶም ኪፋቐሩን ኪከባበሩን ኣለዎም። ኵሎም ሰብኡትን ኣንስትን ዘይፍጹማት ስለ ዝዀኑ፡ ይቕረ ምብህሃል ንሓጐስ ስድራ ቤት ኣዝዩ ኣገዳሲ እዩ።​—ኤፌሶን 4:31, 32፣ 5:22-25, 33፣ 1 ጴጥሮስ 3:7 ኣንብብ።

3. ብሓዳርካ ሕጉስ እንተ ዘይኴንካ፡ ክትፈላለ ድዩ ዘሎካ፧

ኣብ መንጎኻን ኣብ መንጎ መጻምድትኻን ጸገም እንተ ኣጋጢሙ፡ ብፍቕሪ ኽትፈትሕዎ ጽዓሩ። (1 ቈረንቶስ 13:4, 5) ቃል ኣምላኽ፡ ሰብኣይን ሰበይትን ነቲ ኣብ ሓዳሮም ዘጋጠሞም ጸገም ንምፍታሕ ኪፈላለዩ ኸም ዘለዎም ኣይመክርን እዩ። ኣብ ገሊኡ ጽንኩር ኵነታት ግና፡ ሓደ ክርስትያን ምስ መጻምድቱ ኺፈላለ ዚሓይሽ እንተ ዀይኑ ወይ እንተ ዘይኰይኑ ኺውስን ኣለዎ።​—1 ቈረንቶስ 7:10-13 ኣንብብ።

​4. ኣቱም ውሉዳት፡ ኣምላኽ እንታይ ክትኰኑ እዩ ዚደልየኩም፧

የሆዋ ሕጉሳት ክትኰኑ እዩ ዚደሊ። ኣብ ግዜ ንእስነትኩም ሕጉሳት ዚገብረኩም ዝበለጸ ምኽሪ ሂቡኩም ኣሎ። ካብ ጥበብን ተመክሮን ወለድኹም ጥቕሚ ኽትረኽቡ ይደሊ እዩ። (ቈሎሴ 3:20) የሆዋ ነቲ ንዕኡ ኽትውድስዎ ኢልኩም እትገብርዎ ዝዀነ ይኹን ተግባር ኣኽቢሩ እዩ ዚርእዮ።​—መክብብ 11:9–12:1፣ ማቴዎስ 19:13-15፣ 21:15, 16 ኣንብብ።

5. ኣቱም ወለዲ፡ ውሉዳትኩም ሕጉሳት ምእንቲ ኪዀኑ እንታይ ክትገብሩ ኣሎኩም፧

ንደቅኹም ምግብን ቤትን ክዳንን ምእንቲ ኸተማልኡሎም፡ ኣበርቲዕኩም ክትዓዩ ኣሎኩም። (1 ጢሞቴዎስ 5:8) ይኹን እምበር፡ ሕጉሳት ምእንቲ ኪዀኑ፡ ንኣምላኽ ንኼፍቅርዎን ካብኡ ንኺመሃሩን ከተሰልጥንዎም ኣሎኩም። (ኤፌሶን 6:4) ንኣምላኽ ዘለኩም ፍቕሪ፡ ንልቢ ውሉዳትኩም ኪጸልዎ ይኽእል እዩ። መምርሒታትኩም ኣብ ቃል ኣምላኽ እተመርኰሰ እንተ ዀይኑ፡ ንኣተሓሳስባ ውሉዳትኩም ብኣወንታዊ መገዲ ኪቐርጾ ይኽእል እዩ።​—ዘዳግም 6:4-7፣ ምሳሌ 22:6 ኣንብብ።

ንደቅኹም ተተባብዕዎምን ትንእድዎምን እንተ ዄንኩም፡ ኪጥቀሙ እዮም። ኣብ ርእሲኡ እውን፡ ክትእርምዎምን ክትቀጽዕዎምን ኣሎኩም። ከምዚ ዝኣመሰለ ስልጠና፡ ካብቲ ሓጐሶም ኬጥፍኣሎም ዚኽእል ጠባይ እዩ ዜዕቍቦም። (ምሳሌ 22:15) ይኹን እምበር፡ ብጭካነ ኽትቀጽዕዎም የብልኩምን።​—ቈሎሴ 3:21 ኣንብብ።

ናይ የሆዋ መሰኻኽር ብፍላይ ንወለድን ንሕጻናትን ተባሂሉ እተዳለወ ሓያሎ መጻሕፍቲ ይሓትሙ እዮም። እዚ መጻሕፍቲ እዚ፡ ኣብ መጽሓፍ ቅዱስ እተመስረተ እዩ።​—መዝሙር 19:7, 11 ኣንብብ።

ዝያዳ ሓበሬታ እንተ ደሊኻ፡ ኣብ ምዕራፍ 14 እዛ መጽሓፍ ቅዱስ ብሓቂ እንታይ እዩ ዚምህር፧ ዘርእስታ ብናይ የሆዋ መሰኻኽር እተሓትመት መጽሓፍ ርአ።