ሓገዝ ንዜድልዮም ሰባት ብኸመይ ክንድግፎም ንኽእል፧

ኣብ ሓንቲ ኣብ ምምዕባል እትርከብ ሃገር ዚነብር ፍራንስዋ ዝስሙ ሽማግለ፡ “ድሕሪ እቲ እተገብረ ሃገራዊ ምርጫ፡ ዘይምስምማዕ ስለ እተላዕለ፡ ኣሽሓት ናይ የሆዋ መሰኻኽር ካብ መንበሪኦም ኪሃድሙ ተገዲዶም እዮም። ሕጽረት ምግብን መድሃኒትን ድማ ነበረ፣ እቲ ኺርከብ ዚከኣል ምግብን መድሃኒትን ድማ ኣመና ኽቡር እዩ ነይሩ። ባንክታት ተዓጽወ፡ ናይ ገንዘብ ማሽናት ድማ ስራሑ ኣቋረጸ” በለ።

ኣብ ቤት ጽሕፈት ጨንፈር ዝነበሩ ኣሕዋት፡ ነቶም ኣብ ምልእቲ እታ ሃገር ኣብ ኣዳራሽ መንግስቲ ኣምላኽ ተኣኪቦም ዝነበሩ ኻብ መረበቶም እተመዛበሉ ናይ የሆዋ መሰኻኽር፡ ገንዘባዊ ሓገዝ ኬብጽሑሎም ጀመሩ። እቶም መቐናቕንቲ ሰራዊት ንመገድታት እኳ እንተ ዓጸውዎ፡ ክልቲኦም ወገናት ግና፡ ናይ የሆዋ መሰኻኽር ገለልተኛታት ምዃኖም ስለ ዚፈልጡ፡ ነተን ካብ ቤት ጽሕፈት ጨንፈር ዚመጻ ዝነበራ ማካይን መብዛሕትኡ እዋን ንኺሓልፋ ይፈቕዱለን ነበሩ።

ፍራንስዋ ኸምዚ በለ፦ “ናብ ሓደ ኣዳራሽ መንግስቲ ኣምላኽ ክንከይድ ከለና፡ ተዋጋእቲ ናብታ ማኪናና ኺትኵሱ ጀመሩ። እቲ ጠያይቲ ግና ብመንጎና እዩ ዚሓልፍ ነይሩ። ሓደ ወተሃደር ብረት ሒዙ ናባና ገጹ ኺጐዪ ኸሎ ምስ ረኣናዮ፡ ብቕልጡፍ ንድሕሪት ብምኻድ፡ ተጠዊና ናብቲ ቤት ጽሕፈት ጨንፈር ገጽና ተሓምበብና። ብህይወት ብምትራፍና ንየሆዋ ኣመስጊንናዮ ኢና። ንጽብሒቱ፡ እቶም ኣብቲ ኣዳራሽ መንግስቲ ኣምላኽ ዝነበሩ 130 ኣሕዋት ናብ ደሓን ዝዀነ ቦታ ኸዱ። ገሊኣቶም ግና ናብቲ ቤት ጽሕፈት ጨንፈር መጹ፣ ኣብኡ ኸኣ ክሳዕ እቲ ጽንኩር ኵነታት ዚሓልፍ ብመንፈሳውን ብስጋውን መዳይ ንከናኸኖም ነበርና።”

ፍራንስዋ ኣስዕብ ኣቢሉ፡ “ጸኒሑ ኣብ ኵላ እታ ሃገር ዚነብሩ ኣሕዋትን ኣሓትን፡ ዓሚቝ ሞሳኦም ንምግላጽ ዝጸሓፍዎ ደብዳበታት፡ ናብቲ ቤት ጽሕፈት ጨንፈር ይመጽእ ነበረ። ኣብ ካልእ ቦታ ዚነብሩ ኣሕዋቶም ኪሕግዝዎም ከለዉ ምርኣዮም፡ ነቲ ኣብ የሆዋ ዝነበሮም ምትእምማን ወሲኹሉ እዩ” በለ።

ባህርያዊ ዀነ ሰብ ዜምጽኦ ሓደጋታት ኬጋጥም ከሎ፡ ነቶም እተሸገሩ ኣሕዋትናን ኣሓትናን፡ “ሙቑ፡ ጽገቡ” ኣይንብሎምን ኢና። (ያእ. 2:15, 16) የግዳስ፡ ዜድልዮም ነገራት ንኸነማልኣሎም ንጽዕር ኢና። ኣብ ቀዳማይ ዘመን፡ ጥሜት ከም ዜጋጥም መጠንቀቕታ ምስ ተዋህበ፡ “እቶም ደቀ መዛሙርቲ . . . ነፍሲ ወከፎም ከከም ዓቕሙ፡ ነቶም ኣብ ይሁዳ ዚቕመጡ ኣሕዋት ረድኤት ኪሰድዱሎም ወሰኑ።”—ግብ. 11:28-30።

ኣገልገልቲ የሆዋ ኸም ምዃንና መጠን፡ ነቶም እተሸገሩ ውልቀ ሰባት ብስጋዊ መዳይ ክንሕግዞም ንህንጠ ኢና። ኰይኑ ግና፡ መንፈሳዊ ሓገዝ እዩ ብዝያዳ ዜድልዮም። (ማቴ. 5:3) የሱስ፡ ሰባት መንፈሳዊ ነገራት ከም ዜድልዮም ምእንቲ ኺፈልጡን ነዚ ምእንቲ ኼማልኡን ኢሉ፡ ንሰዓብቱ ደቀ መዛሙርቲ ኺገብሩ ኣዚዝዎም እዩ። (ማቴ. 28:19, 20) ነፍሲ ወከፍና ኸኣ፡ ነዚ ትእዛዝ እዚ ንምፍጻም፡ ግዜናን ጕልበትናን ሃብትናን ንውፊ ኢና። ብደረጃ ውድብ፡ ንገሊኡ እተወፈየ ገንዘብ ብስጋዊ መዳይ ንምሕጋዝ ንጥቀመሉ እኳ እንተ ዀንና፡ ብቐንዱ ግና ኣብ ረብሓታት መንግስቲ ኣምላኽን ብስራት መንግስቲ ኣምላኽ ኣብ ምዝርጋሕን ኢና እነውዕሎ። በዚ ኸምዚ ድማ፡ ንኣምላኽን ንብጻይናን ከም እነፍቅር ነርኢ።—ማቴ. 22:37-39።

እቶም ንዓለምለኻዊ ዕዮ ናይ የሆዋ መሰኻኽር ዚድግፉ ኣስፋሕቲ፡ ወፈያኦም ብግቡእን ውጽኢታዊ ብዝዀነ መገድን ኣብ ጥቕሚ ኸም ዚውዕል ርግጸኛታት ኪዀኑ ይኽእሉ እዮም። ነቶም ኣብ ጸገም ዚርከቡ ኣሕዋትካ ኽትሕግዞም ትኽእልዶ፧ ነቲ ደቀ መዛሙርቲ ናይ ምግባር ዕዮ ኽትድግፎ ትደሊዶ፧ ትደሊ እንተ ዄንካ፡ “ኢድካ ኽትገብረሉ ዚከአላ እንተ ዀይኑስ፡ ነቲ ዚግብኦ ሰብ ሰናይ ኣይትኽልኣዮ።”—ምሳ. 3:27።

ገሊኣቶም ንዓለምለኻዊ ዕዮ ዚኸውን ውጽኢት ዚህቡሉ መገድታት

ልክዕ ከምቲ ብግዜ ሃዋርያ ጳውሎስ ዚግበር ዝነበረ፡ ሎሚ ብዙሓት ሰባት ኣብቲ “ዓለምለኻዊ ዕዮ” ዚብል እተጻሕፎ ሳጹናት ውጽኢት ዜእትውዎ እተወሰነ ገንዘብ ‘ኣዋህሊሎም የቐምጡ’ እዮም። (1 ቈረ. 16:2) ጉባኤታት ነዚ ገንዘብ እዚ፡ ኣብ ነፍሲ ወከፍ ወርሒ ናብቲ ነታ ሃገር ዜገልግል ቤት ጽሕፈት ጨንፈር ናይ የሆዋ መሰኻኽር ይልእካኦ እየን። እንተ ደሊኻ እውን፡ ናብቲ ንሃገርካ ዜገልግል ሕጋዊ ትካል ናይ የሆዋ መሰኻኽር፡ ብቐጥታ ወፈያ ኽትልእኽ ትኽእል ኢኻ። ሕጋዊ ስም እቲ ንሃገርካ ዜገልግል ትካል ናይ የሆዋ መሰኻኽር ክትፈልጥ እንተ ደሊኻ፡ ምስቲ ንሃገርካ ዜገልግል ቤት ጽሕፈት ጨንፈር ክትራኸብ ትኽእል ኢኻ። ኣድራሻታት ኣብያተ ጽሕፈት ጨንፈር ኣብ www.pr418.com ኪርከብ ይከኣል እዩ። ብቐጥታ ኽትልእኮ እትኽእል ወፈያታት ኣብ ታሕቲ ተዘርዚሩ ኣሎ።

ብዘይ ገደብ ዚውሃብ ወፈያታት
- ጥረ ገንዘብ፡ ስልማት፡ ወይ ከኣ ካልእ ክቡር ነገራት ኪውሃብ ይከኣል እዩ።
- ጥረ ገንዘብ ወይ ካልእ ነገራት ኪውሃብ ከሎ፡ ብዘይ ገደብ ከም እተዋህበ ዚሕብር ደብዳበ ምስቲ ውጽኢት ኪልኣኽ ኣለዎ።
ኪምለስ ዚከኣል ገንዘብ ናይ ምሃብ መደብ
- እቲ ዝሃበ ሰብ ምስ ዚደልዮ ኺምለሰሉ ዚከኣል ገንዘብ ኪውፈ ይከኣል እዩ።
- እቲ ወፈያ ኺምለስ ዚከኣል ምዃኑ ዚሕብር ደብዳበ ኺልኣኽ ኣለዎ።
ብመደብ ዚግበር ልግሲ

ብጀካ እቲ ናይ ገንዘብን ናይ ካልእ ክቡር ነገራትን ወፈያ፡ ነቲ ኣብ ብዘላ ዓለም ዚካየድ ኣገልግሎት መንግስቲ ኣምላኽ ንምሕጋዝ፡ ካልእ ነገራት ናይ ምሃብ መገድታት እውን ኣሎ። እቲ ንስኻ ኽትጥቀመሉ እትደሊ መገዲ ብዘየገድስ፡ ፈለማ ምስቲ ንሃገርካ ዜገልግል ቤት ጽሕፈት ጨንፈር ተራኺብካ፡ ኣብ ሃገርካ እንታይ ዓይነት ወፈያ ኺውሃብ ከም ዚከኣል ፍለጥ። ሕጋዊ ብቕዓታትን ሕግታት ግብርን እተፈላለየ ስለ ዝዀነ፡ እትውፍየሉ መገዲ ቕድሚ ምምራጽካ፡ ፈለማ ምስ ብቑዓት ኣማኸርቲ ግብርን ሕግን ተዘራረብ።

መድሕን፦ ንሓደ ናይ የሆዋ መሰኻኽር ዚጥቀሙሉ ሕጋዊ ትካል ብምጥቃስ፡ ናይ ህይወት መድሕን ፖሊሲ ወይ ናይ ጡረታ/እስትሕጋግ ክፍሊት ተጠቃሚ ኸም ዝዀነ ጌርካ ስም ኪመሓላለፈሉ ይከኣል እዩ።

ናይ ባንክ ሕሳብ፦ ናይ ባንክ ሕሳብ፡ ናይ ቅሙጥ ሕሳብ ምስክር ወረቐት፡ ወይ ናይ ውልቀ ሰብ ናይ ጡረታ ሕሳብ፡ ብመሰረት እቲ ናይ ከባቢ ባንክ ዚፈቕዶ ንሓደ ናይ የሆዋ መሰኻኽር ዚጥቀሙሉ ሕጋዊ ትካል ብሓደራ ኺውሃብ ወይ ድሕሪ ሞት ተጠቃሚ ምዃኑ ኺግለጽ ይከኣል እዩ።

ኣክሲዮንን ቦንድን፦ ኣክሲዮንን ቦንድን ብዘይ ገለ ገደብ ኪውሃብ ዚከኣል ህያብ ኰይኑ፡ ንሓደ ናይ የሆዋ መሰኻኽር ዚጥቀሙሉ ሕጋዊ ትካል ኪውፈ ይከኣል እዩ። ብዘይካዚ፡ እቲ ናይ የሆዋ መሰኻኽር ዚጥቀሙሉ ሕጋዊ ትካል፡ ድሕሪ ሞት ተጠቃሚ ምዃኑ ኺግለጽ ይከኣል እዩ።

ዘይንቀሳቐስ ንብረት፦ ኪሽየጥ ዚከኣል ዘይንቀሳቐስ ንብረት፡ ብዘይ ገለ ገደብ ዚውሃብ ህያብ ወይ እቲ ንብረት መንበሪ እንተ ዀይኑ ድማ እቲ ለጋሲ ብህይወቱ ኽሳዕ ዘሎ በቲ ንብረት ተጠቃሚ ኪዀነሉ ዚኽእል መደብ ብምግባር፡ ንሓደ ናይ የሆዋ መሰኻኽር ዚጥቀሙሉ ሕጋዊ ትካል ኪውፈ ይከኣል እዩ።

ህያብ ዓመታዊ መልዕሎ፦ ህያብ ዓመታዊ መልዕሎ ኺብሃል ከሎ፡ ሓደ ሰብ ገንዘብ ወይ ሰነድ ዋንነት ንሓደ ናይ የሆዋ መሰኻኽር ዚጥቀሙሉ ሕጋዊ ትካል ዚህበሉ መሰናድዎ እዩ። እቲ ወሃቢ ወይ ንሱ ዝወከሎ ሰብ ድማ ኣብ ምሉእ ህይወቱ እተወሰነ ዓመታዊ ኽፍሊት ይውሃቦ እዩ። እቲ ወሃቢ ኣብቲ እቲ ወፈያ ዝገበረሉ ዓመት መጠን እቲ ዚስልዓሉ ግብሪ ይንከየሉ እዩ።

ለበዋን ሕድርን፦ ኣብ ቅድሚ ሕጊ ተቐባልነት ዘለዎ ለበዋ ብምግባር፡ ጥሪት ወይ ገንዘብ ንሓደ ናይ የሆዋ መሰኻኽር ዚጥቀሙሉ ሕጋዊ ትካል ከተውርሶ ይከኣል እዩ፣ ወይ እቲ ናይ የሆዋ መሰኻኽር ዚጥቀሙሉ ሕጋዊ ትካል ናይ ንብረት ሕድሪ ውዕል ተጠቃሚ ምእንቲ ኪኸውን፡ ስም ኪመሓላለፈሉ ይከኣል እዩ። እዚ መሰናድዎ እዚ፡ እተወሰነ ናይ ግብሪ ምጕዳላት ኪህልዎ ይኽእል እዩ።

እቲ “ብመደብ ዚግበር ልግሲ” ዚብል ስያመ ኸም ዚገልጾ፡ እዚ ዓይነት ወፈያታት እዚ ብወገን እቲ ዚውፊ ሰብ ገለ መደብ ምግባር ዚሓትት እዩ። ነቶም በዚ መገዲ እዚ ገይሮም ንዓለምለኻዊ ዕዮ ናይ የሆዋ መሰኻኽር ኪውፍዩ ዚደልዩ ውልቀ ሰባት ንምሕጋዝ፡ ቻሪታብል ፕላኒን ቱ በነፊት ኪንግደም ሰርቪስ ወርልድዋይድ እትብሃል ብሮሹር ብእንግሊዝኛን ብስጳንኛን ተዳልያ ኣላ። እታ ብሮሹር፡ ውልቀ ሰባት ሕጂ ወይ ምስ ሞቱ ብመልክዕ ውርሲ ኺውፍዩሉ ዚኽእሉ እተፈላለየ መገዲ ትሕብር እያ። ብምኽንያት እቲ ኣብ ሃገርካ ዘሎ ምስ ግብርን ምስ ካልእ ነገራትን ዚተሓሓዝ ሕግታት፡ እቲ ኣብዛ ብሮሹር እዚኣ ዚርከብ ሓበሬታ፡ ምሉእ ብምሉእ ንዅነታትካ ዚሽፍን ከይከውን ይኽእል እዩ። ስለዚ፡ ነዛ ብሮሹር እዚኣ ምስ ኣንበብካያ፡ ምስቶም ብዛዕባ ግብሪ ወይ ሕጊ ዜማኽሩኻ ሰባት ተዘራረብ። ብዙሓት በቲ ኣብ ላዕሊ እተጠቕሰ መገድታት ገይሮም ነቲ ኣብ መላእ ዓለም እንፍጽሞ ሃይማኖታውን ግብረ ሰናያውን ንጥፈታት ኪሕግዙ፡ ነቲ ኸምኡ ብምግባሮም ዚርከብ ናይ ምጕዳል ግብሪ ረብሓታት ከኣ ኬዕብይዎ ኽኢሎም እዮም። እቲ ኣብ ላዕሊ እተጠቕሰ መገድታት ኣብ ሃገርካ ይዓዪ እንተ ዀይኑ፡ ቅዳሕ እዛ ብሮሹር እዚኣ፡ ካብ ጸሓፊ ጉባኤኻ ኽትረክብ ትኽእል ኢኻ።

ዝያዳ ሓበሬታ እንተ ደሊኻ፡ በዚ ኣብ ታሕቲ ተገሊጹ ዘሎ ኣድራሻ ጌርካ ወይ ድማ ናብቲ ንሃገርካ ዜገልግል ቤት ጽሕፈት ጨንፈር ብምጽሓፍ ወይ ብምድዋል፡ ምስቶም ኣብ “ቤት ጽሕፈት ብመደብ ዚግበር ልግሲ” ዚሰርሑ ኣሕዋት ክትራኸብ ትኽእል ኢኻ።

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707