ንኣብያተ⁠-​መጻሕፍቲ ኣደራሽ መንግስቲ ኣምላኽ ብዝምልከት እተገብረ ሓድሽ ምድላው

ኣብ መላእ ዓለም ዝርከባ ጉባኤታት ኣብዚ ግዜ እዚ ንሓያሎ ዓመታት ካብቲ ቐደም ቤተ⁠-​መጻሕፍቲ ቲኦክራሲያዊ ኣገልግሎት ቤት ትምህርቲ ተባሂሉ ዝፍለጥ ዝነበረ ሕጂ ኸኣ ቤተ⁠-​መጻሕፍቲ ኣደራሽ መንግስቲ ኣምላኽ ዝበሃል ምድላው ክጥቀማ ጸኒሐን እየን። ኣብ ዝሓለፈ እዋናት ነፍሲ ወከፍ ጉባኤ ናይ ገዛእ ርእሳ ቤተ⁠-​መጻሕፍቲ ኽትሕዝ እዩ ዝድለ ነይሩ። ይኹን እምበር: ኣብዚ እዋን እዚ ኣብ ሓደ ኣደራሽ መንግስቲ ኣምላኽ ዝጥቀማ ጉባኤታት ብዙሓት ስለ ዝዀና: ገለ ኻብዚኣተን ድማ ናይ ወጻኢ ቛንቋ ዝጥቀማ ብምዃነን: ኣብ ነፍሲ ወከፍ ኣደራሽ መንግስቲ ኣምላኽ ንሓደ ቛንቋ ሓደ ቤተ⁠-​መጻሕፍቲ ጥራይ ምሓዝ ዝሓሸ ዀይኑ እዩ ተረኺቡ። ኣብቲ ኻብ ሓደ ንላዕሊ መአከቢ ኣደራሻት ዘለዎ ኣደራሽ መንግስቲ ኣምላኽ: ኣብ ነፍሲ ወከፍ ኣደራሽ ንነፍሲ ወከፍ ኣብኡ ዝእከባ ጕጅለ ቛንቋታት ዝኸውን ቤተ⁠-​መጻሕፍቲ ኽግበር ኣለዎ።

እዚ ምድላው እዚ ቦታን ወጻኢታትን ክቕንስ ኢና ትጽቢት እንገብረሉ። ኣብ ርእሲ እዚውን ክልተ ወይ ካብኡ ዝዛይድ ኣብያተ⁠-​መጻሕፍቲ ኣብ ሓደ ምግባሩ ዝሓሸ ኣብያተ⁠-​መጻሕፍቲ ንኽህልወካ የኽእል። እቲ ኣብያተ⁠-​መጻሕፍቲ ኣብ ሓደ ኽግበር ከሎ እቲ ተረፍ ቕዳሓት ኣብ መኽዘን ክቕመጥ: ሓድሽ ኣደራሽ መንግስቲ ኣምላኽ ክህነጽ ከሎ ኸኣ ኽወሃብ ይከኣል እዩ። እቲ ኣደራሽ መንግስቲ ኣምላኽ ኮምፕዩተርን ኣብ ሲዲ⁠-​ሮም ዝርከብ ዎችታወር ላይብረሪን ምስ ዝህልዎ: ገሊኣቶም ካብዚ ኽጥቀሙ ይኽእሉ እዮም።

ኣብ ነፍሲ ወከፍ ቤተ⁠-​መጻሕፍቲ ኣደራሽ መንግስቲ ኣምላኽ: ዓቃብ መጻሕፍቲ ዀይኑ ዘገልግል ሓደ ሓው ክምደብ ኣለዎ: እዚ ድማ ሓደ ኻብቶም ናይ ቲኦክራሲያዊ ኣገልግሎት ቤት ትምህርቲ ተዓዘብቲ እንተዀነ ይምረጽ። ቀስ ብቐስ ነቲ ቤተ⁠-​መጻሕፍቲ ዝኸውን ዘድሊ ጽሑፋት ከዋህልልን ናይቲ ቤተ⁠-​መጻሕፍቲ ንብረት ምዃኑ ኣብ ውሽጣዊ ገበር ብጽፈት ምልክት ክገብረሉን ኣለዎ። እንተ ወሓደ ኣብ ዓመት ሓንሳእ: እቲ ቤተ⁠-​መጻሕፍቲ ምሉእ ምዃኑን እቲ ጽሑፋት ኣብ ጽቡቕ ኵነታት ከም ዝርከብን ከረጋግጽ ኣለዎ። ኣብዚ ኣብያተ⁠-​መጻሕፍቲ ዝርከብ ጽሑፋት ካብቲ ኣደራሽ መንግስቲ ኣምላኽ ወጻኢ ኽውሰድ የብሉን።

እቶም ኣባላት ጉባኤ ንቤተ⁠-​መጻሕፍቲ ኣደራሽ መንግስቲ ኣምላኽ ኣጸቢቖም የማስዉሉ እዮም። እምበኣር ነቲ መጻሕፍቲ ተጠንቂቕና ብምሓዝን ብእኡ ጌርና “ንምፍላጥ ኣምላኽ” ንኽንረክብ ምርምር ብምግባርን በብውልቅና ነዚ ምድላው እዚ ዘሎና ኣኽብሮት ነርኢ።​—⁠ምሳ. 2:5