ንበዓል ዝኽሪ ትዳሎዶ ኣለኻ፧

እታ የሱስ ዘሕለፋ ናይ መወዳእታ ፋስጋ ዓብዪ ትርጉም እዩ ነይርዋ። እታ ዝሞተላ ሰዓት ቀሪባ ስለ ዝነበረት፡ የሱስ ፋስጋ ምስ ሃዋርያቱ ኺበልዕን ሓድሽ ዓመታዊ በዓል፡ ማለት ድራር ጐይታ ኺሰርዕን መዲቡ ነበረ። ስለዚ ድማ ንጴጥሮስን ንዮሃንስን ኣብ ኣዳራሽ ኬዳልዉሉ ለኣኾም። (ሉቃ 22:7-13፣ ኣብ ገበር ዘላ ስእሊ ርአ።) እዚ ኸኣ፡ ነቲ ኣብ መጋቢት 27 ዚኽበር በዓል ዝኽሪ ኽንዳሎ የዘኻኽረና። ጉባኤታት ተዛራባይን ቅጫን ወይንን ካልእ ነገራትን ኣዳልየን ኪዀና ይኽእላ እየን። ይኹን እምበር፡ ብደረጃ ውልቀ ሰብ ንበዓል ዝኽሪ ኽንዳሎ እንታይ ክንገብር ንኽእል፧

ንልብኻ ኣዳልዎ። ነቲ ናይ በዓል ዝኽሪ ንባብ መጽሓፍ ቅዱስ ኣንቢብካ ኣስተንትነሉ። እቲ መደብ ኣብታ ቅዱሳት ጽሑፋት መዓልቲ መዓልቲ ምምርማር ዘርእስታ ጽሕፍቲ ኽትረኽቦ ትኽእል ኢኻ። ብዘይካዚ፡ ኣብቲ እተኸለሰ መጽሓፍ ቅዱስ ትርጉም ሓዳስ ዓለም መመላእታ ጽሑፍ ለ12 ዝርዝር መደብ ይርከብ እዩ። (ናይ ሚያዝያ 2020 ሕታም ደብተር ኣኼባ ህይወትን ኣገልግሎትን እውን ርአ።) ስድራ ቤታት ኣብ ዎችታዎር ፓብሊኬሽንስ ኢንዴክስ ወይ ኣብ መሐበሪ ምርምር ናይ የሆዋ መሰኻኽር፡ ብዛዕባ ኣገዳስነት በጃ ኣብ ኣምልኾ ስድራ ቤቶም ዚመያየጡሉ ሓበሬታ ኺረኽቡ ይኽእሉ እዮም።

ንብዙሓት ዓድም። ኣብ ወፈራ ዕድመ ምሉእ ብምሉእ ተኻፈል። ንመን ክትዕድም ከም እትኽእል ሕሰብ። ንኣብነት፡ ተመላሊስካ ምብጻሕ ንእትገብረሎምን መጽናዕቲ መጽሓፍ ቅዱስ ትመርሓሎም ንዝነበርካን ንእትፈልጦም ሰባትን ንኣዝማድካን ክትዕድም ትኽእል ኢኻ። ሽማግለታት ንዘይንጡፋት ሰባት ኪዕድምዎም ኣለዎም። ሓደ እትፈልጦ ሰብ ኣብ ከባቢኻ ዘይነብር እንተ ዀይኑ ግና፡ ነዚ ዚስዕብ ኣስተብህለሉ፦ ነቲ ኣብ jw.org ቀንዲ ገጽ ዚርከብ ብዛዕባና ዚብል ዓምዲ ጠውቕ፡ ድሕሪኡ “በዓል ዝኽሪ” ዚብል ብምሕራይ ኣብቲ እቲ ሰብ ዝነብረሉ ኸባቢ በዓል ዝኽሪ ዚኽበረሉ ሰዓትን ቦታን ክትፈልጥ ትኽእል ኢኻ።

ንምድላው ክንገብሮ እንኽእል እንታይ ካልእ ነገር ኣሎ፧