ዓለምለኻዊ ጸገም ኣእምሮኣዊ ጥዕና

እዚ ርእይቶታት እዚ፡ ብኣእምሮኣዊ ሕማም ዚሳቐዩ ሰባት እተዛረብዎ እዩ፣ ንስኻ ወይ እትፈትዎ ሰብካ ኸምዚ ይስምዓኩም ድዩ፧

ከምዚ ዚስምዓካ ንስኻ በይንኻ ኸም ዘይኰንካ ርግጸኛ ኹን። ሎሚ ብዙሓት ሰባት ገዛእ ርእሶም ወይ ዚፈትውዎ ሰብ ብሰንኪ ኣእምሮኣዊ ጸገም ይሳቐዩ እዮም።

ኣብ “ጽንኩር ግዜ” ንነብር ከም ዘለና ዜጠራጥር ኣይኰነን፣ ስለዚ፡ እተፈላለየ ዓይነት ጭንቀት የጋጠመና እዩ። (2 ጢሞቴዎስ 3:1) ሓደ መጽናዕቲ ኸም ዝቐመሮ፡ ብዓለምለኸ ደረጃ ኻብ ሸሞንተ ሰብ ሓደ ምስ ኣእምሮኣዊ ምዝንባል ይቃለስ እዩ። ብሰንኪ ለበዳ ኮቪድ 19፡ ኣብ 2019 ኣስታት 28 ሚእታዊት ሰባት ብሕዱር ጭንቀት ይሳቐዩ ነይሮም እዮም። ኣብ 2020 ድማ ቍጽሪ እቶም ብጭንቀት ዚሳቐዩ ሰባት 26 ሚእታዊት ወሲኹ እዩ።

ይኹን እምበር፡ ኣእምሮኣዊ ጥዕናና ብኣሃዛዊ ጸብጻብ ጥራይ ዚግለጽ ኣይኰነን። ከመይሲ፡ ኣእምሮኣዊ ጥዕና ኺብሃል ከሎ ምስ ስምዒትናን ምስ ስምዒት እነፍቅሮ ሰብን ህይወትና ምስ እንመርሓሉ መገድን ዚተሓሓዝ እዩ።

ኣእምሮኣዊ ጥዕና እንታይ ማለት እዩ፧

ጽቡቕ ኣእምሮኣዊ ጥዕና እንተ ኣልዩካ፡ ጽቡቕ ይስምዕካ፡ ጽቡቕ ትዓዪ። ብዘይካዚ፡ ንውጥረት ትቈጻጸሮ፡ ኣብ ስራሕካ ውጽኢታዊ ትኸውን፡ ዜዕግብ ህይወት ድማ ትነብር።

ኣእምሮኣዊ ምዝንባል፦

• ብብሕታዊ ድኽመት ዚመጽእ ኣይኰነን።

• ሕክምናዊ ኽንክን ዜድልዮ ኸቢድ ጭንቀት ኰይኑ፡ ኣተሓሳስባኻ የዛብዕ፡ ስምዒትካ ይቈጻጸር፡ ባህርያትካ ይቕይር።

• መብዛሕትኡ ግዜ፡ ምስ ካልኦት ንዘሎካ ርክብ የበላሹ፣ መዓልታዊ ዋኒንካ ኸይትገብር ጸገም ይፈጥረልካ።

• እተፈላለየ ዕድመን ባህልን ሃይማኖትን ትምህርታዊ ድሕረ ባይታን ኣታውን ንዘለዎም ሰባት የጥቅዕ።

ንኣእምሮኣዊ ጸገም ዚኸውን ሓገዝ

ኣብ ገዛእ ርእስኻ ወይ ኣብ ሰብካ ዓብዪ ናይ ባህርይ ለውጢ እንተ ርኢኻ፡ ድቃስ እንተ ኣብዩካ፡ ኣመጋግባኻ ስሩዕ እንተ ዘይኰይኑ፡ ወይ ንነዊሕ ግዜ ዚጸንሕ ጸቕጢ፡ ጭንቀት፡ ወይ ጓሂ እንተ ኣጋጢሙካ ነቲ ቐንዲ ጸገም ምእንቲ ኸተለልዮ ሕክምናዊ ሓገዝ ርኸብ። እሞ ደኣ ሓገዝ ኣበይ ትረክብ፧

እቲ ኣብ ምድሪ ኻብ ዝነበሩ ኣዝዩ ጥበበኛ ዝነበረ የሱስ ክርስቶስ ከምዚ ኢሉ ኣሎ፦ “ሓኪም ንሕሙማት ደኣ እምበር፡ ንጥዑያት ኣየድልዮምን እዩ።” (ማቴዎስ 9:12) ምስ ጥዕናዊ ጸገማት ዚቃለሱ ሰባት፡ ግቡእ ሕክምናን መድሃኒትን እንተ ረኺቦም፡ ካብ ሕማሞም ኪሕሾም፡ ውጽኢታውን ዜሐጕስን ህይወት ኪነብሩ ኸኣ ይኽእሉ እዮም። እቲ ምልክታት ከቢድ ወይ ንነዊሕ ግዜ ዝጸንሐ እንተ ደኣ ዀይኑ፡ ከይደንጐዩ ናብ ሕክምና ምኻዶም ጥበባዊ እዩ።a

መጽሓፍ ቅዱስ ናይ ሕክምና መጽሓፍ እኳ እንተ ዘይኰነ፡ ንኣእምሮኣዊ ጥዕናና ዚጠቅም ምኽሪ ዝሓዘ እዩ። መጽሓፍ ቅዱስ ንኣእምሮኣዊ ጸገም ክትዋጽኣሉ ብኸመይ ከም ዚሕግዘካ ንምፍላጥ፡ ነዘን ዚስዕባ ዓንቀጻት ክትምርምረን ንዕድመካ።