ካብ መፈንጠራ ድያብሎስ ተጠንቀቕ!

‘ካብ መፈንጠራ ድያብሎስ ኣምልጥ።’ —2 ጢሞ. 2:26።

እንታይ ኢልካ ምመለስካ፧

ንኻልኦት ብዘየድሊ ትነቕፎም እንተ ዄንካ፡ ብኸመይ ኢኻ ርእስኻ ኽትምርምር እትኽእል፧

ብፍርህን ብጸቕጥን ብዛዕባ ምምብርካኽ ካብ ጲላጦስን ጴጥሮስን እንታይ ክትመሃር ትኽእል፧

መጠኑ ኻብ ዝሓለፈ ጸጸት ክትርሕቕ እትኽእል ብኸመይ ኢኻ፧

1, 2. ኣብዛ ዓንቀጽ እዚኣ፡ ብዛዕባ ኣየናይ መፈንጠራ ድያብሎስ ኢና ኽንምርምር፧

ድያብሎስ ንኣገልገልቲ የሆዋ ይሃድኖም እዩ። ይኹን እምበር፡ ወትሩ ልክዕ ከም ሓደ ንግዳዩ ዚቐትል ሃዳናይ ኣይኰነን። ኣብ ክንዳኡስ፡ ንግዳዩ ብህይወቱ ኸሎ ብምሓዝ፡ ከም ድላዩ ኺገብሮ እዩ ዚደሊ።—2 ጢሞቴዎስ 2:24-26 ኣንብብ።

² ሓደ መጻወድያ ተጠቒሙ ዚሃድን ሰብ፡ ንግዳዩ ብህይወቱ ኸሎ ንምሓዝ፡ እተፈላለየ ዓይነት መፈንጠራ ይጥቀም ይኸውን። ምናልባት ነቲ ግዳዩ ናብ ቃልዕ ቦታ ኸም ዚወጽእ ብምግባር፡ ብመሸንቆቓ ኺሕዞ ይፍትን ይኸውን። ወይ ከኣ ብሃንደበት ተፈንጢሩ ነቲ እንስሳ ዚሕዞ ሕቡእ መጻወድያ ይጥቀም ይኸውን። ድያብሎስ እውን እንተ ዀነ፡ ንኣገልገልቲ ኣምላኽ ብህይወቶም ከለዉ ንምሓዝ፡ ተመሳሳሊ መፈንጠራታት ይጥቀም እዩ። በዚ መፈንጠራታት እዚ ኸይንተሓዝ እንተ ደሊና፡ ንቑሓት ክንከውንን ነቲ ብዛዕባ መፈንጠራ ወይ መጻወድያ ሰይጣን ዚሕብር መጠንቀቕታ ኸነቕልበሉን ኣሎና። ኣብዛ ዓንቀጽ እዚኣ፡ ንገዛእ ርእስና ብኸመይ ካብ ሰለስተ መጻወድያ ድያብሎስ ከነዕቍባ ኸም እንኽእል ክንምርምር ኢና። እዚ ኸኣ፡ (1) ካብ ቍጽጽር ወጻኢ ዝዀነ ዘረባ፡ (2) ፍርህን ጸቕጥን፡ ከምኡውን (3) መጠኑ ዝሓለፈ ጸጸት እዩ። ኣብታ ቐጺላ ዘላ ዓንቀጽ ድማ፡ ብዛዕባ ኽልተ ተወሳኺ መጻወድያ ወይ መፈንጠራ ሰይጣን ክንርኢ ኢና።

ነቲ ምስ ሓዊ ዚመሳሰል ካብ ቍጽጽር ወጻኢ ዝዀነ ዘረባ ኣጥፍኣዮ

3, 4. ልሳንካ ዘይምቍጽጻር እንታይ ሳዕቤን እዩ ኺህልዎ ዚኽእል፧ ኣብነት ሃብ።

³ ሓደ ሃዳኒ ንእንስሳታት ካብ እተሓብኡሉ ምእንቲ ኼውጽኦም ኢሉ፡ ብሓደ ጫፍ ዱር የቃጽል እሞ፡ እቶም እንስሳታት ኪሃድሙ ኺፍትኑ ኸለዉ ይሕዞም። ድያብሎስ እውን ብምሳልያዊ መገዲ ንክርስትያናዊት ጉባኤ ብሓዊ ኼባርዓ ይደሊ እዩ። እንተ ተዓዊቱ ኸኣ፡ ንኣባላት እታ ጉባኤ ኻብቲ ዝነበርዎ ሰላማዊ ዅነታት ኼውጽኦምን ኣብ ኢዱ ኼእትዎምን ይደሊ እዩ። ከመይ ጌርና ኢና ብዘይፍላጥ ንሰይጣን ክንሕግዞን ብመጻወድያኡ ኽንተሓዝን እንኽእል፧

⁴ ያእቆብ እቲ ወደ መዝሙር ንልሳን ምስ ሓዊ ኣመሳሲልዋ ኣሎ። (ያእቆብ 3:6-8 ኣንብብ።) ንልሳንና ኽንቈጻጸራ እንተ ዘይክኢልና፡ ኣብታ ክርስትያናዊት ጉባኤ ሓዊ ኸም ዚባራዕ ክንገብር ንኽእል ኢና። ብኸመይ፧ ነዚ ዚስዕብ ኵነታት እሞ ርአ፦ ኣብ ኣኼባ ጉባኤ፡ ሓንቲ ሓብቲ ስርዕቲ ፈላሚት ከም ዝዀነት ዚሕብር ምልክታ ተነብበ። እቲ ኣኼባ ምስ ተዛዘመ፡ ክልተ ኣስፋሕቲ ብዛዕባ እቲ ምልክታ ኼዕልላ ጀመራ። ሓንቲ ኻባታተን፡ በቲ ምልክታ ኸም እተሓጐሰትን ነታ ፈላሚት ዕዉትቲ ኽትከውን ከም እትምነየላን ተዛረበት። እታ ኻልአይታ ግና፡ እታ ፈላሚት ንኽትርአ ኢላ ኸምኡ ኸም ዝገበረት ብምዝራብ ንድራኸ እታ ፈላሚት ኣብ ሕቶ ኣእተወቶ። ካብ ክልቲአን፡ ምስ መን ክትቀራረቡ ምደለኹም፧ ብኣዘራርባኣ ኣብታ ጉባኤ ሓዊ ኽትጅምር እትኽእል ኣየነይተን ምዃና ንጹር እዩ።

5. ነቲ ምስ ሓዊ ዚመሳሰል ካብ ቍጽጽር ወጻኢ ዝዀነ ዘረባ ምእንቲ ኸነጥፍኦ፡ ብኸመይ ኢና ርእስና ኽንምርምር እንኽእል፧

⁵ ነቲ ምስ ሓዊ ዚመሳሰል ካብ ቍጽጽር ወጻኢ ዝዀነ ዘረባ ኸነጥፍኦ እንኽእል ብኸመይ ኢና፧ የሱስ፡ “ኣፍ ካብ ምልኣት ልቢ ይዛረብ እዩ” በለ። (ማቴ. 12:34) ስለዚ፡ ብቐዳምነት ክንወስዶ ዘሎና ስጕምቲ፡ ልብና ምምርማር እዩ። ጐዳኢ ነገራት ከም እንዛረብ ኪገብረና ኻብ ዚኽእል ሕማቕ ስምዒታት ንርሕቕ ዲና፧ ንኣብነት፡ ሓደ ሓው ፍሉይ መሰል ኣገልግሎት ንምርካብ ይመጣጠር ከም ዘሎ ምስ እንሰምዕ፡ ብንጹህ ድራኸ ኸምኡ ይገብር ከም ዘሎ ዲና እንኣምን ወይስ ብስስዐ ተደሪኹ ኸምኡ ይገብር ከም ዘሎ ጌርና ኢና እንጥርጥር፧ ነቐፍቲ ናይ ምዃን ዝንባለ እንተ ኣልዩና፡ ድያብሎስ ንድራኸ እቲ እሙን ኣገልጋሊ ኣምላኽ ዝነበረ እዮብ ኣብ ሕቶ ኸም ዘእተዎ ኽንዝክር ኣሎና። (እዮ. 1:9-11) ኣብ ክንዲ ንኣሕዋትና እንጥርጥሮም፡ ስለምንታይ ንነቕፎም ከም ዘለና ኽንምርምር ኣሎና። ከምኡ ኢልና እንሓስበሉ ብቑዕ ምኽንያት ኣሎና ድዩ፧ ወይስ ልብና በቲ ኣብዘን ዳሕሮት መዓልትታት ኣስፋሕፊሑ ዘሎ ፍቕሪ ዝጐደሎ መንፈስ ስለ እተመረዘ እዩ፧—2 ጢሞ. 3:1-4።

6, 7. (ሀ) ንኻልኦት ከም እንነቕፎም ኪገብረና ዚኽእል ምኽንያታት እንታይ እዩ፧ (ለ) ክንጽረፍ ከለና፡ እንታይ ምላሽ ክንህብ ኣሎና፧

⁶ ነቐፍቲ ኽንከውን እንኽእለሉ ኻልእ ምኽንያት እስከ ንርአ። ዝረኸብናዮ ኣሳልጦ ኻብ ናይ ካልኦት ብዝያዳ ኺጐልሕ ስለ እንደሊ ኪኸውን ይኽእል እዩ። በዚ ምኽንያት እዚ፡ ካብ ካልኦት በሊጽና ኽንርአ ንፍትን ንኸውን። ወይ ከኣ ጌጋና ኽንሽፍን ንጽዕር ንህሉ ንኸውን። ንኻልኦት እንነቕፈሉ ምኽንያት ብሰንኪ ትዕቢት ወይ ቅንኢ፡ ወይ ከኣ ብሰንኪ ጕድለት ርእሰ ምትእምማን ይኹን ብዘየገድስ፡ ሳዕቤኑ ሕማቕ እዩ።

⁷ ንኻልኦት እንነቕፈሉ ብቑዕ ምኽንያት ዘሎና ዀይኑ ኺስምዓና ይኽእል እዩ። ምናልባት ካልእ ሰብ ብእተዛረቦ ኻብ ቍጽጽር ወጻኢ ዝዀነ ዘረባ ተጐዲእና ኽንከውን ንኽእል ኢና። ከምኡ እንተ ኣጋጢሙና፡ ሕነ ኽንፈዲ ግቡእ ኣይኰነን። ከምኡ ምግባር፡ ኣብ ሓዊ ነዳዲ ኸም ምፍሳስ ጌርካ እዩ ዚርአ፣ ምስ ፍቓድ ኣምላኽ ዘይኰነስ፡ ምስ ፍቓድ ድያብሎስ ከኣ እዩ ዚሰማማዕ። (2 ጢሞ. 2:26) ኣብዚ መዳይ እዚ፡ ንየሱስ ክንመስሎ ኣሎና። ንሱ ምስ ጸረፍዎ፡ ‘መሊሱ ኣይጸረፈን።’ ኣብ ክንዳኡስ፡ “ነቲ ብቕንዕና ዚፈርድ ደኣ ነገሩ ኣሕሊፉ ሀበ።” (1 ጴጥ. 2:21-23) የሱስ፡ የሆዋ ንነገራት ብናቱ መገድን ኣብ ዝደለዮ ግዜን ከም ዚገብሮ ይተኣማመን ነበረ። ንሕና እውን ኣብ ኣምላኽ ከምኡ ዓይነት ምትእምማን ኪህልወና ኣለዎ። ንዘረባና ንኻልኦት ንምሕዋይ እንተ ተጠቒምናሉ፡ ነቲ ኣብ ጉባኤና ዘሎ “ማእሰር ሰላም” ክንዕቅቦ ኢና።—ኤፌሶን 4:1-3 ኣንብብ።

ካብቲ ምስ መሸንቈቛ ዚመሳሰል ፍርህን ጸቕጥን ኣምልጥ

8, 9. ጲላጦስ ንየሱስ ንሞት ዝፈረዶ ስለምንታይ እዩ፧

⁸ ብመፈንጠራ እተታሕዘ እንስሳ፡ ከም ድላዩ ኺንቀሳቐስ ኣይክእልን እዩ። ብተመሳሳሊ፡ ሓደ ብሰንኪ ፍርሂ ወይ ጸቕጢ ዚምብርከኽ ሰብ፡ ንህይወቱ ምሉእ ብምሉእ ኪቈጻጸራ ኣይክእልን እዩ። (ምሳሌ 29:25 ኣንብብ።) ቀጺልና እስከ ብሰንኪ ጸቕጥን ፍርህን ብዛዕባ እተምበርከኹ ሰብኡትን ካብ ተመክሮኦም እንታይ ክንመሃር ከም እንኽእልን ንርአ።

⁹ እቲ ሮማዊ ኣመሓዳሪ ዝነበረ ጶንጥዮስ ጲላጦስ፡ የሱስ ንጹህ ምዃኑ ስለ ዝፈለጠ፡ ኪጐድኦ ኣይደለየን ነይሩ። “ናብ ሞት ዜብጽሕ ነገር ሓንቲ እኳ ኣይገበረን” ኢሉ ተዛሪቡ እውን ነይሩ እዩ። ይኹን እምበር፡ ንየሱስ ንሞት ፈረዶ። ስለምንታይ፧ እቶም ጭፍራ ብዝገበሩሉ ጸቕጢ ስለ እተምበርከኸ እዩ። (ሉቃ. 23:15, 21-25) እቶም ተጻረርቲ ኸምቲ ዝደለይዎ ምእንቲ ኺግበረሎም፡ ንጲላጦስ፡ “ነዚ እንተ ፈታሕካዮ፡ ፈታው ቄሳር ኣይኰንካን” በለዎ። (ዮሃ. 19:12) ጲላጦስ፡ ንክርስቶስ እንተ ፈቲሕዎ፡ ስልጣኑ፡ ወይ እውን ህይወቱ ኺስእን ከም ዚኽእል ሓሲቡ ኪኸውን ይኽእል እዩ። ስለዚ፡ በቲ ጸቕጢ ተደፊኡ፡ ፍቓድ ድያብሎስ ገበረ።

10. ጴጥሮስ ንክርስቶስ ከም ዚኽሕዶ ዝገበሮ እንታይ እዩ፧

¹⁰ ሃዋርያ ጴጥሮስ ሓደ ኻብቶም ናይ ቀረባ ፈተውቲ የሱስ እዩ ነይሩ። የሱስ መሲሕ ምዃኑ እውን ብግህዶ ተዛሪቡ እዩ። (ማቴ. 16:16) ካልኦት ሰባት ንትምህርቲ የሱስ ስለ ዘይተረድእዎ ሓዲጎምዎ ኪኸዱ ኸለዉ፡ ጴጥሮስ ግና ብተኣማንነት ምስ የሱስ ጠበቐ። (ዮሃ. 6:66-69) ጸላእቲ ንየሱስ ኪሕዝዎ ምስ መጹ እውን፡ ጴጥሮስ ንጐይታኡ ንኺከላኸለሉ ኢሉ ሰይፊ ተጠቕመ። (ዮሃ. 18:10, 11) ጸኒሑ ግና፡ ጴጥሮስ ብሰንኪ ፍርሂ ንየሱስ ክርስቶስ ከም ዘይፈልጦ ኸሓደ። ንእተወሰነ እዋን በቲ ኸም መፈንጠራ ዝዀነ ፍርሂ ሰብ ስለ እተታሕዘ፡ ትብዓት ዝመልኦ ስጕምቲ ኺወስድ ኣይከኣለን።—ማቴ. 26:74, 75።

11. ምስ ከመይ ዝበለ ኣሉታዊ ጽልዋታት ኢና ኽንቃለስ ዘሎና፧

¹¹ ከም ክርስትያናት መጠን፡ ነቲ ንኣምላኽ ዜጕህዮ ነገራት ንኽንገብር ዚወርደና ጸቕጢ ኽንቃወሞ ኣሎና። ኣስራሕቲ ወይ ካልኦት ሰባት፡ ንኸነታልል ወይ ጾታዊ ርኽሰት ንኽንፍጽም ኪደፋፍኡና ይፍትኑ ይዀኑ። ተመሃሮ፡ ኣብ ፈተና ንኪቐድሑ፡ ስእለ ጽዩፍ ንኺርእዩ፡ ሽጋራ ንኼትክኹ፡ ሓሽሽ ንኺወስዱ፡ ኣልኮላዊ መስተ ንኼብዝሑ፡ ወይ ከኣ ጾታዊ ርኽሰት ንኺፍጽሙ ጸቕጢ ይግበረሎም ይኸውን። እሞኸ ኻብቲ ንየሆዋ ዜጕህዮ ነገራት ንኽንገብር ዚደፋፍእ ከም መፈንጠራ ዝዀነ ፍርህን ጸቕጥን ንኸነምልጥ ኪሕግዘና ዚኽእል እንታይ እዩ፧

12. ካብ ጲላጦስን ጴጥሮስን እንታይ ክንመሃር ንኽእል፧

¹² ካብ ጲላጦስን ጴጥሮስን እንታይ ክንመሃር ከም እንኽእል እስከ ንርአ። ጲላጦስ ብዛዕባ ክርስቶስ ብዙሕ ፍልጠት ኣይነበሮን። የሱስ ንጹህን ፍሉይ ሰብን ምዃኑ ግና ይፈልጥ ነይሩ እዩ። ይኹን እምበር፡ ትሕትናን ፍቕሪ ናይ ሓቂ ኣምላኽን ኣይነበሮን። በዚ ኸምዚ፡ ድያብሎስ ንጲላጦስ፡ ብህይወቱ ኸሎ ሓዞ። ጴጥሮስ፡ ቅኑዕ ፍልጠትን ፍቕሪ ኣምላኽን እኳ እንተ ነበሮ፡ ሓድሓደ ግዜ ዓቕሙ ዘይፈለጠሉን ዝፈርሃሉን ብጸቕጢ እተምበርከኸሉን ኣጋጣሚታት ነይሩ እዩ። ጐይታኡ የሱስ ቀቅድሚ ምትሓዙ፡ “ኵሎም እንተ ተዐንቀፉ እኳ፡ ኣነስ ኣይዕንቀፍን እየ” ኢሉ ተነየተ። (ማር. 14:29) ኰይኑ ግና፡ ልክዕ ከምቲ ሓደ ኻብቶም ጸሓፍቲ መጽሓፍ መዝሙር ዝገበሮ ብኣምላኽ እንተ ዚተኣማመን፡ ንፈተና ብግቡእ ምተዳለወ ነይሩ፣ እቲ ጸሓፍ መዝሙር፡ “እግዚኣብሄር ምሳይ እዩ፡ ኣይፈርህን፡ ሰብከ እንታይ ከይገብረኒ፧” ኢሉ ዘመረ። (መዝ. 118:6) የሱስ ኣብታ ኣብ ምድራዊ ህይወቱ ዘሕለፋ ናይ መወዳእታ ምሸት፡ ንጴጥሮስን ንኻልኦት ክልተ ሃዋርያትን ናብ ኣታኽልቲ ስፍራ ጌቴሴማኔ ሒዝዎም ከደ። ይኹን እምበር፡ ጴጥሮስን ብጾቱን ንቑሓት ኣብ ክንዲ ዚዀኑ፡ ደቀሱ። የሱስ ካብ ድቃሶም ኣበራቢሩ፡ “ናብ ፈተና ኸይትአትዉ፡ ንቕሑ ጸልዩውን” በሎም። (ማር. 14:38) ጴጥሮስ ግና መሊሱ ደቀሰ፣ ጸኒሑ ድማ ብፍርህን ብጸቕጥን ተምበርከኸ።

13. ነቲ ገለ ጌጋ ንኽንፍጽም ዚወርደና ጸቕጢ ብኸመይ ክንቃወሞ ንኽእል፧

¹³ ካብ ጲላጦስን ጴጥሮስን ካልእ ኣገዳሲ ትምህርቲ እውን ክንረክብ ንኽእል ኢና፣ ነቲ ዜጋጥመና ጸቕጢ ምእንቲ ኽንቃወሞ፡ ልክዕ ፍልጠት፡ ትሕትና፡ ፍቕሪ ኣምላኽ፡ ከምኡውን ፍርሂ ሰብ ዘይኰነስ፡ ፍርሃት የሆዋ የድልየና እዩ። እምነትና ኣብ ልክዕ ፍልጠት እተመርኰሰት እንተ ዀይና፡ ብዛዕባ እቲ እንኣምነሉ ነገራት ንኻልኦት ብትብዓት ክንነግሮም ኢና። እዚ ኸኣ ንጸቕጥን ንፍርሂ ሰብን ንኽንቃወሞ ኺሕግዘና እዩ። ሓቂ እዩ፡ ብርእስና ኽንተኣማመን የብልናን። የግዳስ፡ ንጸቕጢ ንኽንቃወሞ ዜኽእለና ሓይሊ ኣምላኽ ከም ዜድልየና ብትሕትና ኣፍልጦ ኽንህብ ኣሎና። መንፈስ የሆዋ ንኺውሃበና ኽንጽሊ፡ ንዕኡ ዘሎና ፍቕሪ ንስሙን ንስርዓታቱን ክብ ንኸነብሎ ኺድርኸና ኸኣ ክንፈቅድ ኣሎና። ብዘይካዚ፡ ንጸቕጥታት ኣቐዲምና ኽንዳለወሉ ኣሎና። ንኣብነት፡ ደቅና ብጸሎት ኣቐዲሞም እንተ ተዳልዮም፡ መዛኑኦም ገለ ጌጋ ንኺፍጽሙ ኺደፋፍእዎም ከለዉ ብውጽኢታዊ መገዲ ንኺምልሱ ኺሕግዞም ይኽእል እዩ።—2 ቈረ. 13:7።a

ካብቲ ምስ ዚጭፍልቕ መጻወድያ ዚመሳሰል መጠኑ ዝሓለፈ ጸጸት ርሓቕ

14. ምስቲ ኣብ ዝሓለፈ ዝፈጸምናዮ ጌጋ ብእተተሓሓዘ፡ ድያብሎስ እንታይ ኢልና ኽንድምድም እዩ ዚደሊ፧

¹⁴ ግዳያት ኣዘውቲሮም ኣብ ዚንቀሳቐሱሉ መገዲ፡ ጕንዲ ወይ ገዚፍ እምኒ ብምንጥልጣል ዚግበር ሓደ ዓይነት መጻወድያ ኣሎ። ሓደ እንስሳ ነታ እትፍንጠር ገመድ ምስ ተንከፋ፡ እቲ ጕንዲ ወይ እምኒ ኣብ ልዕሊኡ ወዲቑ ይጭፍልቖ። መጠኑ ዝሓለፈ ጸጸት፡ ምስቲ ኺጭፍልቐና ዚኽእል ከቢድ ጾር ኪመሳሰል ይኽእል እዩ። ብዛዕባ ኣብ ዝሓለፈ ዝፈጸምናዮ ጌጋ ኽንሓስብ ከለና፡ ‘እምብዛ እተቐጥቀጥና’ ወይ እተጨፍለቕና ዀይኑ ኺስምዓና ይኽእል እዩ። (መዝሙር 38:3-5, 8 ኣንብብ።) ሰይጣን፡ ምሕረት የሆዋ ዘይግብኣና ወይ ነቲ የሆዋ ዚሓትቶ ብቕዓታት ከነማልእ ከም ዘይንኽእል ኰይኑ ኺስምዓና እዩ ዚደሊ።

15, 16. ካብቲ ምስ ዚጭፍልቕ መጻወድያ ዚመሳሰል መጠኑ ዝሓለፈ ጸጸት ክትርሕቕ እትኽእል ብኸመይ ኢኻ፧

¹⁵ ካብቲ ዚጭፍልቕ መጻወድያ ብኸመይ ክንርሕቅ ንኽእል፧ ከቢድ ሓጢኣት እንተ ፈጺምካ፡ ነቲ ምስ የሆዋ ዝነበረካ ርክብ ናብ ዝነበሮ ንምምላስ ውዓል ሕደር ከይበልካ ስጕምቲ ውሰድ። ናብ ሽማግለታት ኪድ፡ ንኺሕግዙኻ ኸኣ ሕተቶም። (ያእ. 5:14-16) ንጌጋኻ ንምእራም ዚከኣለካ ግበር። (ማቴ. 3:8) ተግሳጽ እንተ ተዋሂቡካ፡ ሕልና ኣይተዕርብ። ከመይሲ፡ ተግሳጽ፡ የሆዋ ኸም ዜፍቅረካ ዚሕብር መረጋገጺ እዩ። (እብ. 12:6) ነቲ ኸም እትሓጥእ ዝገበረካ ስጕምትታት ከይትደግሞ ተጠንቀቕ፣ ንቘራጽነትካ ኸኣ ተግብሮ። ምስ ተነሳሕካን ምስ ተመለስካን፡ መስዋእታዊ በጃ የሱስ ክርስቶስ ንጌጋታትካ ኺሽፍኖ ኸም ዚኽእል ተኣማመን።—1 ዮሃ. 4:9, 14።

¹⁶ ገሊኦም ውልቀ ሰባት፡ ሓጢኣቶም ይቕረ ተባሂሉሎም ክነሱ፡ ብጸጸት ይውሓጡ። ከምኡ ዚስምዓካ እንተ ዀይኑ፡ የሆዋ ነቶም ነቲ ዜፍቅሮ ወዱ የሱስ ኣብ ኣገዳሲ እዋን ዝጠንጠንዎ ሃዋርያትን ንጴጥሮስን ይቕረ ኸም ዝበለሎም ዘክር። የሆዋ ነቲ ኣብ ጉባኤ ቈረንቶስ ዜሰምብድ ርኽሰት ፈጺሙ እተወገደ እሞ፡ ጸኒሑ እተነስሐ ሰብኣይ እውን ይቕረ ኢሉሉ እዩ። (1 ቈረ. 5:1-5፣ 2 ቈረ. 2:6-8) ብዘይካዚ፡ ቃል ኣምላኽ ብዛዕባ እቶም ከቢድ ሓጢኣት ዝፈጸሙ፡ ግናኸ ተነሲሖም ካብ ኣምላኽ ይቕረታ ዝረኸቡ ሰባት ይዛረብ እዩ።—2 ዜና 33:2, 10-13፣ 1 ቈረ. 6:9-11።

17. መስዋእታዊ በጃ የሱስ እንታይ እዩ ኺገብረልና ዚኽእል፧

¹⁷ ብሓቂ እንተ ተነሲሕካን ንምሕረት የሆዋ እንተ ተቐቢልካዮን፡ የሆዋ ይቕረ ኺብለልካን ነቲ ኣብ ዝሓለፈ ዝፈጸምካዮ ጌጋታት ኪርስዖን እዩ። መስዋእታዊ በጃ የሱስ ንሓጢኣትካ ኺሽፍኖ ዘይክእል ኰይኑ ኣይሰማዕካ። ከምኡ እንተ ተሰሚዑካ፡ ኣብ መፈንጠራ ሰይጣን ክትወድቕ ኢኻ። ድያብሎስ፡ እቲ በጃ ንሓጢኣትካ ኺሽፍኖ ኸም ዘይክእል ኰይኑ ኺስምዓካ እኳ እንተ ደለየ፡ እቲ በጃ ንሓጢኣት ኵሎም እቶም ዝሓጥኡ፡ ግናኸ እተነስሑ ሰባት ኪሽፍኖ ይኽእል እዩ። (ምሳ. 24:16) እታ ኣብቲ በጃ ዘላትካ እምነት፡ ነቲ እተሰከምካዮ ኻብ መጠኑ ዝሓለፈ ጸጸት ኸተውርዶ እያ፣ ንኣምላኽ ብምሉእ ልብኻን ኣእምሮኻን ነፍስኻን ንኸተገልግሎ ዜድልየካ ብርታዐ ኸኣ ኽትህበካ ትኽእል እያ።—ማቴ. 22:37።

ንውዲት ሰይጣን ኣይንስሕቶን ኢና

18. ካብ መፈንጠራ ድያብሎስ ክንርሕቕ እንኽእል ብኸመይ ኢና፧

¹⁸ ሰይጣን፡ ንተሓዘሉ ጥራይ ደኣ እምበር፡ በየናይ መጻወድያ ኸም ዚሕዘና ኣየገድሶን እዩ። ኰይኑ ግና፡ ንውዲቱ ስለ ዘይንስሕቶ፡ ከይብለጸልና ኽንጥንቀቕ ንኽእል ኢና። (2 ቈረ. 2:10, 11) ነቲ ዜጋጥመና ፈተናታት ንኽንዋጽኣሉ ዜኽእለና ጥበብ ኪውሃበና ንጽሊ እንተ ዄንና፡ ብመፈንጠራ ወይ ብመጻወድያ ሰይጣን ኣይክንተሓዝን ኢና። ያእቆብ፡ “ሓደ ኻባኻትኩም ጥበብ እንተ ጐደለቶ ግና፡ ነቲ ኸየስተሐፈረ ንዅሉ ብልግሲ ዚህብ ኣምላኽ ይለምኖ፡ ኪውሀቦውን እዩ” ኢሉ ጸሓፈ። (ያእ. 1:5) ወትሩ ብሕታዊ መጽናዕቲ ብምግባርን ንቓል ኣምላኽ ብምትግባርን፡ ምስ ጸሎትና ተሰማሚዕና ኽንመላለስ ኣሎና። እቲ እሙን ኣስተውዓሊ ባርያ ዜዳልዎ ንመጽናዕቲ መጽሓፍ ቅዱስ ዚሕግዝ ናውቲ፡ ንመጻወድያ ድያብሎስ ንኸነለልዮን ካብኡ ንኽንርሕቕን ይሕግዘና እዩ።

19, 20. እከይ ክንጸልእ ዘሎና ስለምንታይ ኢና፧

¹⁹ ጸሎትን መጽናዕቲ መጽሓፍ ቅዱስን፡ ሰናይ ንኽንፈቱ ይሕግዘና እዩ። ኰይኑ ግና፡ ማዕረ ማዕሪኡ እውን እከይ ክንጸልእ ኣሎና። (መዝ. 97:10) ደድሕሪ ስስዐ ዝመልኦ ትምኒት ምስዓብ እንታይ ሳዕቤን ከም ዘለዎ ምስትንታን፡ ካብኡ ንኽንርሕቕ ኪሕግዘና ይኽእል እዩ። (ያእ. 1:14, 15) እከይ ንጸልእ፡ ሰናይ ከኣ ንፈቱ እንተ ዄንና፡ ንመጻወድያ ሰይጣን ስለ እንጸልኦ፡ ብእኡ ኣይክንታለልን ኢና።

²⁰ ኣምላኽ፡ ሰይጣን ንኸይብለጸልና ዚሕግዘና ብምዃኑስ፡ ክሳዕ ክንደይ ኰን ኢና ኸነማስወሉ ዘሎና! ብመንፈሱን ብቓሉን ብውድቡን ገይሩ፡ “ካብ ክፉእ” የድሕነና እዩ። (ማቴ. 6:13) ኣብ እትቕጽል ዓንቀጽ፡ ካብቲ ድያብሎስ ንኣገልገልቲ ኣምላኽ ብህይወቶም ኪሕዘሉ ዝኸኣለ ኽልተ ውጽኢታዊ መጻወድያታት ብኸመይ ክንርሕቕ ከም እንኽእል ክንምርምር ኢና።

ጸኒዕካ ብምቛም ካብ መጻወድያ ሰይጣን ርሓቕ!

‘ንፍሕሶ ሰይጣን ተቓወሞ።’ —ኤፌ. 6:11።

እንታይ ኢልካ ምመለስካ፧

ሓደ ኣገልጋሊ የሆዋ በቲ ኸም መጻወድያ ዝዀነ ፍቕረ ንዋይ ንኸይሕነቕ ኪጥንቀቕ ዚኽእል ብኸመይ እዩ፧

ንክርስትያን ሰብ ሓዳር ካብቲ ኸም ጕድጓድ ዝዀነ ዝሙት ንኺርሕቁ ኺሕግዞም ዚኽእል እንታይ እዩ፧

ንፍቕረ ንዋይን ንጾታዊ ርኽሰትን ጸኒዕካ ኽትቃወሞ ጠቓሚ ዝዀነ ስለምንታይ ይመስለካ፧

1, 2. (ሀ) ሰይጣን ንቕቡኣት ኰነ ን“ኻልኦት ኣባጊዕ” ዚጸልኦም ስለምንታይ እዩ፧ (ለ) ኣብዛ ዓንቀጽ እዚኣ ኣየናይ መጻወድያ ሰይጣን ኢና ኽንምርምር፧

ሰይጣን ድያብሎስ ንደቂ ሰብ ብሓፈሻ፡ ብፍላይ ከኣ ነቶም ንየሆዋ ዜገልግልዎ ሰባት ይጸልኦም እዩ። አረ ሕሉፍ ሓሊፉስ ምስ ተረፍ ቅቡኣት ይዋጋእ እዩ ዘሎ። (ራእ. 12:17) እዞም እሙናት ተረፍ ቅቡኣት እዚኦም፡ ነቲ ኣብዚ ግዜና ዚግበር ዘሎ ዕዮ ስብከት መንግስቲ ኣምላኽ ግንባር ቀደም ኰይኖም ይዓይይዎ ኣለዉ፣ ንሰይጣን፡ ገዛኢ እዛ ዓለም እዚኣ ምዃኑ ኣቃሊዖምዎ እዮም። ድያብሎስ ነቶም ንቕቡኣት ዚድግፍዎምን ናይ ዘለኣለም ህይወት ተዳልዩሎም ዘሎን “ካልኦት ኣባጊዕውን” ይጸልኦም እዩ። (ዮሃ. 10:16) ንሱ ንዘለኣለም ናይ ምንባር ተስፋ የብሉን። ኣዝዩ እንተ ተቘጥዐ እምበኣር ዜገርም ኣይኰነን። ተስፋና ሰማያዊ ይኹን ምድራዊ፡ ሰይጣን ብዛዕባ ድሕንነትና ኣይዓጅቦን እዩ። ቀንዲ ዕላማኡ፡ ግዳያቱ ኺገብረና እዩ።—1 ጴጥ. 5:8።

² ነዚ ዕላማኡ ንምፍጻም፡ እተፈላለየ መጻወድያታት ወይ መፈንጠራታት ይጥቀም እዩ። ‘ንሓሳብ እቶም ዘይኣምኑ ስለ ዘዖሮ፡’ እዞም ሰባት እዚኦም ንብስራት መንግስቲ ኣምላኽ ኣይቅበልዎን እዮም፣ ብሰንኪ እዚ ኸኣ ነቲ መጻወድያታቱ ኺርእይዎ ኣይክእሉን እዮም። ይኹን እምበር፡ ድያብሎስ ነቶም ንመልእኽቲ መንግስቲ ኣምላኽ እተቐበልዎ ሰባት እውን ይፍንጥሮም እዩ። (2 ቈረ. 4:3, 4) እታ ኣቐዲማ ዝነበረት ዓንቀጽ፡ ካብ ሰለስተ መጻወድያታት ሰይጣን፡ ማለት (1) ካብ ቍጽጽር ወጻኢ ኻብ ዝዀነ ዘረባ፡ (2) ካብ ፍርህን ጸቕጥን፡ ከምኡውን (3) መጠኑ ኻብ ዝሓለፈ ጸጸት ብኸመይ ክንርሕቕ ከም እንኽእል ገሊጻትልና ነይራ እያ። ሕጂ ኸኣ ካብ ክልተ መጻወድያታት ወይ መፈንጠራታት ሰይጣን፡ ማለት ካብ ፍቕረ ንዋይን ካብቲ ዝሙት ንኽንፍጽም ዚወርደና ፈተናን ብኸመይ ክንርሕቕ ከም እንኽእል እስከ ንርአ።

ፍቕረ ንዋይ—ዚሓንቕ መጻወድያ

3, 4. ጭንቀት እዛ ዓለም እዚኣ ናብ ፍቕረ ንዋይ ዚመርሕ ብኸመይ እዩ፧

³ የሱስ ኣብ ሓንቲ ኻብተን ምሳሌታቱ፡ ብዛዕባ ኣብ እሾኽ እተዘርአ ዘርኢ ተዛረበ። ሓደ ሰብ ንመልእኽቲ መንግስቲ ኣምላኽ ኪሰምዖ ይኽእል እኳ እንተ ዀነ፡ የሱስ፡ “ጓሂ እዛ ዓለም እዚኣን ምዕሻው ሃብትን ግና ነቲ ቓል ይሐንቆ፡ ከይፈረየውን ይተርፍ” በለ። (ማቴ. 13:22) እወ፡ ፍቕረ ንዋይ ሓደ ኻብቲ ጸላኢና ዝዀነ ሰይጣን ዚጥቀመሉ መፈንጠራ እዩ።

⁴ ክልተ ረቛሒታት እዩ ንመልእኽቲ መንግስቲ ኣምላኽ ዚሓንቖ። ሓደ ረቛሒ፡ “ጓሂ [ወይ፡ ጭንቀት] እዛ ዓለም እዚኣ” እዩ። ኣብዚ ዘለናሉ “ኽፉእ ዘመን፡” ብዙሕ ዜጨንቕ ነገራት ኬጋጥመካ ይኽእል እዩ። (2 ጢሞ. 3:1) ናብራ ይኸብርን ሽቕለት ኣልቦነት ይውስኽን ስለ ዘሎ፡ ድራር ዕለት ምርካብ የጸግመካ ይህሉ ይኸውን። ‘ጡረታ ምስ ወጻእኩ፡ እኹል ኣታዊ ይህልወኒ ደዀን ይኸውን፧’ ኢልካ እውን ብዛዕባ መጻኢ ትጭነቕ ትኸውን። ገሊኣቶም ብምኽንያት ከምዚ ዝበለ ጭንቀት፡ ገንዘብ ድሕንነት ዜምጽኣሎም ኰይኑ ስለ እተሰምዖም፡ ደድሕሪ ሃብቲ ኺስዕቡ ጸኒሖም እዮም።

5. ‘ሃብቲ ኼዐሽወና’ ዚኽእል ብኸመይ እዩ፧

⁵ የሱስ ካልእ ረቛሒ እውን ጠቒሱ ነበረ፣ ንሱ ኸኣ፡ “ምዕሻው ሃብቲ” እዩ። እዚ ረቛሒ እዚ ምስ ጭንቀት ተደሚሩ፡ ነቲ ቓል ኪሓንቆ ይኽእል እዩ። ሓቂ እዩ፡ መጽሓፍ ቅዱስ፡ ‘ገንዘብ ከም ጽላል’ ምዃኑ ይገልጽ እዩ። (መክ. 7:12) ይኹን እምበር፡ ደድሕሪ ሃብቲ ምስዓብ ጥበብ ኣይኰነን። ብዙሓት ሰባት፡ ሃብቲ ንምጥራይ ብዝጸዓሩ መጠን፡ ብመጻወድያ ፍቕረ ንዋይ እናተሓንቁ እዮም ዚኸዱ። ገሊኣቶም እሞ ኸኣ ባሮት ሃብቲ ዀይኖም እዮም።—ማቴ. 6:24።

6, 7. (ሀ) እንታይ ኣብ ቦታ ስራሕ ኬጋጥም ዚኽእል ኵነታት እዩ ብፍቕረ ንዋይ ከም እትሕነቕ ኪገብረካ ዚኽእል፧ (ለ) ሓደ ክርስትያን ሕላፍ ሰዓት ኪሰርሕ ዜኽእሎ ኣጋጣሚ ምስ ዚረክብ፡ እንታይ እዩ ኣብ ግምት ኬእቱ ዘለዎ፧

⁶ ከይተፈለጠና ሃብታም ንምዃን ክንብህግ ንጅምር ንኸውን። ንኣብነት፡ ነዚ ዚስዕብ ኵነታት እሞ ንርአ። ኣስራሒኻ ናባኻ መጺኡ፡ “ብስራት ሒዘልካ እየ መጺአ። ትካልና ዓብዪ ጨረታ ስዒሩ ኣሎ። ስለዚ፡ ኣብዚ ቐጺሉ ዘሎ ኣዋርሕ፡ ሕላፍ ሰዓት ክትሰርሕ ኬድልየካ እዩ። እኹል ገንዘብ ግና ኪኽፈለካ እዩ” ኢሉካ። እንታይ ምላሽ ምሃብካ፧ ሓቂ እዩ፡ ንስድራ ቤትካ ብስጋዊ ዜድልዮም ነገራት ናይ ምምላእ ረዚን ሓላፍነት ኣሎካ፣ ኰይኑ ግና፡ ሓላፍነትካ ንሱ ጥራይ ኣይኰነን። (1 ጢሞ. 5:8) ብዙሕ ኣብ ግምት ከተእትዎ ዘሎካ ነገራት ኣሎ። ክንደይ ሕላፍ ሰዓት ኢኻ ኽትሰርሕ፧ ዓለማዊ ስራሕካ ኻብ ከም ኣኼባ ጉባኤን ኣምልኾ ስድራ ቤትን ዝኣመሰለ መንፈሳዊ ንጥፈታትካ ኺዓናቕፈካ ድዩ፧

⁷ ሕላፍ ሰዓት ብዛዕባ ምስራሕ ውሳነ ኽትገብር ከለኻ፡ ተወሳኺ ገንዘብ ምርካብ ድዩ ብቐንዱ ዜተሓሳስበካ ወይስ መንፈሳውነትካ ብኸመይ ከም ዚጽሎ፧ ተወሳኺ ገንዘብ ንምርካብ ዘሎካ ባህጊ፡ ንረብሓታት መንግስቲ ኣምላኽ ኣብ ህይወትካ ቐዳምነት ከም ዘይትህብ ድዩ ዚገብረካ፧ ንመንፈሳዊ ጥዕናኻን ንመንፈሳዊ ጥዕና ስድራ ቤትካን ዕሽሽ እንተ ኢልካዮ፡ ፍቕረ ንዋይ ብኸመይ ኪጸልወካ ኸም ዚኽእል ከተስተውዕሎ ምኸኣልካዶ፧ ኣብ ከምዚ ዓይነት ኵነታት እንተ ኣሊኻ፡ ጸኒዕካ ኽትቀውምን ብፍቕረ ንዋይ ንኸይትሕነቕ ክትጥንቀቕን እትኽእል ብኸመይ ኢኻ፧—1 ጢሞቴዎስ 6:9, 10 ኣንብብ።

8. ብዛዕባ ኣየናይ ቅዱስ ጽሑፋዊ ኣብነታት ምምርማርና እዩ ናብራና ንኽንግምግም ኪሕግዘና ዚኽእል፧

⁸ ብፍቕረ ንዋይ ምእንቲ ኸይትሕነቕ፡ በብእዋኑ ናብራኻ ገምግም። ልክዕ ከምቲ ንመንፈሳዊ ነገራት ከም ዚንዕቕ ብተግባሩ ዘርኣየ ኤሳው ከይትኸውን ተጠንቀቕ። (ዘፍ. 25:34፣ እብ. 12:16) ልክዕ ከምቲ ንብረቱ ሸይጡ ንድኻታት ብምሃብ ንየሱስ ኪስዕቦ ዕድመ ዝቐረበሉ ሃብታም ጐበዝ እውን ክትከውን የብልካን። እቲ ጐበዝ ነቲ ዝቐረበሉ ዕድመ ኣብ ክንዲ ዚቕበሎ፡ “ብዙሕ ጥሪት ስለ ዝነበሮ፡ . . . እናጐሀየ ኸደ።” (ማቴ. 19:21, 22) ኣብ መጻወድያ ሃብቲ ስለ ዝኣተወ፡ ነቲ ኣብ ምድሪ ኻብ ዝነበሩ ዝዓበየ ሰብኣይ ናይ ምስዓብ ፍሉይ መሰል ሰኣነ። ንስኻ እውን ነቲ ወደ መዝሙር የሱስ ክርስቶስ ናይ ምዃን ፍሉይ መሰል ከይትስእኖ ተጠንቀቕ።

9, 10. ቅዱሳት ጽሑፋት ብዛዕባ ስጋዊ ነገራት እንታይ ኣረኣእያ ዘለዎ ይመስለካ፧

⁹ ብዛዕባ ስጋዊ ነገራት እምብዛ ምእንቲ ኸይንጭነቕ፡ ነዚ ዚስዕብ ማዕዳ የሱስ ከነቕልበሉ ኣሎና፦ “እምብኣርከ እንታይ ንበልዕ፡ እንታይ ንሰቲ፡ እንታይ ንኽደን፧ ኢልኩም ኣይትጨነቑ። ነዚ ዅሉስ ኣህዛብ ይደልይዎ እዮም እሞ፡ ንኣኻትኩም እዚ ዅሉ ኸም ዜድልየኩም፡ ናይ ሰማይ ኣቦኹም ይፈልጥ እዩ።”—ማቴ. 6:31, 32፣ ሉቃ. 21:34, 35።

¹⁰ ብመጻወድያ እቲ ዜዐሹ ሃብቲ ኣብ ክንዲ እንሕነቕ፡ ንኣረኣእያ እቲ ሓደ ኻብቶም ጸሓፍቲ መጽሓፍ ቅዱስ ዝነበረ ኣጉር ንቕድሓዮ፣ ንሱ፡ “ድኽነትን ሃብትን ኣይትሀበኒ፡ ግናኸ በቲ ዜድልየኒ እንጌራ መግበኒ” በለ። (ምሳ. 30:8) ኣጉር፡ ገንዘብ ከም ጽላል ምዃኑ ጥራይ ዘይኰነስ፡ ሃብቲ ኸም ዜዐሹ እውን ይርዳእ ነይሩ እዩ። ንሕና እውን፡ ጭንቀት እዚ ስርዓት እዝን ምዕሻው ሃብትን ንመንፈሳውነትና ኼጥፍኦ ኸም ዚኽእል ክንግንዘብ ኣሎና። ብዛዕባ ስጋዊ ነገራት እምብዛ ምጭናቕ፡ ንግዜና ኼባኽኖን ንጕልበትና ኺጽንቅቖን ይኽእል እዩ፣ ንረብሓታት መንግስቲ ኣምላኽ ቐዳምነት ንኽንህብ ዜድልየና ድራኸ ድማ ኣይህልወናን። ስለዚ፡ በቲ መጻወድያ ሰይጣን ዝዀነ ፍቕረ ንዋይ ከይንተሓዝ ንጠንቀቕ።—እብራውያን 13:5 ኣንብብ።

ዝሙት—ስዉር ጕድጓድ

11, 12. ሓደ ክርስትያን ኣብ ቦታ ስራሑ ብመጻወድያ ዝሙት ኪተሓዝ ዚኽእል ብኸመይ እዩ፧

¹¹ ሓደ ሓያል እንስሳ ኺሕዙ ዚደልዩ ሃደንቲ፡ ኣብቲ እቲ እንስሳ ብተደጋጋሚ ዚጓዓዘሉ መገዲ፡ ጕድጓድ ይዅዕቱ። መብዛሕትኡ እዋን፡ እቲ ጕድጓድ ብእተወሰነ ቐሸምን ሓመድን እተሸፈነ እዩ። ሓደ ኻብቲ ሰይጣን ካብ ኵሉ ንላዕሊ ዚዕወተሉ ፈተናታት፡ ምስዚ መጻወድያ እዚ ይመሳሰል እዩ። ንሱ ኸኣ፡ ጾታዊ ርኽሰት እዩ። (ምሳ. 22:14፣ 23:27) ሓያሎ ክርስትያናት ንገዛእ ርእሶም ብቐሊሉ ጾታዊ ርኽሰት ኪፍጽሙ ኣብ ዚኽእሉሉ ዅነታት ስለ ዘእተዉዋ፡ በቲ መጻወድያ ተታሒዞም እዮም። ገሊኦም ምርዑዋት ክርስትያናት፡ መጻምድቶም ምስ ዘይኰነ ሰብ ፍቕራዊ ርክብ ድሕሪ ምጅማሮም እዮም ዝሙት ፈጺሞም።

¹² ዘይግቡእ ፍቕራዊ ርክብ ኣብ ቦታ ስራሕ ኪምዕብል ይኽእል እዩ። ሓደ ጸብጻብ ከም ዝሓበሮ፡ ካብተን ዝሙት ዝፈጸማ ደቂ ኣንስትዮ ልዕሊ ፍርቂ ዝዀና፡ ካብቶም ዝሙት ዝፈጸሙ 4 ደቂ ተባዕትዮ ኸኣ እቶም 3፡ ምስ መሳርሕቶም እዮም ዘምዮም። ንስኻኸ ምስ ኣንጻር ጾታ ዲኻ እትሰርሕ፧ ከምኡ እንተ ዀይኑ፡ እንታይ ዓይነት ርክብ እዩ ዘሎካ፧ ንፍቕራዊ ርክብ ዚጥዕም ኵነታት ምእንቲ ኸይህሉ፡ ንርክብካ ደረት ትገብረሉ ዲኻ፧ ንኣብነት፡ ሓንቲ ክርስትያን ሓብቲ ምስ ሓደ መሳርሕታ ብተደጋጋሚ ተዕልል ትኸውን፣ ሕሉፍ ሓሊፋ እውን ኣብ ሓዳራ ብዛዕባ ዜጋጥማ ጸገማት ክትነግሮ ትጅምር ትኸውን። ኣብ ካልእ ኵነታት ከኣ፡ ሓደ ክርስትያን ሓው ምስ ሓንቲ መሳርሕቱ ብሕውነት ምስ ተቐራረበ፡ “ንርእይቶይ ኣኽቢራ እያ እትርእዮ፡ ንዘረባይ እውን ትሰምዖ እያ። ኣኽቢራ እያ እትርእየኒ። ኣብ ቤተይ ከምዚ ዓይነት ኣተሓሕዛ እንተ ዚግበረለይ፡ መን ምሃበ፧” ኢሉ ይሓስብ ይኸውን። ኣብ ከምዚ ዓይነት ኵነታት ዘለዉ ክርስትያናት ብኸመይ ብቐሊሉ ኺዝምዉ ኸም ዚኽእሉ ኣስተብሂልካዶ፧

13. ኣብ ክርስትያናዊት ጉባኤ ዘይግቡእ ፍቕራዊ ርክብ ኪምዕብል ዚኽእል ብኸመይ እዩ፧

¹³ ኣብ ክርስትያናዊት ጉባኤ እውን እንተ ዀነ፡ ዘይግቡእ ፍቕራዊ ርክብ ኪምዕብል ይኽእል እዩ። ነዚ ዚስዕብ ናይ ሓቂ ታሪኽ እስከ ንርአ። ዳንኤልን ሰበይቱ ሳራንa ስሩዓት ፈለምቲ እዮም ነይሮም። ዳንኤል፡ ከምቲ ባዕሉ ዝገለጾ፡ ‘ኣይፋል ዘይወጾ ዓይነት ሽማግለ’ እዩ ነይሩ። ንዝዀነ ይኹን እተዋህቦ ፍሉይ መሰል ብህንጥዮት ይቕበሎ ነበረ። ንሓሙሽተ መንእሰያት መጽናዕቲ መጽሓፍ ቅዱስ ይመርሓሎም ነበረ፣ ካባታቶም እቶም ሰለስተ ኸኣ ተጠምቁ። እዞም ሓደስቲ ጥሙቓት ብዙሕ ሓገዝ የድልዮም ነበረ። ዳንኤል ብቲኦክራስያዊ ዕዮታቱ ትሑዝ ኣብ ዚዀነሉ እዋን፡ ሳራ ሰበይቱ ነቶም ሓደስቲ ጥሙቓት ትሕግዞም ነበረት። ከምኡ እናበለ፡ እቶም ቀደም ዳንኤል መጽናዕቲ መጽሓፍ ቅዱስ ዚመርሓሎም ዝነበረ መንእሰያት፡ ምጽንናዕ ኪደልዩ ኸለዉ ናብ ሳራ ይመጹ ነበሩ። ንሳ ኸኣ ሓልዮት ክትደሊ ኸላ፡ ናባታቶም ትኸይድ ነበረት። በዚ ኸምዚ፡ ኣዝዩ ሓደገኛ መጻወድያ ተጻወደ። ዳንኤል ከምዚ በለ፦ “ሰበይተይ ንነዊሕ ኣዋርሕ ንኻልኦት ትሕግዞም እኳ እንተ ነበረት፡ ናይ ገዛእ ርእሳ መንፈሳውን ስምዒታውን ጕልበት ግና ተጸንቀቐ። እዝን ኣነ ንዓኣ ዕሽሽ ምባለይን ተደማሚሩ ድማ ሕማቕ ሳዕቤን ኣምጽአ። ሰበይተይ ምስ ሓደ ኻብቶም ናይ ቀደም ተመሃሮይ ዘመወት። ኣብቲ ዝነበረኒ ፍሉይ መሰላት ጥራይ አተኵር ስለ ዝነበርኩ፡ ሰበይተይ ብመንፈሳዊ መዳይ ከም ዝደኸመት እውን ኣየስተውዓልኩን።” ካብ ከምዚ ዝበለ ዜሕዝን ፍጻመ ኸተምልጥ እትኽእል ብኸመይ ኢኻ፧

14, 15. ክርስትያን ሰብ ሓዳር ካብቲ ኸም ጕድጓድ ዝዀነ ዝሙት ንኼምልጡ፡ እንታይ ረቛሒታት ኪሕግዞም ይኽእል፧

¹⁴ ካብቲ ኸም ጕድጓድ ዝዀነ ዝሙት ምእንቲ ኸተምልጥ፡ ብዛዕባ ትርጕም ቃል ኪዳን ኣስተንትን። የሱስ፡ “ነቲ ኣምላኽ ዘጋጠሞስ፡ ሰብ ኣይፍለዮ” ኢሉ ነይሩ እዩ። (ማቴ. 19:6) እቲ ዘሎካ ቲኦክራስያዊ ፍሉይ መሰል ካብ መጻምድትኻ ንላዕሊ ኸም ዜገድስ ጌርካ ኣይትሕሰብ። ብዘይካዚ፡ ብዘየድሊ ንጥፈታት ካብ መጻምድትኻ በብግዜኡ ተፈሊኻ ግዜ ተሕልፍ እንተ ዄንካ፡ ኣብ ሓዳርኩም ድኽመት ከም ዘሎ ኼመልክት ይኽእል እዩ፣ ናብ ፈተናን ናብ ከቢድ ሓጢኣትን ድማ ኪመርሓካ ይኽእል እዩ።

¹⁵ ሽማግለ እንተ ዄንካ፡ ነቲ መጓሰ እውን ክትሓልየሉ ኣሎካ። ሃዋርያ ጴጥሮስ፡ “ነቲ ምሳኻትኩም ዘሎ መጓሰ ኣምላኽ ጓስይዎ፡ ብፍታው ከም ፍቓድ ኣምላኽ እምበር፡ ብግዲ ኣይኹን፡ ብታሕጓስ እምበር፡ ምእንቲ ኸንቱ ረብሓውን ኣይኹን” ኢሉ ጸሓፈ። (1 ጴጥ. 5:2) ንኣባላት ጉባኤኻ ዕሽሽ ክትብሎም የብልካን። ይኹን እምበር፡ ነቲ ኸም ጓሳ መጠን ዘሎካ ግደ ንኽትፍጽም ኢልካ፡ ነቲ ኸም ብዓል ሓዳር መጠን ዘሎካ ግደ ሸለል ክትብሎ የብልካን። ምሉእ ብምሉእ ነታ ክርስትያናዊት ጉባኤ ኣብ ምምጋብ ብምትኳርካ፡ መጻምድትኻ ኣብ ቤት “ዚጠሚ” እንተ ዀይኑ፡ ጻዕርኻ ብላሽ፡ ሕሉፍ ሓሊፉ እውን ሓደገኛ ኪኸውን ይኽእል እዩ። ዳንኤል፡ “ንስድራ ቤትካ ዕሽሽ እናበልካዮም ክነስኻ፡ ነቲ ዘሎካ ፍሉይ መሰል ንምፍጻም ብትግሃት ምዕያይ ግቡእ ኣይኰነን” በለ።

16, 17. (ሀ) ክርስትያን ሰብ ሓዳር፡ ኣብ ቦታ ስራሖም ምስ ካልእ ሰብ ዘየድሊ ርክብ ኪምስርቱ ኸም ዘይደልዩ ንጹር ኪገብሩ ዚሕግዞም ኣየናይ ግብራዊ ስጕምትታት እዩ፧ (ለ) ንክርስትያናት ካብ ዝሙት ንኺርሕቑ ኺሕግዞም ብዛዕባ ዚኽእል ኣብ ጽሑፋትና ዝወጸ ሓሳባት ጥቐስ።

¹⁶ ኣብ መጽሔታት ግምቢ ዘብዐኛን ንቕሑ!ን፡ ክርስትያን ሰብ ሓዳር ካብቲ ኸም መጻወድያ ዝዀነ ዝሙት ንኼምልጡ ዚሕግዞም ጽቡቕ ምኽሪ ወጺኡ ነይሩ እዩ። ንኣብነት፡ ናይ 15 መስከረም 2006 ሕታም ግምቢ ዘብዐኛ፡ ከምዚ ዚስዕብ ዚብል ምኽሪ ሒዛ ወጺኣ ነበረት፦ “ኣብ ስራሕን ኣብ ካልእን፡ ምቅርራብ ኪፈጥር ካብ ዚኽእል ኵነታት ተጠንቀቕ። ንኣብነት፡ ምስ ኣንጻር ጾታ ዄንካ ትርፊ ሰዓታት ምዕያይ፡ ንፈተና ኼቃልዓካ ይኽእል እዩ። ብዓል ሓዳር ከም ምዃንካ መጠን፡ ብዘረባኻን ብጠባይካን ምስ ካልእ ዘየድሊ ርክብ ክትምስርት ከም ዘይትደሊ ንጹር ግበሮ። ኣምልኾ እትስዕብ ብምዃንካ፡ ብምኵሻም ወይ ኣብ ኣከዳድናኻን ትርኢትካን ቅጥዒ ዘይብልካ ብምዃን ዘይግቡእ ቈላሕታ ኽትስሕብ ከም ዘይትደሊ እተረጋገጸ እዩ። . . . ኣብ ስራሕ ናይ መጻምድትኻን ደቅኻን ስእሊ ምሓዝ፡ ንዓኻን ንኻልኦትን ኣብ ቀዳማይ ቦታ እትሰርዖ ኸም ዘሎ ብዓይኒ ዚርአ መዘኻኸሪ ኪኸውን ይኽእል እዩ። ፍቕራዊ ምቅርራብ ንምግባር ዚእምት ዝዀነ ይኹን ነገር ከቶ ንኸይተተባብዕ ወይ እውን ስቕ ኢልካ ንኸይትርኢ ቘራጽነት ግበር።”

¹⁷ እታ፡ “ኣብ ቃል ኪዳንካ እሙን ምዃን ብሓቂ እንታይ ማለት እዩ፧” ዘርእስታ ኣብ ናይ ሚያዝያ 2009 ሕታም ንቕሑ! (እንግሊዝኛ) ዝወጸት ዓንቀጽ፡ መጻምድትኻ ምስ ዘይኰነ ሰብ ብጾታዊ መገዲ ኽትቀራረብ ምሕሳብ ሓደገኛ ምዃኑ ኣጠንቂቓ ነበረት። እታ ዓንቀጽ ከም ዝገለጸቶ፡ ከምኡ ምግባር ብቐሊሉ ናብ ዝሙት ኪመርሕ ይኽእል እዩ። (ያእ. 1:14, 15) ብዓል ሓዳር እንተ ዄንካ፡ ምስ መጻምድትኻ ዄንካ በብግዜኡ ንኸምዚ ዝኣመሰለ ሓበሬታ እንተ መርመርካዮ ጥበባዊ እዩ። መውስቦ ብየሆዋ እተመስረተ መሰናድዎ ስለ ዝዀነ፡ ቅዱስ እዩ። ምስ መጻምድትኻ ብዛዕባ ሓዳርኩም እትዘራረቡሉ ግዜ ምምዳብካ፡ ንቕዱስ ነገራት ከም እተኽብር ከተርኢ እትኽእለሉ ዝበለጸ መገዲ እዩ።—ዘፍ. 2:21-24።

18, 19. (ሀ) ሳዕቤን ዝሙት እንታይ እዩ፧ (ለ) ኣብ ቃል ኪዳንካ እሙን ምዃን እንታይ ጥቕምታት ኣለዎ፧

¹⁸ ዘይግቡእ ፍቕራዊ ርክብ ክትምስርት እንተ ተፈቲንካ፡ ብዛዕባ እቲ ምንዝርን ዝሙትን ዘለዎ ጐዳኢ ሳዕቤን ኣስተንትን። (ምሳ. 7:22, 23፣ ገላ. 6:7) እቶም ርኽሰት ዚፍጽሙ ሰባት ንየሆዋ የጕህይዎ፡ ንመጻምድቶምን ንገዛእ ርእሶምን ከኣ ይጐድኡ እዮም። (ሚልክያስ 2:13, 14 ኣንብብ።) እቶም ስነ ምግባራዊ ንጽህናኦም ዚሕልዉ ሰባት ብዛዕባ ዚረኽብዎ ጥቕምታት ኣስተንትን። ንሳቶም ንዘለኣለም ናይ ምንባር ተስፋ ጥራይ ዘይኰነስ፡ ሎሚ እውን ዜሐጕስ ህይወት እዮም ዚነብሩ፣ ጽሩይ ሕልና ኸኣ ኣለዎም።—ምሳሌ 3:1, 2 ኣንብብ።

¹⁹ ሓደ ኻብቶም ጸሓፍቲ መጽሓፍ መዝሙር፡ “እቶም ሕግኻ [ሕጊ ኣምላኽ] ዜፍቅሩ ብዙሕ ሰላም አለዎም፡ ዜዐንቅፎም ከኣ የልቦን” ኢሉ ዘመረ። (መዝ. 119:165) ስለዚ፡ ንሓቂ ኣፍቅራ፣ ‘ቅንያቱ ኽፉእ እዩ እሞ፡ ከም ለባም እምበር፡ ከም ዓሻ ዘይኰነ ኸመይ ብጥንቃቐ ኸም እትመላለስ እውን ተመልከት።’ (ኤፌ. 5:15, 16) እቲ እንጓዓዘሉ መገዲ፡ በቲ ሰይጣን ንናይ ሓቂ ኣምለኽቲ ንምፍንጣር ኢሉ ዘዳለዎ መጻወድያ ዝመልአ እዩ። ኰይኑ ግና፡ ገዛእ ርእስና ኸነዕቍብ ንኽእል ኢና። የሆዋ፡ ጸኒዕና ንኽንቀውምን ‘ነቲ ናይቲ ኽፉእ ርሱን መንትግ ንኸነጥፍኦን’ ኣዕጢቑና እዩ።—ኤፌ. 6:11, 16።