ኣብ ኣገልግሎት ክእለትካ ኣመሓይሽ —ብብሮሹር ብስራት ኣምላኽ ኣብ ኣፍ ደገ ዄንካ መጽናዕቲ መጽሓፍ ቅዱስ ኣጀምር

ኣገዳሲ ዝዀነ ስለምንታይ እዩ፦ ደቀ መዛሙርቲ ምእንቲ ኽንገብር፡ መምህራን ቃል ኣምላኽ ክንከውን ኣሎና። (ማቴ. 28:19, 20) ኵላትና ነቲ እተዋህበና ንዋት ተጠቒምና፡ ብውጽኢታዊ መገዲ ሓቂ ኽንምህር ንኽእል ኢና። ብሮሹር ብስራት ኣምላኽ ብፍላይ ንሰባት ሓቂ ኽንምህሮም ክትሕግዘና ተባሂላ እያ ተዳልያ። ስለዚ፡ ኣብ በቤት ከነገልግል ከለና፡ ንሓደ ብዓል ቤት ኣብ ኣፍ ደገኡ ዄንና በዛ ብሮሹር እዚኣ መጽናዕቲ መጽሓፍ ቅዱስ ክንጅምረሉ ንኽእል ኢና።

ኣብዛ ወርሒ እዚኣ፡ ነዚ ፈትኖ፦

መጽናዕቲ መጽሓፍ ቅዱስ ንምምራሕ ድሌት ከተማዕብል ጸሊ። መጽናዕቲ መጽሓፍ ቅዱስ ከተጀምርን ንሓቂ ብውጽኢታዊ መገዲ ኽትምህርን የሆዋ ምእንቲ ኺሕግዘካ እውን ጸሊ።—ፊል. 2:13።
ነቲ ኣቀራርባ ኣብ እዋን ኣምልኾ ስድራ ቤት ወይ ኣብ ናይ ብሕቲ መጽናዕቲ፡ ኣጽንዓዮ። ከምኡ እንተ ጌርካ፡ ኣብ ኣገልግሎት ብምትእምማን ክትዛረብን ኣብ ኣፍ ደገ ዄንካ መጽናዕቲ መጽሓፍ ቅዱስ ከተጀምርን ኢኻ።

ካብ ቤት ናብ ቤት ከተገልግል ከለኻ፦

“ሰባት፡ እዛ ዓለም እዚኣ ናበይ ገጻ ተምርሕ ከም ዘላ ኺፈልጡ ይደልዩ እዮም። ብዛዕባ እዚ ኸመያይጠካ ኸኣ እየ መጺአ። ኵነታት ዚመሓየሽዶ ይመስለካ፧ [መልሲ ተጸበ።] ሓያሎ ሰባት፡ መጽሓፍ ቅዱስ ተስፋ ዚህብ ብስራት ሒዙ ኸም ዘሎ ኺሰምዑ ኸለዉ ይግረሙ እዮም። ገለ ኻብቲ መጽሓፍ ቅዱስ ዚምልሶ ሕቶታት እንሆ።” ነታ ብሮሹር ሃቦ እሞ፡ ካብቲ ኣብ ድሕሪት እታ ብሮሹር ዘሎ ሕቶታት፡ ብዝያዳ እተገድሶ ሕቶ ኺመርጽ ሕተቶ። ሽዑ፡ ናብታ ትምህርቲ ኼድካ፡ መጽናዕቲ ኣጀምሮ። ኣብታ ትምህርቲ እቲኣ፡ ነታ እትቕጽል ሕቶ ምስ ተመለስካ ኽትመያየጡላ ቘጸራ ግበር።