«Rebbiň huzuryna sadaka getireliň»
BIRI size ýagşylyk etse, siz oňa nädip minnetdarlyk bildirip bilersiňiz? Geliň, bir bolan waka seredeliň. Midýanlaryň Pegor Bagal taňrysy ysraýyllylaryň günä etmegine sebäp bolýar. Şonuň üçin Ysraýylyň goşun serkerdeleri midýanlar bilen söweşýär, Ýehowa hem halkyna ýeňiş gazanmaga kömek edýär. Indi goşun serkerdeleri Hudaýa minnetdarlyk bildirmek isleýärler. Olja düşen zatlary urşa gatnaşan 12 müň esgere we galan ysraýyllara bölüp berýärler. Ýehowanyň beren görkezmesine laýyklykda, esgerler oljanyň belli bir bölegini ruhanylara bermelidiler, galan ysraýyllar bolsa öz paýyndan lewilere bermelidiler (San. 31:1—5, 25—30).
Ýöne goşun serkerdeleri köpräk sadaka bermek islediler. Olar Musa ýüzlenip: «Biz... ýolbaşçylyk edýän goşunymyzdaky esgerleri sanap çykdyk. Olaryň ýekejesi hem kem däl» diýdiler. Olar Ýehowa sap altyn we dürli şaý-sepleri sadaka bermek islediler. Olaryň beren altyn şaý-sepleriniň agramy 190 kilogramdan hem köpdi (San. 31:49—54).
Şu günler hem köp adamlar Ýehowanyň edýän ýagşylyklary üçin minnetdarlyk bildirýärler. Emma minnetdarlygy diňe Ýehowanyň gullukçylary bildirmeýär. Muny şeýle waka tassyklaýar. 2009-njy ýylda Italiýanyň Bolonýa şäherinde Ýehowanyň Güwäçileriniň halkara kongresi geçirildi. Şonda bir awtobus sürüjisi myhmanlary stadiona gatnatdy. Ol ýumşak häsiýetli adamdy we awtobusy seresaply sürýärdi. Şol sebäpli dogan-uýalar sürüjä minnetdarlyk hatyny ýazýarlar; ýol töleginden daşary çaý puluny we «Mukaddes Ýazgylar näme öwredýär?» atly kitaby sowgat berýärler. Sürüji olara şeýle diýýär: «Men siziň ýazan hatyňyzy we kitabyňyzy höwes bilen kabul edýärin, ýöne beren çaý puluňyzy welin, wagyz işi üçin sadaka berýärin. Men Ýehowanyň Güwäçisi bolmasam-da, sadakany bermek isleýärin, sebäbi siziň söýgi bilen edýän işiňizi gördüm».
Ýehowanyň Güwäçileriniň bütindünýä işine pul sadaka bermek — Hudaýyň eden ýagşylyklary üçin minnetdarlygyňy bildirmegiň bir ýoludyr (Mat. 24:14). Käbir adamlar çarçuwada görkezilen ýollar bilen sadaka berýärler.