Olar Braziliýada höwes bilen gulluk edýärler

OTUZ ýaşyndaky Rubiýa (1) atly uýa birnäçe ýyl mundan ozal Braziliýanyň günortasynda ýerleşýän kiçijik ýygnakda pioner bolup gulluk edýän Sandrany (2) görmäge gidýär. Şol ýerde bolan bir waka Rubiýa şeýle bir täsir edýär welin, bu onuň durmuşyny düýpgöter özgerdýär. Ol nähili waka? Geliň, muny Rubiýanyň özünden bileliň.

«MEN ÖZ GULAGYMA YNANMADYM»

«Sandra meni Mukaddes Ýazgylar okuwyny geçýän bir aýalyň ýanyna alyp bardy. Sapak geçip otyrkak, ol aýal birdenkä şeýle diýdi: “Sandra, meniň işleýän ýerimde üç sany gyz Mukaddes Ýazgylar okuwyny geçmek isleýär. Ýöne men olara nobata durmalydygyny aýtdym. Sebäbi men seniň köp adamlar bilen okuw geçýändigiňi we bir ýylyň dowamynda seniň asla wagtyň bolmajakdygyny bilýärin“. Men öz gulagyma ynanmadym. Ýehowa barada bilmek isleýän adamlar öz nobatyna garaşmalydylar! Meniň ýaşaýan ýerimde Mukaddes Ýazgylar okuwyny geçmek isleýän adamyň ýekejesini-de tapmak kyn. Ol aýal bilen okuw geçip otyrkak, mende bu kiçijik şäherdäki adamlara kömek etmäge güýçli isleg döredi. Tiz wagtdan men uly şäherden gaýdyp, Sandranyň pioner bolup gulluk edýän ýerine göçüp geldim».

Soňra näme boldy? Rubiýa şeýle gürrüň berýär: «Ol ýere göçüp baranyma iki aý bolanda, men 15 adam bilen Mukaddes Ýazgylar okuwyny geçirýärdim. Isle ynanyň, isle ynanmaň, Sandra ýaly maňa-da okuw geçmek isleýän adamlar nobata durup başladylar!»

GULLUGYNA TÄZEDEN SERETMÄGE HÖWES DÖREDI

20 ýaşlaryndaky Diýego (3) atly dogan Braziliýanyň günortasynda ýerleşýän Prudentopolis şäherinde gulluk edýän birnäçe pioneri görmäge barýar. Bu gezelenç oňa güýçli täsir etdi we gullugyna täzeden seretmäge höweslendirdi. Ol şeýle gürrüň berýär: «Men öz ýygnagymda her aý bary-ýogy birnäçe sagat gulluk edýärdim. Men pionerlerde myhmançylykda bolanymda we olaryň gürrüň berýän wakalaryny diňlänimde, olaryň şatlykly gulluk edişleri bilen özümiň gulluga bolan garaýşymyň tapawudyny duýdum. Olaryň bagtly we şadyýan ýaşaýyşlaryny görüp, men öz durmuşymyň manyly bolmagyny isledim». Bu gezelençden soň, Diýego pioner gullugyna başlady.

Eger siz hem Diýego ýaly ýaş Güwäçi bolup, wagyz işine we ýygnak duşuşyklaryny ýürekgysgynç hem-de adaty zat hökmünde garaýan bolsaňyz näme? Onda siz wagyzçylaryň ýetmeýän ýerinde gulluk edip, durmuşyňyzy şatlykdan doldurmak üçin gerekli özgerişikleri edip bilermisiňiz? Elbetde, amatly ýaşaýyşdan el çekmek pikiri sizi gorkuzmagy mümkin. Ýöne köp ýaşlar şeýle özgerişlikleri höwes bilen etdiler. Olar Ýehowa has köpräk gulluk etmek üçin, öz maksatlaryna we isleg-arzuwlaryna täzeden seretdiler. Geliň, indi Bruno bilen bolan waka seredeliň.

SAZANDAMY ÝA-DA WAGYZÇY?

Häzir 28 ýaşly Bruno (4) birnäçe ýyl mundan öň ady belli sazçylyk mekdebinde okaýardy we orkestriň dirižýory bolmak isleýärdi. Ol okuwda uly üstünlikler gazandy. Hatda ony birnäçe gezek simfoniki orkestrine dirižýorlyk etmäge çagyrdylar. Oňa abraýly gelejek garaşýardy. Emma Bruno şeýle gürrüň berýär: «Men durmuşymda nämedir bir zadyň ýetmeýändigini duýýardym. Men suwda çokundyryldym, ýöne özümi bütinleý Ýehowa bagyş etmändigime düşünýärdim, ine, şol-da meni biynjalyk edýärdi. Men Ýehowa doga edip, Oňa duýgularym barada aýdýardym. Şeýle-de ýygnakdaky tejribeli doganlar bilen gürrüňdeş bolýardym. Men ähli zady ölçerip, Hudaýa gulluk etmegi birinji orunda goýmagy ýüregime düwdüm we sazçylyk okuwyny taşlap, wagyzçylaryň ýetmeýän ýerinde gulluk etmegi maksat edindim». Onuň gelen kararynyň netijesi nähili boldy?

Bruno San-Pauldan 260 kilometr uzaklykda ýerleşýän 7 000-e golaý ilatly kiçijik şähere, ýagny Guapiara göçüp gelýär. Bruno üçin bu uly özgerişlik bolýar. Ol şeýle gürrüň berýär: «Men holodilniksiz, telewizorsyz we Internetsiz kiçijik öýe göçüp geldim. Emma ol öýde mende öň hiç haçan bolmadyk zat bardy. Ol mellekli we bag-bakjaly öýdi!» Bruno kiçijik ýygnakda gulluk edýän döwri, hepdede bir gezek ýany bilen iýmit, suw hem-de edebiýatlary alyp, motosiklde oba ýerlerinde wagyz etmäge gidýärdi. Ol ýerdäki köp adamlar hoş habary hiç haçan eşitmändirler. Bruno şeýle ýatlaýar: «Men 18 sany Mukaddes Ýazgylar okuwyny geçirýärdim. Okuw geçýän adamlaryň durmuşynyň özgerýändigini görüp, men uly şatlyk tapýardym! Indi men öň durmuşymda nämäniň ýetmeýändigine düşündim — Hudaýyň Patyşalygyny birinji orunda goýsaň, uly kanagat tapyp bolýan ekeni. Eger men maddy zatlara kowalaşmagy maksat edinen bolsam, şeýle kanagat tapyp bilmezdim». Bruno Guapiarada öz zerurlyklaryny kanagatlandyrar ýaly nädip gazanç etdikä? Ol ýylgyryp, şeýle diýdi: «Gitarada saz çalmagy öwredýärdim». Hawa, oňa entegem sazanda diýse bolardy.

«MEN GALMALY BOLDUM»

Häzir 30 ýaşlaryndaky Marýana-da (5) Brunonyňky ýaly ýagdaýy başdan geçirdi. Ol aklawçy bolup işleýärdi. Oňa gowy hak tölense-de, durmuşdan kanagat tapmaýardy. Marýana şeýle diýýär: «Men özümi howanyň yzyndan ylgaýan ýaly duýýardym» (Wag. 1:17). Dogan-uýalaryň käbiri ony pioner gullugy barada oýlanmaga höweslendirdiler. Marýana bu teklip barada oýlanyp, joralary Býanka (6), Karolina (7) we Juliana (8) bilen öz öýlerinden müňlerçe kilometr uzaklykda Boliwiýanyň golaýynda ýerleşýän Barra-du-Burges şäherindäki ýygnaga kömek etmegi ýüregine düwdüler. Olar nähili üstünlik gazandy?

Marýana şeýle gürrüň berýär: «Men ol ýerde üç aý galmakçydym. Emma öýe gaýtmaly bolanymda, 15 adam bilen Mukaddes Ýazgylar okuwyny geçirýärdim. Elbetde, olara ruhy taýdan ösmäge kömek gerekdi. Şonuň üçin men olara öýe gaýtmalydygymy aýtmaga dözmedim. Men galmaly boldum». Şeýlelikde, dört uýa-da bir karara geldi. Marýananyň «täze işi» onuň durmuşyny manyly etdimi? Ol şeýle diýýär: «Men özümi bagtly duýýaryn, sebäbi adamlara durmuşyny özgertmäge kömek etmek üçin Ýehowa meni gural hökmünde ulanýar. Men wagtymy we güýjümi degerli zada sarp edýändigime örän begenýärin». Bu dört uýanyň duýgusyny Karolina şeýle beýan edýär: «Men gije başymy ýassyga goýanymda, özümi diýseň bagtly duýýaryn, sebäbi men özümi bütinleý Patyşalyk işine bagyş etdim. Men bar ünsümi Mukaddes Ýazgylar okuwyny geçýän adamlara kömek etmäge gönükdirdim. Olaryň ruhy taýdan ösýändigini görmek, gör, nähili ajaýyp! Men: “Rebbiň ýagşylygyny dadyp görüň!“ diýen sözleriň hakykatdygyna göz ýetirýärin» (Zeb. 34:8).

Dünýäniň dürli künjegindäki ýaş dogan-uýalaryň Patyşalyk baradaky hoş habary wagyz etmek üçin özlerini «meýletin» hödür edýändigini görende, Ýehowa diýseň begenýändir! (Zeb. 110:3; Sül. tym. 27:11). Şeýle yhlasly wagyzçylaryň ählisi Ýehowadan bol bereket alýarlar (Sül. tym. 10:22).