60 ýyldan bäri dowam edýän dostluk

Şol ýylyň fewral aýynda 122 sany pioner Gilead mekdebiniň 17-nji klasynda okamaga Saut-Lansinge (Nýu-Ýork ştaty) geldiler. Gelejekki missionerleriň arasynda Louell Terner, Uilýam (Bill) Kasten, Riçard Kelsi we Reýmon Templton dagylar hem bardy. Louell bilen Bill Miçigandandy, Riçard Aýowadan, Reýmon bolsa Kaliforniýadandy. Tizden olaryň dördüsi dostlaşdylar.

Çepden saga: Riçard, Louell, Reýmon we Bill Gilead mekdebinde dostlaşdylar

Takmynan bäş aý geçenden soň, bütindünýä baş edarada gulluk edýän Neýtan Norr doganyň çykyş etjekdigi barada talyplara bildiriş edildi. Şol güne hemmeler garaşýardy. Mundan birnäçe gün öň dört dost, eger mümkin bolsa, bile bir ýurtda gulluk etmek islegleriniň bardygyny aýdypdylar. Häzir olar nirä bellenjekdiklerini bilerlermi? Elbetde!

Norr dogan talyplaryň haýsy ýurtlara bellenendiklerini aýdyp başlanda, klasda oturanlaryň ählisi janlanyp ugrady. Ilki bilen, dört dost sahna çagyryldy. Olar örän tolgunýardy, emma bir ýerde gulluk etjekdiklerini bilip, uludan dem aldylar. Olary nirä bellärler? Haçanda Norr dogan olaryň Germaniýada gulluk etjekdikleri barada aýdanynda, synpdaşlary örän geň galdylar we uzak wagtlap el çarpdylar.

1933-nji ýylda Gitleriň goly astyndaky Germaniýada Hudaýa wepaly bolan Güwäçiler baradaky gürrüňler bütin dünýädäki Ýehowanyň Güwäçilerini haýran galdyrýardy. Ikinji Jahan urşundan soňra Ýewropadaky doganlara eşik we başga-da gerekli zatlaryň iberilendiginden talyplaryň köpüsi habarlydy. Germaniýadaky Hudaýyň halky iman, gaýduwsyzlyk, mertlik we Ýehowa bil baglamak babatda ajaýyp görelde galdyrdylar. Şonda Louell şeýle pikir etdi: «Indi şol mähriban dogan-uýalar bilen biziň hut özümiz tanyş bolarys». Dostlaryň nirä bellenendiklerini dogan-garyndaşlaryna jaň edip aýtmaga howlugandyklary geň galdyrmaýar!

GERMANIÝA BARÝAN ÝOLDA

1951-nji ýylyň 27-nji iýulynda «Houmlend» gämisi Ist-Riweriň (Nýu-Ýork ştaty) gämi duralgasyndan daşlaşyp, Germaniýa tarap 11 günlük ýola düşdi. Bu gämide dört dost hem bardy. Gilead mekdebiniň mugallymy we soňra Ýolbaşçylyk maslahatynyň agzasy bolan Albert Şrýoder olara nemesçe birnäçe söz öwredipdi. Bu dört dost gämidäki birnäçe nemes adamlary görüp, olardan nemes dilinde ýene-de käbir zatlary öwreneris öýdüp pikir etdiler. Ýöne ýolagçylar dürli şiwede gepleýärdiler, bu bolsa doganlaryň başyny çaşyrdy.

Ýokarda: Reýmon Patyşalyk gullugynyň mekdebini geçirýär

Doganlar gämide barýarkalar deňiz keseline uçradylar. Olar 7-nji awgustda, sişenbe güni irden Germaniýanyň Gamburg diýen ýerine gelip düşdüler. Urşuň tamamlanyna bary-ýogy alty ýyl bolupdy we onuň ýetiren zyýany mese-mälim görnüp durdy. Gözüniň görýän zatlaryna geň galyp, doganlar Wisbadene gidýän gijeki otla mündüler. Şol wagtlar filial Wisbadende ýerleşýärdi.

Doganlar çarşenbe güni irden birinji sapar Hans diýen ýerli Güwäçini gördüler. Onuň tüýs nemes ady bardy. Ol doganlary demir ýol duralgasyndan Beýtele getirdi we olaryň aladasyny etmegi dogumly gartaşan uýa tabşyrdy. Ol uýa iňlisçe ýekeje söz hem bilmeýärdi. Ýöne ol gaty gepleseň, bu kynçylygy ýeňip bolar öýden bolmagy ahmal. Emma uýa näçe gaty geplese-de, dört dost hiç zada düşünmeýärdi we tizden uýanyň özi-de, doganlar-da ýadady. Ahyry, filialda gulluk edýän Erih Frost dogan gelip, olar bilen iňlis dilinde mähirli salamlaşdy. Şonda doganlar özlerini has arkaýyn duýdular.

Riçard Wisbadendäki Beýtelde kanwertiň daşyna salgyny çap edýän maşynda işleýär

Bu dört dogan awgust aýynyň ahyrynda ilkinji sapar Frankfurt-na-Maýnede geçirilen «Arassa sežde» atly nemes kongresine gatnaşdylar. Kongrese gatnaşan adamlaryň iň ýokary sany 7 432 boldy. 2 373 adamyň suwda çokundyrylandygyny bilip, bu dört dostuň missioner bolmak yhlasy we wagyz etmek islegi has güýjedi. Ýöne birnäçe gün geçensoň, olar Norr dogandan özleriniň Beýtelde gulluk etmäge bellenendigini bildiler.

Reýmonda öň Amerikanyň Birleşen Ştatyndaky Beýtelde gulluk etmäge mümkinçiligi bolupdy, emma ol ondan el çekipdi. Sebäbi Reýmon bütin ýüregi bilen missioner bolmak isleýärdi. Riçard bilen Bill hem hiç haçan Beýtelde gulluk etmek barada oýlanmandylar. Emma wagtyň geçmegi bilen, olar bellenen ýerlerinde gulluk etmekden köp şatlyk tapdylar. Bu bolsa olary Ýehowanyň kimiň nirede gulluk etmelidigini hemişe gowy bilýändigine ynandyrdy. Şonuň üçin öz islegiňe däl-de, Onuň berýän görkezmesine eýermek has paýhaslydyr! Muňa ýürekden düşünen adam, Ýehowa nirede gulluk edip, nähili borjy ýerine ýetirse-de, özüni bagtly duýar.

«FERBOTEN!»

Beýtel maşgalasynyň köp agzalary amerikan doganlaryň gelenine örän begendiler. Sebäbi olarda indi iňlis dilinde gepleşmäge gowy mümkinçilik döräpdi. Ýöne bir gezek naharhanada, olaryň eden arzuwy puç boldy. Frost dogan özüne mahsus bolan ruhubelentlik äheňde, nemes dilinde örän möhüm zat barada aýdyp başlady. Beýtel agzalarynyň köpüsinden ses-seda çakmady. Olar ýüzlerini aşak salyp, bir nokada seredip galdylar. Täze gelenler Frost doganyň sözlerine düşünmeseler-de, olar gürrüňiň özleri barada gidýändigini aňdylar. Frost dogan gaty ses bilen: «FERBOTEN!» («Gadagan!») diýdi we ony nygtamak üçin batly sesi bilen ýene-de gaýtalap aýtdy. Şonda Amerikadan gelen doganlar özlerini oňaýsyz ýagdaýda duýdular. Beýle ýagdaý ýüze çykar ýaly, olar näme etdilerkä?

Nahardan soň doga edildi we ähli dogan-uýalar öz otaglaryna tarap howlukdylar. Soňra bir dogan bize şeýle düşündirdi: «Bize kömek etmek üçin, siz nemes dilinde geplemegi öwrenmeli. Şol sebäpli Frost dogan tä siz nemes dilini öwrenýänçäňiz, siziň bilen iňlis dilinde gepleşmegi FERBOTEN, ýagny gadagan etdi».

Ýokarda: Frost dogan (sagda), Norr (çepde) we başga doganlar

Beýtel maşgalasynyň agzalary derrew görkezmä gulak asdylar. Doganyň söýgi bilen beren maslahatyny başda ýerine ýetirmek kyn bolsa-da, bu täze gelenlere diňe bir nemes dilini öwrenmäge däl, eýsem, berilýän maslahatyň köplenç peýda getirýändigine düşünmäge kömek etdi. Frost doganyň beren maslahaty Ýehowanyň guramasynyň bähbidi üçindi we doganlara bolan söýgüsini görkezýärdia. Wagtyň geçmegi bilen, dostlaryň dördüsi-de, ol dogany örän gowy gördüler!

DOSTLARDAN NÄME ÖWRENSE BOLÝAR

Hudaýdan gorkýan bu dostlardan biz Ýehowa bilen dostlukly gatnaşygymyzy berkitmäge ýardam edýän köp zatlary öwrenip bileris. Bu dört dost Hudaýa wepaly ençeme nemes dogan-uýalardan we biri-birinden köp zatlary öwrendiler. Riçard şeýle düşündirýär: «Louell biraz nemes dilini bilýärdi we oňa bu dili öwrenmek aňsatdy. Bize bolsa kyn düşýärdi. Şeýle-de Louelliň ýaşy bizden uludy. Şol sebäpli dil babatda sorag dörände we görkezme gerek bolanda, biz derrew oňa ýüz tutardyk». Reýmon şeýle ýatlaýar: «Germaniýada gulluk edenimize bir ýyl bolanda, biz ilkinji dynç alyş günlerimizi Şweýsariýanyň daglyk obasynda geçirdik, sebäbi şweýsariýaly bir dogan bize öýüni hödürläpdi. Meniň begenjimiň çägi ýokdy! Iki hepdeläp dostlaryň bilen bile bolmak we nemes dilinde geplemegi alada etmän dynç almak, diýseň gowudy! Ýöne men Louelliň bardygyny unudypdyryn. Ol her gün irden gündeki aýady we oňa degşli düşündirişi nemes dilinde okamagy hem-de pikir alyşmagy bizden berk talap edýärdi. Ol örän tutanýerlidi! Emma biziň ýürekden aladamyzy edýän adamyň berýän görkezmesi bilen käte ylalaşmasak-da, oňa eýermelidigi babatda özümize gymmatly sapak edindik. Bu prinsip bize köp ýyllaryň dowamynda kömek etdi we teokratik görkezmä tabyn bolmak bize aňsat boldy».

1952-nji ýylda Şweýsariýada dynç alyş günleri

Dört dost Filipililer 2:3-däki: «Başgalary özüňizden üstün saýyp, pespäl boluň» diýen sözlere eýerip, biri-biriniň güýçli taraplaryny gymmat saýmagy öwrendiler. Meselem, käbir işleri Billiň gowy başarýandygyny dostlaryň ählisi boýun alýardy. Doganlar oňa hormat goýýardylar we köplenç şeýle işleri oňa tabşyrýardylar. Louell şeýle ýatlaýar: «Haçanda belli bir karara gelmek ýa-da gowy däl habary aýtmak babatda kyn meseläni çözmeli bolanda, biz Bille ýüz tutýardyk. Ol iň kyn ýagdaýlardan hem gowy baş alyp çykýardy. Elbetde, biz hem şeýle edip bilerdik, ýöne bize batyrgaýlyk we ukyp ýetmeýän ýalydy».

BAGTLY NIKALAR

Dört dost yzly-yzyna öýlenmek kararyna gelýärler. Olaryň dostlugy Ýehowa bolan söýgä we doly wagtly gulluga esaslanýardy. Şol sebäpli olar durmuşda Hudaýa gulluk etmegi birinji orunda goýýan uýalardan özlerine gelinlik gözleýärdiler. Doly wagtly gulluk olara bermegiň almakdan has köp şatlyk berýändigine we Patyşalyk işleriniň öz arzuw-islegleriňden has wajyp bolmalydygyna düşünmäge kömek etdi. Şonuň üçin olar doly wagtly gulluk edýän uýalara öýlendiler. Şeýlelikde, dört sany bagtly maşgala döredi.

Eger dostluk ýa-da maşgala gatnaşyklary Ýehowa bolan söýgä esaslansa, olar, hakykatdan-da, berk bolar (Wag. 4:12). Bill bilen Reýmonyň aýaly aradan çykan hem bolsa, olar wepaly ýanýoldaşyň nähili şatlyk we goldaw berýändigini gördüler. Louell bilen Riçard häzirem maşgalasy bilen bagtly ýaşaýarlar. Bill soňra ýene-de öýlendi. Ol akyldarlyk bilen özüne gelinlik saýlandygy üçin, doly wagtly gullugyny dowam edýär.

Soňky ýyllarda dostlar dürli ýurtlarda: Germaniýada, Awstriýada, Lýuksemburgda, Kanadada we Amerikanyň Birleşen Ştatlarynda gulluk etdiler. Şol sebäpli olar öz isleýişleri ýaly, köp wagtyny bile geçirip bilmediler. Ýöne olar uzak aralykda ýaşasalar-da, biri-biri bilen habarlaşyp durardylar. Olar alýan bereketlerine bile şatlanýardylar, hasrat çekenlerinde bile aglaýardylar (Rim. 12:15). Elbetde, şeýle dostlaryň gadyryny bilmeli we olara minnetdar bolmaly. Olar — Ýehowanyň beren gymmatly sowgady (Sül. tym. 17:17). Şu günler hakyky dost tapmak örän kyn! Emma her bir mesihçi özüne ençeme dost tapynyp biler. Ýehowanyň Güwäçileri hökmünde, biz dünýäniň dürli künjeginde ýaşaýan dogan-uýalar bilen, iň esasy-da, Ýehowa Hudaý we Isa Mesih bilen dostlaşýarys.

Bu dört dost hem beýlekiler ýaly köp zatlary, ýagny ýanýoldaşyňy ýitirmek hasratyny, agyr kesel sebäpli döreýän kynçylyklary, garry ata-enesiniň aladasyny etmegi, doly wagtly gulluk edýän döwri çagalaryny terbiýelemek kynçylygyny, täze berilýän teokratik borçlar sebäpli döreýän aladalary başdan geçirdiler. Indi bolsa, olar garrylyk çagynda gitdigiçe köpelýän kynçylyklara duçar bolýarlar. Ýöne olar öz tejribesinden dostlaryň biri-birinden uzakda ýaşasalar-da, Ýehowany söýmäge we ähli kynçylyklaryň hötdesinden gelmäge birek-birege kömek edýändigine düşündiler.

EBEDI DOSTLUK

Louell, Reýmon, Bill we Riçard özlerini ýaş wagtlary Ýehowa bagyş etdiler. Şonda olar 18, 12, 11 we 10 ýaşlaryndady. Haçanda olaryň ýaşy 17-den 21 aralygy bolanda, ählisi doly wagtly gulluga başlady. Olar Wagyzçy 12:1-däki: «Juwanlygyňda... özüňi Ýaradany ýatla» diýen masalahata eýerdiler.

Eger siz ýaş dogan bolsaňyz we sizde doly wagtly gulluk etmäge mümkinçilik bar bolsa, onda Ýehowanyň çakylygyny kabul ediň. Şonda siz Onuň merhemeti bilen, bu dört dost ýaly, etrap, welaýat ýa-da filiallara seredýän gözegçi bolup, Beýtelde, şeýle-de filialyň komitetinde gulluk edip, Pionerler we Patyşalyk gullugynyň mekdebinde öwredip, uly hem kiçi kongreslerde doklad bilen çykyş edip, köp şatlyk taparsyňyz. Bu dört dogan edýän gullugynyň on müňlerçe adamlara peýda getirendigine örän begenýärler! Olar ýaş wagtlary Ýehowa bütin ýüregi bilen gulluk etmek üçin, Onuň söýgüden doly çakylygyna seslenendikleri sebäpli şeýle ajaýyp üstünlikleri gazanyp bildiler (Kol. 3:23).

Çepden saga: Riçard, Bill, Louell we Reýmon 1984-nji ýylda Zeltersdäki täze filial bagyş edilende duşuşdylar

Şu günler Louell, Riçard we Reýmon ýene-de bile Zeltersdäki (Germaniýa) filialda gulluk edýärler. Gynansak-da, 2010-njy ýylda Bill aradan çykýar. Ol Amerikanyň Birleşen Ştatlarynda ýörite pioner bolup gulluk edýärdi. Ölüm — dört doganyň 60 ýyla golaý dowam edip gelýän dostlugyň bagyny üzdi! Ýöne biziň Hudaýymyz Ýehowa hiç haçan dostlaryny unutmaýar. Onuň Patyşalygynyň ýolbaşçylygy astynda, her bir mesihçiniň ölüm sebäpli kesilen dostlugynyň dikeldiljekdigine şübhelenmän bileris.

Ölmeziniň öň ýany Bill şeýle ýazýar: «Bütin 60 ýylyň dowamynda dostlukly gatnaşygymyzda ýüze çykan erbetlik meniň ýadyma düşenok. Biziň dostlugymyz meniň üçin hemişe gymmatlydy». Bill täze dünýäde olaryň dostlugynyň dowam etjekdigini göz öňünde tutup, şeýle diýdi: «Bu entek başlangyjydyr».