Hudaý Ybraýym bilen äht baglaşýar

TUPANDAN soň, takmynan 350 ýyl geçipdi. Ybraýym pygamber gülläp ösen Ur şäherinde, häzirki Yrakda ýaşaýardy. Ybraýym berk imanly adamdy. Emma onuň imany synalmalydy.

Ýehowa Hudaý Ybraýyma dogduk mekanyny goýup, keseki ýurda Kengana gitmegi buýurýar. Ybraýym ikirjiňlenmän gulak asýar. Ol aýaly Sarany, doganoglany Luty we hyzmatkärleriniň köpüsini öz ýanyna alyp, uzak ýola düşýär. Ol Kengana baryp, çadyr dikýär. Ýehowa Hudaý Ybraýym bilen äht baglaşyp, ondan beýik millet döretjekdigini, ýer ýüzündäki ähli milletleriň ondan pata aljakdygyny we onuň nesilleriniň Kengan ýurduny eýelejekdigini wada berýär.

Ybraýym bilen Lutuň ownuklyirili mallary juda köpelýär. Ybraýym ak ýürekden Luta islän ýerini saýlamaga rugsat berýär. Lut mes toprakly Iordan jülgesini saýlap, Sodom şäheriniň golaýynda ýaşap başlaýar. Emma Sodomyň ýaşaýjylary ahlaksyzdy we Ýehowa Hudaýa garşy agyr günä edýärdiler.

Ýehowa Hudaý Ybraýyma onuň neslini asmandaky ýyldyzlar kimin sansyz-sajaksyz etjekdigini wada berýär. Ybraýym Hudaýa ynanýar. Emma Ybraýymyň söýgüli aýaly Sara önelgesizdi. Ybraýym 99, Sara bolsa 90 ýaşlaryndaka, Hudaý olara oglunyň boljakdygyny aýdýar. Hudaýyň aýdyşy ýaly, Sara Yshagy dogurýar. Ybraýymyň başga-da çagalary bolýar, ýöne Eremde wada edilen Halasgär Yshagyň neslinden dogulmalydy.

Lut we onuň maşgalasy Sodomda ýaşaýardy. Ol ýeriň ýaşaýjylary ahlaksyzdy, emma Lut dogry adamdy. Ýehowa Hudaý Sodomy weýran etmek üçin höküm çykarýar. Ony Luta duýdurmak üçin öňünden perişdelerini ýollaýar. Perişdeler Luta we onuň maşgalasyna yzlaryna garaman Sodomdan gaçmagy tabşyrýar. Soňra Hudaý Sodoma otly kükürt ýagdyryp, onuň golaýyndaky Gomora şäheriniň hem ýaşaýjylaryny ýok edýär. Lut we onuň iki gyzy halas bolýar. Emma Lutuň aýaly galdyran emlägine gynanyp, yzyna seredýär. Ol gulak asmandygy üçin ölýär.

Gelip çykyş 11:10—19:38-nji aýatlaryna esaslanýar.