Müneçjimler Isany görmäge gelýärler

Gündogardan birnäçe adam gelýär. Olar müneçjimler, ýagny ýyldyzlary öwrenip, olaryň durşy boýunça başgalaryň ykbalyny kesgitleýän adamlar (Işaýa 47:13). Müneçjimler heniz gündogardaka, bir «ýyldyzy» görýärler we ony yzarlap, ýüzlerçe kilometr ýol sökýärler. Ýöne olar Beýtullahama däl-de, Iýerusalime gelýärler.

Müneçjimler Iýerusalime gelende: «Ýehudylaryň patyşasy bolmaly oglan nirede? Biz Gündogarda onuň ýyldyzyny görüp, oňa tagzym etmäge geldik» diýýärler (Matta 2:1, 2).

Iýerusalimiň patyşasy Hirodes muny eşidip, gaty howsala düşýär. Ol uly ruhanylary we başga-da dini ýolbaşçylary ýanyna çagyryp, olardan Mesihiň nirede dogulmalydygyny soraýar. Olar Mukaddes Ýazgylara salgylanyp: «Beýtullahamda» diýip jogap berýärler (Matta 2:5; Mika 5:2). Şonda Hirodes müneçjimleri çagyrdyp, olara: «Gidiň-de, çagany gowuja gözläň. Ony tapsaňyz, maňa habar beriň, sebäbi menem oňa tagzym edesim gelýär» diýýär (Matta 2:8). Aslynda, Hirodes çagany öldürmek isleýärdi.

Müneçjimler Hirodesyň ýanyndan gaýdansoň, Gündogarda gören «ýyldyzy» olara ýol görkezip başlaýar. Ol adaty ýyldyz däldi we olara ýörite barmaly ugruny görkezýärdi. Ýyldyz tä Ýusup bilen Merýemiň ýaşaýan ýerine gelip durýança, müneçjimler onuň yzyna düşýärler.

Müneçjimler öýe girende, Merýem bilen ogly Isany görýärler. Olar Isa tagzym edip, oňa altyn, ladan, mirra sowgat berýärler. Soňra Hirodesiň ýanyna dolanmakçy bolanlarynda, Hudaý olaryň düýşüne girip, muny etmezligi tabşyrýar. Şol sebäpli olar öz ýurduna başga ýol bilen gaýdýarlar.

Siziň pikiriňizçe, müneçjimlere ýol görkezen «ýyldyzy» kim iberdikä? Ýadyňyza düşýän bolsa, ýyldyz olary göni Isanyň ýanyna Beýtullahama getirmändi. Gaýtam, Isany öldürmekçi bolýan Hirodes patyşanyň ýanyna Iýerusalime alyp gelipdi. Eger Hudaý müneçjimleri Isanyň ýaşaýan ýerini Hirodese aýtmazlygy duýdurmadyk bolsady, ol, dogrudan-da, çagany öldürerdi. Hawa, muny Hudaýyň duşmany Şeýtan etdi. Ol Isany öldürmek isleýärdi we ýyldyzy ulanyp, niýetini amala aşyrmakçydy.